Ua aoai e Alema lona atalii faalogogata, o Korianetona, o le na tuulafoai le galuega ma faia le agasala matuia o le faitaaga. Na aoao atu e Alema Korianetona i le matautia o ana faatinoga ma faaali atu lona faanoanoa i le tausalaina o Korianetona i nei faiga sese matuia. Sa poloaiina e Alema Korianetona ina ia tuu le “tuinanau o ou mata” ma ia salamo (Alema 39:9). O le savali a Alema ia Korianetona o loo maua i le Alema 39–42.
Ua faamatala e Alema le matautia o le agasala o le feusuaiga i lona atalii o Korianetona.
Mafaufau i manatu nei: O nisi o agasala e sili atu le matautia nai lo isi agasala.
Tali fesili nei i lau api talaaga mo le suesueina o tusitusig paia: Pe e te ioeina o nisi o agasala e sili atu le matautia nai lo isi agasala? Aisea pe aisea e le [sao] ai?
E pei ona faamaumauina i le Alema 39, sa tuuina atu e Alema fautuaga i lona atalii o Korianetona e mafai ona fesoasoani e te malamalama ai i le matautia o nisi o agasala. Sa faatasi atu Korianetona ia Alema ma lona uso o Sepulona i se misiona e talai le talalelei ia sa Sorama. A o i ai iina, sa faia e Korianetona se agasala matuia o le feusuaiga.
Faitau le Alema 39:1–4, ma vaavaai mo mea sese na faia e Korianetona. Ina ia fesoasoani ia te oe ia malamalama i nei fuaiupu, atonu e fesoasoani le iloa o le fafine talitane o se fafine e lē mama. E taua ona malamalama o le “Alii e le mafai ona vaai i luga o le agasala ma sina tikeri itiiti o le faatagaina ” (MF&F 1:31); o agasala faalefeusuaiga ua sili ona matuia. Ia manatua foi na tuua ma le faamoemoe e Korianetona lana misiona ae mulimuli atu i le fafine talitane o Isapela, lea na mafua ai le matuia tele o lana agasala.
Faitau le Alema 39:5, ma vaavaai pe na faapefea ona faamatala e Alema le matuia o le agasala faalefeusuaiga i isi agasala. O le inosia o se mea e agasala, amioleaga, pe mataga. Mai nei fuaiupu ua tatou aoao ai o le agasala faalefeusuaiga ua inosia i le silafaga a le Alii. Manatunatu loloto pe aisea ua e manatu ai o le agasala faalefeusuaiga ua faatulagaina e sosoo i le fasioti tagata i lona matuia.
Na tuuina mai e Elder Jeffrey R. Holland o le Korama a Aposetolo e Toasefululua lenei faamalamalamaga i le mafuaaga ua inosia ai le agasala faalefeusuaiga i le Alii: “O le tuuina atu o se tulaga matuia i se tuinanau faaletino i se tulaga lautele, o le a le mea o loo taumafai le Atua e tau mai ia i tatou e uiga i lona tulaga i Lana fuafuaga mo alii ma tamaitai uma? Ou te tauina atu ia te outou o loo sa’o lelei le mea o loo Ia faia — o le faufautua mai lea i le fuafuaga lava ia o le ola. Ua manino mai o se tasi o Ona popolega silisili e faatatau i le olaga faaletino o le faapefea lea ona oo mai o se tasi i lenei lalolagi ma le auala e toe alu ese atu ai. Ua Ia faataatiaina ni faatapulaa ma’oti i nei mataupu” (“O Le Mama o le Tagata Lava Ia” Liahona, Ian. 1999, 90).
Faitau palakalafa nei, ma vaavaai mo ma faailoga tali i fesili nei: O a nisi o faamanuiaga o le tumau i le mama?
O sootaga vavalalata faaletino i le va o le tane ma le ava e matagofie ma paia. Ua faauuina e le Atua mo le foafoaina o fanau ma e mo le faailoaina atu o le alofa i le va o le tane ma le ava. Ua poloai mai le Atua o le sootaga vavalalata faalefeusuai e ao ona faaagaaga mo faaipoipoga.
“Pe a e mama atoatoa mai tulaga feusuai, ua e saunia oe lava e osia ma tausia feagaiga paia i le malumalu. Ua e saunia oe lava e fausia se faaipoipoga malosi ma ia aumaia fanau i le lalolagi o se vaega o se aiga faavavau ma le agaalofa. Ua e puipuia oe lava mai le faaleagaina faaleagaga ma faalelagona lea e oo mai le faia o sootaga vavalalata faalefeusuai i fafo atu o le faaipoipoga. Ua e puipuia foi oe lava mai faamai matautia. O le tumau i le mama atoatoa i tulaga feusuai e fesoasoani lea ia te oe ia lototele ma fiafia moni ma faaleleia ou tomai e faia faaiuga lelei i le taimi nei ma le lumanai” (Mo le Malosi o le Autalavou [tamaitusi, 2011], 35).
Faitau le palakalafa lenei, ma vaavaai mo tali i fesili nei: O a faatulagaga a le Alii ina ia tumau i le mama i tulaga feusuai?
“O le tulaga faatonuina a le Alii e uiga i le mama atoatoa i tulaga feusuai e manino ma e le masuia. Aua lava nei e faia ni sootaga feusuai a o le i faaipoipo, ma ia e faamaoni atoatoa i lou toalua pe a uma le faaipoipoga. Aua le faatagaina ala o faasalalauga, o au taaga tupulaga, po o isi e faatauanau oe faapea e taliaina ni sootaga vavalalata feusuai a o lei faaipoipo. E le taliaina. I le silafaga a le Atua, o agasala feusuai e matua matuia lava. Latou te faaleagaina le mana paia o le Atua na tuuina mai ia te i tatou e foafoa ai le ola. Na aoao mai le perofeta o Alema o agasala faalefeusuaiga ua silisili ona matuia nai lo se isi lava agasala vagana ai le fasioti tagata po o le faafitia o le Agaga Paia. (tagai i le Alema 39:5).
“Aua lava nei faia soo se mea e mafai ona taitai atu ai i le agasala faalefeusuaiga. Ia taulimaina isi ma le faaaloalo, ae le o ni mea e faaaogaina e faamalie ai le tuinanau ma manaoga manatu faapito. A o lei faaipoipo, ia aua lava nei faia ni kisi faananau loto, pe taoto i luga o se isi tagata, pe tago i vaega lilo, po o itutino sa o se isi tagata, pe o fai ni ofu pe leai foi. Aua lava nei e faia soo se mea e faaosoina ai ni lagona feusuai. Aua nei e faaosoina na lagona i lou tino. Ia gauai atu i uunaiga a le Agaga ina ia mafai ai ona taumamaina oe ma amio mama. O le a aluese le Agaga o le Alii mai se tasi o loo i ai se agasala faalefeusuai.
“Aloese mai tulaga e valaaulia ai le tele o faaosoosoga, e pei o gaoioiga i le leva o le po, po o gaoioiga e o ese ai mai aiga i le po atoa po o gaoioiga e le o i ai se vaavaaiga a tagata matutua. Aua nei auai i ni talanoaga po o soo se ala o faasalalauga e faaosofia ai lagona feusuai. Aua nei auai pe matamata i soo se ituaiga o ponokalafi. E mafai ona fesoasoani atu le Agaga ia te oe ia iloa le taimi ua e i ai i se tulaga lamatia ma tuu atu ia te oe le malosi e te aveesea ai oe lava mai le mea o loo tupu. Ia i ai lou faatuatua ma usitai i fautuaga amiotonu a ou matua ma taitai.
“O amioga faatauatane ma faatauafafine o se agasala matuia. Afai e te iloa o loo e tauivi ma lagona faatosina o le itupa-e-tasi pe ua faatauanauina foi oe e auai i ia amioga le talafeagai, saili le fautuaga mai ou matua ma le epikopo. O le a latou fesoasoani ia te oe.
“O tagata e aafia fua i feusuaiga faatautala e le tausalaina i le agasala ma e le manaomia ona salamo. Afai na e aafia fua i se faiga faatautala, ia e iloa e taumamaina oe ma e alofa le Atua ia te oe. Talanoa i ou matua po o se isi tagata matua faatuatuaina, ma saili vave le fautuaga mai le epikopo. E mafai ona latou lagolagoina oe faaleagaga ma fesoasoani ia te oe i le mauaina o le puipuiga ma le fesoasoaniga e te manaomia. O le faagasologa o le faamaloloina e ono umi se taimi. Faalagolago i le Faaola. O le a Ia faamaloloina oe ma tuu atu ia te oe le filemu.
“Afai e faaosoosoina oe e fai soo se agasala faalefeusuaiga, ia e sailia se fesoasoani mai ou matua ma le epikopo. Tatalo i lou Tama oi le Lagi, o le a fesoasoani ia te oe e tetee i le faaosoosoga ma faatoilaloina mafaufauga ma lagona le talafeagai. Afai ua e faia se agasala faalefeusuai, ia talanoa nei i lou epikopo ma amata le faagasologa o le salamo ina ia mafai ai ona e maua le filemu ma maua le mafutaga atoatoa ma le Agaga.
“Ia e faia se tautinoga patino o le a e mama atoatoa i tulaga feusuai. E ala i au upu ma amioga, ia uunaia isi e faia lena lava mea e tasi” ( “Mo le Malosi o le Autalavou”, 35–37).
Manatunatu loloto i le savali e te lagona ua finagalo le Alii e tulimatai i ai mai mea sa e faitau i ai.
Vaai faalemafaufau o loo faia se talanoaga ma ou matua, taitai o Alii Talavou po o Tamaitai Talavou, po o lau epikopo po o le peresitene o le paranesi e uiga i le taua o le mama atoatoa i tulaga feusuai. Mafaufau i le auala e te tali atu ai i ou matua po o taitai o le Ekalesia a o latou fautuaina oe e uiga i le taua o le tutumau i le mama atoatoa i tulaga feusuai. Faitau le Alema 39:7–8 ina ia iloa ai le faamoemoega o Alema i le aoaoina o Korianetona e uiga i le matuia o lana agasala. Manatunatu loloto pe faapefea e lau tali atu i fautuaga a ou matua po o taitai o le Ekalesia ona aafia ai lou iloa o se valaaulia alofa le tumau i le mama pe salamo ma ia aloese mai le faamasinoga a le Atua.
Sa faamatalaina e Elder D. Todd Christofferson o le Korama a Aposetolo e Toasefululua le mafuaaga e valaau atu ai matua e faapei o Alema ia latou fanau ina ia salamo: “O le valaaulia e salamo o se faailoaga o le alofa. …Afai tatou te le valaauliaina isi ina ia sui ma pe afai foi tatou te le salamo i tatou lava ia, ua tatou toilalo i se tiute autu lea e tatau ona fai i le tasi ma le isi ma i tatou lava. O matua e tuu a latou fanau e agasala, se uo manatu faapito, se taitai palaai o le Ekalesia, o le mea moni lava ua sili atu ona latou popole mo i latou lava nai lo le tulaga lelei ma le fiafia o i latou e mafai ona fesoasoani atu i ai. Ioe, o le valaau ina ia salamo ia i nisi o taimi ua manatu i ai o le le onosaia po o le faatiga, ma e ono oo foi lava i le itagiaina, ae o le taialaina e le Agaga, o le tulaga moni lava o se faatinoga o le popole moni” (“O Le Meaalofa Paia o le Salamo,” Ensign po o le Liahona, Nov. 2011, 39).
Tusi mea nei i lau api talaaga mo le suesueina o tusitusiga paia: O le salamo e aofia ai … Ma, a o e suesue le Alema 39:9–14, ia fai se lisi i lau api talaaga mo le suesueina o tusitusiga paia i mea na aoao atu e Alema ia Korianetona e uiga i le salamo e mafai ona fesoasoani e faamaea ai lenei faamatalaga.
Faaaoga fesili nei ma faamatalaga e fesoasoani ai ia te oe e malamalama ai ma faaaoga apoapoaiga a Alema, Taumafai e faailoa mai ma tusi ia le itiiti ifo ma le tasi le upumoni mo fuaiupu taitasi o loo lisiina i lalo e mafai ona fesoasoani e faamaea ai le faamatalaga i lau api talaaga mo le suesueina o tusitusiga paia. E le manaomia ona e tali i fesili i lau api talaaga mo le suesueina o tusitusiga paia.
Faitau le Alema 39:9. (Alema 39:9 o se fuaiupu mau tauloto. Atonu e te manao e faailoga i se auala faigofie ina ia mafai ona e maua i le lumanai.) O le a le mea e faia e fasifuaitau “aua e te toe alu e tusa ma tuinanau o ou mata” ma le “faafiti oe lava i nei mea” e faatatau i le lafoaia o le agasala?
I o tatou aso, o le fasifuaitau “tuinanau o ou mata” e i ai se faatatauga malosi i le tino ola pea ma ata po o faafiafiaga faaponokalafi i soo se itu. O le fasifuaitau “faafiti oe lava,” e pei ona faaaoga i le Alema 39:9, o lona uiga ia faafiti oe lava mai se mea. O lenei fasifuaitau e le masani tele ai i tatou i aso nei. Peitai, i taimi o Iosefa Samita, o isi uiga o le veape kolosi o le “ ia titina; ia aveese. … O le tetee … ; o le taofi” (Noah Webster’s First Edition of an American Dictionary of the English Language, facsimile ed. [1967]). Afai tatou te faaaoga nei faauigaga i mea sa aoao atu e Alema i lona atalii, e mafai ona tatou malamalama i le taua o le aveesea o tulaga uma o le tino ola pea (e aofia ai punavai o faaosoosoga o le ola mama ua tatou puleaina) mai o tatou olaga, ina ia tatou “ mautofi i le malo o le Atua.” O a nisi o auala e mafai e le autalavou o le Au Paia o Aso e Gata Ai ona tusi se laina mo i latou lava i tulaga o le mama atoatoa i tulaga feusuai ma le aloese mai le tuinanau o o latou mata?
Faitau le Alema 39:10. E mafai faapefea e le sailia o meaai faaleagaga—mai matua, taitai o le Ekalesia, uso ma tuafafine/tuagane, po o uo faatuatuaina —ona fesoasoani i se tasi ina ia salamo?
Faitau le Alema 39:11–12, ma manatunatu loloto i fesili nei:
O le a le mea e manaomia ona suia i se loto o le tagata i le taimi o taualumaga o le salamo ina ia le toe taitai seseina o ia e le tiapolo e fai le agasala?
E mafai faapefea e le aloese mai le saili o mea le aoga ma le valea ona fesoasoani i se tasi e salamo?
Faitau le Alema 39:13. Ia manatua sa tau atu e Alema ia Korianetona ina ua vaai sa Sorama i amioga a Korianetona o le a le talitonu i latou i upu a Alema (tagai Alema 39:11). Atonu e fesoasoani le malamalama i totonu o tusitusiga paia, o le fasifuaitau “liliu atu i le Alii” o lona uiga o le salamo. O le salamo o le “ liliu atu o le loto ma manatu i le Atua ” (Bible Dictionary, “Salamo”).
O le a sou manatu i le uiga o le salamo i lou “mafaufau, loto, ma le malosi atoa”?
Pe a aafia isi i a tatou agasala, o le a se mea e tatau ona faia o se vaega o lo tatou salamo?
Pe a faia se agasala matuia, aisea e talafeagai ai ona saili le fesoasoani a se epikopo po o se peresitene o le paranesi?
Mai le Alema 39:9–13 ua tatou aoao ai: O le salamo e aofia ai le tautau atu ma le lafoaiina o a tatou agasala ma liliu atu i le Alii ma o tatou mafaufau, loto, ma le malosi atoa.
Manatunatu loloto i ou lagona i le mea e finagalo le Alii e te fai ina ia liliu atu atoatoa lou loto ma le mafaufau ia te Ia. O le a se mea e mafai ona e faia i le aso ina ia amata ai ona e galue e tusa ma nei musumusuga?
A aunoa ma Iesu Keriso ma Lana Togiola, o le a le mafai ona faamagaloina oe i au agasala. Faitau le Alema 39:15–16, 19, ma vaavaai pe faapefea ona faamatala e Alema le malamalama o le a afio mai Iesu Keriso ma aveesea agasala a le lalolagi.
I lau api talaaga mo le suesueina o tusitusiga paia, tusi pe aisea ua avea ai o se tala lelei le afio mai o Iesu Keriso mo Korianetona ma oe.
Na saunoa Elder Richard G. Scott o le Korama a Aposetolo e Toasefululu i nei mea e uiga i le taulotoina o mau:
“O le aoaoina, mafaufau loloto, sailiili, ma le taulotoina o mau ua pei lava o le faatumuina o se kapeneta o faila i uo, tulaga faatauaina, ma upumoni ia e mafai ona tapa i ai soo se taimi, i soo se mea i le lalolagi.
“E mafai ona oo mai se mana maoae mai le taulotoina o mau. O le taulotoina o se mau o le fatuina lea o se faigauo fou. E pei lava o le mauaina o se tagata fou e mafai ona fesoasoani mai i se taimi o puapuaga, tuu mai musumusuga ma faamafanafanaga, ma avea o se punavai o uunaiga mo suiga manaomia” (“O Le Mana o Tusitusiga Paia,” Ensign po o le Liahona, Nov. 2011, 6).
Taumafai e tauloto le Alema 39:9. I lau api talaaga mo le suesueina o tusitusiga paia, tusi se fuaiupu pe lua e uiga i le ala e mafai ai e le taulotoina o lenei fuaiupu ona avea ma puipuiga mo oe i taimi o faaosoosoga.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:
Ua ou suesueina le Alema 39 ma faamaeaina lenei lesona i le (aso).
Fesili, mafaufauga, ma manatu faaopoopo ou te fia faasoa i lou faiaoga: