Iunite 10: Aso 4

Iaroma ma Ominae

Folasaga

O tusi o Iaroma ma Ominae oloo i ai tusitusiga faaiu mai papatusi laiti a Nifae. Na maua e Iaroma ia papatusi mai lona tamā, o Enosa, ma tusia ai tauiviga ma faamanuiaga a sa Nifae i le silia ma se periota e tusa ma le 60 tausaga. Ona ia tuufaasolo atu lea o papatusi i lona atalii o Ominae. O le tusi o Ominae o loo i ai tusitusiga a tausi tusi eseese sa Nifae e toalima ma aofia ai le tusa o le 230 tausaga.

Iaroma 1:1–15; Ominae 1:5–7

Ua faamatala e Iaroma le ala e manuia ai sa Nifae pe a latou tausia poloaiga a le Alii

Ina ia saunia e suesue se mataupu faavae taua o loo aoaoina mai i le Iaroma ma le Ominae, faitau le aafiaga lenei na faasoa mai e Peresitene Dieter F. Uchtdorf o le Au Peresitene Sili:

“Ou te manatua a o ou sauni e aoga faamasani o se pailate o vaalele tau. Sa matou faaaluina se taimi tele o a matou aoaoga amata i le militeli i gaoioiga faaletino. Ou te le o matuai mautinoa lelei lava pe aisea na faapea ai o le taufetuli e le malolo o se sauniuniga taua o le avea ma se pailate. Ae ui i lea, sa matou taufetuli ma taufetuli ma taufetuli pea.

“A o ou tamoe, sa amata ona ou matauina se mea, o le mea moni, na faapea ona fai ma faalavelave ia te a’u. Na faafia ma fai soo ona pasia a’u e alii o e na ulaula, inupia, ma faia ituaiga o mea uma sa le tusa ai ma le talalelei ma, ae maise lava, o le Upu o le Poto.

“Ou te manatua lo’u mafaufau e faapea, ‘Faatali a la! Pe e le tatau ea ona mafai ona ou tamoe ae le vaivai?’ Peitai sa ou vaivai, ma sa pasia a’u e tagata o e na mautinoa lava e le usitai i le Upu o le Poto. Ou te tau atu, sa fai lea ma faalavelave ia te au i lena taimi. Sa ou fesili ifo ia te a’u lava, pe e moni le folafolaga pe leai?” (“Continue in Patience,” Ensign po o le Liahona, Me 2010, 58).

Pe sa e mafaufau pe po o o le a foi le auala o le a faataunuu ai e le Alii Lana folafolaga e faamanuia oe mo le tausiga o Ana poloaiga?

O le perofeta o Iaroma, o le atalii o Enosa, na faamalamalama mai le ala na faamaonia, pe molimauina ai le sa’o o se folafolaga faapitoa a le Alii i lona tamā. Faitau le Iaroma 1:9, ma faailoga le folafolaga na faamaonia e le Alii i tagata.

1. Sa faailoa mai e Iaroma a tatou usitai i poloaiga a le Atua, o le a tatou manuia. Ina ia iloa faataitaiga o lenei upumoni, suesue mau taitasi o loo i lalo, ma tali ia fesili o loo i ai faatasi i totonu o lau api talaaga mo le suesueina o tusitusiga paia:

   1. Iaroma 1:4–5, 8. O a nisi o faataitaiga o auala na usiusitai ai sa Nifae ma auala na faamanuiaina ai i latou?

   2. Iaroma 1:7, 10–12. O le a le tiute na faia e perofeta ma isi taitai e fesoasoani ai ia sa Nifae ia usiusitai ma manuia?

   3. Ominae 1:5–7. Na faapefea ona faamaonia mulimuli ane le folafolaga a le Atua i se auala e ese mai?

Faitau le mea na aoao ma molimau mai ai Peresitene Uchtdorf e uiga i lana aafiaga o le mafaufau pe o le a faamaonia e le Alii le folafolaga ua tuuina mai i le Upu o le Poto: “Sa le’i vave ona oo mai le tali. Ae peitai sa iu ina ou iloaina o folafolaga a le Atua e le o taimi uma e vave faataunuuina ai pe o le auala foi tatou te faamoemoe i ai; e oo mai e tusa ai ma Lana taimi ma i Lana ala. O ni tausaga mulimuli ane, sa mafai ona ou vaaia ai le faamaoniga manino o faamanuiaga faaletino e oo mai ia i latou o e usitaia le Upu o le Poto—e faaopoopo atu i faamanuiaga faaleagaga lea e vave oo mai mai le usiusitai i soo se tulafono a le Atua. Pe a toe tepa i tua, ua ou iloa ma le mautinoa o folafolaga a le Alii, atonu e le o taimi uma e vave ai, ae e mautinoa lava i taimi uma” (“Continue in Patience,” 58, ua faaopoopo le faatusilima).

2. I lau api talaaga mo le suesueina o tusitusiga paia, faamatala se aafiaga i se taimi na faamanuiaina pe tauia ai oe e le Alii ona o le tausiga o Ana poloaiga. Mai lou aafiaga, o le a se mea e mafai ona e molimau ai e uiga i le Alii ma Ana folafolaga?

Ominae 1:1–30

Toe faamatala e tausi faamaumauga le talafaasolopito o sa Nifae

Sa tusia e i latou e tupuaga mai ia Iaroma le tusi o Ominae, lea e aofia ai le tusa o le 230 tausaga. Faailoga igoa o tagata eseese o e na tausia papatusi laiti ina ua mavae Iaroma. E mafai ona e mauaina i le Ominae 1:1, 4, 9, 10, 12, ma le 25.

O le tusi o Ominae o loo faamatala ai ni isi o mea taua na tutupu i le talafaasolopito o le Tusi a Mamona. Atonu e te manatua i le taimi o Nifae sa tuua ai e sa Nifae ia sa Lamana ae faamautu i se nofoaga na latou ta’ua o le laueleele o Nifae. O lenei feoaiga ua faailogaina i luga o le faafanua e se āū mai le laueleele o le uluai tofi i le laueleele o Nifae.

Faitau le Ominae 1:12–13, ma faailoa le auala na oo mai ai sa Nifae e nonofo i le nuu o Saraemila. Atonu e te manao e vase lalo o soo se fasifuaitau i nei fuaiupu e faaalia ai sa malaga mai sa Nifae e ala i le taitaiga ma le mana o le Alii. I luga o le faafanua, o le āū mai le nuu o Nifae i le nuu o Saraemila ua faailoga ai lenei feoaiga.

Faitau le Ominae 1:14–19, ma vaai mo mea e tutusa ai ma eseesega i le va o sa Nifae ma tagata na latou mauaina i le nuu o Saraemila.

3. Tali fesili nei, i lau api talaaga mo le suesueina o tusitusiga paia:

   1. O le a se aafiaga na i ai i tagata o Saraemila ona o le leai o ni tusitusiga paia?

   2. E faapefea ona fesoasoani le iloa o lenei mea ia te oe e te lagona ai le atili faafetai mo tusitusiga paia ma ia e maelega atili ai i le suesueina o i latou?

O loo faailoa mai foi e le tusi o Ominae isi vaega e lua o tagata o le a e suesue i ai mulimuli ane i le Tusi a Mamona. Ina ia iloa le tasi o nei vaega, faitau le Ominae 1:20–22, ma tusi le upu sa Iareto i au tusitusiga paia i talane o fuaiupu nei. O Korianetuma o se tasi o tagata mulimuli e toalua na ola o le nuu o sa Iareto; o le isi o le perofeta o Eteru. O le a e aoao e uiga ia sa Iareto i lau suesuega o le tusi o Eteru.

Ina ia aoao e uiga i le vaega mulimuli o tagata na ta’ua i le Ominae, matau le āū o loo i le faafanua e faasolo mai le nuu o Saraemila e lata atu i le nuu o Nifae ona toe foi mai lea i Saraemila ma le āū mai le nuu o Saraemila e faasolo atu lava i le nuu o Nifae. O nei āū e faatusa i feoaiga o le nuu o Senifa, o e o loo ta’ua i le Ominae 1:27–30. (Atonu e te manao e tusi “nuu o Senifa” i talane o fuaiupu nei.) O le a e aoao e uiga i lenei vaega o tagata a o e suesue i le tusi o Mosaea.

E le o faapea mai o le Tusi a Mamona o se faamaumauga o tagata uma o e na ainā ai Amerika. E ese mai ia sa Iareto, le nuu o Saraemila, ma e e tupuga mai ia Liae, sa i ai foi isi o e na o mai foi i le konetineta o Amerika. Sa ta’ua e Peresitene Anthony W. Ivins o le Au Peresitene Sili i le konafesi aoao ia Aperila 1929: “E le o ta’u maia e le Tusi a Mamona … ia i tatou sa leai ni isi iinei e i luma mai [o tagata o le Tusi a Mamona]. E le o ta’ua mai ia i tatou e le’i o mai ni tagata mulimuli ane” (i le Conference Report, Apr. 1929, 15).

Ia matau i le Ominae 1:23–24 o le vaega faaiu o le tusi lenei sa tusia e Amaleki. Sa ola o ia i le vaitaimi o le Tupu o Peniamina, ina ua mavae le feoaiga a sa Nifae i le nuu o Saraemila. Faitau le Ominae 1:25–26, ma faailoga se valaaulia na tuu mai faatolu e Amaleki.

Vaai mo Upu, Fasifuaitau, ma Manatu e Ta’ua Soo i Tusitusiga Paia

O i latou o e na tusia tusitusiga paia e masani ona faamamafaina upumoni taua e ala i le ta’ua soo. A o e mauaina upu, fasifuaitau, ma manatu e ta’ua soo, ia taumafai e malamalama le mafuaaga ua faamamafaina ai ma le mea e finagalo le Alii e te aoao mai ai.

Ia matau o valaaulia taitasi e tolu e o mai ia Keriso i le Ominae 1:25–26 e sosoo ma le upu ma, faapea foi ma se faatonuga faapitoa o le a fesoasoani tatou te iloa ai le ala e o mai ai ia Keriso. Toe tagai i le Ominae 1:25–26, ma faailoga le mea na faamalosiau mai Amaleki ia i tatou e fai e o mai ai ia Keriso.

Ua tatau ona e maua le fautuaga lenei o le ala e o mai ai ia Keriso:

• Talitonu

• Taumamafa i Lana olataga (maua faaaliga o Lana Togiola)

• Tuu atu lou agaga atoa ia te Ia (tuu atu lou loto, ou manaoga, ma au taumafaiga sili ona lelei—ia le taofia se mea)

• Anapogi ma tatalo

• Tumau e oo i le iuga

Sa tuuina mai e Amaleki se folafolaga i le faaiuga o le Ominae 1:26 ia i latou o e e mulimuli i lenei fautuaga. Sue le folafolaga, ma faatumu le mataupu faavae lenei: Afai tatou te o mai ia Keriso ma tumau e oo i le iuga, tatou te .

4. Filifili se fasifuaitau se tasi i le fautuaga i le ala e o mai ai ia Keriso o loo lisiina i luga, ma tusi pe fuafua i lau api talaaga mo le suesueina o tusitusiga paia se lauga e tasi i le lua minute e faamatala ai le ala e mafai ona tatou o mai ai ia Keriso e ala i le faaaogaina o lena mataupu faavae.

   Mo se faataitaiga, e mafai ona e tusia lau lauga i le ala e mafai ai e le anapogi ma le tatalo ona fesoasoani ia i tatou e o mai ia Keriso. O lau lauga e ono aofia ai le (1) faitau le Ominae 1:25–26 ma faamatala i a oe lava upu le fasifuaitau e te filifilia; (2) mau faaopoopo e faamanino pe faaopoopo ai le uiga o le fasifuaitau; (3) o se aafiaga mai lou olaga pe mai le olaga o se tasi e te iloa e faailoa ai se faataitaiga o le fasifuaitau; ma (4) ou manatu, lagona, ma le molimau.

E ono fai atu lou faiaoga e faasoa atu lau lauga i le isi taimi tou te feiloai ai. Atonu e te manao foi e faasoa atu lau lauga i se afiafi faaleaiga po o se isi nofoaga.

5. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

   Ua ou suesueina le Iaroma–Ominae ma faamaeaina lenei lesona i le (aso).

   Fesili, mafaufauga, ma manatu faaopoopo ou te fia faasoa i lou faiaoga: