2 Nifae 32

Folasaga

Ina ua uma ona aoao mai e uiga i le “ala lauitiiti ma le vaapiapi e tau atu i le ola e faavavau” (2 Nifae 31:18), sa vaaia e Nifae sa tau mafaufau lona nuu po o le a le mea e tatau ona latou faia pe a uma ona amata uia le ala. Sa ia taliina a latou fesili e ala i le faamalosiauina o i latou e “taumamafa fiafia i afioga a Keriso” ma “tatalo e le aunoa” (2 Nifae 32:3, 9). Sa ia faamautu atu ia i latou afai o le a latou faia nei mea, o le a fesoasoani le Agaga Paia ia i latou ia iloa le mea e fai.

2 Nifae 32:1–7

Ua fautua mai Nifae ia i tatou e saili le taitaiga faalelagi e ala i afioga a Iesu Keriso

Mafaufau i se taimi na tuuina atu ai e se tasi ia te oe ni faatonuga e alu atu ai mai le tasi nofoaga i le isi. Pe sa faigofie pe faigata ona malamalama i na faatonuga? Aisea e taua ai le tuuina atu e se tasi o ni faatonuga manino?

I le lesona na muamua atu sa e suesueina ai nisi o faatonuga na tuuina atu e Nifae i lona nuu. Ina ua uma ona faasoa mai o nei faatonuga, sa ia faapea mai, “O le ala lenei” (2 Nifae 31:21). Ia suesue vave le 2 Nifae 31:17–18, ma toe faamanatu pe faapefea ona amata se tagata i le ala i le ola e faavavau. Ona faitau lea o le 2 Nifae 32:1, ma vaai mo se fesili sa i loto o tagata e faatatau i le mea na aoao atu e Nifae ia i latou. Faamatala le fesili a tagata i a oe lava upu:

Faitau le 2 Nifae 32:2–3, ma vaai mo le mea na ta’u mai e Nifae e tatau ona tatou faia pe a uma ona tatou ulu atu i le ala. Atonu e aoga le iloa o le tautala i le gagana a agelu, e tusia ai ma le saunoaga a Peresitene Boyd K. Packer, Peresitene o le Korama a Aposetolo e Toasefululua, “o lona uiga e mafai ona e tautala i le mana o le Agaga Paia” (“The Gift of the Holy Ghost: What Every Member Should Know,” Ensign, Aok. 2006, 50).

Atonu e te manao e faailoga le fasifuaitau “taumamafa fiafia i afioga a Keriso” i le 2 Nifae 32:3 (o le fuaiupu lenei o se mau tauloto). Na faaaoga e Nifae le fasifuaitau “i afioga a Keriso” e faamatala ai aoaoga e musuia e le Agaga Paia. Lisi nisi o auala po o nofoaga e mafai ona e faitau, faalogo, pe maua ai aoaoga musuia a le Agaga Paia.

O afioga a Keriso e aofia ai tusitusiga paia ma upu a perofeta o onaponei. Ina ia fesoasoani ia e malamalama i le uiga o le “taumamafa fiafia i afioga a Keriso,” faitau upusii nei:

Na aoao mai Elder Russell M. Nelson o le Korama a Aposetolo e Toasefululua: “Ina ia taumamafa fiafia o lona uiga e sili atu nai lo na o le tofo. O le taumamafa fiafia o lona uiga o le aai fiafia. Tatou te aai fiafia i tusitusiga paia e ala i le suesueina i se agaga o le mauaina ma le agaga fiafia ma le usitai faamaoni. A tatou taumamafa fiafia i afioga a Keriso, e avea i latou … o se vaega taua o o tatou natura” (“Living by Scriptural Guidance,” Ensign, Nov. 2000, 17).

Sa fautua mai foi Elder Robert D. Hales, o le Korama a Aposetolo e Toasefululua, e faapea, “Afai ta te taumamafa i afioga a Keriso, e tatau la ona ta suesue i tusitusiga paia ma teuloto Ana afioga e ala i le mafaufau loloto i ai ma avea o se vaega o manatu uma ma amioga” (“Faamaloloina o le Agaga ma le Tino,” Liahona, Ian. 1999, 16).

I lau api talaaga mo le suesueina o tusitusiga paia, tusi i au oe lava upu lou manatu o le uiga o le taumamafa fiafia i afioga a Keriso.

Mafaufau loloto i le eseesega i le va o upu taumafa, lamulamu, ma le faaoge. Mafaufau mo se taimi e uiga i nisi o auala e le mataalia tele o le suesueina o afioga a Keriso e ono faatusa i ai le lamulamu pe o le faaoge foi.

Faatumu atoa le mataupu faavae o loo i lalo e tusa ai ma le 2 Nifae 32:3: A tatou taumamafa fiafia i afioga a Keriso, o afioga a Keriso o le a .

I lau api talaaga mo le suesueina o tusitusiga paia, a le o le tusi e uiga i se taimi na fesoasoani ai le taumamafa i afioga a Keriso ia te oe e iloa ai le mea e fai i lou olaga pe faamatala se tulaga o loo feagai nei ma oe lea e mafai ai ona fesoasoani ia te oe le taumamafa i afioga a Keriso.

Faatumu avanoa o looi lalo e iloilo ai po o le a le lelei o loo e taumafa ai i afioga a Keriso ma o a foi auala e te ono faaleleia atili ai. I faataitaiga taitasi o loo i lalo, tusi le upu —taumafa, lamulamu, po o le faaoge—e sili ona faamatalaina ai le lelei o loo e sailia e iloa ai afioga a Keriso i lena tulaga. Mo se faataitaiga, atonu e te ono taumafa i tusitusiga paia i lau lava suesuega patino ae na o le lamulamu i afioga a Kerisoi le konafesi aoao.

Suesuega faaletagata lava ia o tusitusiga paia:

Sauniga faamanatuga:

Konafesi aoao:

Suesuega faaleaiga o tusitusiga paia:

Seminare:

Afiafi faaleaiga:

Fonotaga a le korama a le Perisitua Arona po o le vasega a Tamaitai Talavou:

Aoga Sa:

Tatalo faaletagata lava ia:

Faaalu se taimi e filifili ai se gaoioiga se tasi lea sa e tusia ai o loo e “lamulamu” pe “faaoge” ai i le taimi nei. I lau api talaaga mo le suesueina o tusitusiga paia, tusi ai pe o le a faapefea ona e faaleleia le taumafa i afioga a Keriso i lena tulaga. Ona mulimuli ai lea ma fai.

Faitau le 2 Nifae 32:4–7, ma mafaufau loloto i tali i fesili nei (o le a e tusia lau tali i se tasi o fesili mo le galuega atofaina lona 4):

I le fuaiupu e 4, o le a lou manatu i le uiga o le “ole” po o le “tu’itu’i”? E mafai faapefea ona avea le tatalo ma se faataitaiga lelei o le ole po o le tu’itu’i?
E faapena foi i le fuaiupu e 4, o le a le faamatalaga a Nifae o taunuuga mo i latou o e o le a le ole pe tu’itu’i?
I le fuaiupu e 5, o le a le faamanuiaga ua folafola mai e Nifae e mafai ona tatou maua pe a tatou talia le Agaga Paia?
I le fuaiupu e 7, o a ni uiga na i ai i le nuu o Nifae lea na taitai atu ai o ia e faanoanoa mo i latou? Aisea e te manatu ai o nei uiga e taofia ai tagata mai le sailia ma malamalama i le “poto silisili”?

Tusi i lau api talaaga mo le suesueina o tusitusiga paia se upumoni e tasi ua e aoaoina mai le 2 Nifae 32:4–7, ma faamatala pe aisea e taua ai lenei upumoni i lou olaga.

Mau Tauloto—2 Nifae 32:3

O le a le umi e te manatu e te faaaluina e tauloto ai le 2 Nifae 32:3 pe afai e te taulotoina i taimi taitasi e ai ai sau meaai? Tusi le fuaiupu i luga o se kata po o se fasipepa laitiiti, ma alu ma feaveai. Mo nai aso e sosoo ai, taumafa i afioga a Keriso e ala i le taumafai e tauloto le 2 Nifae 32:3 ae e te le’i ai pe i le uma foi ona e ai i taimi uma. I lau api talaaga mo le suesueina o tusitusiga paia, ia lipoti mai pe fia ni aiga na alu e te taulotoina ai le mau.

2 Nifae 32:8–9

Ua fautua mai Nifae ia i tatou ia tatalo e le aunoa

E toatele tagata e fai mai e faapea, a uma ona latou faia se agasala latou te le mananao e tatalo i le Tama Faalelagi. Mafaufau mo se taimi pe aisea e tupu ai lenei mea. O ai o le a le manao e te tatalo i soo se taimi, ae maise lava pe a uma ona e faia se agasala? Aisea? Vaai i le 2 Nifae 32:8 mo le mea o loo aoao mai e le Agaga Paia ia i tatou e fai e faatatau i le tatalo. Mafaufau loloto i fesili nei: Aisea e te manatu ai e manao le Alii e te tatalo? Aisea e te manatu ai e le manao Satani e te tatalo?

Faitau le 2 Nifae 32:9, ma vaai mo pe tatau ona faafia ona tatou tatalo ma o a foi faamanuiaga ua folafola mai e le Alii ia i tatou pe a tatou tatalo. A o e faitau i lenei fuaiupu, atonu o le a aoga ona iloa o le faapaia o lona uiga o le tuuto atu i le galuega a le Atua po o le fai ia paia.

Mai le 2 Nifae 32:9 tatou te aoao ai i le mataupu faavae lenei: A o tatou tatalo e le aunoa, o le a mafai ona tatou faia mea uma e finagalo le Alii ia tatou faia mo le manuia o o tatou agaga. (Manatua o le 2 Nifae 32:8–9 o se mau tauloto. Atonu e te manao e faailoga i se ala iloagofie ina ia mafai ona e mauaina i le lumanai.)

Mafaufau loloto po o le a le uiga o le tatalo e le aunoa. A o e faitau i le faamatalaga lenei mai ia Elder David A. Bednar o le Korama a Aposetolo e Toasefululua, vase lalo o se auala se tasi pe sili atu e mafai ona tatou faataunuuina ai le poloaiga ia “tatalo e le aunoa”:

“Atonu o loo i ai ni mea i o tatou uiga faaalia, i a tatou amioga, pe faatatau i lo tatou tuputupu ae faaleagaga lea e manaomia ai ona tatou talanoa ma le Tama Faalelagi i le tatalo i le taeao. A uma ona faailoa atu se faafetai e tatau ai mo faamanuiaga ua maua, ona tatou ole atu lea mo le malamalama, taitaiga, ma le fesoasoani e faia ai mea e le mafai ona tatou faia na o i tatou i lo tatou lava malosi. …

“I le gasologa o le aso, tatou te teuina pea se tatalo i o tatou loto mo se fesoasoani ma se tomatauga faifai pea. … …

“Tatou te matauina i le aso tonu lava lea e i ai taimi semanu tatou te soona tautala ai ona ua masani ai, ae e lei tupu; pe atonu na tauau ai tatou te feitai, ae e lei tupu foi. Tatou te iloatino lava le fesoasoani faalelagi ma le malosi, ma tatou iloaina ma le lotomaualalo ia tali i a tatou tatalo. E oo lava i lena taimi ua iloaina ai, tatou te ofo atu ai lava se tatalo le leoa o le agaga faafetai.

“I le faaiuga o le aso, tatou te toe tootutuli ai foi ma toe lipoti atu i lo tatou Tama. Tatou te toe iloiloina mea na tutupu o le aso ma faailoa atu le faafetai mai le taele o o tatou loto mo faamanuiaga atoa ai ma fesoasoaniga na tatou maua. Tatou te salamo ma, faatasi ai ma le fesoasoaniga a le Agaga o le Alii, iloa auala e mafai ai ona tatou faia ma lelei atili ai taeao. O lea, ua fausia ai a tatou tatalo o le afiafi i luga o a tatou tatalo o le taeao, ma o se faaauauga lena. Ma o a tatou tatalo o le afiafi o se sauniuniga foi lea mo tatalo anoa o le taeao.

“O tatalo i le taeao ma le afiafi—ma tatalo uma i le va—e le o ni mea tumaoti, pe le feaiaa’i; ae e fesootai faatasi i aso taitasi ma aso uma, vaiaso, masina, ma tausaga. O se vaega lea tatou te faataunuuina ai le apoapoaiga faaletusi paia “ia tatalo e le aunoa” (Luka 21:36; 3 Nifae 18:15, 18; MF&F 31:12). O tatalo anoa faapena e aoga i le mauaina o faamanuiaga silisili o loo teuina e le Atua mo Ona fanau faamaoni” (“Tatalo E Le Aunoa,” Ensign po o le Liahona, Nov. 2008, 41–42).

Tusi i lau api talaaga mo le suesueina o tusitusiga paia e faapefea ona fesoasoani ia te oe i lou olaga le aoaoga a Elder Bednar ia “tatalo e le aunoa”.

Ina ia faaiuina le lesona lenei, faitau le molimau o loo i lalo mai ia Elder Spencer J. Condie, o lē o le taimi lena na auauna atu ai o se tasi o Fitugafulu, e uiga i le taumamafa i afioga a Keriso: “Atonu e te feagai ma ni faaiuga e faatatau i se misiona, sau galuega i le lumanai, ma, mulimuli ane, o se faaipoipoga. A e faitau i tusitusiga paia ma tatalo mo se taitaiga, atonu e te le vaai tino i le tali i se ituaiga o upu ua lomia i luga o itulau, ae a o e faitau o le a e mauaina ni uunaiga uigaese, ma ni musumusuga, ma, e pei ona folafola mai, o le Agaga Paia ‘o le a faaali mai e ia ia te outou mea uma e tatau ona faia.’ [2 Nifae 32:5.]” (“O Le Avea ma Faamanuiaga Tele i o Tatou Uso a Tagata,” Liahona, Iul. 2002, 50).

Mau Tauloto—2 Nifae 32:8–9

I le isi 24 itula e sosoo ai, taumafai e tuufaatasi mea ua e aoaoina e uiga i auala e “tatalo ai e le aunoa” i lou olaga. I le amataga o le lesona e sosoo ai, o le a valaaulia ai oe e lipoti atu ou manatu ma lagona e uiga i lenei aafiga. Tusi i lau api talaaga mo le suesueina o tusitusiga paia pe faapefea ona faia e le taumafai e “tatalo e le aunoa” se eseesega i au tatalo.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le 2 Nifae 32 ma faamaeaina lenei lesona i le (aso).

Fesili, mafaufauga, ma manatu faaopoopo ou te fia faasoa i lou faiaoga: