Alema 13

Folasaga

Sa aoao atu e Alema tagata fouvale o Amonaea e uiga i faitaulaga sili o le Perisitua Mekisateko o e ua faauuina e fesoasoani i tagata ina ia salamo ma ulufale atu i le malologa o le Alii. Na ia tuuina atu le faataitaiga o Mekisateko, o le sa fesoasoani i ona tagata e salamo ma ola filemu. Sa taumafai Alema e aoao atu tagata o Amonaea ina ia maua le faatuatua ma le faamoemoe ma faamalosi ia i latou ia suia ina ia mafai ona latou saunia e ulufale atu i le malologa o le Alii.

Alema 13:1–12

Ua aoao e Alema tagata o Amonaea e uiga i le valaauga o faitaulaga sili

Faitau le upu sii lenei, ona tali lea o fesili:

“I le muai olaga o agaga, sa tofia e le Atua ni agaga e faataunuuina ni misiona patino i le taimi e soifua ai i le olaga nei. O lenei mea ua taua o le muai faauuina.

“O le muai faauuina e le faapea ua mautinoa ai o ia tagata o le a maua ni valaauga po o ni tiutetauave faapitoa. O nei avanoa e oo mai i lenei olaga o se taunuuga o le faaaogaina ma le amiotonu o le saolotoga, e pei lava o le oo mai o le muai faauuina o se taunuuga o le amiotonu i le muai olaga” (Faamaoni i le Faatuatua: O Se Tusitaiala O Le Talalelei [2004], 69).
1. O le a le fesootaiga i le va o filifiliga sa faia i le muai olaga ma le muai faauuina?
2. E faapefea e filifiliga sa faia i le muai olaga ona aafia ai le muai faauuina?

E ui o loo talanoaina e umia le perisitua i le Alema 13, na faamanatu mai e Peresitene Spencer W. Kimball o tuafafine sa tuuina foi i ai tofiga tamalii i le muai olaga: “Ia manatua, i le lalolagi a o tatou te le i o mai iinei, o tamaitai faatuatua sa tofia i ni valaauga faapitoa ae o alii faatuatua sa muai faauuina i ni tofiga faaleperisitua faapitoa” (“The Role of Righteous Women,” Ensign, Nov. 1979, 102).

Na aoao mai Elder Neal A. Maxwell o le Korama a Aposetolo e Toasefululua: “E le o se mataupu paie lenei mataupu. Ua tofu i tatou ma filifiliga e fai, ma galuega e fai, ma faigata e oo i ai, ma taimi e faaaoga poto, ma taleni ma meaalofa e faaaoga lelei. E le faapea na filifilia i tatou i ‘inā i lena taimi,’ ona tatou le manatu mamafa ai lea i ‘inei ma le taimi nei.’ E tusa pe na muai faauuina alii, pe na muai tofia tamaitai, e tatau ia i latou uma na tofia ma saunia, ona faamaonia lo latou ‘filifilia ma lo latou faamaoni.’ (Tagai Faaaliga 17:14; MF&F 121:34–36.)” (“O Le Muai Olaga, o se Mataupu Moni Mamalu,” Liahona, Ian. 1986, 11).

Sa aoao e Alema le au uso o Amonaea e faapea e toatele alii sa muai faauuina i le muai olaga e maua le perisitua. Faitau Alema 13:1, 8–9, ma faailoa mai po o le fea o perisitua na talanoaina e Alema. Atonu e fesoasoani le iloa i lenei mataupu o le fasifuaitau o le “faatulagaga paia” o lona uiga o le Perisitua Mekisateko, po o le “Perisitua Paia, e tusa ma le Faatulagaga a le Alo o le Atua” (MF&F 107:3). Mafaufau e maka le fasifuaitau “faatulagaga paia” a o e suesue i le vaega o totoe o lenei mataupu (tagai Alema 13:2, 6–7, 10–11, 16, 18). Na saunoa Elder Bruce R. McConkie o le Korama a Aposetolo e Toasefululua: “O sa Nifae, o e sa faatuatua ma faamaoni i le tausia o tulafono a Mose, sa maua le Perisitua Mekisateko, o lona uiga sa ia i latou le atoatoaga o le talalelei” (The Promised Messiah: The First Coming of Christ [1978], 421). O lona uiga o perofeta o le Tusi a Mamona sa maua le Perisitua Mekisateko ma sa iloa lona auala e galueaiina ai.

Suesue le Alema 13:2–6, 10 mo tali i fesili nei, ma tusi tali i a outou tusi lesona:

O a uiga o loo maua e i latou ua faauuina i le Perisitua Mekisateko? (Tagai Alema 13: 3–5, 10 .)
O a mea na faauuina i ai nei Perisitua Mekisateko e latou te fai? (Tagai Alema 13:6.)
Na faapefea ona e vaaia i lenei mea o fai e se tasi o umia le Perisitua Mekisateko e te iloa i lau uarota po o le paranesi, ma e faapefea ona faamanuia ai lou olaga ma olaga o isi?

Alema 13 o loo i ai se felafolafoaiga loloto e uiga i le Perisitua Mekisateko. Ua aoao mai o alii uma e maua lenei perisitua sa muai faauuina ia mauaina (tagai fuaiupu 3). O i latou o e umia lenei perisitua e latou te aoao atu poloaiga a le Atua i isi ina “ia mafai foi ona latou ulu atu i lona malologa” (fuaiupu 6). O le perisitua e faavavau (tagai i le fuaiupu 9), ma e faaee atu i luga o alii “ona o lo latou faatuatua tele ma lo latou salamo, ma lo latou amiotonu i luma o le Atua” (fuaiupu 10). O e umia le perisitua ua faapaiaina e le Agaga Paia ina ua latou aoao e inoino i le agasala, ma ua “famamaina ma ulu atu i le malologa o le Alii lo latou Atua” (fuaiupu 12).

Faitau le Alema 13:11–12, ma faailoa mai le aafiaga o le faapaiaga o le Togiola a Iesu Keriso ua maua e i latou o umia le perisitua ona o lo latou faatuatua, salamo, ma le amiotonu.

Tali le fesili lenei i lau api talaaga mo le suesueina o tusitusiga paia: O le a se mea ua e aoao mai le faataitaiga a nei [alii] o umia le Perisitua Mekisateko e uiga i mea e mafai ona e faia ina ia maua ai le aafiaga o le faapaiaga o le Togiola i lou olaga?
Tusi le upumoni lenei i lau tusitusiga paia i talaane o le Alema 13:1–12 po o i lau api talaaga mo le suesueina o tusitusiga paia: O alii o e auai i le Ekalesia a Iesu Keriso o Aso e Gata Ai ma galulue ma le faatuatua tele ma filifili le amiotonu ua valaauina i le Perisitua Mekisateko e aumai isi i le Atua. Ona tusi lea i lau api talaaga mo le suesueina o tusitusiga paia e uiga i le auala e avea ai le iloaina o lenei mataupu faavae o le talalelei ona mafai ona aafia ai le auala e te tali atu ai i taitai perisitua i le faagasologa o lou olaga.

Alema 13:13–20

Ua aoao atu Alema e uiga ia Mekisateko, o se faitaulaga sili maoae o le na faavaeina le filemu i ona tagata

Faitau le Alema 13:13–18, ma vaavaai mo upu sa faaaoga e Alema e faamatala ai Mekisateko ma mea sa faia e Mekisateko mo ona tagata. Mafaufau pe faapefea e nei upu ona faamatala le olaga faaKeriso o Mekisateko. Sa aoao atu e Alema o e o umia le Perisitua Mekisateko ua “e tusa ma le faatulagaga a le Alo, o le Toatasi na Fanauina e le Tama” (Alema 13:9; tagai foi MF&F 107:2–4), o Iesu Keriso lea, ma ua latou faasino tatou ia te Ia e ala ia latou faataitaiga ma a latou aoaoga. Na saunoa Elder Bruce R. McConkie: “E le taumate e tele mea e tutupu i olaga o le tele o perofeta ua vaetofiaina ai na tagata amiotonu o ni ituaiga ma ata o lo latou Mesia. E atoatoa ma talafeagai ona vaavaai mo faatusa mo Keriso i soo se mea ma faaaoga pea lava pea e ala i le tausia o ia ma ana tulafono silisili i o tatou mafaufau ” (The Promised Messiah, 453).

Faitau Alema 13:19, ma vaavaai mo mea o loo tau mai e lenei fuaiupu ia i tatou e uiga ia Mekisateko. Toe vaavaai i le Alema 13:17 ina ia iloa le ala na faamatala ai e Alema tagata i Salema ina ua avea Mekisateko ma o latou tupu. Ia matau le ala e mafai ai foi ona faaaoga nei upu e faamatala ai tagata o Amonaea (tagai Alema 8:9; 9:28). O a mea na faia e tagata o Salema o se taunuuga ona o taumafaiga a Mekisateko? (Tagai Alema 13:18.)

Ia matau mea na faaaogaina, mauaina, ma folafolaina i le Alema 13:18. Mafaufau e uiga i mea na e aoaoina e uiga i le ala e tatau ona avea ai se taitai perisitua mai faataitaiga a Mekisateko.

Tali le fesili lenei i lau api talaaga mo le suesueina o tusitusiga paia: O anafea na e pe o se tasi e te iloa ona maua le filemu i le maea ai ona mulimuli i le fautuaga a se taitai perisitua amiotonu?

Alema 13:21–31

Na valaaulia e Alema tagata e faalogo i le siufofoga o le Alii ma ulufale atu i Lona malologa

Vaavaai ma faailoga fasifuaitau fai soo e pei o le “malologa o le Alii” (po o se isi fasifuaitau faapena) i le Alema 13:12, 13, 16, ma le 29. Sa aoao atu e Alema tagata o Amonaea e faapea o le Alii ua valaaulia alii i le perisitua ina ia fesoasoani i tagata e ulufale atu i le malologa o le Alii. Sa ia faaaoga le faataitaiga o Mekisateko e faaali ai ia i latou o tagata sa faatumulia i le agasala ma le amioleaga e mafai ona salamo ma ulufale atu i le malologa o le Alii (tagai Alema 13:17–18; tagai foi MF&F 84:24).

Na saunoa Peresitene Iosefa F. Samita o le ulufale atu i le malologa o le Atua “o lona uiga o le ulufale atu i le malamalama ma le alofa o le Atua, i le faatuatua i lona faamoemoega ma lana fuafuaga, e oo ai i se tulaga tatou te iloa ai e sao i tatou, ma tatou te le o vaavaai mo se isi mea, e le o faapopoleina foi i tatou e matagi taitasi o aoaoga faavae, po o le poto ma le pepelo o tagata o loo taooto ma faatalitali e faavalea. Tatou te iloa aoaoga faavae o la le Atua ia” (O Aoaoga a Peresitene o le Ekalesia: Iosefa F. Samita [1998], 56).

O le a se mea e te faamoemoe i ai i se amioga a se tasi pe afai ua ulufale atu o ia i le malologa o le Alii i lenei olaga e pei ona faamatalaina e Peresitene Iosefa F. Samita?

Na aoao atu Elder Bruce R. McConkie: “O le aupaia faamaoni e ulufale atu i le malologa o le Alii a o i ai i lenei olaga, ma e ala i le ola ai i le upumoni, latou te faaauau ai i lena tulaga faamanuiaina seia o latou malolo ma le Alii i le lagi. … O le malologa o le Alii, i le faavavau, o le maua lea o le ola e faavavau, ia maua le atoatoaga o le mamalu o le Alii” (Mormon Doctrine, 2nd ed. [1966], 633).

Ina ua maea ona lapataia e Alema tagata o Amonaea e sauniuni mo le afio mai o Keriso (tagai Alema 13:21–26), sa ia tuuina atu aoaoga faaopoopo i le ala e ulufale atu ai i le malologa o le Alii. Faitau le Alema 13:27–29 e vaavaai ai po o a na aoaoga.

E mafai ona otooto aoaoga a Alema e le mataupu faavae lenei: : A o tatou tali atu ma le lotomaualalo i le valaaulia e salamo, o le a mulimuli ane taitaiina i tatou e le Agaga i le malologa o le Alii.

Faailoa mai se tasi o faamanuiaga o loo taua i le Alema 13:27–29 e te manao e te maua. A maea ona e faailoa mai le faamanuiaga, vaavaai mo le fautuaga na tuuina atu e Alema o le a fesoasoani e te saunia ai e maua lena faamanuiaga. Ona tusi lea o se sini i lau api talaaga mo le suesueina o tusitusiga paia e faatatau i le auala o le a e faatino ai le fautuaga a Alema ina ia mafai ona e ulufale atu i le malologa o le Alii i lenei olaga ma le isi.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Alema 13 ma faamaeaina lenei lesona i le (aso).

Fesili, mafaufauga, ma manatu faaopoopo ou te fia faasoa i lou faiaoga: