Iunite 21: Aso 3
Alema 53; 56–58
Folasaga
O Helamana ma le Taitaiau o Moronae sa tau ma sa Lamana i vaega eseese o le fanua. Sa auina atu e Helamana le tusi ia Moronae e faamatala ai taua a ana vaegaau ma sa Lamana ma faailoa atu lona to’a ma le faamalieina i le faatuatua tele o le 2,060 o au tau a taulelea Ona o le faatuatua ma le lotoa o nei toa o sa Nifae, na fesoasoani le Alii latou te manumalo i taua ma faamanuia i latou i le mautinoa ma le faamoemoe i taimi o o latou puapuaga.
Alema 53;–56
O vaegaau a Anetipa ma Helamana na faatoilaloina le vaegaau sili ona malosi a sa Lamana.
A o tau le Taitaiau o Moronae ma sa Lamana i se tasi itu o le nuu, sa taitai atu e Helamana lana vaegaau i le isi itu o le nuu. E aofia ai i lana vaegaau le 2,000 o alii talavou o tagata o Amona. O matua o nei alii talavou ua fai le tautoga e aua lava nei o latou toe sii taua i o latou fili, ae o o latou atalii sa le i faia le feagaiga, o lea e mafai ona latou fesoasoani i vaegaau a sa Nifae (tagai Alema 53:10–18).
-
Tusi le ata lenei i lau api talaaga mo le suesueina o tusitusiga paia. Faitau le Alema 53:18–21, ma vaavaai mo fasifuaitau o loo faamatala ai uiga ua atiaeina e alii talavou e 2,000 a o le i faia la latou tautua faa militeli. Lisi fasifuaitau ua e maua i lalo o le ulutala “Uiga na atiae a o le i faia le taua.” Atonu e te manao e faailoga nei fasifuaitau i au tusitusiga paia.
O Anetipa, o le taitai o le militeri o sa Nifae, sa itiiti lo latou fainumera nai lo le fili o sa Lamana a o ia ma lana vaegaau sa puipuia la latou vaega o le fanua. Sa fiafia Anetipa ina ua aumai e Helamana le tusa ma le 2,000 toa talavou e fesoasoani ia te ia (tagai Alema 56:9–10).
I la latou taua muamua ma le fili, sa taitaieseina e le 2,000 toa talavou ia le vaegaau malosi a sa Lamana, ma o le taitai o sa Nifae o Anetipa ua ia faatonu lana vaegaau e tuli tatao atu i le vaegaau a sa Lamana mai tua. Sa maua atu e le vaegaau a Anetipa le vaegaau a sa Lamana, o e na tau ma i latou. O au tau a taulelea, o e sa faaauau i luma, ua latou iloa ua le mulimuli mai sa Lamana ia i latou. Sa latou le iloa po ua malolo sa Lamana e faasese i latou e toe foi atu ina ia faaumatia i latou pe ua malolo sa Lamana ona ua maua i latou e vaegaau a Anetipa mai tua. O lea, sa le iloa ai e Helamana pe latou te toe foi i tua ma osofaia sa Lamana. (Tagai i le Alema 56: 29–43.)
Faitau le Alema 56:43–48, ma vaavaai mo fasifuaitau o loo faamatala ai uiga na faaalia e nei alii talavou i se taimi faigata o le taua. Lisi mea na e maua i lau api talaaga mo le suesueina o tusitusiga paia i lalo o le ulutala “Uiga na faaalia i le taimi o le taua.” Atonu e te filifili foi e faailoga nei fasifuaitau i au tusitusiga paia.
Suesue le Alema 56:49, 54–56 ia iloa ai le mea na tupu ina ua foi mai le 2,000 o taulelea talavou e tau ma sa Lamana. Vaavaai mo fasifuaitau o loo faailoa ai lenei upumoni: : Afai tatou te galulue i le faatuatua, e mafai ona tatou maua le malosi mai le Atua.
-
-
E mafai faapefea e le atiaeina o uiga o au tau a taulelea ona fesoasoani ia te oe e galue ai i le faatuatua pe a e feagai ma tulaga luitauina?
-
Faamatala se taimi na e ( po o se tasi e te iloa) galue ai i le faatuatua ma maua ai le malosi mai le Atua e taulimaina ai ma le manuia tulaga faigata.
-
Alema 57
Na toe faoa e vaegaau a Helamana aai o Anetipara ma Kumenae
Sa mafai e Helamana ma ana vaegaau ona faoa aai o Anetipara ma Kumenae mai ia sa Lamana. I le taimi lenei, sa maua ai e Helamana faamalosiauga i lana vaegaau. E faitau afe au tau mai le nuu o Sara’emila na faatasi atu i le vaegaau, e faapena le isi 60 o atalii o tagata o Amona (tagai Alema 57:1–12).
E le i umi talu ona maua e le vaegaau a Helamana le aai o Kumenae, na toe osofaia i latou e sa Lamana. Sa feagai le vaegaau a Helamana ma se faafitauli tele, lea na avea ai le au tau a taulelea e 2,060 ma malosiaga i le vaegaau atoa. Faitau le Alema 57:19–21 e maua ai ni uiga na faaalia e au tau a taulelea i lenei taua. Atonu e te manao e faaopoopo nei uiga i le lisi o “Uiga na faaalia i le taimi o le taua” i lau api talaaga mo le suesueina o tusitusiga paia.
-
-
O le a sou manatu i le uiga o le usiusitai i se poloaiga “ma le sa’o atoatoa”?
-
Aisea e te manatu ai o le usiusitai i upu a lo latou taitai ma le sa’o atoatoa na fesoasoani i au tau a taulelea e manumalo ai i la latou taua?
-
E faapefea e le usiusitai i poloaiga a le Alii ma le sa’o atoatoa ona fesoasoani ia te oe i le taua faaleagaga o loo feagai ma oe i lou olaga?
-
Mafaufau e tusi le mataupu faavae lenei i lau tusitusiga paia po o i lau api talaaga mo le suesueina o tusitusiga paia: A o tatou usiusitai i le Alii ma le sa’o atoatoa, o le a Ia faamalosia i tatou i taua ua ia i tatou i le olaga. Faitau le saunoaga lenei a Elder Russell M. Nelson o le Korama a Aposetolo a le Toasefululua, o le na faamatala mai le taua tele o le usiusitai i poloaiga a le Atua “ma le sa’o atoatoa”.
“O le a e fetaui i ni tagata o le a latou filifili po o le fea poloaiga latou te tausia ae le ano i isi poloaiga latou te filifili e soli. Ou te ta’ua lenei mea o le ‘ai filifili i poloaiga e usitai i ai. O lenei faiga o le ilo ma filifili o le a le manuia. O le a oo atu ai i le faanoanoa. Ina ia saunia e fetaiai ma le Atua, o lea e tausi ai e se tagata ia Ana poloaiga uma. E manaomia ai le faatuatua e usiusitai ai, ma o le tausia o Ana poloaiga o le a faamalosia ai lena faatuatua.
“O le usiusitai e mafai ona tafe mai faamanuiaga a le Atua e aunoa ma le tau taofiofia. O le a Ia faamanuia Ana fanau usiusitai i le saoloto mai le saisaitia ma le faanoanoa. Ma o le a Ia faamanuia i latou i le malamalama e sili atu.
“… O le usiusitai i poloaiga a le Atua o le a aumaia ai le puipuiga faaletino ma le faaleagaga” (“Faasaga Atu ma le Faatuatua i le Lumanai,” Ensign po o le Liahona, Me 2011, 34–35).
Faitau le Alema 57:25–27, vaavaai mo ni mafuaaga na tuuina atu ai e le Alii Lona mana e puipuia ai au tau a taulelea. O le a le mea na sili ona e fiafia i ai e uiga i au tau a taulelea i nei fuaiupu?
E tusa lava pe ua tatou amiotonu, o le a le mafai e le Atua ona puipuia pea i tatou mai faigata. E ui ina sa faasaoina au tau a taulelea mai le oti, sa manunua uma i latou (tagai Alema 57:25), ma o le toatele o isi sa Nifae amiotonu na fasiotia (tagai Alema 57:26). Ae peitai, o le a faamalosia pea e le Atua i tatou i taimi o faigata ma faamanuia i tatou i mea tatou te manaomia. Mulimuli ane, o le a Ia tuuina mai faamanuiaga e faavavau ia i latou uma o e usiusitai i Ana poloaiga.
Alema 58
Sa faatali vaegaau a sa Nifae mo mea na manaomia ona latou toe faoa lea o le aai o Maneti
E faaopoopo i taua sa o latou tau ai ma sa Lamana, sa feagai le vaegaau a Helamana ma se isi ituaiga o faigata. O a latou taua sa tauina e mamao ese mai Sara’emila, lea sa avea ma nofoaga autu o le malo o sa Nifae. Sa manumalo le vaegaau a Helamana i nisi o taua faigata tele, ae sa latou le i maua ni meaai, sapalai, ma ni fitafita faaopoopo na latou manaomia mai le malo. Sa latou le iloa pe aisea ua le lagolagoina ai i latou e le malo. (Tagai Alema 58:7–9.)
-
-
O a mea sa fai e sa Nifae ina ua latou feagai ma lenei tulaga faigata?
-
Na faapefea ona tali mai le Alii i a latou tatalo ma aioiga faamaoni?
-
E tusa ai ma le Alema 58:12, na faapefea ona fesoasoani faamautinoaga a le Alii ia Helamana ma lana vaegaau?
-
Tusi le mataupu faavae lenei i lau tusitusiga paia po o lau api talaaga mo le suesueina o tusitusiga paia: Afai tatou te liliu atu i le Atua i taimi o faigata, e mafai ona tatou maua le faamaoniga paia lena e mafai ona faamalosia ai lo tatou faatuatua ma aumaia ia i tatou le faamoemoe.
E ui i vaivaiga o lana vaegaau, sa mafai e Helamana ma ana au ona pu’ea le aai o Maneti (tagai Alema 58:13–41). Sa tuuina atu e Helamana le manuia uma a le vaegaau i le fesoasoani a le Alii (tagai Alma 58:37).
Sa faaauau pea ona maofa Helamana i le manuia o au tau a taulelea. Suesue le Alema 58:39–40, ma vaavaai mo upu po o fasifuaitau o loo faaalia ai auala sa totoa ai le au tau a taulelea i taimi o tulaga faigata. Mafaufau e faailoga upu ma fasifuaitau nei i au tusitusiga paia.
-
-
Ua ou suesueina le Alema 53; 56–58 ma faamaeaina lenei lesona i le (aso).
Fesili, mafaufauga, ma manatu faaopoopo ou te fia faasoa i lou faiaoga: