Mamona 1–2

Folasaga

E ui lava na soifua ae Mamona i se taimi o le matautia o le amioleaga, ae na ia filifili e faamaoni.Ona o lona faamaoni, sa tofia o ia e tausia faamaumauga a sa Nifae. Ina ua 15 ona tausaga, sa “asiasi mai ai le Alii ia [Mamona], ma…tofo ma…iloa ai le agalelei o Iesu” (Mamona 1:15). I lena lava tausaga, na tofia ai Mamona e sa Nifae e taitai a latou autau (tagai Mamona 2:1). Na ia manao e fesoasoani ia sa Nifae ia salamo, ae ona o lo latou tetee ma le loto i ai, na faasaina ai o ia e le Alii ona talai atu ia i latou.Na aveesea mai ia sa Nifae le meaalofa o le Agaga Paia ma isi meaalofa a le Atua ma tuua ai na o i latou ao latou tau ma sa Lamana.

Mamona 1:1–5

Ua tuu atu ia Mamona le matafaioi o faamaumauga paia.

O a nisi upu e te manao e faaaoga e tagata pe a latou faamatalaina oe?

Na i ai se taimi na faamatalaina ai oe o se Mamona? O le a le uiga ia te oe o le faamatalaina o oe e se tagata o se Mamona?

Na saunoa mai Peresitene Gordon B. Hinckley e uiga i le igoa tauvalaau Mamona, lea e faaaoga e nisi tagata pe a faatatau i tagata o Le Ekalesia a Iesu Keriso o le Au Paia o Aso e Gata Ai:

“E ui ina ou faanoanoa i nisi taimi i le le ta’ua e tagata o le ekalesia lenei i lona igoa sa’o, ou te fiafia o le igoa ua latou faaaogaina, o se igoa mamalu tele na tuuina mai e se alii maoa’e ma se tusi ua tuuina mai ai se molimau e le mafaatusalia, e uiga i le Togiola o le lalolagi.

“Soo se tasi e malamalama i lenei alii o Mamona, e ala i lona faitau ma manatunatu loloto i ana upu, soo se tasi na te faitau i lenei faaputuga oa o talafaasolopito sa tuufaatasi ma faasaoina e ia, o le a ia iloa o le upu Mamona e le o se upu faatauvaa, ae o se faatusa o le lelei tele—e mai le Atua” (“E Tatau Ona Uiga le Upu Mamona i le ‘Lelei Tele,’” Liahona, Ian. 1991, 56–59).

O le perofeta o Mamona, na fanau mai i se taimi lea e toeitiiti lava o tagata uma sa i le laueleele na ola i le amioleaga. O lea taimi sa faatonuina ai se perofeta e igoa ia Amorona ina ia natia faamaumauga paia uma (tagai 4 Nifae 1:47–49). Na asiasi atu Amorona i le tama itiiti o Mamona lea sa 10 tausaga i lena taimi ma tuu atu ia te ia faatonuga e uiga i lona tiutetauave i le lumanai i faamaumauga. Faitau Mamona 1:2, ma tagai mo upu ma fuaitau na faaaoga e Amorona e faamatala ai Mamona talavou.

O upu e lua na faaaoga e Amorona e faamatala ai Mamona o le mafaufau lelei. O upu mafaufau lelei o ona uiga o le manatunatu, faamaoni, amiotonu, po o le faaleatua. Atonu e te manao e tusi le faauigaga lenei i le avanoa i talaane o au mau. O a autu po o tulaga i le olaga e te manatu e tatau ona e mafaufau lelei e uiga i ai? E taua le malamalama o tagata mafaufau lelei e mafai ona fiafia ma talie, ae ua latou malamalama i le taimi e talafeagai ai le toafimalie ma le taimi e talafeagai ai le matua faapaū.

Na faamatalaina foi e Amorona ia Mamona o se tasi “e vave ona… matau” (Mamona 1:2). O le a lou manatu i le uiga o le vave ona matau?Na faamatalaina e Elder David A. Bednar o le Korama a Aposetolo e Toasefululua o le upu matau e lua ni auala e faaaoga ai i tusitusiga paia:

“[O se] meaalofa faaleagaga e foliga mai e faatauvaa ma atonu foi e tau le talisapaiaina—o le mana e vave ai ona iloa po o le ‘atamai’ (Mamona 1:2)—e matuai taua mo oe ma au i le lalolagi o loo tatou ola ai nei ma o le a tatou ola ai. …

“Faamolemole ia mafaufau i le aoga o lenei meaalofa faaleagaga taua. E pei ona faaaogaina i tusitusiga paia, o le upu atamai e lua ona faaaogaina taua. O le tasi ‘ia vaai’ po o le ‘ia iloa’ po o le ‘ia matau’—e pei ona tatou aoao i le Isaia 42:20. …

“O le atamai e mafai foi ona faauigaina ‘ia usitai’ po o le ‘ia taofimau’—e pei ona manino mai i le [Mataupu Faavae ma Feagaiga 54:6]. …

“O lea la, a tatou atamamai, e vave ona vaai pe matau ma usitai.O nei elemene taua uma e lua—o le vaai ma usitai—e taua i le atamai.Ma o le perofeta o Mamona o se faataitaiga lelei lea o le faatinoina o lenei meaalofa” (“Atamai,” Liahona, Tes. 2006, 15–20).

I totonu o lau api talaaga mo le suesueina o tusitusiga paia, tusi ai ni ou manatu e uiga i le auala e mafai ai ona fesoasoani lenei uiga faatagata o le vave ona matau i lou olaga o aso uma.

Faitau le Mamona 1:3–5, ma faailoa mai faatonuga a Amorona ia Mamona. E faapefea ona fesoasoani ia uiga o Mamona o le mafaufau lelei ma le vave ona matau ia te ia i nei tiutetauave?

Mamona 1:6–19

Na faasa e le Alii Mamona ona talai atu ona o le tetee ma le loto i ai o tagata.

Ata

Mamona

Na i ai se taimi sa leiloa ai se mea e sili ona taua ia te oe? Ao laitiiti lava o ia, na molimauina ai e Mamona le tele o taua i le va o sa Nifae ma sa Lamana ma le faateleina o le amioleaga i luga o le fogaeleele (tagai Mamona 1:6–13). Talu ai ona ua matua maoae le amioleaga o sa Nifae, na faamaumau ai e Mamona e faapea na leiloloa mai ia i latou le tele o meaalofa taua mai le Alii.

Fai ni koluma se lua i totonu o lau api talaaga mo le suesueina o tusitusiga paia. Faaulutala le koluma muamua “Meaalofa a sa Nifae na Leiloloa.” Faitau le Mamona 1:13–14, 18, ma vaavaai po o a meaalofa na aveese mai e le Alii mai sa Nifae. Tusi mea sa e maua i le koluma muamua. Faaulutala le koluma lona lua “O Le Mafuaaga na Aveese ai e le Alii Ana Meaalofa.” Faitau le Mamona 1:14, 16–17, 19, ma vaavaai mo mafuaaga na aveese ai e le Alii Ana meaalofa mai ia sa Nifae. Tusi mea sa e maua i le koluma lona lua.

E mafai ona tatou aoao mai nei mau o le amioleaga ma le le talitonu e aveesea ai meaalofa a le Alii faapea ma le uunaiga a le Agaga Paia. E ui lava sa matua matautia le fouvale a sa Nifae, ae o loo faatatau foi lenei mataupu faavae ia i tatou taitoatasi pe a tatou le usiusitai i soo se poloaiga a le Atua.

Afai na e ola i le vaitaimi o Mamona, o fea o meaalofa a le Atua lea na ta’ua i le Mamona 1:13–14, 18 e sili ona e faanoanoa ai i le aveesea?

Faitau le Mamona 1:15, ma vaavaai i le tulaga na oo i ai Mamona ao aveesea mai ia sa Nifae atoa le meaalofa o le Agaga Paia ma isi meaalofa a le Atua. Aisea i lou manatu na mafai ai e Mamona ona maua aafiaga faaleagaga e ui lava na i ai o ia i totonu o le amioleaga matautia?

Mamona 2:1–15

Ua taitai e Mamona autau a sa Nifae ma ua faanoanoa i lo latou amioleaga

Mafaufau i vaaiga po o tulaga nei: O se alii e 30 tausaga le matua e nofo faatasi ma ona matua i le fale ma ua filifili e aua nei sailia se galuega. Nai lo lena, e ola i galuega a ona matua ma faamaumauina lona taimi i gaoioiga le aoga e pei o le faaaluina o le tele o lona taimi e taalo ai i taaloga vitio. Faatusatusa lenei vaaiga i le faamatalaga o le tamaitiiti o Mamona ao e suesue i le Mamona 2.

Faitau le Mamona 2:1–2, ma vaavaai mo le tiutetauave na tuuina atu ia Mamona ma po o le a lona matua sa i ai i le taimi na ia mauaina ai.

E lei umi ona tofia Mamona e avea o se taitai i le autau a sa Nifae, ae o mai le autau a sa Lamana ma le malosi tele e tau ma sa Nifae ma sa fefefe ma solomuli sa Nifae. Na tulia e sa Lamana i latou mai lea nofoaga i lea nofoaga seia oo ina faapotopoto sa Nifae i se nofoaga se tasi.Na iu lava ina tatalia e le autau a Mamona ia sa Lamana ma mafua ai ona latou sosola (tagai Mamona 2:3–9).

Faitau le Mamona 2:10–15, ma vaavaai mo le tulaga faaleagaga o sa Nifae ina ua mavae nei taua. Ona tali lea o fesili nei i totonu o lau api talaaga mo le suesueina o tusitusiga paia:
1. Aisea na faanoanoa ai sa Nifae?
2. E tusa ai ma le Mamona 2:14, na faapefea ona iloa e Mamona o lo latou faanoanoa e le o se faailoga o le salamo moni?
3. O a ni eseesega e mafai ona e vaaia i le Mamona 2:13–14 i le va o i latou o e faanoanoa i le salamo ma i latou o lo latou faanoanoa ua oo atu ai i le malaia (ua taofia lo latou alualu i luma)?

Ua aoao mai nei mau afai o lo tatou faanoanoa mo agasala e oo atu i le salamo, o le a taitaia i tatou ia Keriso faatasi ma se loto momomo. Latou te faailoa mai ai foi le mataupu faavae e faapea o le faanoanoa mo na o le taunuuga o le agasala e oo atu ai i le malaia (po o le taofia o lo tatou alualu i luma e agai atu i le ola e faavavau).

Tali fesili nei i totonu o lau api talaaga mo le suesueina o tusitusiga paia:
1. E mafai faapefea e se tagata o le sa agasala ona faaalia le faanoanoa faalelalolagi—le ituaiga o faanoanoa lea e oo atu ai i le malaia?
2. E mafai faapefea e se tagata o le sa agasala ona faaalia le ituaiga o faanoanoa lea e oo atu ai i le salamo?

Mafaufau loloto pe faapefea ona e tali atu pe a e iloa na e faia ni mea sese pe ua agasala. Afai e te sau i le Faaola ma se loto momomo ma le salamo, e mafai ona e maua le filemu ma ia faalelei ma le Atua.

Mamona 2:16–29

Ua maua e Mamona papatusi ma faamaumau se tala i le amioleaga o lona nuu

Ao faaauau pea taua ma sa Lamana, na iloa e Mamona lona latalata atu i le mauga lea sa natia ai e Amorona talafaamaumau a sa Nifae. Na ia aumaia papatusi a Nifae ma amata ona faamaumau mea na ia matauina i totonu o tagata talu mai le taimi ao tamaitiiti (tagai Mamona 2:16–18).Faitau le Mamona 2:18–19, ma faailoga nisi o fuaitau ia e faamatalaina ia tulaga faaleagaga na tuputupu ae ma Mamona.

Mai mea na e aoaoina mai ia Mamona, aisea e te manatu ai sa ia mautinoa o le a “sii ae [o ia] i luga i le aso gataaga”?(Mamona 2:19). (I lenei anotusi, o le “sii ae i luga i le aso gataaga” o lona uiga o le faaeaina—toetu ma se tino faaselesitila ma aumai i le afioaga o le Atua e faatasi ma Ia e faavavau.)

O le olaga o Mamona o se molimau faapea e mafai ona tatou filifili ia ola amiotonu e tusa lava pe o amioleaga tagata.

Mafaufau i le fautuaga lenei: “O lau matafaioi le faia o au filifiliga. E manatu tele mai le Atua ia te oe ma o le a fesoasoani ia te oe i le faia o filifiliga lelei, e tusa lava pe faaaoga e lou aiga po o uo o latou faitalia i auala e le sa’o. Ia i ai lou lototoa a’ia’i e tu mausali ai e usiusitai i le finagalo o le Atua, e tusa lava pe e te tu na o oe. A o e faia lenei mea, ua e faia se faataitaiga mo isi e mulimuli ai” (Mo le Malosi o le Autalavou [tamaitusi, 2011], 2).

I totonu o lau api talaaga mo le suesueina o tusitusiga paia, tusi e uiga i se taimi na e vaaia ai se uo po o se tagata o le aiga o tu mausali e usitaia le finagalo o le Atua e tusa lava pe le o faia e isi. Tusi ai foi ou manatu e faatatau i le aoga ia te oe o le faataitaiga a lena tagata ma le faataitaiga a Mamona.

O le mau tauave a Tamaitai Talavou o le “Tu mo le Upumoni ma le Amiotonu.”Pe o oe o se tamaitai talavou po o se alii talavou, mafaufau i se vaega faapitoa o lou olaga lea e mafai ona e tautino atili atu ai ina ia tu atu mo le mea sa’o. O le a fesoasoani le Alii ia te oe ao e taumafai e tu atu mo le mea sa’o e tusa lava pe le o faia e isi o loo siomiaina oe.

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Mamona 1–2 ma faamaeaina lenei lesona i le (aso).

Fesili, mafaufauga, ma manatu faaopoopo ou te fia faasoa i lou faiaoga: