Mamona 7:1–8:11

Folasaga

Ina ua mavae le taua mulimuli i le va o sa Nifae ma sa Lamana, na tusi atu Mamona i e o le a tupuga mai i le lumanai i tagata o le Tusi a Mamona e uiga i le taua o le iloaina po o ai i latou ma po o le a le mea e tatau ona latou faia ina ia laveaiina ai.Faatasi ai ma le alofa tele i tupuaga o le lumanai a ona fili, na aoao atu ai e Mamona le taua o le mulimuli i le talalelei a Iesu Keriso ina ia “lelei ia te [outou] i le aso o le faamasinoga” (Mamona 7:10).Ina ua mavae le maliu o Mamona, sa tuua na o Moronae e tusi e uiga i le faaumatiaina o lona nuu.

Mamona 7

I le molimau mulimuli a Mamona, na ia apoapoai atu ai i tagata na totoe o sa Lamana ia talitonu ia Iesu Keriso ma mulimuli i Lana talalelei

Ata

Ua Faatofa atu Mamona i se Malo Maoae sa I Ai

I le Mamona e 6 ua e aoao ai e 230,000 sa Nifae na fasiotia i le taua mulimuli ma sa Lamana. Vaai faalemafaufau faapea sa faasaoina oe mai se taua maoae faapenei, ae e lei faasaoina au uo ma lou aiga. O le a sou lagona e uiga i tupuaga a tagata o e na fasiotia e e pele ia te oe ma faatoilaloina lou malo? Faitau le Mamona 7:1–4, ma tagai i le mea sa tusia e Mamona i tupuaga a sa Lamana.

Tali fesili nei, i lau api talaaga mo le suesueina o tusitusiga paia:
1. O le a se mea na manao Mamona ia iloa e sa Lamana ma o latou tupuaga?
2. E faapefea ona faatusa lenei mea i le auala e te manatu e te ono lagonaina e uiga i tupuaga a tagata o e na fasiotia au uo ma aiga i le tulaga o le vaai faalemafaufau?
3. O a uiga o le Faaola o loo e vaaia i upu a Mamona i ona fili?

Sa faaauau pea ona tusi atu Mamona i tupuaga a sa Lamana. Faitau le Mamona 7:5–7, ma faailoga ia le itiiti ifo ma le tolu ni upumoni na uunaia ai e Mamona ia tupuaga a sa Lamana ina ia talitonu i le Faaola, o Iesu Keriso.

Filifili se tasi o upumoni e uiga ia Iesu Keriso sa e mauaina, ma tusi i totonu o lau api talaaga mo le suesueina o tusitusiga paia pe na faapefea ona aafia lou olaga i le talitonu i aoaoga faavae.

Atonu na lagona e Mamona le talafeagai o le tusi atu o upu o le tausalaina i tagata sa Lamana lea sa fasiotia le toatele naua o lona nuu, ae ona o lona malamalama e uiga i le upumoni, sa ia tusi atu ai e aoaoina i latou e uiga i mea e tatau ona latou (ma tatou) faia ina ia mama ai i luma o le Atua i le taimi o le faamasinoga. Faitau le Mamona 7:8–10, ma faailoa mai le mea na molimau atu ai Mamona e tatau ona faia e le tagata. Atonu e te manao e faailoga le mea sa e mauaina i totonu o au tusitusiga paia.

O loo aoaoina mai e nei mau faapea ua ofoina atu e le Alii le faaolataga i tagata uma ma o le a togiolaina i latou o e talia ia mataupu faavae ma sauniga o Lana talalelei. Atonu e te manao e tusi lenei mataupu faavae i totonu o au tusitusiga paia. Ia matauina sa aoao mai Mamona faapea o le auala tatou te iloa ai le ala e ola ai i lenei mataupu faavae o la tatou suesuega lea i tusitusiga paia (tagai Mamona 7:8). Atonu o le a fesoasoani le iloaina o le fuaitau “i lenei talafaamaumau” o loo faasino lea i le Tusi a Mamona, ma o “le talafaamaumau foi lea o le a oo atu i Nuuese mai tagata Iutaia” e faasino lea i le Tusi Paia. E tutusa lava, o “lenei” i le Mamona 7:9 e faasino i le Tusi a Mamona, ma o “lena” o loo faasino i le Tusi Paia. Atonu e te manao e faailoga nei eseesega i totonu o au tusitusiga paia.

A o e faaiuina le Mamona 7, faaalu se taimi e mafaufau loloto ai i le faataitaiga a Mamona i le alofa mama ma le alofa faaKeriso i le tusiaina o se savali faapea o le faamoemoe ma le faamalosiauga i fanau a i latou o e na avea ma ona fili matautia.

Tusi i lau api talaaga mo le suesueina o tusitusiga paia, ni ou manatu e uiga i fesili nei: E mafai faapefea ona ou mulimuli i le faataitaiga a Mamona ma taulimaina isi, e aofia ai i latou o e atonu e le lelei le taulimaina o a’u, i se auala e atagia ai lo latou agavaa e faavavau?

Mamona 8:1–11

Ua tusi Moronae e uiga i le maliu o lona tama, le faaumatiaga o lona nuu, ma lona tuua ai na o ia

Mafaufau i se taimi sa na o oe ai. O le a sou lagona e uiga i le tuua na o oe? Mafaufau i le tuua na o oe mo le tele o tausaga.

Matau ia aso i aotelega o mataupu po o le pito i lalo o itulau i le Mamona 7 ma le 8. E fia tausaga na tea i le va o le taimi na tusia ai e Mamona ana upu mulimuli i le mataupu e 7 ma le taimi na amata ai ona tusitusi Moronae i papatusi i le mataupu e 8?

Ata

Ua faavauvau Moronae ona o Mamona

Faitau le Mamona 8:1–2, ma vaavaai po o le a le mea na tupu ina ua mavae le taua tele i Kumora. Ona faitau lea o le Mamona 8:3–9 ma faailoga fuaitau ia na faamatala ai tulaga na oo ia Moronae ina ua mavae le faaumatiaga o lona nuu. Mafaufau loloto po o le a sou lagona pe ana faapea sa e i ai i se tulaga faapea.

Mafaufau i se taimi na e lagona ai le tuua na o oe i ou talitonuga po o tulaga faatonuina. Pe na faateleina ea lou naunautaiga e mulimuli i le Faaola ma tausi Ana poloaiga i lena taimi, tumau i le mea e tasi, pe na faaitiitia? Aisea?

Toe tagai i le Mamona 8:1, 3 e saili ai le mea na filifili Moronae e fai e tusa lava po o a ona tulaga. O le faataitaiga a Moronae o loo faailoa mai ai e tusa lava pe o tuua na o oe, e mafai ona e filifili ina ia tumau faamaoni. Atonu e te manao e tusi le upumoni lenei i totonu o au tusitusiga paia.

E i ai isi e pei o Mamona, i le Tusi a Mamona na tumau faamaoni e tusa lava pe na tuua na o i latou. Sa tu na o Apinati ma molimau atu i luma o le Tupu o Noa ma ana faitaulaga (tagai Mosaea 12–17). O Alema sa na o ia lava le faitaulaga lea sa talitonu i upu a Apinati ma taumafai e puipui o ia (tagai Mosaea 17:1–4).

Sa faasoa mai e Elder Richard G. Scott le tala lenei e uiga i se alii talavou o le sa filifili e faamaoni e tusa lava pe tu na o ia:

“Manatu i se faataitaiga a [lenei] alii talavou. I le gasologa o tausaga sa ou maitauina ai le aoaoina o ia e ona matua mai lava i lona tamaitiiti ina ia ola mauai i poloaiga a le Atua. Na la faafaileleina o ia e ala i faataitaiga, o mataupu, faatasi foi ma isi o a laua fanau, i le upumoni. Sa laua uunaia le atiaeina o le amio pulea ma taulaga ina ia ausia ai sini aoga. Sa filifilia e lenei alii talavou le aau e faatumauina ai i lona tagata na uiga taua. O ana toleniga i le taeao po e manaomia ai le amio pulea ma taulaga. Ina ua mavae se taimi umi, sa oo ina matua maoae i lena taaloga.

“Ona oo mai ai lea o luitau—mo se faataitaiga, o se tauvaga aau faasiamupini i le Aso Sa. Mata o le a auai o ia? Mata o le a na ia fetuunaia lana tulafono o le le aau i le Aso Sa ina ia fesoasoani ai i lana au ia malo i le siamupini? E leai, e le mafai ona ia faamatuu atu i ai e oo lava i le uunaiga malosi mai ana uo. Sa lau ona pona, ma oo lava ina sauaina faaletino. Ae e lei ioe lava. O le teena o ia e ana uo, o lagona tuulafoaiina ma le mamafa o lagona, na oo mai ai le faanoanoa ma loimata. Ae e le mafai lava ona ioe. Na ia muai aoaoina le moni o le apoapoaiga a Paulo ia Timoteo, ‘O i latou uma foi o e nonofo ma le amio Atua ia Keriso Iesu e sauaina i latou’ (2 Tim. 3:12). I le tele o tausaga, o lenei faatulagana tumau o le ola amiotonu—na lalagaina mai le fia selau o faaiuga sao, o nisi na fai a o feagai ma luitau tetele—ua atinaeina ai se tagata malosi ma le talenia. O lea la, i le avea ai ma se faifeautalai, e talisapaia o ia e ana uo ona o lona tomai i le galuega, o lona malamalama i le upumoni, o lona faamaoni le maluelue ma lona naunautai e talai atu le talalelei. O se tasi na teena i se taimi muamua e ana uo ao lea ua avea ma se taitai faaaloalogia a ana uo” (“Faamuamua Mea e Tatau Ona Faamuamua,” Liahona, Iulai 2001, 6).

Faitau le Mamona 8:10–11, ma faailoa mai se auala e tasi na lagolagoina ai e le Alii Moronae ma Mamona (ao lei maliu o ia) i le vaitaimi o tulaga faigata sa fetaiai ma i laua. O le faamalosiauga lenei a Peresitene Thomas S. Monson e mafai ona fesoasoani ia te oe i lau filifiliga e tumau faamaoni e tusa lava pe na o oe:

“A o tatou ola ai mai lea aso i lea aso, e toetoe lava a muai iloaina o le a luitauina lo tatou faatuatua.Atonu o nisi taimi tatou te iloa ai le siosiomia o i tatou lava e isi ae o loo tutu pea o ni vaega toalaiti pe oo foi lava i le tutu na o i tatou e tusa ma mea ua taliaina ma mea e le taliaina.Pe i ai ea so tatou lototele a’ia’i e tutu mausali ai mo o tatou talitonuga, e tusa lava pe afai o le faia o lea mea e tatau ai ona tatou tutu na o i tatou? …

“… Tau ina ia tatou lototetele pea ma saunia e tutu mo mea ua tatou talitonu i ai, ma afai e tatau ona tatou tutu na o i tatou i le faagasologa, tau ina ia tatou faia ma le lototele, ua faamalosia e lo tatou iloa, e moni lava e le o tuua na o i tatou pe a tatou tutu faatasi ma lo tatou Tama o i le Lagi” (“Ia Lototele e Tu Na o Oe,” Ensign ma le Liahona, Nov. 2011, 60, 67).

Tusi i lau api talaaga mo le suesueina o tusitusiga paia, ni tali i fesili nei:
1. O ai se isi e te iloa o avea ma se faataitaiga o le tu faamaoni e tusa lava pe o tu toatasi?
2. E faapefea ona fesoasoani le faamatalaga a Peresitene Monson ia te oe e filifili ai ina ia tu faamaoni e tusa lava pe na o oe?
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Mamona 7:1–8:11 ma faamaeaina lenei lesona i le (aso).

Fesili, mafaufauga, ma manatu faaopoopo ou te fia faasoa i lou faiaoga: