1 Nifae 12–14

Folasaga

O le tala i le faaaliga a Nifae, o loo amata i le 1 Nifae 11, o loo faaauau i le 1 Nifae 12–14. I lana faaaliga na vaai ai Nifae i mala matautia, e aofia ai le faaumatiaga mulimuli o ana fanau. Na ia vaai i tagata amioleaga ua aveese upu moni manino ma pele mai le Tusi Paia, ma amata ai le tautevateva o le toatele faaleagaga. Ae ui i lea, na aumaia e le faaaliga a Nifae ia te ia le mafuaaga mo le faamoemoe tele i le lumanai. Na ia vaaia Kolomupasa ma le nofoia e tagata o Amerika. Na ia vaaia o le a saunia e le Alii le ala mo le Toefuataiina o le talalelei, e aofia ai le toefuataiina o le tele o upu moni manino ma pele na leiloloa. Na molimauina e Nifae le ala o le a fesoasoani ai le Alii ma puipui e ola amiotonu i aso e gata ai. A o e suesue i le 1 Nifae 12–14, mafaufau loloto i le taua i lou olaga o upu moni manino ma pele o loo aoaoina i le Tusi a Mamona ma isi tusitusiga paia o aso e gata ai. A o e taumafai e ola amiotonu ma faamamalu au feagaiga ma le Atua, e mafai foi e oe ona manumalo i le leaga.

1 Nifae 12

Ua vaai Nifae i le lumanai o nuu o Sa Nifae ma Sa Lamana

I le 1 Nifae 12, na faamatalaina e Nifae mea na ia vaaia mo le lumanai o ana fanau ma lo latou aafiaga i faatosinaga o loo faatusaina i le puao o le pogisa ma le fale tele ma le ateatea. Na ia faaaogaina le upu fanau e faatatau i tupuaga.

Na vaai Nifae o nisi o ana fanau o le a taliaina faamanuiaga uma o le Togiola. Ae ui i lea, na ia vaai foi o ana fanau o le a iu lava ina faaumatia e Sa Lamana. Faitau 1 Nifae 12:19, ma vase lalo o mafuaaga na faaumatia ai Sa Nifae. Mafaufau e uiga i le ala e mafai ai ona e puipuia oe mai le faamaualuga ma aloese mai faaosoosoga a le tiapolo.

1 Nifae13:1–9

Ua vaai Nifae i le lotu tele ma le inosia

Lio soo se taaloga o nei taaloga na e taalo ai pe matamata ai, ma faaopoopo i le lisi nisi lava taaloga na e taalo pe na matamata ai:

Soka
Kirikiti
Pasiketipolo
Peisipolo
Tenisi i le Laulau
Tenisi
Lakapi
Tagapolo i le Aisa
Volipolo
Lakapi Amerika

I taaloga faapolofesa, e masani ona suesue e au ia taaloga talu ai a au latou te fetaui ma a latou auala e taaalo ai ae latou te lei tauva. O le malamalama i le faamoemoega o le fili, o auala, ma fuafuaga e mafai ona fesoasoani e saunia ai i tatou e puipuia i tatou lava mai ia i latou.

I le 1 Nifae 13, na faamatalaina e Nifae le mea na ia vaaia e uiga ia i latou o le a tetee i le Ekalesia a le Atua i aso e gata ai. Faitau 1 Nifae 13:1–6, ma faailoa mai le mea na vaaia e Nifae o le a faatuina i Nuuese ma le tala a le agelu e uiga i lena mea.

O lenei “ekalesia tele ma le inosia” na vaaia e Nifae e le faatusa i se vaega faapitoa se tasi, faapotopotoga, po o se lotu. Na faamalamalamaina e Elder Bruce R. McConkie o le Korama a Aposetolo e Toasefululua faapea “ … o faapotopotoga o soo se igoa po o se natura … ua fuafuaina e aveina tagata i se ala e taitaiesea ai mai le Atua ma ana tulafono ma mai le faaolataga o le malo o le Atua” (Mormon Doctrine, 2nd ed. 1966], 137–38). Atonu e te manao e tusi le faamalamalamaga a Elder McConkie i tafatafa o le 1 Nifae 13:4–6.

Faitau 1 Nifae 13:8–9, ma faailoa mai manaoga ma faamoemoega o le lotu tele ma le inosia.

Tali le fesili lenei, i lau api talaaga mo le suesueina o tusitusiga paia: Aisea e te manatu ai e taua le iloa e faatulagaina e Satani ana autau e taitaiese i tatou mai le Atua ma Ana tulafono?

A o e suesue atili i le 1 Nifae 13, o le a e vaai i se tasi auala ua taumafai ai le lotu tele ma le inosia e poloka i latou o loo sailia le Faaola.

1 Nifae13:10–42

Ua vaai Nifae i Nuuese i le lumanai ma le Tusi Paia, Tusi a Mamona, ma isi tusitusiga paia o aso e gata ai

Ina ia tau ma aafiaga o le lotu tele ma le inosia, na saunia e le Alii le ala mo le Toefuataiga o Lana talalelei. I le 1 Nifae 13, na muai vaai Nifae i na taualumaga e pei o Kolomupasa ma tagata malaga lolotu ua o mai i le laueleele o le folafolaga ona o “le Agaga o le Atua … galue [mau pe galue] i luga [latou]” (tagai 1 Nifae 13:12–13). Na ia muai vaaia foi le Taua a Amerika mo le Tutoatasi—ina ua “o Nuuese sa latou o ese atu i fafo mai le faatagataotauaina” na tau ma lo “latou tina Nuuese [o e] ua faapotopoto faatasi … e tau faasaga ia te i latou,” ae na “laveaiina e le mana o le Atua mai lima o isi atunuu uma” (tagai 1 Nifae 13:16–19

Ata

tusitusiga paia

Faitau 1 Nifae 13:20–23, ma faailoa mai le tusi na vaai Nifae i tagata o nuuese na muai taunuu i le laueleele o le folafolaga o tauaveina e i latou.

Tusi le “Tusi Paia” i au tusitusiga paia i autafa o le 1 Nifae 13:20. Na faamalamalamaina e Nifae o le Tusi Paia o le a “aoga tele” ia i tatou (1 Nifae 13:23) ma ina ua faatoa tusia “sa i ai le atoatoa o le talalelei a le Alii” (1 Nifae 13:24). Faaaoga le 1 Nifae 13:26–27, 29 e faatumu ai avanoa o le otootoga lenei:

O le lotu tele ma le inosia na aveesea “le tele o vaega ia ua ma sili ; ma e tele foi a le Alii ua latou aveese” mai le Tusi Paia (1 Nifae 13:26). Na latou aveesea nei mea ia ala sao o le Alii, ina ia latou i mata ma loto o le fanauga a tagata” (1 Nifae 13:27). Ona o nei mea ua le maua, “ua matua toatele lava ua ” (1 Nifae 13:29).

Toe faitau le otootoga i luga pe a uma ona faatumu avanoa.

O se tasi o faamoemoega o le lotu tele ma le inosia e “faasese ai ala sao o le Alii” (1 Nifae 13:27) e ala i le aveesea o le tele o upu moni manino ma pele. Ia “faasese” o le faia ia faatafa pe fulitua mai se mea e sao. Mafaufau i taunuuga leaga o le faatafa pe fulitua mai “ala sao o le Alii.”

Faaaoga au tusitusiga paia e tali ai fesili nei:

E tusa ai ma le 1 Nifae 13:34, o le a le mea o le a aumaia e le Alii ona o lona alofa mutimutivale? (Atonu e fesoasoani le iloa o le suafa “Tamai Mamoe” e faatatau i le Faaola, o Iesu Keriso.)
I le 1 Nifae 13:35–36, o le a le mea na fetalai i ai le Faaola o le a natia ia oo mai i Nuuese?
I le 1 Nifae 13:36, o le a le mea na fai mai le agelu o tusia i talafaamaumau sa natia—le Tusi a Mamona?
E faaopoopo atu i le Tusi a Mamona, o a “isi tusi” e ono faasino i ai le 1 Nifae 13:39?

Faitau 1 Nifae 13:40–41, ma vase lalo o mea o le a faailoa atu e le Tusi a Mamona ma nei “isi tusi” i tagata uma. E taua le iloa e tatau ona tatou o mai i le Faaola “e tusa ma afioga o le a faatutuina e le fofoga o le Tamai Mamoe” (1 Nifae 13:41)—tusitusiga paia.

E ala atu i lenei vaega o le faaaliga a Nifae, ua tatou aoao ai o le Tusi a Mamona ma tusitusiga paia o aso e gata ai e toefuataiina upu moni manino ma pele e fesoasoani ia i tatou ia iloa ai o Iesu Keriso o le Alo o le Atua ma e fesoasoani tatou te iloa ai le ala e o mai ai ia te Ia.

Tali fesili nei, i lau api talaaga mo le suesueina o tusitusiga paia:
1. Na faapefea e upu moni manino ma pele i le Tusi a Mamona ma isi tusitusiga paia o aso e gata ai ona faamalosia lau molimau ia Iesu Keriso?
2. Na faapefea ona latou fesoasoani ia te oe ia malamalama ma ola i Lana talalelei?

Ia faaalu se taimi e iloilo ai po o aoga lau suesuega o tusitusiga paia e fesoasoani ia te oe e latalata atili atu ai i le Faaola.

1 Nifae 14:1–17

Na vaai Nifae i le taua i le va o le lotu tele ma le inosia ma le Ekalesia a le Tamai Mamoe a le Atua

I le 1 Nifae 14 tatou te faitau ai i le taua i le va o le lotu tele ma le inosia ma le Ekalesia a le Tamai Mamoe a le Atua Faitau 1 Nifae 14:10–13, ma faailoa mai po o fea le itu o le a tele ai tagata. Matau i le 1 Nifae 14:12 pe aisea e toalaiti ai le numera o tagata e lagolagoina le Ekalesia a le Tamai Mamoe ma pe aisea e mafai ai e le lotu tele ma le inosia ona faapotopoto le tele o tagata.

O le a sou lagona pe afai ua toatele atu le isi vaega ao tauina se taua? Faitau 1 Nifae 14:14, ma vase lalo o fuaitau o faailoa mai ai le fesoasoani “le au paia o le ekalesia a le Tamai Mamoe” ma “tagata o le feagaiga a le Alii”o le a latou mauaina ao latou tau ma le leaga.

O se mataupu faavae taua o le talalelei o loo aoaoina i le 1 Nifae 14:1–17 o le a o tatou ola amiotonu ma tausi a tatou feagaiga, o le a fesoasoani ia i tatou le mana o le Atua e manumalo ai i le leaga.

Tusi se parakalafa puupuu i lau api talaaga mo le suesueina o tusitusiga paia e faamalamalama ai pe faapefea e le avea ma “tagata o le feagaiga a le Alii” ma “faaauupegaina i latou i le amiotonu” (ola amiotonu) ona fesoasoani ia te oe e manumalo i faaosoosoga na semanu e taitaiese ai oe mai le Atua ma Ana tulafono.

Na vaai Nifae i aso e gata ai o i latou e lagolagoina le lotu tele ma le inosia o le a feagai ma lo “latou faaumatiaga atoa” (1 Nifae 14:3). E mafai ona e mautinoa o le a manumalo le malo o le Atua i aso e gata ai.

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le 1 Nifae 12–14 ma faamaeaina lenei lesona i le (aso).

Fesili, mafaufauga, ma manatu faaopoopo ou te fia faasoa i lou faiaoga: