Iunite 26: Aso 4
3 Nifae 20–22
Folasaga
I le aso lona lua o Lana auaunaga i totonu o sa Nifaē, na toe tufatufaina atu e Iesu Keriso le faamanatuga i tagata. Na Ia molimau mai o aso e gata ai o le a faataunuu ai e le Tama Lana feagaiga e faapotopoto ia Isaraelu ma faamanuia malo uma o le lalolagi. Na ia faamalamalama mai foi o le oo mai o le Tusi a Mamona i aso mulimuli o le a avea ma faailoga ua faataunuuina e le Tama lenei feagaiga.
3 Nifae 20:1–9
Ua toe tufatufaina atu e le Faaola le faamanatuga i tagata
Afai o oe o se alii talavou ma o loo umia le Perisitua Arona, mafaufau i fesili nei: O le a le uiga ia te oe o le mafai ona fesoasoani e tufatufaina atu le faamanatuga? E faapefea ona e faaali atu i le Alii faapea ua e malamalama i le natura paia o lenei sauniga?
Afai o oe o se tamaitai talavou po o se alii talavou e le’i umiaina le perisitua, mafaufau i fesili nei: O a ni ou lagona pe a e vaaia alii talavou agavaa o tufatufaina le faamanatuga? O le a lau mea e fai i le taimi o le faamanuiaina ma le tufatufaina o le faamanatuga, e faaalia ai ua e malamalama i lona natura paia?
E pei ona faamaumauina i le 3 Nifae 20:3–5, i le amataga o le aso lona lua o Lana galuega i sa Nifae, na faavavega le sauniaina e le Faaola o le falaoa ma le uaina ina ia toe tufatufaina atu le faamanatuga. Faitau le 3 Nifae 20:1, ma faailoa mai mea na Ia talosagaina tagata e faia a o le’i saunia e Ia ma tufatufaina atu le faamanatuga. O le a sou manatu, e mafai faapefea e le tatalo i lou loto, ona uunaia ai lou aafiaga i le ai ma inu i le faamanatuga i vaiaso taitasi?
Faitau le 3 Nifae 20:8. Matau na faaaogaina e sa Nifae le uaina i lea taimi, ae o le faatulagaga i le taimi nei a le Ekalesia o le faaaogaina o le vai (tagai MF&F 27:2). Ia matau foi mea ua faatusa i ai le falaoa ma le vai. A o tatou aai ma feinu soo i le faamanatuga, ua tatou faaali atu lo tatou naunautai e avea le Togiola a le Faaola ma vaega o o tatou olaga.
E tusa ma le 3 Nifae 20:8, o le a le mea na folafola atu e Iesu Keriso ia i latou o e aai ma inu i le faamanatuga? Mafaufau i le telē o le falaoa ma le vai i le faamanatuga. Afai ua e galala faaletino e fia taumafa ma fiainu, mata e faamalieina e le falaoa ma le vai lou galala e fia taumafa ma fiainu? Ina ia sili atu ona malamalama i le auala e mafai ai ona faatumuina i tatou i le aai ma feinu i le faamanatuga, faitau le 3 Nifae 20:9 ma faamaea lenei mataupu faavae: Afai tatou te aai ma feinu ma le agavaa i le faamanatuga, e mafai ona faatumuina i tatou i le .
Faitau le faamatalaga lenei mai ia Elder Dallin H. Oaks o le Korama a Aposetolo e Toasefululua, ma vase ni auala na ia tau mai e mafai ona faamanuiaina ai oe a o e faatumuina i le Agaga:
“Ia tatou faaagavaaina i tatou lava mo folafolaga a lo tatou Faaola e faapea, o le taumafa i le faamanatuga o le a ‘faatumuina’’ (3 Ni. 20:8; tagai foi i le 3 Ni. 18:9), o lona uiga o le a ‘tumu i tatou i le Agaga’ (3 Ni. 20:9). O lena Agaga—le Agaga Paia—o lo tatou fesoasoani, o lo tatou taiala, o lo tatou sootaga, o lo tatou faamatala upu, o lo tatou molimau, ma lo tatou faamama—o lo tatou taitai e le sese ma le na te faapaiaina i tatou mo la tatou faigamalaga i lenei olaga e agai atu i le ola e faavavau.
“… O nai mea iti o le faafouina o a tatou feagaiga o le papatisoga ma le loto fuatiaifo ma le faaaloalo e oo mai ai se faafouga o faamanuiaga o le papatisoga i le vai ma le Agaga, ina ia tatou maua pea lona Agaga e faatasi ma i tatou. O le auala lenei o le a taitaiina uma ai i tatou, ma o le auala foi lenei e mafai ona faamamaina uma ai i tatou” (“Ia Maua Pea Lona Agaga,” Liahona, Ian. 1997, 71).
-
Mafaufau i se taimi na e lagona ai le Agaga Paia a o e ai ma inu i le faamanatuga. Faitau ia tatalo o le faamanatuaga i le Moronae 4:3 ma le 5:2. E faapefea e le ai ma le inu i le faamanatuga i vaiaso taitasi ona fesoasoani ia te oe ia tumu i le Agaga Paia? Tusi nisi o auala nei i lau api talaaga mo le suesueina o tusitusiga paia.
3 Nifae 20:10–46
Ua aoao e le Faaola sa Nifaē i feagaiga o le a faataunuuina i aso mulimuli
Mafaufau i nisi o ou uiga sili ona taua. O ituaiga o uiga na e taulai i ai? Pe o ni uiga faaletino, faaletagata lava ia, pe faaleagaga?
Faitau le saunoaga lenei mai ia Elder David A. Bednar o le Korama a Aposetolo e Toasefululua, ma faailoga pe na faapefea ona ia faamaninoina po o ai i tatou: “E mafai ona outou fiafia i musika, afeleti, po o le matele atu i le faaenisinia, ma o le a i ai foi se aso atonu e te galue ai i se matata po o se galuega po o faatufugaga. Pe o le a le taua e mafai ona oo i ai ni gaoioiga ma galuega, e le mafai ona faamatalaina ai po o ai i tatou. O le vaega muamua lava ma le sili, o i tatou o tagata faaleagaga. O i tatou o atalii [ma afafine] o le Atua ma fanau a Aperaamo” (“Avea ma se Faifeautalai,” Ensign po o le Liahona, Nov. 2005, 47).
O le avea ma suli o Aperaamo o lona uiga o i tatou o fanau moni a Aperaamo po ua avea i tatou ma atalii ma afafine e ala i le usiusitai i tulafono ma sauniga o le talalelei a Iesu Keriso. E maua e tagata uma folafolaga e tasi ma feagaiga na osia e le Atua ma Aperaamo.
E pei ona faamaumauina i le 3 Nifae 20:11–13, na aoao atu e le Faaola sa Nifae e uiga i feagaiga ma folafolaga na tuuina atu ia Aperaamo ma lana fanau, o e o le aiga o Isaraelu. Na Ia aoao mai e faapea o le a faataunuu e le Tama Lana feagaiga e faapotopoto le aiga o Isaraelu i aso mulimuli. Faitau le 3 Nifae 20:13, ma matau po o le a le malamalama o le a maua e le aiga o Isaraelu o se vaega taua o lenei faapotopotoina. Aisea e te manatu ai e taua lenei malamalama?
Faitau le 3 Nifae 20:25–26, ma faailoa mai mea na aoao atu e le Faaola e uiga i le auala na faamanuiaina ai fanau a Liae ona o le feagaiga na faia e le Tama ia Aperaamo. Na faamamafa mai e le Faaola na auina mai o Ia e le Tama e asiasi i sa Nifae ma laveai i latou mai le agasala “ona [o i latou] o fanau o le feagaiga” (3 Nifae 20:26).
-
Faitau le 3 Nifae 20:27, ma faailoga fasifuaitau o loo aoao mai ai le mataupu faavae lenei: I le avea ai ma suli o Aperaamo, ua ia i tatou se tiutetauave faalefeagaiga e faamanuia tagata uma o le lalolagi.
A o e faitau i le saunoaga lenei na saunia e Elder David A. Bednar, vaavaai pe faapefea—i le avea ai ma suli o Aperaamo—ona tatou faamanuia i tagata uma o le lalolagi: “O outou ma au, i le taimi nei ma aso uma lava, e ao ona faamanuiaina tagata uma i atunuu uma o le lalolagi. O outou ma au, i le taimi nei ma aso uma lava, e ao ona molimau atu ia Iesu Keriso ma folafola atu le savali o le Toefuataiga. O outou ma au, i le taimi nei ma aso uma lava, e ao ona valaau atu i tagata uma ina ia mauaina sauniga o le faaolataga. O le folafola atu o le talalelei e le o se matafaioi faaleperisitua mo na o se vaitaimi. E le na o se gaoioiga lea tatou te aafia ai mo se taimi faatapulaaina po o se tofiga e tatau ona tatou faamaeaina i le avea ai ma tagata o Le Ekalesia a Iesu Keriso o le Au Paia o Aso e Gata Ai. Ae, o le galuega faafaifeautalai o se faaaliga lea o lo tatou tofi ma lo tatou faasinomaga faaleagaga. Na muai faauuina i tatou i le muai olaga ma fananau mai i le olaga faaletino ina ia faataunuuina le feagaiga ma le folafolaga na faia e le Atua ia Aperaamo. Ua tatou i ai iinei i le lalolagi i lenei taimi e faalauteleina le perisitua ma talai atu le talalelei. O i tatou na, ma o le mafuaaga lena ua tatou i ai iinei—i le taimi nei ma aso uma lava” (“Avea ma se Faifeautalai,” 47).
-
-
O a ni mea e mafai ona e faia i le taimi nei, o se tagata talavou, e faamanuia ai isi i le lalolagi?
-
Aisea e te manatu ai e taua ona e malamalama o oe o le suli o Aperaamo?
-
3 Nifae 21–22
Ua muai ta’u mai e Iesu Keriso le faailoga mo le faapotopotoina o le aiga o Isaraelu i aso mulimuli
E pei ona faamaumauina i le 3 Nifae 21–22, na aoao atu e le Faaola ia sa Nifae le tele o mea e uiga i aso mulimuli—le taimi o le a toefuatai mai ai i le talalelei i le lalolagi ma o le a sauniuni le Au Paia mo Lona Afio Mai Faalua.
-
|
Fuaiupu |
Fesili |
|---|---|
|
Faitau le 3 Nifae 21:1–2, 7. Pe a oo mai le Tusi a Mamona i aso mulimuli, o le a avea ma se faailoga ua amata e le Tama ona faapotopotoina le aiga o Isaraelu. |
|
|
Faitau le 3 Nifae 21:9. O le fasifuaitau “o se galuega tele ma le ofoofogia” o loo faatatau i le Toefuataiga o le talalelei a Iesu Keriso. |
|
|
Faitau 3 Nifae 21:10–11, ma mafaufau loloto pe faapefea ona fetaui lenei faamatalaga i le Perofeta o Iosefa Samita. |
|
|
Faitau le 3 Nifae 21:22. Afai e salamo tagata ma lē faamaaaina o latou loto, o le a faitaulia faatasi i latou ma le aiga o Isaraelu. |
|
|
Faitau le 3 Nifae 22:7–10, ma vaavaai mo folafolaga na faia e le Faaola i Lana nuu o le feagaiga o e na toe foi ane ia te Ia i le maea ai o le faagaloina o feagaiga na latou osia ma Ia. |
|
Mafaufau i se tasi e mafai ona e faasoa i ai lau molimau e uiga ia Iesu Keriso, le Tusi a Mamona, le Toefuataiga o le talalelei, ma le misiona a le Perofeta o Iosefa Samita ina ia fesoasoani i lenei tagata ia maua faamanuiaga o le talalelei toefuataiina. Mafaufau loloto foi pe mafai faapefea ona e uunaia isi e o mai i le Alii, e aofia ai i latou o e na faamaoni i le taimi muamua i le talalelei ae ua le o toe [faamaoni]. A e mafaufau loa i se tagata faapitoa, faatu se sini e galue loa i musumusuga ua e mauaina.
-
Ua ou suesueina le 3 Nifae 20 22 ma faamaeaina lenei lesona i le (aso).
Fesili, mafaufauga, ma manatu faaopoopo ou te fia faasoa i lou faiaoga: