Iunite 17: Aso 3
Alema 21–22
Folasaga
O Arona, o se tasi o uso o Amona, sa ia taumafai e aoao atu sa Amaleka ma sa Amulonā e uiga ia Iesu Keriso ma le Togiola, ae sa teena o ia e tagata. O ia ma nisi o ana soa na mulimuli ane faafalepuipuiina i le nuu o Mitonae. Sa tumau lo la faatuatua i le taimi o o laua faigata. Ina ua maea ona tatalaina i tua i latou e Amona ma le Tupu o Lamonae, sa aoaoina e Arona le tama o Lamonae i le auala e “fanau ai i la le Atua” (Alema 22:15). Na aoaoina e le tupu e ala i le salamo i ana agasala, o le a mafai ona ia iloa le Atua ma mulimuli ane maua le ola e faavavau. O le faatuatua o Arona ma ona uso na fesoasoani i le toatele o sa Lamana e iloa le Atua ma Ona ala o le togiola.
Alema 21:1–23
Ua aoao atu e Arona ma ona uso le talalelei e ui lava i tofotofoga ma le faafalepuipuiina
Mafaufau i se taimi sa e taumafai ai ma le malosi e tausia poloaiga ae peitai na e fetaiai ma faigata. Ona mafaufau loloto lea i fesili nei: O a au mea na fai ina ia e faamaoni ai e ui lava i tofotofoga sa e feagai ai? A o e toe tepa atu i ia aafiaga, o le a sou lagona i mea sa faamanuiaina ai oe e le Alii i lena taimi?
A o aoao atu e Amona le Tupu o Lamonae ma ona tagata (tagai i le Alema 17–19), sa oo mai ia Arona ma ana soa faigata sili atu a o latou taumafai e aoao atu i se isi vaega o le nuu. Mo se iloiloga puupuu o tofotofoga na mafatia ai Arona ma ana soa a o i ai i le falepuipui, faitau le Alema 20:28–30. Ona faitau lea o fuaitau mai le Alema 21:1–17 o loo faailoa mai i le gaoioiga o loo i lalo. Vaavaai mo auala na taulimaina ai e Arona ma ona uso o latou tofotofoga.
-
Kopi le siata lenei i lau api talaaga mo le suesueina o tusitusiga paia, ma tuu se avanoa mo au faamatalaga pe a uma ata taitasi:
Luitau po o Faigata
Le Ala na Tali Atu ai Arona ma Ana Soa
A maea ona faitau vaega taitasi o fuaitau o mau, i le koluma i le itu agavale o le siata, tusi luitau po o faigata na feagai ma Arona ma ana soa. I le koluma o loo i le itu taumatau, tusi pe na faapefea ona tali atu Arona ma ana soa. Ona tali lea o fesili nei:
-
Aisea e te manatu ai sa tatau ona faigofie mo i latou ona faavaivai, leai se faamoemoe, ma toe foi i le aiga i se nofoaga faaleuo sili ma tagata o sa Nifae?
-
E faapefea e i tatou o uso o le ekalesia talai, ona faamanuiaina mai le suesueina o lenei tala?
-
Faitau le Alema 21:16–17, ma vaavaai pe na faapefea ona fesoasoani le Alii ia Arona ma ona uso e faia Lana galuega a o latou faamalosi atu ma le faatuatua. E ala ia Arona ma ona uso, ua tatou aoao i lenei mataupu faavae: Afai tatou te faamalosi ma le faatuatua i o tatou tofotofoga, o le a fesoasoani mai le Alii ia i tatou e faia Lana galuega. Atonu e te manao e tusi lenei mataupu faavae i au tusitusiga paia po o i lau api talaaga mo le suesueina o tusitusiga paia.
Mafaufau i ituaiga o galuega ua i ai i le Atua mo oe e faia nei ma i le lumanai ma po o a ni luitau atonu e fetaiai ma oe i le taumafai e faataunuu lenei galuega. Faitau le saunoaga lenei mai ia Peresitene Thomas S. Monson, o le na aoao mai e ono i ai a tatou tofotofoga a o tatou taumafai e faia le galuega a le Alii:
Ina ia aapa atu, ia aoao atu, ia pai atu i agaga faapelepele ua saunia e lo tatou Tama mo Lana savali, o se galuega tele lea. O le faamanuiaina e seāseā ona faigofie. O le mea masani lava e muamua atu i loimata, tofotofoga, talitonuga, ma le molimau. …
“… E maua e auauna a le Atua le mafanafana mai le faamautinoaga a le Matai: “Ou te ia te outou i aso uma lava” (Mataio 28:20). O lenei folafolaga maoae e faatumauina outou. … E nate faamafanafana ia te oe i taimi o le faavaivai, e oo mai i tagata uma” (“Tears, Trials, Trust, Testimony,” Ensign, May 1987, 43).
-
Faitau le Alema 21:18–23 e iloa ai mea na faia e Amona ina ua maea ona fesoasoani ia Arona ma ona uso e tatalaina mai le falepuipui. Vaavaai mo pe na faapefea ona suia olaga o sa Lamana ona ua aoao atu e Amona ia i latou le talalelei.
Mafaufau i le auala ua suia ai e le talalelei a Iesu Keriso le olaga o se tasi e te iloa. Manatunatu loloto pe faapefea ona e faasoa atu le talalelei i se tasi e te iloa, po o le mafaufau e uiga i se tasi e mafai ona aafia e ala i faataitaiga a Arona ma ona uso. Mafaufau e faasoa atu ma lena tagata mea sa e aoaoina mai le faataitaiga a Arona ma ona uso ao latou faamalosi ma le faatuatua i le galuega a le Alii.
Alema–22
O le tama o Lamonae, o le sa fai ma tupu i le nuu uma, ua talitonu i le talalelei e pei ona aoao atu ai e Arona
Ia toe faamanatu le feiloaiga a Amona ma le tama o Lamonae, sa iloiloina i le lesona ua mavae atu. Toe faitau le talosaga faapitoa a le tupu ia Amona, e pei ona faamaumauina i le Alema 20:27. A o e faitau i le Alema 22:1–3, ma vaavaai pe na faapefea ona tali atu le tupu i le asiasiga a Arona.
Faitau le Alema 22:4–6, ma sue le mea na le fiafia ai le tama o le Tupu o Lamonae. Suesue le Alema 22:7–14 mo upumoni sa aoao atu e Arona i le tama o Lamonae.
Toe manatunatu i fesili nei (atonu e mafai ona fesoasoani e manatua ai talanoaga faapenei e uiga i le tupu o Lamonae i le Alema 17–18):
-
Aisea e manaomia ai e le tupu ona talitonu i le Atua ina ia malamalama ai i le salamo?
-
E faapefea e le iloa e uiga i le Pau ona fesoasoani i le tupu e malamalama ai i le salamo?
-
Suesue i le Alema 22:15, ma vaavaai mo mea na naunau ia le tama o le Tupu o Lamonae e tuuese ina ia maua le olioli ma le ola e faavavau, ma mafaufau e faailoga i au tusitusiga paia.
-
Faitau le Alema 22:16 e vaavaai pe na faapefea ona tali atu Arona i le fesili a le tupu e uiga i le auala e maua ai le ola e faavavau. (Mafaufau e faailoga upumoni taua ua e vaaia o loo aoaoina i lenei fuaiupu.) E faapefea e le talia ma le ola ai i le upumoni na aoao atu e Arona ona taitai atu se tagata e maua le ola e faavavau?
Faitau le Alema 22:17–18, ma vaavaai pe na faapefea ona tali atu le tupu i aoaoga a Arona. Manatunatu loloto i le fesili lenei: O le a se mea ua tatou aoao mai e uiga i le fanau i la le Atua mai le tama o le Tupu o Lamonae?
Atonu e mafai ona e faailoga lenei fasifuaitau i le Alema 22:18: “O le a ou lafoai ese au agasala uma ina ia ou iloa oe.” Manatunatu loloto i nei upumoni, ma tusi i lau api talaaga mo le suesueina o tusitusiga paia: E tatau ona tatou naunau e tuuesea a tatou agasala uma ina ia suia faaleagaga ma fanauina i le Atua.
Faitau le saunoaga lenei mai ia Elder Dallin H. Oaks o le Korama a Aposetolo e Toasefululua: “Ua luitauina i tatou e le talalelei a Iesu Keriso ina ia suia. O le “Salamo” o lana savali faifai pea lea, ma o le salamo o lona uiga o le lafoai ese uma lea o mea tatou te faia —faaletagata, faaleaiga, faaleaganuu, ma faaleatunuu—e feteenai ma poloaiga a le Atua. O le faamoemoega o le talalelei o le liuaina lea o tagata faaletino e avea ma tagatanuu faaselesitila, ma e moomia ai le suia” (“Salamo ma Suia,” Ensign po o le Liahona, Nov. 2003, 37). 2003
Manatunatu loloto i mea e te manaomia ona fai i lou olaga i le taimi nei ina ia suia ai faaleagaga.
Faitau le Alema 22:19–22 ina ia iloa ai mea na tutupu na mulimuli mai i le tatalo a le tupu. Faitau Alema 22:23–27, ma vaavaai i mea na faia e le tama o Lamonaea ona ua ia maua le suiga o le loto ma ua ia talia le Agaga o le Alii e ia lava.
-
-
Ua ou suesueina le Alema 21–22 ma faamaeaina lenei lesona i le (aso).
Fesili, mafaufauga, ma manatu faaopoopo ou te fia faasoa i lou faiaoga: