Iunite 5: Aso 1

1 Nifae 20–22

Folasaga

I le 1 Nifae 20–21, na sii mai e Nifae valoaga a le perofeta o le Feagaiga Tuai o Isaia, e ana tusitusiga na i ai i papatusi apamemea na toe auina atu Nifae ma ona uso i Ierusalema e aumai mai ia Lapana. Na aoao mai Isaia e ui lava e lei tausia e Isaraelu anamua a latou feagaiga, ae na alofa pea le Alii ia i latou ma valaaulia i latou e salamo ma o mai ia te Ia. A o suesueina nei mataupu, taulai atu i aoaoga a Isaia e uiga ia Iesu Keriso ma Lona finagalo e laveai Lona nuu.

1 Nifae 20

Ua aoaia e le Alii Isaraelu ma valaaulia i latou e foi mai ia te Ia

Pe mafai ona e mafaufau i se taimi na e fai ai se mea e le fetaui ma feagaiga na e faia po o tulaga faatonuina o le Ekalesia? O le a sou lagona e uiga i lau filifiliga? Faitau 1 Nifae 20:1–2 (ia “faalagolago” i le fuaiupu 2 o lona uiga o le faalagolago i luga). O ai na saunoa i ai Isaia? O Ai le “Aiga o Iakopo”?

I le Feagaiga Tuai, o Iakopo o le atalii o Isaako ma o le atalii o le atalii o Aperaamo. Na tuuina atu ia te ia le suafa Isaraelu e le Alii (tagai Kenese 32:28). “O le Aiga o Isaraelu” e faatatau i ona tupuaga ma o nisi taimi e taua o le “aiga o Iakopo.” E faatatau foi i soo se tasi e talitonu moni ia Iesu Keriso. (Tagai Taiala i Tusitusiga Paia, “Isaraelu”; tagai foi Bible Dictionary, “Israel, Kingdom of.”) E pei lava o aso anamua, o i latou e osia feagaiga (e pei o le papatisoga) ma le Atua i aso nei ua taua o tagata o le feagaiga o le aiga o Isaraelu.

Suesue 1 Nifae 20:3–4, 8, 18, ma vase lalo o upu ma fuaitau e faaali mai ai o le aiga o Isaraelu e lei faamaoni i le Alii. O le fuaitau “o lou ua o se uaua uamea, ma o lou muaulu o se apamemea” (1 Nifae 20:4) e faatusa i se tulaga ua taua soo e tusitusiga paia o le “ua maaa.” O le faamalamalamaga e tasi o lenei fuaitau o manu e pei o povi ma asini e faamalo o latou ua ina ia le mafai ai ona taitaia pe tosoina e o latou taitai. O le isi faamalamalamaga o tagata e le loto malie e ifo o latou ulu e ua maaa. E faapena, le aiga o Isaraelu na faamaaa o latou ua i le faamaualuga ma le amioleaga ma mumusu e taitaia e le Alii.

Ina ia malamalama atili i nei fuaiupu ma faatusa i o tatou aso, mafaufau pe faapefea e nei faamalamalamaga o le aiga o Isaraelu ona faamatalaina mea o fai e nisi tagata i aso nei.

Mafaufau loloto

Na aoao mai Peresitene Henry B. Eyring o le Au Peresitene Sili: “O le faitau, suesue, ma le manatunatu loloto e le tutusa. Tatou te faitau i upu ma mafai ona maua ai ni manatu. Tatou te suesue ma maua ai mamanu ma sootaga o mau. A tatou manatunatu loloto, ua tatou valaaulia faaaliga e ala i le Agaga. Ia te au, o le manatunatu loloto o le mafaufau lea ma le tatalo ou te faia pe a uma ona faitau ma suesue ma le faaeteete i tusitusiga paia” (“Auauna atu ma le Agaga,” Ensign po o Liahona, Nov. 2010, 60). O le suesueina o tusitusiga paia i se nofoaga filemu e mafai ai ona e mafaufau loloto i ai o le a fesoasoani ia te oe e lagona le uunaiga a le Agaga Paia.

A o e faitauina le 1 Nifae 20:9–14, 16, mafaufau loloto i mea ua aoaoina mai e nei fuaiupu e uiga i le Alii ma pe faapei o Ia.

1. Tusi ni tali pupuu i fesili nei, i lau api o talaaga mo le suesueina o tusitusiga paia:

   1. E ui lava sa tetee tagata i taimi ua tuanai, na faapefea ona tali atu le Alii ia i latou? Aisea?tagai 1 Nifae 20:9–11, 14.)

   2. O le a le mea na finagalo le Alii i Ona tagata o le feagaiga e fai? (Tagai 1 Nifae 20:12, 16.

Ua tatou aoao mai nei fuaiupu e valaaulia e le Alii i latou e lei usitai ia salamo ma toe foi mai ia te Ia. A o e faitauina le fuaitau lenei mai ia Peresitene Dieter F. Uchtdorf o le Au Peresitene Sili, vase lalo o le tasi pe sili atu o fuaitau e faamaonia lenei upu moni:

“[O Satani] e manao ia tatou lagona e le mafai ona faamagaloina i tatou (tagai Faaaliga 12:10). E manao Satani ina ia tatou mafaufau faapea a tatou agasala ua tatou pasia se “vaega tonu o le le toe foi mai”—e faapea ua fai si tuai ona sui lo tatou auala. …

Na afio mai Keriso e laveai i tatou.Afai ua tatou uia se auala sese, o le Togiola a Iesu Keriso e mafai ona aumaia ia i tatou le faamautinoaga o le agasala e le o se vaega tonu o le le toe foi mai.E mafai ona tatou toe foi saogalemu pe afai tatou te mulimuli i le fuafuaga faataatia a le Atua mo lo tatou faaolataga” (“Vaega Tonu o le Toe Foi Saogalemu,” Ensign po o Liahona, Me 2007, 99

1 Nifae 21:1–17

Ua vavalo Isaia o le a le galo i le Mesia Lona nuu o le feagaiga

I le 1 Nifae 21:1–13, na faamaumauina e Nifae se tasi o valoaga a Isaia ia Iesu Keriso, o le o le a avea ma Mesia. Keriso (o le upu Eleni) ma le Mesia (o le upu Eperu) e uiga tutusa “le ua Faauuina” po o “le ua Filifilia.” Na filifilia Iesu Keriso e avea ma Faaola o Isaraelu ma Nuuese foi.

A o e faitau 1 Nifae 21:6–13, faailoga i au tusitusiga paia fuaitau na e faamatalaina Iesu Keriso ma le mea o le a Ia faia i le avea ai ma Faaola o Isaraelu.

Ona o se taunuuga o a latou agasala, na tau mamao Isaraelu mai le Alii ma na latou faapea ua faagaloina ma tuulafoaiina i latou e Ia (tagai 1 Nifae 21:14). E ui lava ua latou lagonaina le tuulafoaia e le Alii, suesue 1 Nifae 21:14–16 mo le faamaoniga e alofa le Alii ia i tatou, ma o le a Ia le faagaloina i tatou. Atonu e te manao e faailoga soo se fuaitau i nei fuaiupu e taua ia te oe.

Na faamatalaina e Elder Jeffrey R. Holland o le Korama a Aposetolo e Toasefululua le faatumauina e le Faaola o manua o Lona faasatauroga o se faamaoniga o le a Ia le faagaloina lava i tatou: “O le a le faagaloina e Keriso le fanau ua ia laveaiina po o le feagaiga na ia faia ma i latou mo le faaolataga i Siona. O faamanatuga tiga o [Lana] tausia lelei ma feagaiga o faailoga o fao a Roma na togitogia i luga o alofilima o ona lima” (Christ and the New Covenant [1997], 84

2. Tusi ni tali pupuu i fesili nei, i lau api o talaaga mo le suesueina o tusitusiga paia:

   1. Aisea i lou manatu e faapea ai tagata i nisi taimi ua faagaloina i latou e le Alii?

   2. O le a le uiga i lou manatu o le togitogia i luga o alofilima o le Faaola? E faapefea ona fesoasoani lenei mea e te faafetaia ai le puapuagatia o le Faaola i luga o le satauro?

   3. O a aafiaga ua fesoasoani ia te oe e iloa ai e le o faagaloina oe e le Alii?

3. Vaai faalemafaufau e i ai sau uo na fai atu ua le toe lagona e ia le agavaa e sau ai i le lotu ona o ana agasala ua tuanai. Tusi i lau api talaaga mo le suesueina o tusitusiga paia, se tusi puupuu i lau uo, e faaaoga ai mea na e aoaoina mai 1 Nifae 20–21 ma le fuaitau a Peresitene Uchtdorf i le vaega suesue mo 1 Nifae 20.

1 Nifae 21:18–22:22

Ua faamalamalamaina e Nifae le valoaga a Isaia i le faataapeapeina ma le toe faapotopotoina o Isaraelu

Na faaaofia e Nifae se tasi o valoaga a Isaia e uiga i le faapotopotoina o Isaraelu i lana talafaamaumau. E maua i le 1 Nifae 21:18–26. I le 1 Nifae 22, na tuuina mai ai e Nifae lana lava faamalamalamaga ma faamatalaga o le valoaga a Isaia. A o e faitau 1 Nifae 22:4–12, vaavaai mo le faamalamalamaga a Nifae pe faapefea ona faapotopotoina Isaraelu i aso e gata ai.

Atonu e fesoasoani le iloa e faapea i le Tusi a Mamona o le upu “Nuuese” e masani ona faatatau i tagata e le oni tupuaga o Iuta. O le fuaitau “o se galuega ofoofogia” e faatatau i le Toefuataiina o le talalelei i aso e gata ai. Ia matau foi le ta’ua soo e Nifae o feagaiga—atonu e te manao e faailoga nei mea i au tusitusiga paia.

Na folafola mai e le Alii e toefuatai le talalelei ma toe faapotopotoina Isaraelu i aso e gata ai. Faailoga i au tusitusiga paia le mea o le a tupu ia Satani ona o le amiotonu o tagata a o e suesueina le 1 Nifae 22:17, 19–22, 25–28.

4. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

   Ua ou suesueina le 1 Nifae 20, 22 ma faamaeaina lenei lesona i le (aso).

   Fesili, mafaufauga, ma manatu faaopoopo ou te fia faasoa i lou faiaoga: