Iunite 6: Aso 3

2 Nifae–9

Folasaga

O lau suesuega o le lauga a Iakopo, lea na amata i le 2 Nifae 6–8, o loo faaauau i le 2 Nifae 9. I le 2 Nifae 6–8 sa e suesueina ai aoaoga a Iakopo e uiga i le alofa mutimutivale o le Faaola ma Lona mana e laveai ai le aiga o Isaraelu mai lo latou leiloa ma le tulaga o le faasalalauina. I le mataupu e 9 o le a e suesue ai i le molimau a Iakopo e uiga i le mana o le Togiola a le Faaola e laveai ai i tatou mai aafiaga o le Pau, e aofia ai le oti faaletino ma le faaleagaga faapea foi ma taunuuga o a tatou agasala. Na aoao mai Peresitene Iosefa Filitia Samita o le 2 Nifae 9 o se “tasi o aoaoga e sili ona malamalama ua fofogaina mai e faatatau i le togiola. … E tatau ona faitauina ma le totoa e tagata uma e sailia le faaolataga” (Answers to Gospel Questions, comp. Joseph Fielding Smith Jr., 5 vols. [1957–66], 4:57).

2 Nifae 9:1–9

Ua aoao mai Iakopo o le Pau na aumai ai le oti faaletino ma le faaleagaga i luga o tagata uma

O le a le mea e oo mai i lou mafaufau pe a e mafaufau i le upu sauai?

O le upu sauai e masani ona faatatau atu i se mea e taufaafefe ma e mafai ona mafua ai se afaina tele. E ui e toatele tagata e mafaufau lava i na o meaola e le mo’i pe a latou mafaufau i se sauai, manatu pe afai e i ai se mea e mafai foi ona aumaia le tiga tumau ia te oe ma, o lea, e taufaafefe moni ai. Sa faaaoga e Iakopo le faatusa o se sauai e fai ma faailoga o se tulaga taufaafefe e fetaia’i ma i tatou uma i le olaga nei. Faitau le 2 Nifae 9:10, ma sue elemene e lua o le sauai na faamatalaina e Iakopo. Ona faatumu lea o avanoa o le siata o loo i lalo.

Sau’ai Leaga Matautia
O	S
“o o le t”	“o o le a”

E taua le malamalama ina ua aoao mai Iakopo e uiga i le “oti o le agaga” o le uiga o lana faamatalaga e le faapea o le a oti mo’i o tatou agaga, ae o le vavaeese mai o i tatou faaleagaga pe aveese mai mai le afioaga o le Atua (tagai 2 Nifae 9:6). O lenei vavaeeseina e masani ona ta’ua i tusitusiga paia o le oti faaleagaga. Atonu e te manao e tusi le fasifuaitau vavaeese mai le afioaga o le Atua i le autafa o au tusitusiga paia i talaane o le “oti o le agaga” i le 2 Nifae 9:10.

Faitau le 2 Nifae 9:6, ma matau na amata e Iakopo i le talanoa mai e uiga i le oti o le tino ae faaiu i le talanoaina o le vavaeese mai le afioaga o le Atua. Ia suesue ma le toto’a i le fuaiupu lenei. O le a le mea na tupu na oo mai ai le oti faaletino ma le oti faaleagaga i le tagata?

Faitau le 2 Nifae 9:7–9, ma ta’u mai le mea na aoao mai e Iakopo o le a tupu i o tatou tino ma o tatou agaga pe ana faapea e leai se Togiola ae tumau ai e faavavau le oti faaletino ma le oti faaleagaga. Ae e te le’i faitau, o le a fesoasoani ia te oe le iloa o le uiga o upu nei na faaaoga e Iakopo i le fuaiupu e 7: O le fasifuaitau “o le faasalaga muamua na oo mai Ii le tagata” (2 Nifae 9:7) e faatatau i taunuuga o le Pau o Atamu ma Eva. O le upu tino pala e faatatau i le tino faalelalolag aua e le atoatoa ma o le a iu lava ina oti. O le upu tino e le pala e faatatau i le tino toetu, lea o le a ola e faavavau.

1. I lau api talaaga mo le suesueina o tusitusiga paia, lisi ni nai fasifuaitau e te maua i le 2 Nifae 9:7–9 e faamatala ai le mea o le a tupu i o tatou tino ma agaga pe ana faapea e leai se Togiola.

Iesu o loo Tatalo i Ketesemane

Faitau le faamatalaga lenei mai ia Elder D. Todd Christofferson o le Korama a Aposetolo e Toalua e faamanino ai lo tatou malaia pe ana le i ai le Togiola a Iesu Keriso: “Ana faapea e tumau lo tatou vavaeese mai le Atua ma lo tatou oti faaletino, semanu e matuai leai lava se uiga o le faitalia e filifili ai. Ioe, o le a tatou filifili e fai filifiliga, ae o le a la lona uiga? O le taunuuga mulimuli lava o le a tutusa lava e tusa lava po o a tatou amioga: o le oti e aunoa ma se faamoemoe o le toetutu ma leai se faamoemoe o le lagi. Pe tatou te filifili e fai le lelei po o le leaga, o le a tatou iu uma lava o ni ‘agelu a le tiapolo’” (“Moral Agency,” Ensign, Iuni 2009, 50).

2. Tusi se fuaiupu i lau api talaaga mo le suesueina o tusitusiga paia e faamatala ai i a oe lava upu lou manatu e uiga i le saunoaga a Elder Christofferson e uiga i lo tatou tulaga pau. Faaopoopo i ai se faamalamalamaga puupuu o le mafuaaga e te manatu ai o le a faatusa ai e Iakopo le oti faaletino ma le vavaeese mai le Atua o se “sauai leaga matautia.”

2 Nifae 9–10

Ua aoao mai Iakopo i le auala e laveai ai e puapuaga a le Faaola i tatou mai aafiaga o le pa’u ma taunuuga o agasala

E le’i tuua i tatou e le Atua ia tigaina i taunuuga atoatoa o “lena sauai leaga matautia o le oti ma seoli.” Faitau le 2 Nifae 9:10, ma faailoga le mea ua saunia e le Atua mo i tatou.

Faitau le talafaatatau lenei mai ia Peresitene Iosefa Filitia Samita lea e faailoa ai lo tatou manaomia o se Faaola

“Sa savalivali se alii i le auala ma faapea ona pa’u ai i totonu o se lua loloto ma pogisa, sa faapea ona le mafai ona toe pe’a mai i luga ma toe maua loa saolotoga. E mafai faapefea ona ia laveai mai o ia lava mai lenei mala? E le ala mai i soo sana taumafaiga, aua e leai se auala e sao ese ai i totonu o le lua. Sa taufonō mai mo se fesoasoani ma o se tagata agalelei naunautai, sa faalogo atu i ana tuualaga mo se mapusaga, sa faavave atu e fesoasoani i ai i le tuuifo o se apefai, ma tuu atu ia te ia le auala e mafai ai ona ia pe’a ae ai i luga.

“O le tulaga tonu lava lenei sa tuu ai e Atamu o ia lava ma ana fanau, ina ua ia a’i i le fua o le laau faasaina. O le i ai faatasi uma i totonu o le lua, na leai ai se tasi e mafai ona oo mai i luga e faasao isi. O le lua o le tuliesea mai le afioaga o le Alii ma le oti faaletino, o le faagataina o le tino. Ma ona o tagata uma e oo i ai le oti, o lea e leai ai se tasi e mafai ona tuuina mai se auala e sao ai.

“O le mea lea, i lona alofa mutimutivale e le iu, na faafofoga mai ai le Tama i auega a lana fanau ma auina mai ai Lona Alo Pele e Toatasi, o le sa le mafai ona oti pe agasala, e tuuina mai le auala e sao ai. O lenei mea sa ia faia e ala i lana togiola e le iu ma le talalelei e faavavau” (Doctrines of Salvation, ed. Bruce R. McConkie, 3 vols. [1954–56], 1:126–27).

O le tele lava o le savali a Iakopo i le mataupu e 9 e taulai atu i le ala ua saunia e le Alii mo i tatou e sao ai mai le uu a le oti faaletino ma le faaleagaga, ma ua faamautinoa mai ia i tatou e mafai ona laveaiina mai ai i tatou.

3. Suesue i le 2 Nifae 9:5, 19–21, ma tali fesili nei i lau api talaaga mo le suesueina o tusitusiga paia:

   1. E tusa ai ma le 2 Nifae 9:5, 21, o le a le mea na tupu i le Faaola ina ia mafai ona laveaiina i tatou mai le oti ma seoli?

   2. Mo ai na mafatia ai le Faaola, e tusa ai ma le 2 Nifae 9:21?

Mafaufau pe toafia tagata “ua i ai i le aiga o Atamu” (2 Nifae 9:21). E aofia ai i latou o e na ola, o loo ola nei, ma e o le a ola i le lalolagi—e aofia ai ma oe. Atonu e te manao e tusi lou igoa i autafa o le 2 Nifae 9:21 e manatua ai le taulaga a le Faaola na faia mo oe.

Tuuina o Lou Igoa i totonu o Tusitusiga Paia

O le faaaoga ai o lou lava igoa i se fuaiupu o tusitusiga paia e fesoasoani e fai ai aoaoga o se mea e sili atu ona patino. A uma ona faitau se fuaiupu e te manatu e faatatau ia te oe, o le tuu i ai o lou igoa e mafai ona fesoasoani e te faatatauina ai lena savali i lou olaga.

O Le Faasatauroga

Na aoao mai Iakopo o mafatiaga o le Faaola o le a fesoasoani tatou te sosola ese ai mai le sauai leaga matautia—oti faaletino ma le vavae ese mai e faavavau mai le afioaga o le Atua. Faitau le 2 Nifae 9:22, ma faailoa mai se fasifuaitau o loo faapea mai o le a mafai ona tatou faatoilaloina le oti faaletino ma se fasifuaitau o loo faaali mai ai o le a tatou toe i ai i le afioaga o le Atua. Tusi mea ua e maua i fuaiupu o loo i lalo:

Ona o le Pau, o le a oti ai o tatou tino, ae ona o mafatiaga o Keriso, o o tatou tino o le a .

Ona o le Pau, ua vaveese mai ai i tatou mai le afioaga o le Atua, ae ona o mafatiaga o Keriso, o le a toe tutu tagata uma .

Mai aoaoga a Iakopo ua tatou aoao ai i le aoaoga faavae: O le Togiola a Iesu Keriso ua laveai ai tagata uma mai le oti faaletino ma le oti faaleagaga lea na oo mai ona o le Pau.

E faaopoopo atu i lenei savali o le faamoemoe, sa aoao mai foi e Iakopo o puapuaga o le Faaola e mafai ona laveai ai i tatou mai le oti faaleagaga lea e mafua mai ona o a tatou lava agasala. Faitau le 2 Nifae 9:27, ma faailoa mai pe o le a se faamalamalamaga a Iakopo o le tulaga o i latou o e solitulafono pe agasala. Faitau le 2 Nifae 9:15–16, ma faailoga le ita faaleagaga po o le faasalaga lea o le a aumai e a tatou agasala i o tatou luga pe afai tatou te le salamo.

E faaopoopo atu i lenei faasalaga, matau le fuaitau “o le a latou o ese atu” i le 2 Nifae 9:16. Ona o le Togiola, o le a toe foi atu ai tagata uma i le afioaga o le Atua ina ia faamasinoina. Ae peitai, afai tatou te le’i salamo ia tatou agasala, o le a toe vavae ese mai i tatou mai le afioaga o le Atua. E ui o le laveaiina mai i le Pau o se meaalofa i tagata uma, o lo tatou laveaiga mai taunuuga o a tatou lava agasala e faalagolago lea i o tatou manaoga ma amioga. Faitau le 2 Nifae 9:21, 23–24. Ona o le Togiola, o le a se mea e mafai ona tatou faia ina ia laveai ai mai taunuuga e faavavau o a tatou agasala?

A uma ona faitau upu a Iakopo, faauma le mataupu faavae lenei: E ala mai i le Togiola a Iesu Keriso, e mafai ona tatou faatoilaloina taunuuga o a tatou agasala pe afai tatou te.

Faaalu sina taimi e tomanatu ai i se mea e mafai ona e faia ina ia e atili lagona atoatoa ai le mana faamamā o le Togiola a le Faaola. O i ai ni mea o le a finagalo le Alii e te salamo ai? Mafaufau loloto i auala e mafai ona e salamo ai i nei mea. E mafai faapefea ona e faalogo lelei atu i Lona siufofoga?

4. Tusi se parakalafa puupuu i lau api talaaga mo le suesueina o tusitusiga paia e faailoa ai ou lagona e uiga i le taulaga togiola a le Faaola mo oe.

5. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

   Ua ou suesueina le 2 Nifae 9 ma faamaeaina lenei lesona i le (aso).

   Fesili, mafaufauga, ma manatu faaopoopo ou te fia faasoa i lou faiaoga: