Alema 45–49

Folasaga

Ina ua maea ona tuuina atu e Alema ana faatonuga mulimuli i lona atalii o Helamana, sa ia tuua tagata o Nifae ma sa le toe faalogo lava i ai. I le faagasologa o taimi faigata na mulimuli mai mo sa Nifae, na avea Helamana ma le Taitaiau o Moronae o o latou taitai faaleagaga ma faavaegaau. O le taitai o sa Lamana o Amalekia na faufau ma le manatu faapito ona naunautaiga amioletonu, e faaaoga ai faiga e faapei o le tiapolo. Na saunia e le Taitaiau o Moronae ona tagata ina ia faatuatua i le Atua i le faagasologa o na aso faigata.

Alema 45

Ua talitonu Helamana i upu a lona tama, o Alema, ma ua amata lana galuega

Toe manatu i se faatalanoaga sa e maua ma se matua po o se taitai perisitua. Mafaufau i ituaiga o fesili sa fesiligia ai oe. A o le i tuua e Alema le laueleele, sa ia fesiligia Helamana i ni fesili taua se tolu. Faitau le Alema 45:2–7, ma faailoa mai ma faailoga nei fesili. (O “upu” sa faatatau i ai Alema i le fuaiupu 2 e mafai ona maua i le Alema 37:1.) Mafaufau pe faapefea ona e tali atu i fesili a Alema: E te talitonu i tusitusiga paia? E te talitonu ia Iesu Keriso? Pe o le a e tausi i poloaiga?

Ina ua maea ona folafola atu e Helamana lana molimau, na talanoa atu Alema ia te ia e tusa ma le lumanai o sa Nifae. Na ia valoia i lo latou faatafunaina ma le faatafunaina o isi lava tagata ua matua le agasala i lenei nuu filifilia. Faitau le Alema 45:16, ma mafaufau i upumoni nei i lenei fuaiupu: E le mafai ona silasila le Alii i le agasala ma se tikeri itiiti o le taliaina.

Ina ia fesoasoani ia te oe ia malamalama i lenei mataupu faavae, ia manatua e ala i Lana Togiola, sa totogiina e le Faaola le tau mo a tatou agasala uma pe afai tatou te salamo ma saili i Lana faamagaloga. E le mafai e le Atua ona taliaina le agasala i soo se tikeri. Ae ui i lea, ona sa finagalo le Faaola e mafatia e fai ma o tatou sui, ua tatou le mafatia mo a tatou agasala pe afai tatou te salamo.

Faitau le Mataupu Faavae ma Feagaiga 1:31 –33. Atonu e te manao e tusi nei fuaiupu o ni mau faasino i tafatafa o Alema 45:16.

Tali mai i le fesili lenei i lau api talaaga mo le suesueina o tusitusiga paia: O a ni ou lagona e uiga i le Faaola pe a e mafaufau i Lona naunautai e totogi le tau mo au agasala?

E pei ona faamaumauina i le Alema 45:20–24, na amata le talaiga a Helamana le perofeta a le Alii ma le taitai o le Ekalesia. O ia ma isi taitai o le Ekalesia na tofia ositaulaga ma aoao i le faapotopotoga atoa, ae ona o le feitagai ma le faateleina o le faamaualuga sa teena tagata e faalogo i o latou taitai.

Alema 46

Sa faapotopoto e le Taitaiau o Moronae e amiotonu e puipui i a latou aia tatau ma la latou tapuaiga

E pei ona faamaumauina i le Alema 46:1–7, o nisi tagata sa le fiafia ia Helamana ma ona uso sa filifili e tuua le Ekalesia ma mulimuli i se tagata amioleaga e igoa ia Amalekia, o le sa manao e avea ma tupu. Faitau le Alema 46:8–10, ma vaavaai i lesona na manao Mamona tatou te aoao ai mai lenei tulaga matautia.

Ina ia fesoasoani e puipuia le saolotoga o tagata, o Moronae, o le sa avea ma taitaiau o vaegaau a sa Nifae, ua saeia lona ofu ma ua faaaoga le fasi ofu e fai ai le “tagavai o le saolotoga” e faapotopoto ai tagata i lee puipuia o le saolotoga.

Faitau le Alema 46:12–13, ma faailoga le mea na tusia e Moronae i luga o le tagavai o le saolotoga. Faailoa mai pe faapefea ona ia saunia e tuuina atu le tagavai o le saolotoga i tagata. Manatunatu loloto i mea o loo aoao ai outou e nei fuaiupu e tusa ai ma uiga o Moronae. Faitau foi le Alema 48:11–13, 17–18 ina ia maua le malamalama atili i uiga o le Taitaiau o Moronae. Atonu e te manao e faailoga uiga o Moronae e te manao e atiae atoatoa i lou lava olaga.

I lau api talaaga mo le suesueina o tusitusiga paia, tusi e faatatau i se uiga se tasi pe sili atu o Moronae mai le Alema 46:12–13 ma le Alema 48:11–13, 17–18. Faamatala pe aisea e te manao ai e maua nei uiga ma le auala e mafai ona e taumafai ai e atiae i latou.

Faitau le Alema 46:18–22, ma vaavaai i le auala na tali atu ai tagata i le valaaulia a Moronae e tau mo le saolotoga. O le feagaiga ua faamatalaina i le fuaiupu 20 o se folafolaga faapitoa sa faia e lenei vaega o sa Nifae ma le Atua.

E tusa ai ma le Alema 46:20, aisea na manao ai Moronae ia sa Nifae e faia se feagaiga ma le Atua o le a latou puipuia a latou aia tatau ma la latou tapuaiga?

E pei ona faamaumauina i le Alema 46:28–37, o sa Nifae o e sa faatasi atu ma le Taitaiau o Moronae sa latou pueina le vaegaau a Amalekia. Ae peitai, o Amalekia ma isi e toaitiiti na sosola ese ma faatasi ma sa Lamana. O le toatele o e na mulimuli ia Amalekia o e na pueina ua osi feagaiga e lagolagoina le saolotoga. O i latou sa le faia sa fasiotia i latou. Mai aafiaga o sa Nifae, e mafai ona tatou aoao lenei mataupu faavae: Afai tatou te faamaoni i le tausia o poloaiga e pei ona sa faia e le Taitaiau o Moronae, o le a faamalosia ma faamanuia i tatou e le Atua.

Ina ua tuanai le taua, sa sisi e le Taitaiau o Moronae le tagavai o le saolotoga i luga o olo uma o sa Nifae e avea o se “tagavai” po o se faamanatu i mea sa latou osi feagaiga ai e tau mo ma puipuia ai (tagai Alema 46:36).

I le tamaitusi o le Mo le Malosi o le Autalavou , na saunoa mai le Au Peresitene Sili: “O matou alii ma tamaitai talavou pele, ua i ai lo matou talitonuga tele ia te outou. O outou o atalii ma afafine faapelepele o le Atua ma e manatu tele mai o Ia ia te outou. Ua outou o mai i le lalolagi i se taimi o le tele o avanoa faapea foi ma le tele o luitau. O tulaga faatonuina i lenei tamaitusi o le a fesoasoani ia te outou i filifiliga taua o loo outou faia i le taimi nei ma [filifiliga] o le a faia i le lumanai. Matou te folafola atu a outou tausia feagaiga na outou osia atoa ai ma nei tulaga faatonuina, o le a faamanuiaina outou i le mafutaga ma le Agaga Paia, o le a tuputupu ae malosi atili lo outou faatuatua ma molimau, ma o le a outou olioli i le fiafia faateleina ” ([2011], ii).

Mai mea ua outou aoao mai i lena savali mai le Au Peresitene Sili, tali fesili nei i lau api talaaga mo le suesueina o tusitusiga paia.
1. O a folafolaga ua faia mo oe pe afai e te tausia feagaiga o le talalelei ua e osia ma tulaga faatonuina i le tamaitusi o le Mo le Malosi o le Autalavou?
2. Vaavaai i le itulau o le anotusi o le tamaitusi o le Mo le Malosi o le Autalavou , ma filifili se tulaga faatonuina se tasi i le tamaitusi. E faapefea e le tausia o lenei tulaga faatonuina ona faamanuia lou olaga,ma pe mafai faapefea ona faamanuia ai lou olaga i le lumanai?

Alema 47

Ua avea Amalekia ma tupu o sa Lamana e ala i le faalataina ma le taufaasese

O le a se mea e te faia pe afai o loo e i ai i le taua ma ua tuuina atu e se tasi ia te oe se tusi ua faaali atu ai fuafuaga o le a faia e lou fili e faaumatia ai oe ma lou aiga? Alema 47 e mafai ona tuuina mai se malamalamaaga i fuafuaga a lo tatou fili, o le tiapolo.

Ua faamaumauina i le Alema 47 le tele o le taufaasese sa faaaoga e Amalekia ina ia avea ai ma tupu o sa Lamana ina ia mafai ona ia taitaia vaegaau a sa Lamana i le taua e faasagatau atu i sa Nifae. O lona faamoemoega sili o le aumaia o sa Nifae uma i le nofo pologa, faatasi ma ia o le latou tupu.

Na muamua o atu Amalekia ma e na mulimuli ia te ia i le nuu o Nifae, lea sa nonofo ai sa Lamana. Na naunau le tupu o sa Nifae e siitau atu ia sa Nifae, ae o le toatele o ona tagata sa fefefe. O lea na fai atu ai le tupu ia Amalekia ina ia faamalosia sa Lamana palaaai e auai i le taua. Sa savali atu Amalekia i le mauga sulufai lea ua sosola i ai nei tagata, ae sa le manao o ia e fesoasoani i le tupu. Sa manao o ia e avea ma taitai o tagata fefefe o sa Lamana e ala i le faaseseina o lo latou taitai o Leoneti i le sau i lalo mai lana mauga sulufai. Na faamoemoe Amalekia e fasioti ia Leoneti i mea oona pe a sau i lalo.

Suesue le Alema 47:10–12. E fia taimi na faaosooso ai e Amalekia ia Leoneti e aluese mai lona nofoaga o le saogalemu? Faitau foi le Alema 47:17–19. Na faapefea ona fasioti e Amalekia ia Leoneti ina ua sau o ia i lalo mai le mauga?

Sa aoao mai Elder Robert D. Hales o le Korama a Aposetolo e Toasefululua o tagata o aso nei o lo o taumafai e faaleaga lo tatou faatuatua ma le molimau e ala i le faaosoosoina o i tatou e tuua o tatou nofoaga o le saogalemu faaleagaga ma oo atu i le teritori o le tiapolo: “I le Tusi a Mamona, ua tatou faitau ai e uiga ia Le’oneti ma ana au sa tolauapi i luga o se mauga. Sa tauanau e Amalekia taufaalata ia Le’oneti e ‘alu ifo i lalo’ la te fetaiai ma ia i le vanu. Ae ina ua tuua e Le’oneti le mauga, sa fa’aona o ia ‘i le mea e gata mai ai’ seia oo ina oti ai o ia, ma pauu atu ai ona tagata i lima o Amalekia (tagai Alema 47). O feupuaiga ma tuuaiga, e maunu ai e nisi tagata i tatou ina ia tuua o tatou tulaga maualuluga. O le eleele maualuga, o iina o i ai le malamalama. …O le eleele saogalemu lena. E moni ma o iina o i ai le malamalama” (“Lototele Faakerisiano: O Le Tulaga Manaomia o se Soo,” Ensign po o le Liahona, Nov. 2008, 74).

Tali le fesili lenei, i lau api talaaga mo le suesueina o tusitusiga paia:
1. O a ni auala o loo saili ai e Satani ina ia maua ai i tatou e “o mai ai i lalo” mai nofoaga maualuga faaleagaga?
2. Pe e te manatu ea o loo taumafai Satani e faasufi le autalavou e tuu i lalo “lemu” a latou tulaga faatonuina? O le a se faataitaiga o le ala o loo ia taumafai ai e faia lenei mea?
3. O le a se mea faapitoa e mafai ona e faia ina ia tumau ai i le nofoaga maualuga faaleagaga? O a tulaga faatonuina o le talalelei e te manao e galue i ai ina ia e le tuu i lalo “lemu” lenei tulaga faatonuina?

E pei ona sa ia faia ia Amalekia, ua saili Satani e faatamaia i tatou ma faasufi lemu i tatou e tuu i lalo a tatou tulaga faatonuina.

Alema 48–49

Na musuia e le Taitaiau o Moronae ia sa Nifae e faamalolosia i latou lava i le faaletino ma le faaleagaga

A o taumafai Amalekia ia maua le pule e ala i le “pepelo ma le taufaasese” (Alema 48:7) i sa Lamana ma sa Nifae, sa ese auala na galue ai Moronae. Faitau le Alema 48:7–10, ma vaavaai mo mea sa fai e Moronae ina ua ia iloa e le pine ae taitai e Amalekia ia vaegaau a sa Lamana e faasagatau atu ia sa Nifae. Atonu e te manao e faailoga manatu nei: (1) Sa ia saunia tagata ina ia faatuatua i le Atua i taimi o faigata (tagai fuaiupu 7). (2) Sa ia fesoasoani i tagata e faamalosia vaega o loo latou vaivai ai (tagai fuaiupu 8–9). (3) Sa ia saunia tagata e lagolago ma puipuia le “faamoemoe o Kerisiano,” po o le Ekalesia (tagai fuaiupu 10).

E faapei ona fesoasoani Moronae i ona tagata ia saunia mo ma tumau i taimi faigata, ua tuuina mai e taitai o le Ekalesia i o tatou taimi fautuaga e fesoasoani ia i tatou e saunia ai mo taimi faigata. Mafaufau e tusi upumoni nei i au tusitusiga paia e faalatalata i le Alema 48:7–10: A o tatou mulimuli i fautuaga a auauna a le Alii, o le a saunia i tatou mo faigata o le olaga.

Na muai sauniuni sa Lamana e osofaia le aai o Amonaea ona sosoo ai ma le aai o Noa, lea na avea ma aai vaivai o sa Nifae. Faitau le Alema 49:4–5 e iloa ai le tali a sa Lamana ina ua latou iloa sauniuniga a sa Nifae i le aai o Amonaea. Na tonu ia sa Lamana e le osofaia le aai ona sa saunia lelei lava e tali atu i le osofaiga. Faitau le Alema 49:12–14 e iloa ai le tali atu a sa Lamana ina ua latou taumafai e osofaia le aai o Noa.

Faaavanoa ni nai minute e faamanatu ai ni lauga mai le konafesi aoao talu ai nei (i le Ensign po o le Liahona). I lau api talaaga mo le suesueina o tusitusiga paia, otooto le fautuaga na tuuina mai e se failauga e toatasi pe sili atu. E mafai faapefea e lenei fautuaga ona fesoasoani e te saunia ai mo taimi faigata i lou olaga? E mafai faapefea ona e faaaoga lenei fautuaga i lou olaga?
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Alema 45–49 ma faamaeaina lenei lesona i le (aso).

Fesili, mafaufauga, ma manatu faaopoopo ou te fia faasoa i lou faiaoga: