Alema 36

Folasaga

Ina ua foi mai Alema mai lana misiona i sa Sorama, sa ia faapotopoto i ona atalii e toatolu ma tuuina atu fautuaga taitasi i [atalii] taitoatasi (tagai Alema 35:16). O lana apoapoaiga ia Helamana o loo faamaumauina i le Alema 36–37, o lana apoapoaiga ia Sepulona o loo faamaumauina i leAlema 38, ma o lana apoapoaiga ia Korianetona o loo faamaumauina i le Alema 39–42. Sa molimau atu Alema ia Helamana o le a faasaoina e le Atua i latou ua tuu atu lo latou talitonuga ia te Ia. Ina ia faailoa atu lenei upumoni, sa faamatala e Alema le faasaoina mai o ia mai le tiga o le agasala i le tele o tausaga ua tuanai. I le maea ai le valaau atu i le suafa o Iesu Keriso, ua fanau o ia i le Atua ma faatumuina i le olioli. Ona ia galue lea e aumaia isi ia Iesu Keriso.

Alema 36:1–5

Ua aoao e Alema lona atalii o Helamana e uiga i le mana o le Atua e lagolagoina i tatou i o tatou tofotofoga.

Manatunatu loloto pe faapefea e se molimau po o se aoaoga faapitoa o se tagata o le aiga, uo, po o se taitai o le Ekalesia ona faamanuiaina ai lou olaga.

Faitau le Alema 36:1–5, ma vaai faalemafaufau ia te oe lava i le tulaga o Helamana a o ia faalogo i le molimau a lona tama. O le a le mea na manao Alema e manatua e Helamana? (Tagai fuaiupu 2.) O le a le mea na manao Alema e aoao mai e Helamana mai ia te ia? (Tagai fuaiupu 3.)

Tusi le mataupu faavae lenei i lau tusitusiga paia i tafatafa o le Alema 36:3: Afai e tuu atu lo tatou faatuatuaga i le Atua, e Na te lagolagoina i tatou i o tatou tofotofoga ma puapuaga uma. Mafaufau i se taimi na e maua ai se tofotofoga i lou olaga. I le avanoa o loo i ai, tusi ni nai auala sa fesoasoani ai le Atua ma lagolagoina oe i le aluga o lena taimi.

Alema 36:6–22

Ua faamatala e Alema lona fouvale ma faamalamalama le auala na ia maua ai le faamagaloga

Sa faamatala e Alema i lona atalii o Helamana le auala na faasaoina ai e le Atua o ia mai le tiga o ana agasala. Faitau le Alema 36:6–10, ma iloilo le mea na tupu ia Alema i lona talavou a o o atu faatasi ma atalii o Mosaea e saili e faaleaga le Ekalesia.

I le Tusi a Mamona e tolu talaaga o le asiasiga a le agelu ia Alema ma atalii o Mosaea. Alema 36 o loo i ai talaaga sili ona manino o mea na oo ia Alema i le aluga o aso ma po e tolu ina ua le mafai e ia ona minoi pe tautala. (Ina ia faitau i isi tala’aga, tagai Mosaea 27 ma le Alema 38.) Faitau le Alema 36:11–16, ma faailoga upu po o fasifuaitau sa faaaoga e Alema e faamatala ai le fefe po o le tiga sa oo ia te ia ina ua tuanai le faaali mai o le agelu.

Sa fesoasoani mai Peresitene Boyd K. Packer o le Korama o Aposetolo e Toasefululua ina ia tatou malamalama i le uiga o le tiga ma le atuatuvale

“O le tiga o lona uiga o le ‘mafatia.’ O aso anamua, o se fata sa faaaoga e faataoto ai se tagata mafatia faatasi ma ona tapulima uma ma tapuvae e nonoa i se auvili lea e mafai ai ona faataavili ma mafua ai le tiga e le lavati.

“O se suotosina o se uamea lea e i ai ni ona tala matuitui. Afai e toso i luga o le palapala, e faapena ona sunui i lalo ma sua a’e ai i luga le palapala. E masani ona tau soo mai e tusitusiga paia ia mafaufau ma agaga ua “atuatuvale” i le tausalaina” (“O Le Pa’i Mai o le Aao o le Matai,” Liahona, Iulai 2001, 25).

I lau api talaaga mo le suesueina o tusitusiga paia, tusi pe aisea ua e manatu ai sa faaaoga e Alema upu mamafa e faamatala ai ona lagona. Tusi foi pe na faapefea e nei upu ona faamatala le tausalaina ma le tiga o se tagata sa agasala ae le i salamo.

Atonu e te manao e tusi le upumoni lenei i lau tusitusiga paia i tafatafa o le Alema 36:11–16: O le agasala e taitai atu ai i le tiga ma le faanoanoa.

Faitau le Alema 36:17–18, ma vaavaai mo mea na manatua e Alema sa valoia mai e lona tama. Ia matau mea sa fai e Alema ina ua ia manatua mea sa aoaoina ai o ia e lona tama.

O Elder Jeffrey R. Holland o le Korama a Aposetolo e Toasefululua na tuuina mai nei malamalamaaga i aafiaga a Alema: “Sa lagona e Alema mea na aoaoina ai o ia e lona tama, ae e sili le taua o le valoaga na ia manatua o se tasi e faatatau i le “afio mai o Iesu Keriso, o le Alo o le Atua e toatasi, e togiola mo agasala a le lalolagi.’ ( Alema 36:17.) O le igoa lena ma o le savali lena e ao i tagata taitasi ona faalogo i ai. Sa faalogo i ai Alema, ma sa ia tagi atu mai le atuatuvale o se seoli o loo mu pea ma le mafaufau e le mapu. ‘E Iesu e, oe le Alo o le Atua, ia e alofa mutimutivale mai ia te au.’ (Alema 36:18.) …Po o a lava isi tatalo tatou te faia, o a lava isi manaoga o loo ia i tatou, o ia mea uma e faalagolago i lena olega: ‘E Iesu e, oe le Alo o le Atua, ia e alofa mutimutivale mai ia te au.’ Ua saunia o Ia e tuuina mai lena alofa mutimutivale. Sa ia totogi i lona lava soifua ina ia tuuina mai” (However Long and Hard the Road [1985], 85).

Mafaufau i tua i se taimi sa e tatalo ai ina ia maua faamanuiaga o le Togiola a Iesu Keriso, e aofia ai faamanuiaga o le faamagaloina mo se agasala. I lau api talaaga mo le suesueina o tusitusiga paia, tusi pe aisea ua e manatu ai e taua le fesili i le Alii mo faamanuiaga o le Togiola i lou olaga.
Faitau le Alema 36:19–22, ma faailoga upu ma fasifuaitau e faamatala ai le auala na suia ai Alema ina ua maea ona ia tatalo mo le alofa mutimutivale. Tusi nisi o nei upu ma fasifuaitau i lau api talaaga mo le suesueina o tusitusiga paia, ma faamatala mea sa latou aoao ai oe e uiga i le mana o le Togiola a le Faaola.

Mai nei mau ua tatou aoao ai i lenei mataupu faavae: Afai tatou te faaaoga le faatuatua i le Togiola a Iesu Keriso, ona Ia faasaoina lea o i tatou mai le tiga o a tatou agasala ma faatumuina i tatou i le olioli. Manatunatu loloto i mea e te mafai ona fai e faaaoga ai le tele o le faatuatua ia Iesu Keriso ina ia faapei o Alema, e mafai ona faasaoina oe mai lagona o le tiga po o le faanoanoa mo au agasala.

Faitau le tulaga lenei, ma mafaufau i le ala e t ono tali atu ai: O se uo sa faitauina le Tusi a Mamona ua fai atu ia te oe mo se fesoasoani e malamalama ai i upu a Alema i le Alema 36:19. Ua fesili lau uo, “Afai ou te manatua au agasala ma lagona pea le faanoanoa mo i latou, o lona uiga ea ua faamagaloina au?”

Faitau le faamalamalamaga lenei mai ia Peresitene Dieter F. Uchtdorf o le Au Peresitene Sili, ma vase lalo o ni fasi fuaiupu e te talitonu o le a fesoasoani tele mo lau uo:

“O le a taumafai Satani e faatalitonu i tatou e le faamagaloina a tatou agasala aua e mafai ona tatou manatuaina. O Satani o le pepelo; e taumafai o ia e faapuaoa la tatou vaaiga ma taitai ese mai ai i tatou mai le ala o le salamo ma le faamagaloga. E le i folafola mai le Atua faapea o le a tatou le manatuaina a tatou agasala. O le manatuaina o le a fesoasoani ia i tatou e aloese mai ai i le toe faia o mea sese lava na. Peitai, afai tatou te tumau i le moni ma le faamaoni, o le a oo ina manifinifi le manatua o a tatou agasala. O le a avea lena ma vaega o le faagasologa o le faamalologa ma le faapaiaga o loo manaomia. Na molimau mai Alema ina ua uma ona ia alaga atu mo le alofa mutimutivale o Iesu, sa mafai lava ona ia manatuaina ana agasala, peitai o le manatuaina o ana agasala sa le toe faaatuatuvale ma pagatia ai o ia, aua sa ia iloa ua faamagaloina o ia (tagai Alema 36:17–19).

“O lo tatou tiutetauave le aloese mai soo se mea e toe aumaia ai le manatua o agasala ua leva. A faaauau pea lo tatou maua o se ‘loto momomo ma le agaga salamo’ (3 Nifae 12:19), e mafai ona tatou talitonuina o le a le ‘toe manatuaina lava [a tatou agasala]’ [MF&F 58:42]” (“Vaega Tonu o le Toe Foi Saogalemu,” Ensign po o le Liahona, Me 2007, 101).

E taua foi ona manatua e le i faapea mai Alema sa ia le toe manatua ana agasala ae sa ia le toe manatua le tiga o ana agasala, ma e sa ia le toe “atuatuvale” i lo latou manatuaina (Alema 36:19). O le salamo moni o le a tafi ese ai le tiga ma le tausalaina o le agasala (tagai Enosa 1:6–8).

I lau api talaaga mo le suesueina o tusitusiga paia, tusi se tali i le uo o loo taua i luga, ma faaaoga le malamalama na e maua mai le faamalamalamaga a Peresitene Uchtdorf. Ia aofia i lau tali pe aisea ua e manatu ai o se faamanuiaga lo tatou manatua pea o a tatou agasala, e ui lava ua tatou le “atuatuvale e manatuaina a [tatou] agasala” (Alema 36:19) ina ua tuanai lo tatou salamo.

Alema 36:23–30

Ua faamatala e Alema le mafuaaga o lona galue pea ina ia aumaia isi i le salamo

O le a sou lagona pe a e faasoa atu se mea’ai manogi ma se uo? Pe a e maua se vaega o talafou fiafia, o le a le mea muamua e te manao e fai? Aisea e te manatu ai o le toatele o tagata ua toetoe lava a i ai se manao vave e faasoa atu mea ua latou faalogo i ai i se isi tagata? Faitau le Alema 36:23–24, ma vaavaai pe faapefea e lagona o loo faamatalaina i nei fesili ona fesootai ma aafiaga o Alema ina ua tuanai lona liua. O a mea sa manao Alema e aafia ai isi tagata?

Faitau le Alema 36:25–26, ma faailoa mai pe faapefea e taumafaiga a Alema e aoao atu le talalelei ona aafia ai o ia ma isi. Faamaea le mataupu faavae lenei, e faalagolago i mea sa e aoao ai e faatatau i le faasoaina o le talalelei mai nei fuaiupu: A o tatou faasoa atu le talalelei i isi, ua tatou maua .

Tusi lau faamatalaga o mataupu faavae ua maea i lau api talaaga mo le suesueina o tusitusiga paia, ma faamatala pe aisea e te talitonu ai e moni lenei mataupu faavae. Ina ia avea ma se vaega o lau faamatalaga, atonu e te manao e faaaofia ai aafiaga ua e maua ma lagona o le olioli mai le faasoaina atu o le talalelei ma isi.

Mafaufau i se tasi e te iloa —o se uo, tagata o le aiga, po o se uso o le uarota po o le paranesi —o e ono manuia mai lau molimau o le Faaola ma Lana talalelei toefuataiina. Manatunatu loloto i auala atonu e te faasoa atu ai lau molimau ma lenei tagata i le ala na laveaiina ai e Iesu Keriso i tatou mai le tiga ma faatumuina i tatou i le olioli. Atonu e te manao e tusi se tusi po o se imeli i lenei tagata, pe e te manao e tusi ni nai manatu e saunia ai mo se taimi faapitoa o le a e talanoa ai ma le tagata.

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Alema 36 ma faamaeaina lenei lesona i le (aso).

Fesili, mafaufauga, ma manatu faaopoopo ou te fia faasoa i lou faiaoga: