Iunite 16: Aso 4
Alema 14–16
Folasaga
Ina ua maea ona faalogo i talaiga a Alema ma Amoleka, o nisi o tagata o Amonaea sa talitonu ma salamo, e aofia ai ma Seseroma. O isi sa feita ma na mafua ai ona faafalepuipui ai Alema ma Amoleka. O tagata amioleaga i Amonaea sa lafoai i fafo alii sa talitonu ma susunu a latou ava ma fanau. Ina ua tuanai aso e tele, na faasaoina e le Alii Alema ma Amoleka mai le falepuipui ma faatafunaina taitai amioleaga o Amonaea. I Saitoma, na mafatia ai Seseroma i le faaletino ma le faaleagaga. Sa ia tautino atu lona faatuatua ia Iesu Keriso ia Alema ma na faamaloloina o ia. Ina ia faataunuuina le valoaga, sa faaumatia e se au a sa Lamana le aai o Amonaea. O le taitaiga faaperofeta a Alema na mafai ai e au a sa Nifae ona taofia le malosi o sa Lamana. O Alema, Amoleka, ma isi e toatele na faamalosia le Ekalesia i laufanua o sa Nifae.
Alema 14
Ua faafalepuipui ia Alema ma Amoleka ma sa lafoaiina ē sa talitonu i fafo pe susunuina
Mafaufau i se mea sa e vaai pe faalogo i ai e uiga i se tasi e amiotonu ae ua mafatia i lima o se isi tagata—o se tulaga o se tasi ua sauaina mo lona talitonuga, mo se faataitaiga. Manatunatu loloto i fesili nei:
-
O a lagona sa e maua mo le tagata ua mafatia?
-
O le a sou lagona i le tagata na ia faaoo le tiga?
-
Aisea e te manatu ai o nisi o taimi e tutupu ai mea leaga ia i latou e mama ma amiotonu?
Ao e faitau le Alema 14, faatatau nei fesili i aaafiaga a Alema ma Amoleka.
Faitau le Alema 14:1–10, ma vaavaai po o ai na mafatia ma pe na faapefea ona mafatia. Ona faatumu lea o le siata lenei:
|
O Ai na Mafatia? |
E Faapefea ona Latou Mafatia? |
|---|---|
E pei ona faamaumauina i le Alema 14:10, o le a le mea na manao Amoleka e na te faia? Faitau le Alema 14:11, ma faailoa mai se upumoni e mafai ona fesoasoani i se tasi o loo tauivi e fia malamalama pe aisea e tuu ai le avanoa i nisi taimi i e amioleaga e faatiga ai i latou o loo mama pe amiotonu.
O se tasi o auala e faailoa ai le upumoni mai le Alema 14:11 o le: E faatagaina e le Alii e amiotonu ina ia mafatia i lima o e amioleaga ina ia tonu ai Lana faamasinoga. Ia manatua sa faaali atu ia Alema o i latou na maliliu ua talia e le Alii “i le mamalu” (Alema 14:11). I le aoao atu e uiga i lenei mea na tupu ma se malamalamaaga e faavavau, na saunoa Peresitene Henry B. Eyring o le Au Peresitene Sili: “Na tuuina atu ia Amoleka le faamanuiaga e iloa ai le lelei ma le sao o le Atua e ui i faalavelave matautia” ” (“Amulek: The Blessings of Obedience,” in Heroes from the Book of Mormon [1995], 110).
Faitau le Alema 60:12–13, ma faatatau i le Alema 14:10–11. Ua tatou aoao i mafuaaga ua faatagaina ai le mafatia o e amiotonu, o le faamauina lea o a latou molimau i o latou ola (tagai MF&F 135:3) ma tutulai o ni molimau e faasaga atu i e amioleaga.
O le malamalama i le mafuaaga ua faatagaina ai e le Atua ina ia mafatia e amiotonu e mafai ona avea ma se mataupu faavae e faigata ona tatou malamalama ai. Toe mafaufau i le saunoaga lenei mai ia Peresitene Spencer W. Kimball ina ia faalautele ai le malamalama i le mafuaaga ua faamatuu atu ai e le Atua tagata e faaaoga lo latou faitalia, e tusa lava pe latou te faia filifiliga sese:
“Afai tatou te vaavaai i le olaga faaletino o se atoaga o le olaga, o lona uiga la, o le tiga, faanoanoa, toilalo, ma le puupuu o le olaga o le a avea ma mala. Ae afai tatou te vaavaai atu i le olaga o se mea e faavavau lea e oo atu i tua i le muai olaga ma oo atu ai i le faavavau i le lumanai pe a mavae le oti, ona mafai lea ona sagatonu la tatou vaai i mea e tutupu. …
“… Afai e puipuia tagata amiotonu uma ma faaumatia tagata leaga, o le a leai se aoga o le polokalama atoa a le Tama ma o le a faamuta ai foi ma le mataupu faavae o le talalelei, o le filifiliga saoloto. Semanu o le a leai se tagata e ola i le faatuatua” ” (Aoaoga a Peresitene o le Ekalesia: Spencer W. Kimball [2006], 15).
-
I lau api talaaga mo le suesueina o tusitusiga paia, faamaumau pe faapefea e upumoni ua e aoaoina i le Alema 14:11 ma le saunoaga a Peresitene Kimball ona fesoasoani ia e malamalama ai pe aisea e faamatuu atu ai e le Atua i nisi o taimi e amiotonu ia mafatia i lima o e amioleaga.
Faitau le Alema 14:12–13, ma vaavaai mo mea na aoao atu e Alema ia Amoleka e fesoasoani ai ia te ia ina ia tumau i tofotofoga sa laua oo i ai. Aisea e te manatu ai sa mafai e Alema ona tali atu ma le mautinoa?
Faitau le saunoaga lenei mai a Elder Richard G. Scott o le Korama a Aposetolo e Toasefululua e fesoasoani ia te oe e malamalama ai mea sa aoao atu e Alema ia Amoleka e uiga i le faalagolago i le Alii: “O le soifuaga lenei o se a’oa’oga i le faalagolago atoatoa—faalagolago ia Iesu Keriso, faalagolago i Ana aoaoga, faalagolago i lo tatou atamai e taitaia ai e le Agaga Paia ia tatou usiusitai i ia aoaoga mo le fiafia i le taimi nei ma se soifuaga aoga fiafia sili e faavavau. O le faalagolago o lona uiga o le usiusitai lea ma le loto i ai e aunoa ma le iloaina o le i’uga amataga (tagai Faataoto 3:5–7). Ina ia fua mai, e tatau ona sili atu le malosi ma tumau lou faalagolago i le Alii, nai lo lou faalagolago i ou lava lagona ma lou poto masani” (“Faalagolago i le Alii,” Liahona, Ian. 1996, 19).
Atonu e fesoasoani le faamamafa o lenei upumoni e ala lea i le tusia i talaane o le Alema 14:12–13 i lau tusitusiga paia: A tatou faalagolago i le Alii, o le a Ia faamalosia i tatou i taimi o o tatou puapuaga.
-
-
E i ai nisi o le au taaalo a se alii talavou na teena o ia ma faifai pe taufaalili ia te ia e tusa ai ma lona usiusitai i tulaga faatonuina o le talalelei. E foliga mai ua latou fuafua le fuafuaina o gaoioiga tuufaatasi i fafo atu o taimi e faia ai ni toleniga aua ua latou iloa o le a le auai o ia ona o ona talitonuga.
-
Ua tusi talosaga atu se tamaitai talavou mo se galuega i se faleoloa o loo galue ai se uo lelei. Sa le maua e ia le galuega, ma e sa tau ane e lana uo i se taimi mulimuli ane na faapea mai le pule o le faleoloa e na te le faafaigaluegaina lava se Mamona.
-
Pe a talosagaina e se alii talavou se vaega o isi alii talavou i le aoga e taofi le faaaogaina o le gagana masoa i ona tafatafa, sa latou tulei faataamilo o ia ma faamatau e faatiga ia te ia e sili atu pe afai na te toe tau atu ia i latou le ala e talanoa ai.
-
Faitau le Alema 14:14–17, ma mafaufau e uiga i le ala na fesoasoani ai le faatuatua o Alema ma Amoleka ia i latou a o faaauau ona mafatia i latou i lima o taitai amioleaga i Amonaea. O le a sou manatu o le leai o se tali atu i lena tulaga o le tali sili lea? (Tafai foi Mataio 27:11–14.)
Alema 14:18–28 ua tau mai le ala na mafatia ai Alema ma Amoleka i ni mea se tele a o le i faasaoina i laua e le Atua ma faaumatia le toatele o taitai amioleaga o Amonaea. O le fasifuaitau o le “lilivau o o latou nifo” (fuaiupu 21) o le uiga ua ū faatasi o latou nifo i le ita tele.
-
E pei ona faamaumauina i leAlema 14:25, o le a le mea na mafai ai e Alema ma Amoleka ona tutu i o laua vae? Faitau le Alema 14:26–29, ma faailoga fasifuaitau ma upu e te lagona e sili ona faamaonia ai lenei upumoni: Afai tatou te valaau atu i le Alii i le faatuatua, o le a Ia faamalosia i tatou mai o tatou puapuaga ma laveaiina i tatou i Lona ala ma Lona lava taimi.
E mafai e le Alii ona faaloaloa Lona mana ma laveaiina outou mai tofotofoga ma puapuaga i Lona lava ala ma le taimi. A o tatou aoao e faalagolago atu i le finagalo o le Alii, o le a o tatou maua le malosi sili ma le mana e tumau ai i faigata i o tatou olaga.
Alema 15–16
Ua manuia Seseroma, ua faaumatia e se vaegaau a sa Lamana ia Amonaea, ma ua faaauau ona talai atu Alema ma Amoleka ia sa Nifae.
Ina ua tuua Amonaea, na o atu Alema ma Amoleka i le aai e lata ane o Saitoma, lea sa latou maua ai e sa talitonu mai Amonaea, e aofia ai ma Seseroma. Faitau le Alema 15:3–5 e iloa ai le tulaga o Seseroma.
Mafaufau i mea nei: O le a le mafuaaga o le ma’i o Seseroma? O le a le mea na faia e Seseroma e maua ai le toomaga ma le filemu?
Faitau ma le faaeteete le Alema 15:6–10, ma vase fasifuaitau e lua pe tolu e faailoa ai sa fesoasoani Alema ia Seseroma e taulai atu ia Iesu Keriso ma Lana Togiola. Ina ia malamalama i se auala e tasi e mafai ai e taitai perisitua ona fesoasoani i tagata e maua le alofa mutimutivale e ala i le Togiola, faitau le aafiaga lenei mai ia Elder Jay E. Jensen o le Au Peresitene o le Fitugafulu:
“A o ou galue o se epikopo, sa ou molimauina ia faamanuiaga o le Togiola i olaga o tagata o le Ekalesia o e sa faia ni solitulafono matuia. …
“Sa tafafao faamasani se talavou nofofua matua o la matou uarota ma se tamaitai talavou Sa le pulea lelei o la’ua lagona faamemelo. Na sau le alii ia te au mo se fautuaga ma se fesoasoani. E faalagolago i mea sa ta’u mai ma le uunaiga a le Agaga ia te au, faatasi ma isi mea, sa le faatagaina o ia e tagofia le faamanatuga mo se vaitaimi. Sa ma talanoa e le aunoa ina ia mautinoa ua salamo, ma ina ua mavae se taimi talafeagai, sa ou toe faatagaina o ia e ai ma inu i le faamanatuga.
“A o ou nofo i luga o le tulaga i lena sauniga faamanatuga, na taulai atu o’u mata ia te ia ina ua ia ‘ai ma inu ma le agavaa i le faamanatuga. Sa ou molimauina lima o le alofa mutimutivale, alofa, ma le mamalu o siosiomia o ia a o faamafanafanaina lona agaga i le faamalologa a le Togiola ma sii ese lana avega, ma ua maua ai le faamagaloga na folafolaina, filemu, ma le fiafia” (“I Lima o le Mamalu,” Ensign po o le Liahona, Nov. 2008, 49).
E mafai e epikopo ma isi taitai perisitua ona fesoasoani ia tatou maua le alofa mutimutivale ma le malosi tatou te manaomia e ala i le Togiola a Iesu Keriso. O a faamaoniga e te maua i le Alema 15:11–12 sa salamo Seseroma ma ua maua le alofa mutimutivale o le Alii?
O se tasi o mataupu faavae e mafai ona e tusi i lau tusitusiga paia po o le api talaaga mo le suesueina o tusitusiga paia mo le Alema 15:6–12 o le: E ala i lo tatou faatuatua ia Iesu Keriso, e mafai ona faamalolo ma faamalosia i tatou. E tusa ai ma Alema 15:16, 18, e faapefea ona iloatino lenei mataupu faavae i le olaga o Amoleka?
Sa atiae e Alema ma Amoleka le Ekalesia i tagata o Saitoma ona toe foi lea i Saraemila.
I le Alema 16 ua tatou faitau ai sa osofaia e le vaegaau a sa Lamana laueleele o sa Nifae ma faaumatia le aai o Amonaea, ma faataunuuina ai le valoaga a Alema ma Amoleka pe afai e le salamo tagata o le a faaumatia i latou (tagai Alema 9:12). A o e faitau i le Alema 16, vaavaai mo po o ai na liliu i ai sa Nifae mo se fesoasoani ina ia latou faatoilalo vaega’au a sa Lamana. Faatusatusa lenei mea ia oe lava taua ma fili o loo feagai ma oe.
-
Ua ou suesueina le Alema 14–16 ma faamaeaina lenei lesona i le (aso).
Fesili, mafaufauga, ma manatu faaopoopo ou te fia faasoa i lou faiaoga: