Eteru 1–2

Folasaga

O le tusi a Eteru o le tuufaatasiga lea a Moronae o le talafaasolopito o sa Iareto. O sa Iareto o tagata ia sa o mai mai le Itulagi i Sisifo i le tele o seneturi ao lei oo mai le nuu o Liae. Ina ua mavae le Lolo i aso o Noa, o le toatele o e tupuga mai ia i latou ia na faasaoina na amata ona amioleaga. Sa taumafai se tasi o vaega o tagata e fausia se olo “ia oo lona tumutumu i le lagi” (Kenese 11:4). O le tala i le nuu o sa Iareto na amata i le fausiaina o le Olo o Papelu. Sa taulimaina e le Alii le faateleina o le amioleaga e ala i le faaeseeseina o le gagana masani ma i le faataapeapeina o tagata i le salafa o le lalolagi (tagai Kenese 11:5–8; Eteru 1:33). O lenei tala i le tusi a Eteru e amata ia Iareto ma lona uso o loo sailia le fesoasoani a le Alii ina ua Ia faaeseeseina gagana a tagata i le Olo o Papelu. Sa faasaoina e le Alii le gagana a Iareto, lona uso, ma o laua aiga ma uo ma taitai i latou e ui atu i le togavao e agai atu i le nuu na folafolaina. Ona faatonuina lea e le Alii le uso o Iareto e fausia ni vaa se valu e ave ai lona nuu i le isi itu o le vasa.

o alii o loo tautatala i le pito i lalo o le olo o Papelu

Eteru 1:1–33

Ua faamaumauina e Moronae le gafa o Eteru e oo ia Iareto i le Olo o Papelu

Ina ia fesoasoani ia te oe ia malamalama i le mea na sau ai le tusi o Eteru, iloilo le “Vaaiga Aoao o le Mosaea 7–24” mai le lesona o le Iunite 12: Aso 1 (itulau 116). Faasino i le faigamalaga 4, ma matau le mea sa maua e le nuu o Limae i lenei faigamalaga.

Tagai i le amataga o le tusi a Eteru, ma saili i le faamatalaga puupuu o le tusi i lalo o le ulutala. O lenei faamatalaga e faamalamalama ai le aumaia o le talafaamaumau a sa Iareto mai papatusi auro e 24 ia na maua e le nuu o Limae.

Ina ua faamaeaina e Moronae le talafaamaumau a lona tama, sa ia aveina le talafaamaumau a sa Iareto ma fatuina mai ai se tusiga puupuu e faaaofia i totonu o le Tusi a Mamona. Faitau le Eteru 1:1–4, ma tagai mo le mea sa fai mai Moronae na te lei faaaofiaina i totonu o lenei tusi e uiga i le talafaamaumau a sa Iareto. Ona faitau lea o le Eteru 1:5, ma tagai mo le vaega o le tala lea na faaaofiaina e Moronae i lana talafaamaumau. O le olo o loo faasino i ai i le Eteru 1:5 o le Olo lea o Papelu. E pei ona faamatalaina i le Eteru 1:33, sa “faaeseeseina” (faalemautonuina pe faaseseina) e le Alii ia gagana a tagata o e na saili e fau le olo ina ia le mafai ona malamalama le tasi i le isi, ma sa Ia faataapeapeina tagata i le lalolagi atoa.

E pei ona faamaumauina i le Eteru 1:6–33, sa tusia e se tagata e igoa ia Eteru le talafaamaumau a sa Iareto. Sa faamaumauina e Moronae ia tuaa o Eteru e toe oo i tua i se tagata e igoa ia Iareto, o le sa ola i le vaitaimi o le Olo o Papelu.

Eteru 1:33–43

Sa tatalo le uso o Iareto mo se fesoasoani, ma sa maua e tagata o lona aiga ma uo le alofa mutimutivale ma le taitaiga

Na i ai se taimi sa e i ai i se atunuu po o se eria lea e tautatala ai tagata i se gagana e te le malamalama ai? Mata o le a sou lagona pe afai e te le malamalama i le gagana o tautatala ai isi o loo siomiaina oe? Afai e mafai ona e pikiina ni nai tagata e fesootai atu i ai i lena tulaga, o ai e te filifilia? O lena tulaga na tupu i se tagata e igoa ia Iareto ma lona uso, faapea foi ma o laua aiga, o e na feola i le vaitaimi o le Olo o Papelu. Faitau le Eteru 1:33–37, ma vaavaai mo tagata o e na mananao Iareto ina ia mafai ona fesootai i ai. Ina ua uma ona maua e le uso o Iareto se folafolaga mai le Alii o le a le faaeseeseina la latou gagana (tagai Eteru 1:34–35), sa ia tatalo mo ana uo (tagai Eteru 1:36–37). E pei ona faailoa mai e le uso o Iareto, o se tasi o uiga o tagata faamaoni o le tatalo lea mo a latou uo ina ia maua ni faamanuiaga mai le Alii.

Sa faamanuiaina e le Alii aiga o Iareto ma lona uso ma a latou uo ina ia aua nei faaeseeseina la latou gagana. Ona fai atu lea o Iareto i lona uso ina ia tatalo i le Atua, ole atu ia te Ia po o fea e tatau ona o i ai o latou aiga. (Tagai i leEteru 1:38–40.)

Faitau le Eteru 1:40–43, ma faailoa mai faatonuga na tuuina atu e le Alii ia sa Iareto e taitaiina ai i latou i la latou faigamalaga. Aisea e te manatu ai sa taua ia Iareto ma lona uso le mulimuli i nei faatonuga mai le Alii?

Eteru 2:1–12

Ua amataina e sa Iareto la latou malaga atu i le laueleele na folafolaina

Faitau le Eteru 2:1–3 e iloa ai pe na faapei le tali atu a sa Iareto i faatonuga na tuuina atu ia i latou e le Alii e faatatau i le sauniuni e malaga atu i le laueleele na folafolaina (tagai i le Eteru 1:41–42). Ona faitau lea o le Eteru 2:4–6, ma tagai i le isi mea lea na tupu. Ia iloa, ona o le usiusitai o sa Iareto i faatonuga a le Alii, sa Ia tuuina atu ia i latou nisi faatonuga. Mafaufau loloto i faamanuiaga ma le taitaiga na mauaina e sa Iareto ona sa latou mulimuli i faatonuga a le Alii.

O aafiaga a sa Iareto ua tatou aoaoina ai le mataupu faavae lenei: A o tatou galulue ma le faatuatua i faatonuga ua tuuina mai ia i tatou e le Alii, e mafai ona tatou maua nisi taitaiga mai ia te Ia. Atonu e te manao e tusi le mataupu faavae lenei i au tusitusiga paia i talaane o le Eteru 2:6.

E mafai ona e mafaufau i se musumusuga po o se uunaiga sa e mauaina mai le Alii ao tatalo, suesue i tusitusiga paia, po o le auai atu i se sauniga Lotu? Ia mafaufau ai pea i lena musumusuga po o le uunaiga ao e faitau i le faamatalaga lenei mai ia Elder Richard G. Scott o le Korama a Aposetolo e Toasefululua e uiga i le tele o taimi tatou te maua ai tali i tatalo: “E seasea ona e mauaina se tali atoa [i le tatalo] i le taimi e tasi. O le a oo mai o ni fasimea i lea taimi ma lea taimi, e oo mai i ni vaega, ina ia faateleina ai lou mana. A mulimulita’ia fasimea taitasi i le faatuatua, o le a taitai atu ai oe i isi vaega seia oo ina e maua atoa le tali. O lena mamanu e manaomia ai lou faaaogaina o le faatuatua i le mana o lo tatou Tama e tali mai ai E ui o nisi taimi e matuai faigata lava, ae e taunuu i le matuai tuputupu a’e o le tagata lava ia.” (“Faaaogaina o le Meaalofa Faalelagi o le Tatalo,” Ensign po o leLiahona, Me 2007, 9).

Tusi i lau api talaaga mo le suesueina o tusitusiga paia le auala na e tali atu ai (po o le mafai ona tali atu ai) i uunaiga faaleagaga sa e mafaufau muamua ai. E mafai foi ona e faaaofia ai ia faamanuiaga sa e mauaina (po o le mafai ona mauaina) mai le faatinoina o lena uunaiga.

E pei ona faamaumauina i le Eteru 2:7–12, sa folafola atu e le Alii i le uso o Iareto afai latou te taunuu ma lona nuu i le laueleele o le folafolaga, e tatau ona latou “auauna atu ia te ia, le Atua moni ma toatasi nao ia, a leai o le a tafi ese i latou” (Eteru 2:8).

Eteru 2:13–15

Na aoaiina e le Alii le uso o Iareto mo le le valaau atu ia te Ia i le tatalo

Faitau le Eteru 2:13–15, ma tagai mo le mea na tupu ina ua taunuu atu sa Iareto i le vasa tele lea e vaelua ai ia laueleele. Sa taitaiina i latou i le vaomatua e le Alii ona sa latou faalogo i le Alii ma tausi Ana poloaiga. Ae peitai, ina ua mavae le latou tolauapiga i autafa o le vasa tele mo tausaga e fa, sa oo mai le Alii i le uso o Iareto ma aoaiina o ia mo le le tatalo.

Eteru 2:14–15 e fesoasoani ia i tatou ia aoao i nei mataupu faavae: E le fiafia le Alii pe a galo ia i tatou ona valaau atu ia te Ia i le tatalo. E finagalo le Alii ia tatou valaau soo atu ia te Ia i le tatalo.

Ao e faitau i le faamatalaga lenei mai ia Elder Donald L. Staheli, o le sa auauna atu o se tasi o Fitugafulu, mafaufau pe faafia ona e tatalo: “O tatalo faatauanau i aso taitasi e saili ai le faamagaloga ma le fesoasoani ma le taitaiga faapitoa e taua tele i o tatou olaga ma le faafaileleina o a tatou molimau. Afai tatou te faananati, tautu i upu, po o le faatalanoa, po o le galo ona faia a tatou tatalo, ua tatou matele atu lava i le le mauaina o le Agaga lea e matuai taua lava i le taitaiga faaauau pea lea tatou te moomia ina ia pulea lelei ai ia luitau o o tatou olaga . i aso uma” (“Faamautuina o a Tatou Molimau” Ensign po o le Liahona, Nov. 2004, 39).

Tali ia fesili nei i totonu o la oe lava api talaaga po o se fasi pepa.

O le a sou lagona e uiga i le fai soo o au lava tatalo?
O le a sou lagona e uiga i le faamaoni o au lava tatalo?
I au lava tatalo, o e lagonaina o e fesootai moni atu i le Tama Faalelagi? Aisea, pe aisea e leai ai?
Afai e mafai ona e faia se suiga se tasi o le a faaleleia ai au lava tatalo, o le a lena mea?

E pei ona faamaumauina i le Eteru 2:16, na salamo le uso o Iareto i ana agasala ma tatalo atu i le Alii mo tagata o lona aiga ma uo. Sa tau atu e le Alii ia te ia ua faamagaloina o ia ae e tatau ona ia faaauau pea i le amiotonu ina ia mafai ona taitai atu i le laueleele na folafolaina.

Eteru 2:16–25

Sa fausia e sa Iareto ni vaa e sopoia ai le vai tele e oo atu ai i le laueleele na folafolaina.

Mafaufau i se filifiliga patino taua o loo feagai ma oe pe atonu o le a feagai ma oe i le lumanai, e pei o le auala e taulima ai se faafitauli faaleaiga po o tulaga faaleagafesootai, pe faapefea ona lelei i le aoga, o ai e faaipoipo i ai, po o o le a se galuega e taulai atu i ai. Na e mafaufau e uiga i le auala atonu e tuu atu ai e le Alii ia te oe se taitaiga po o se fesoasoani i lena tulaga? A o e suesue i le faaiuga o Eteru 2, mafaufau loloto i le filifiliga sa e faailoa mai ma vaavaai mo mataupu faavae o le a fesoasoani ia te oe ina ia maua le lagolago a le Alii.

Faitau le Eteru 2:16–17, ma vaavaai mo le mea sa fetalai atu le Alii ia sa Iareto e fai ina ia agai ai i luma e oo atu i le laueleele o le folafolaga. Sa feagai le uso o Iareto ma ni faafitauli se tolu na mafua mai le mamanuina o vaa. Faitau le Eteru 2:18–19, ma faailoga ni faaletonu se tolu na ta’uina atu e le uso o Iareto i le Alii.

Ina ia fesoasoani ia te oe e vaai faalemafaufau atu i le mea sa e faitau i ai i le Eteru 2:16–19, tusi i totonu o lau api talaaga mo le suesueina o tusitusiga paia le mea e te manatu e foliga i ai vaa.

O le siata lenei o le a fesoasoani ia te oe ia iloa ai le auala na fesoasoani ai le Alii i le uso o Iareto i faafitauli o vaa. Suesue ia mau o tusitusiga paia i le siata, ona faaaoga lea o le faamatalaga e faatumu ai le koluma o le “Vaifofo i le Faafitauli” o le siata.

Mau o Tusitusiga Paia	Faafitauli o Vaa	Vaifofo o le Faafitauli
Eteru 2:20–21	Leai se ea
Eteru 6:4–9	Leai se foeuli
Eteru 2:22–3:6	Leai se malamalama

O le mea sa faia e le Alii ma le mea sa Ia finagalo e fai e le uso o Iareto sa eseese mo faaletonu taitasi. Mai faafitauli ma vaifofo taitasi, e mafai ona tatou aoao i se upumoni ese e uiga i le auala e fesoasoani mai ai ia i tatou le Alii pe a tatou manaomia se fesoasoani. Faatusatusa ia vaifofo sa e tusiina i le siata ma isi ia o loo i le lisi lenei:

Leai se ea (Eteru 2:20–21). Ina ia foia lenei faafitauli, sa tau atu e le Alii i le uso o Iareto le mea e tatau ona ia faia. Ona maua ai lea e le uso o Iareto le faatuatua e mulimuli ai i faatonuga a le Alii.

Leai se foeuli (Eteru 6:4–9). Ina ia foia lenei faafitauli, sa saunia e le Alii Lava Ia le tali i le faafitauli.

Leai se malamalama (Eteru 2:22–3:6). Ina ia foia lenei faafitauli, sa tuuina atu e le Alii nisi faatonuga i le uso o Iareto. Ona mafaufau ai lea o le uso o Iareto i se vaifofo o le faafitauli—e tusa ai ma faamatalaga sa ia maua—ma talosaga atu mo le faamaoniga ma le fesoasoani a le Alii i le faataunuuina.

O aafiaga o le uso a Iareto, ua tatou aoao ai i le mataupu faavae lenei: A o tatou taumafai e faia la tatou vaega e foia ai o tatou faafitauli, e mafai ona tatou mauaina le fesoasoani a le Alii. O le manatunatu i le filifiliga patino sa e mafaufau i ai i le taimi muamua, e faapefea i le iloaina o lenei mataupu faavae ona fesoasoani ia te oe ia maua le fesoasoaniga po o le taitaiga e faatatau i lenei filifiliga? O le a sou manatu i se mea atonu o loo faamoemoe mai le Alii ia te oe e fai i le faiga o lau filifiliga?

Tusi se parakalafa i totonu o lau api talaaga mo le suesueina o tusitusiga paia e faamatala ai le mea sa e aoaoina mai aafiaga o le uso o Iareto e uiga i le tatalo ma le mauaina o le fesoasoaniga ma le taitaiga a le Alii i lou olaga.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Eteru 1 2 ma faamaeaina lenei lesona i le (aso).

Fesili, mafaufauga, ma manatu faaopoopo ou te fia faasoa i lou faiaoga: