I le 2 Nifae 2, na aoao ai e Liae lona atalii o Iakopo i le pogai ua tuuina ai e le Tama Faalelagi Lana fanau i luga o se lalolagi e i ai puapuaga, faanoanoa, agasala, ma le oti. Ina ia fesoasoani ia Iakopo ia malamalama i le faamoemoega o le olaga i le tino, sa ia faamalamalama atu i ai aoaoga faavae autu o le ata o le faaolataga—e aofia ai le faitalia, le Pau o Atamu, ma le Togiola a Iesu Keriso. O le suesueina o upumoni o loo aoaoina i le 2 Nifae 2 e mafai ona fesoasoani e te talisapaia atoatoa ai le ala ua faatoilalo ai e le Togiola a Iesu Keriso ia aafiaga o le Pau ma mafai ai e i tatou taitoatasi ona fai filifiliga o le a taitai atu ai i tatou i le ola e faavavau.
Ua aoao mai Liae e uiga i le Pau o Atamu ma le Togiola a Iesu Keriso
Mafaufau i nisi o luitau sa fetaiai ma oe talu ai nei. Pe na e mafaufau ea pe aisea ua i ai i le olaga ni luitau faapena? A o e faitau i le 2 Nifae 2:1, atonu e te manao e faailoga upu po o fasifuaitau na faaaoga e Liae e faamatala ai uluai tausaga o Iakopo. Ona faitau lea o le 2 Nifae 2:2, ma faailoga po o le a le mea na folafola atu e Liae ia Iakopo o le a tupu mai ona puapuaga. O se tasi uiga o le upu faapaiaina o le ia faamamalu po o le faapaia. E foliga mai o loo folafola atu e Liae ia Iakopo o le a faamamalu e le Alii ia tofotofoga a Iakopo mo lona manuia faaiu.
Sa aoao e Liae ia Iakopo e uiga i le alagatatau o le Pau o Atamu ma lo tatou manaomia o le Togiola a Iesu Keriso i le fuafuaga a le Tama Faalelagi. Sa manao o Ia ia iloa e Iakopo o le Pau ma le Togiola ua mafai ai e i tatou ona faaaoga o tatou faitalia ina ia mafai ona tatou tuputupuae ma alualu i luma agai atu i le ola e faavavau. Faitau le 2 Nifae 2:15–18, ma tuli tali pupuu i fesili nei:
O le a le mea na tuuina atu e le Atua mo Atamu ma Eva i le Faatoaga o Etena na mafai ai ona la’ua faaaogaina o laua faitalia? (Tagai i le 2 Nifae 2:15–16.)
O le a le mea sa sailia e Satani i le Faatoaga o Etena? (Tagai i le 2 Nifae 2:17–18.) O faapefea ona e vaaia le tulitulia e Satani o lena lava faamoemoega e tasi i aso nei?
Tusi le siata o loo i lalo i lau api talaaga mo le suesueina o tusitusiga paia. Suesue i le 2 Nifae 2:19–25, ma ta’u mai po o a taunuuga semanu e i ai pe ana faapea e le aai Atamu ma Eva i le fua o le laau faasāina ma pauu ai, faapea foi ma taunuuga na tulai mai ai ona o le Pau.
A uma ona faatumu le siata, mafaufau pe aisea ua avea ai le Pau o Atamu ma Eva o se vaega taua o le fuafuaga o le fiafia a le Tama Faalelagi.
A faapea ua ta’u atu e se uo ia te oe e faapea na fai e Atamu ma Eva le mea sese o le aai i le fualaau faasaina. I le faaaoga ai o mea ua e aoaoina i le 2 Nifae 2:19–25, tusi se parakalafa i lau api talaaga mo le suesueina o tusitusiga paia e faamalamalama ai le mafuaaga na alagatatau ai le Pau i le fuafuaga a le Tama Faalelagi mo lo tatou faaolataga.
E ui o le Pau o Atamu ma Eva na tatala ai le ala mo i tatou e alualu ai i luma, ae na faapea foi ona oo mai ai ma isi taunuuga. A o le’i oo i le Pau, sa i ai Atamu ma Eva i le afioaga o le Atua i le Faatoaga o Etena; ina ua uma ona aai i le fua o le laau faasāina, sa tatau ai loa ona la tuua Lona afioaga.
Faitau le 2 Nifae 2:5, ma faailoa le fasifuaitau o loo faaalia ai le vavaeeseina o Atamu ma Eva mai le Atua ina ua mavae le Pau. O le “tulafono faaletino” e faatatau i tulafono faaletino lea na oo mai o se taunuuga o le Pau. O lea la, o le “vavae ese” e tusa ai ma le “tulafono faaletino” e faatatau lea i le tulaga faalelalolagi i luga o le fogaeleele lea tatou te maua o ni suli o Atamu ma Eva. Ona o nei tulafono o lea ua tatou vavaeese ai faaletino mai le afioaga o le Atua ma [tatou] oo i faanoanoaga, tiga, puapuaga, ma le oti faaletino. O le “vavae ese” e tusa ai ma le “tulafono faaleagaga” e faatatau i le vavaeese mai le afioaga o le Atua ona o a tatou agasala.
Mafaufau loloto pe na faapefea ona e aafia patino i nei taunuuga o le Pau e ala i le manatunatu i fesili nei:
O a ni puapuaga, tiga, ma ni faanoanoaga ua e oo i ai i lenei olaga?
O ai se tagata e te iloaina ua maliu? O le a se aafiaga o le maliu o lenei tagata ia te oe?
O le a se taimi na e lagonaina ai le vavaeese faaleagaga mai le Atua?
A o e faitau i le 2 Nifae 2:6–10, atonu e te manao e faailoga upu po o fasifuaitau autu e faaalia ai e ala i le Togiola, ua togiola ai e Iesu Keriso i tatou mai aafiaga o le Pau ma ofoina mai le faaolataga mai a tatou agasala. I le 2 Nifae 2:9–10, o le upu puluvaga o lona uiga o le faia o se mea mo le manuia o se isi.
A o aoao e Liae ia Iakopo e uiga i le Pau o Atamu ma mea faafeagai tatou te oo i ai i le olaga nei, sa ia faamamafaina ia taunuuga lelei o le Pau mo tagata uma.
Tali fesili nei, i lau api talaaga mo le suesueina o tusitusiga paia:
Mai mea ua e aoaoina e uiga i le Pau, e faapefea ona aumai ai le olioli i tagata?
O le a se taimi sa e maua ai le olioli ona o taunuuga lelei o le Pau?
Ua aoao mai Liae e uiga i le faitalia ma taunuuga o a tatou filifiliga
Mafaufau i se filifiliga taua sa tatau ona e faia lata mai nei, ma o a ni taunuuga mo se taimi mamao e ono i ai i lena filifiliga. Sa aoao atu e Liae i ona tagata le matuai taua o le faitalia i le ata o le faaolataga a le Tama Faalelagi. Ina ia fesoasoani ia e malamalama ua tatou saoloto e filifili le saolotoga ma le ola e faavavau po o le faatagataotaua ma le oti (tagai 2 Nifae 2:27), faauma le gaoioiga o loo i lalo.
Tusi faamatalaga taitasi nei mai le Mo le Malosi o le Autalavou ([tamaitusi, 2011], 2–3) i lau api talaaga mo le suesueina o tusitusiga. Ona, a o e faitau i fuaiupu taitasi i le 2 Nifae 2:11–18, 26–29, taofi ae tusi le numera o le fuaiupu pe a uma ia le faamatalaga po o faamatalaga e te manatu na te lagolagoina. E tatau ona tusi ia numera o fuaiupu taitasi pe a uma se faamatalaga se tasi. E ono sili atu ma le faatasi ona faaaoga se faamatalaga i se fuaiupu, ma e ono faatatau foi se fuaiupu i se faamatalaga e sili atu i le tasi. O se faataitaiga, tusi se fuaiupu mo le faamatalaga muamua—o se upumoni e tasi na aoao mai e Liae i le 2 Nifae 2:16 o le, ua tuuina mai ia i tatou le tomai e galulue/faatino ai mo i tatou lava.
“Ua tuuina mai e le Tama Faalelagi ia oe le faitalia, o le tomai e filifili ai le sa’o mai le sese ma galue ai mo oe lava.” 2 Nifae 2:16
“A o i ai iinei i lenei lalolagi, ua tofotofoina ai oe e iloa ai pe o le a e faaaogaina lou faitalia e faaali atu ai lou alofa i le Atua e ala i le tausia o Ana poloaiga.”
“E ui ina e saoloto e filifili lau lava ala o faatinoga, ae e te le saoloto e filifili ia taunuuga”
“O filifiliga … leaga e faatuai ai lou alualu i luma ma taitai atu ai i le lototiga ma le faanoanoa.”
“O filifiliga amiotonu e taitai atu ai i le fiafia tumau ma le ola e faavavau.”
Faitau le 2 Nifae 2:26–27. O a mea e te saoloto e filifili? Faitau le 2 Nifae 2:28, ma faailoga po o le a se isi mea ua tuuina mai e le Atua ia te oe e fesoasoani e te “filifilia ai le ola e faavavau.” Mafaufau loloto i filifiliga ua e faia i lou lava olaga e faaalia ai ua e filifilia le ola e faavavau.
Galue e tauloto le 2 Nifae 2:27, o se fuaiupu o le mau tauloto. Faitau i ai mo ni nai taimi, ona tapuni lea o au tusitusiga paia ae faaaoga mataitusi muamua o upu taitasi o le fuaiupu ua lisiina i lalo e te taumafai ai e tauloto ia te oe lava pe i se tagata o le aiga. Toe fai le gaoioiga lenei seia oo ina e lagona ua e mauaina lelei.
O l m l, u s t e t m l l t; m u t m i t i l m u e t a m l t. M u l s e f l s m l o e f, e a i l P s o t u, p f l f m l o, e t m l f m l m o l t; o u s o i i p t u e p o i l.
I le faaaoga ai na o le mataitusi muamua o upu taitasi i le 2 Nifae 2:27 o loo i luga, tusi le fuaitau o le mau tauloto i lau api talaaga mo le suesueina o tusitusiga paia. E leai se mataautilo!
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:
Ua ou suesueina le 2 Nifae 2 ma faamaeaina lenei lesona i le (aso).
Fesili, mafaufauga, ma manatu faaopoopo ou te fia faasoa i lou faiaoga: