Helamana 6–9

Folasaga

I le mulimuli ai i taumafaiga faafaifeautalai a Nifae ma Liae, na faateleina e sa Lamana lo latou amiotonu. Ae paga lea, i le aluga o lenei lava taimi e tasi na faapea ona amioleaga sa Nifae ma lagolagoina le au faomea a Katianetona, o le taunuuga o le alu ese o le Agaga o le Alii mai ia i latou. Na valoia e le perofeta o Nifae pe afai ae faaauau pea e sa Nifae ona ola i le amioleaga, o le a fano i latou. I le tali i ai, o faamasino amioletonu na faaosoina le toatele o tagata e feita e faasaga ia Nifae, e ui o isi tagata na puipuia ma le lototoa le perofeta. O se molimau o le a faataunuuina ana upu, na faaalia e Nifae ua fasiotia e lona uso le faamasino sili. Ina ua faamaonia upu a Nifae, na talia e isi o ia e avea o se perofeta.

Helamana 6

Ua amata ona amiotonu sa Lamana ma ua tau e faasaga i le au faomea a Katianetona, a o lagolagoina e sa Nifae le faiga faalilolilo

Tusi mea nei i lau api talaaga mo le suesueina o tusitusiga paia, ma tuu se avanoa e tusi ai i luga a’e ma lalo ifo o le ata:

A o e suesueina le tusi a Helamana, ua e vaaia na faia e sa Nifae ni filifiliga na taitai atu ai le Agaga o le Alii ina ia alu ese mai o latou olaga, a o faia e sa Lamana ni filifiliga na sa valaaulia ai le Agaga ina ia faateleina i o latou olaga. Faitau Helamana 6:1–5, 16–17, 34–36; vaavaai mo mea na faia e sa Lamana na mafua ai ona faateleina ai le Agaga o le Alii; ma tusi i latou i luga a’e o le aū i le pito i luga. I fuaiupu lava e tasi, vaavaai mo mea na faia e sa Nifae na mafua ai ona faaitiitia le Agaga o le Alii, ma tusi i latou i lalo ifo o le aū i le pito i lalo.

O se mataupu faavae taua e mafai ona tatou aoaoina mai ia sa Nifae ma sa Lamana o le: A o tatou talitonu i ai ma usiusitai i afioga a le Alii, o le a Ia sasaa mai Lona Agaga i o tatou luga. O le faafeagai o lenei mataupu faavae e moni foi: Afai ua tatou le naunau e talitonu ma usiusitai i afioga a le Alii, o le a alu ese le Agaga o le Alii mai ia i tatou.

Tagai i mea ua e tusiaina i luga o le ata i lau api talaaga mo le suesueina o tusitusiga paia. Mafaufau e uiga pe faapefea e na amioga o i ai i le afa pito i luga o ni faataitaiga o le naunau e talitonu ma usiusitai i afioga a le Alii, a o i latou o i le pito i lalo o ni faataitaiga o le loto maaa ma le le naunau e faalogo i le Alii.

Tali fesili nei, i lau api talaaga mo le suesueina o tusitusiga paia:
1. Filifili se tasi o amioga lelei (i le afa pito i luga o lau ata) o loo e faia po o ua e faia i lou olaga. Na faapefea e lenei amioga ona valaaulia le Agaga Paia i lou olaga?
2. Tagai i amioga i le afa o le pito i lalo o lau ata. Aisea e te manao ai e aloese mai le faia o nei mea?

Filifili se mea se tasi e mafai ona e faia e valaaulia ai le Agaga o le Alii ina ia faateleina i lou olaga, ma taumafai ina ia galue ai i lena mea i le vaiaso e sosoo ai.

Helamana 7

Ua talai atu Nifae i sa Nifae amioleaga ma poloaiina i latou ia salamo

Sa auauna atu le perofeta o Nifae o se faifeautalai i le laueleele i matu mo tausaga e ono. Sa ia toe foi i lona lava aiga i le maea ai o taumafaiga e aoao atu i sa Nifae, o e na teena ana upu ma tumau ai i o latou tulaga leaga. Sa matuai lotovaivai o ia. Faitau Helamana 7:6–11 e iloa ai le mea na faia e Nifae.

Ina ua maea ona potopoto atu tagata e faalogologo ia Nifae o tatalo i luga o le olo i lona togalaau, na amata ona aoaoina i latou e Nifae (tagai Helamana 7:12–29). Na ia lapataia i latou i taunuuga o a latou filifiliga ma faamamafa atu lenei mataupu faavae: Afai e tatou te mumusu e salamo i a tatou agasala, o le a aveesea mai ia i tatou le puipuiga ma le faamanuiaga a le Alii o le ola e faavavau.

Helamana 8:1–26

O faamasino amioletonu na faaosoina tagata e feita faasaga ia Nifae

O a nisi o uunaiga e faalavelaveina oe mai le faalogo i upu a perofeta? A o e suesue i le Helamana 8, vaavaai mo manatu faaopoopo i mea e ao ona e faia pe a feagai ma ia faatosinaga.

Faitau le Helamana 8:1–6, vaavaai mo le auala na tali atu ai faamasino a sa Nifae (o e na avea foi ma faomea a Katianetona) i aoaoga a Nifae. A o e faitau, mafaufau loloto i fesili nei: O le a le savali autu a faamasino i tagata? E tusa ai ma le Helamana 8:4, aisea na le faasalaina ai e faamasino ia Nifae?

Mafaufau e uiga i se mea e te faia pe afai e taumafai se tasi e faatauanau oe ia lē amanaia mea ua aoao mai e perofeta. I le Helamana 8, na saunoa atu nisi o tagata e tetee i mea na fai mai ai faamasino e uiga ia Nifae. Faitau le Helamana 8:7–9, ma mafaufau e faailoga mea na tau atu e tagata e lagolago ai Nifae.

Tagai i le Helamana 8:10, ma matau le aafiaga a a latou upu i le mea na tupu. Atonu e te manao e tusi mataupu faavae nei i autafa o le Helamana 8:7–10: Afai e tatou te tetee atu i le tiapolo, e mafai ona tatou taofia mai le alualu i luma.

I lau api talaaga mo le suesueina o tusitusiga paia, tusi se parakalafa puupuu e faamatala ai pe aisea ua e manatu ai o le mataupu faavae ua taua i luga e taua i o tatou aso.
Tali se tasi po o le sili atu o fesili nei, i lau api talaaga mo le suesueina o tusitusiga paia:
1. E mafai faapefea ona e tetee atu i uunaiga e taumafai e tauanau oe ia le amanaia pe tetee atu i aoaoga a perofeta?
2. O a ni auala talafeagai e talanoa atu ai e faasaga i na ituaiga uunaiga ma lagolagoina perofeta a le Alii?
3. O anafea na e po o se tasi e te iloa, na tu atu e tetee i na ituaiga uunaiga? O a ni taunuuga na i ai?

E pei ona faamaumauina i le Helamana 8:11–23, na toe faamanatu atu e Nifae i tagata e uiga i lea perofeta ma lea perofeta o e na molimau atu ia Iesu Keriso. Na ia aoao atu ia sa Nifae lenei mataupu faavae: A o tatou faatino le faatuatua ia Iesu Keriso ma usiusitai, o le a tatou maua le ola e faavavau. E ui lava i le toatele o perofeta o a latou aoaoga na faamaonia ai upu a Nifae, na teena e tagata ia Nifae ma lana savali. Faitau le Helamana 8:24–26, ma faailoa mai taunuuga na feagai pea ma sa Nifae pe afai e latou te faaauau pea ona teena molimau a perofeta. Ona mafaufau loloto lea i fesili nei: Aisea e te manatu ai o i latou o e tumau pea ona faafitia le upumoni ma fouvale e faasaga i le Atua e feagai ma taunuuga ogaoga faapena?

Helamana 8:27–9:41

Ua faaali atu e Nifae o le faamasino sili na fasiotia e lona uso

O se faamautinoaga i le i ai o tagata i se tulaga agasala ma o mea na ia tau atu ia i latou e uiga i lo latou faafanoga o le faataunuuina, na faaali atu ai e Nifae le fasiotia o le faamasino sili o sa Nifae. Na folafola atu foi e Nifae o aualii o lē na fasiotia ma lona uso o ni sui o le au faomea a Katianetona. (Tagai Helamana 8:27–28.)

I lau api talaaga mo le suesueina o tusitusiga paia, tusi ai le mataupu faavae lenei: O le a faataunuuina upu a perofeta. Vaai faalemafaufau o oe o se tagata suesue o loo suesueina le fasiotiga o le faamasino sili. Saili ia tali i fesili nei e ala i le faitauina o fuaiupu o loo i puipui. Tusi au tali i totonu o lau api talaaga mo le suesueina o tusitusiga paia.

Aso Muamua o le Suesuega:
1. Ina ua suesue e ni tagata se toalima le tautinoaga a Nifae, o le a le mea sa latou maua? Aisea na latou pauu ai i le eleele? (Helamana 9:1–5)
2. O ai tagata na masalomia e tagata na fasiotia [le faamasino sili]? Helamana 9:7–8)
Aso Lona Lua o le Suesuega:
1. O ai na faamaonia e mamā? (Helamana 9:10–14, 18)
2. O ai na tuuaia? (Helamana 9:16, 19)
3. O a faamaoniga o lona mamā na tuuina atu e Nifae? Helamana 9:25–36)
4. O ai la le fasioti tagata? (Helamana 9:37–38)

Mafaufau e faailoga ia tali i fesili nei i lau tusitusiga paia:

E tusa ai ma le Helamana 9:5, o a ni mea na talitonu ma matatau ai tagata e toalima na mauaina le faamasino sili ua fasiotia?
E tusa ai ma le Helamana 9:36, o a mea na tau mai e Nifae o le a molimau i ai Seanetuma a’o ia ta’uta’u atu le fasiotia o lona uso?
E tusa ai ma le Helamana 9:39–41, aisea na talitonu ai nisi o tagata ia Nifae?

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Helamana 6–9 ma faamaeaina lenei lesona i le (aso).

Fesili, mafaufauga, ma manatu faaopoopo ou te fia faasoa i lou faiaoga: