Seminare
Iunite 4: Aso 1, 1 Nifae 15

Iunite 4: Aso 1

1 Nifae 15

Folasaga

I le 1 Nifae 15 o le a e vaai ai i le eseesega i le va o Nifae ma ana taumafaiga filiga ia maua faaaliga faaletagata ma taumafaiga lē faavaea a ona uso. A o e suesueina lenei mataupu, mafaufau loloto i lau taumafaiga ia maua tali ma le taitaiga mai le Alii.

1 Nifae 15:1–11

Ua faitio uso o Nifae e le mafai ona la malamalama i le faaaliga a Liae

O le tele lava o gaoioiga e manaomia ai le taumafaiga i la tatou vaega ae lei mafai e i tatou ona olioli i taunuuga. Mafaufau i se gaoioiga ua e auai—e pei o meaaoga, taina o se meafaifaaili, po o afeleti—ma mafaufau i le faia i le va o le galuega e te tuu i le gaoioiga ma taunuuga e mulimuli mai. Vaavaai mo se mamanu faapena ao e suesue i le 1 Nifae 15. Matau le faia o le tuuina i ai o le taumafaiga ma le aoaoina o upu moni faaleagaga ma le mauaina o faaaliga mai le Alii.

Ina ua maea lana saili ma le filiga ia malamalama i le faaaliga ma aoaoga a lona tama, ona maua lea o lana lava faaaliga, na toe foi atu Nifae i le faleie o lona tama. O iina na ia maua ai ona uso o fefinauai. Suesue 1 Nifae 15:1–3, ma faailoa mai mea na la talanoaina.

I le 1 Nifae 15:6–7, vase lalo o mea na popole ai uso o Nifae ma mafua ai le finauga. E tusa ai ma le 1 Nifae 15:3, aisea na faigata ai ia i laua ona malamalama i aoaoga a Liae?

Faitau 1 Nifae 15:8 ma vase lalo o le fesili na fai atu e Nifae i ona uso. Aisea e talafeagai ai lenei fesili mo Nifae e fai atu ina ua faatoa uma lava lona aafiaga?

Vase lalo o tali a uso i le 1 Nifae 15:9. O le upu ona i lenei fuaiupu o lona uiga aua.I nisi upu, na faamalamalama mai e uso o Nifae, “Matou te lei fesili atu i le Alii aua e le fetalai mai o Ia ia te i matou.”

  1. Journal iconMafaufau e i ai sau uo e le fesili atu i le Alii mo le taitaiga aua e le talitonu o ia o le a tali mai o Ia. Suesue 1 Nifae 15:11, ma mafaufau loloto i le fautuaga na tuuina atu e Nifae i ona uso e uiga i le mauaina o tali mai le Alii. Ona, tusi lea i lau api talaaga mo le suesueina o tusitusiga paia, se tusi e faamalosiauina lau uo e fesili atu i le Atua ma le faatuatua. Faasoa atu i le tusi le fautuaga a Nifae ma ou lava lagona e uiga i le tatalo.

O le mataupu faavae o le talalelei e tasi e mafai ona tatou aoao mai uiga ma aafiaga o Nifae ma ona uso o le afai tatou te fesili atu i le Alii i le faatuatua ma tausi Ana poloaiga, o le a tatou saunia e maua faaaliga sili atu ma le taitaiga mai ia te Ia.

  1. Journal iconFilifili se tasi o fesili nei, ma tali i lau api talaaga mo le suesueina o tusitusiga paia:

    1. O le a se mea e te fai atu i se tagata fou o le Ekalesia ia malamalama ai i le mea e manaomia mai ia i tatou ina ia aoaoina ma taitaia e le Alii?

    2. Na faapefea e au taumafaiga e aoao upu moni faaleagaga ma saili le taitaiga a le Alii ona aafia lou mafaia ona lagona le Agaga ma malamalama i le talalelei?

I se taimi o le aso o sosoo ai, faasoa atu lau tali i le galuega atofaina i luga i se matua, se isi tagata o le aiga, taitai o le Ekalesia, po o se faiaoga. A o e faia, valaaulia le tagata e faasoa mai aafiaga ia te oe e uiga i se taimi na ia taumafai ai ma le faatuatua e saili le fesoasoani ma le taitaiga a le Tama Faalelagi.

1 Nifae 15:12–20

Ua faamalamalama e Nifae le faataapeapeina ma le faapotopotoina o Isaraelu

Na le mautonu uso o Nifae e uiga i le valoaga ma aoaoga a Liae i le laau olive ma Nuuese (tagai 1 Nifae 15:7; tagai foi 1 Nifae 10:12–15). Na faamalamalama e Nifae o le faataapeapeina o lala moni o le laau olive e faatusa i le faataapeapeina faaletino ma le faaleagaga o le aiga o Isaraelu (tagata o le feagaiga a le Atua) ona o lo latou le usiusitai. I lo latou tulaga faataapeapeina na latou le maua ai le malamalama o le talalelei, faapea foi lo latou faasinomaga o ni tagata o le aiga o Isaraelu. I le avea ai ma se vaega o le faapotopotoina o le aiga o Isaraelu i aso e gata ai, o le a talia e tagata i le lalolagi atoa le talalelei toefuataiina ma iloa ai o i latou o tagata o le feagaiga a le Alii (tagai 1 Nifae 15:14–15).

Faitau 1 Nifae 15:14, ma faailoga le mea o le a malamalama ai Isaraelu faataapeapeina i aso e gata ai.

Na aoao mai e Nifae o i latou e auai i le Ekalesia e pei lava na suluina i latou “i totonu o le laau olive moni” (1 Nifae 15:16). Na ia faapea mai foi, faapei o le faataapeapeina o le aiga o Isaraelu, o lenei suluina po o le faapotopotoina o le a tupu “e ala mai Nuuese” (1 Nifae 15:17). E ono fesoasoani le malamalama “i tusitusiga paia, Nuuese e tele ona uiga. O nisi taimi e faaigoaina ai tagata e le tupuga mai le ituaiga o Isaraelu, i nisi taimi o tagata e le mai le gafa o Iutaia ma o nisi taimi o atunuu e le i ai le talalelei, e ui lava o loo i ai sina toto Isaraelu i tagata. O lenei faaaogaina mulimuli e faapitoa lava le uiga o le upu e pei ona faaaogaina i le Tusi a Mamona” (Taiala i Tusitusiga Paia, “Nuuese,” scriptures.lds.org).

tamaitai talavou o loo tatalo

E faamaoni le Alii i Ana folafolaga ma manatua Ana feagaiga ma Ana fanau. E finagalo o Ia ia maua e Ana fanau uma lava faamanuiaga o le talalelei faavavau (tagai 1 Nifae 15:18). O au taumafaiga e faasoa atu le talalelei i uo ma aiga ma lou naunau e auauna i se misiona faamanuiaina e fesoasoani i le faataunuuina o le valoaga a Liae.

1 Nifae 15:21–36

Ua tali atu Nifae i fesili a ona uso e uiga i le faaaliga a Liae mai ona lava aafiaga

O le vaega o totoe o le 1 Nifae 15 e maua ai fesili na fai atu e uso o Nifae ia te ia e uiga i le miti a Liae. Na latou fesili, “O le a le uiga o le ai uamea lea na vaai i ai lo tatou tama, lea na tau atu i le laau?(1 Nifae 15:23.) Faitau le tali a Nifae i le 1 Nifae 15:24–25, ma faailoa mai faamanuiaga na folafola mai mo i latou e faalogo ma le filiga i le afioga a le Atua. I nei fuaitau mai ia Peresitene Ezra Taft Benson e uiga i le mana o afioga a le Atua, vase lalo o fuaitau e tutusa ma le aoaoga a Nifae:

  • “O le a le gata ina taitaiina i tatou e le afioga a le Atua i le fua e sili ona manaomia, a e mafai foi ona tatou maua i le afioga a le Atua ma ala mai ai, le mana e tetee atu ai i faaosoosoga, ma le mana e faatoilalo ai galuega a Satani ma ana au.

  • “O le afioga a le Atua … e i ai le mana e faamalosia ai le Au Paia ma faaauupegaina ai i latou i le Agaga ina ia mafai ona latou tetee atu i le leaga, ae taofi mau i le lelei, ma maua le olioli i lenei olaga.”

  • “O le faamanuiaina i le amiotonu, o le mana e aloese ai mai le faaseseina ma teena ai faaosoosoga, taiala i o tatou olaga i aso uma, faamaloloina o le agaga—o nisi nei o folafolaga ua tuuina mai e le Alii ia i latou o e o atu i Lana afioga.… E tusa lava pe o le a lo tatou filiga i nisi itu, ua na o tusitusiga paia lava e maua ai nisi o faamanuiaga, i le o mai lea i le afioga a le Alii ma uumau i ai a o tatou taumafai e malaga atu i le pogisa agai i le laau o le ola” (“O Le Mana o le Afioga,” Liahona, Iulai 1986, 69, 71).

E taua naua lo tatou piimau i le afioga a le Atua e ala i suesuega i tusitusiga paia, tatalo, ma le faalogo i taitai musuia.

  1. Journal iconI lau api talaaga mo le suesueina o tusitusiga paia, tusi se fua e faalauiloa ai afioga a le Atua. Ia mautinoa e faaaofia ai faamanuiaga na folafola mai e Nifae ia i latou e piimau i afioga a le Atua. Atonu foi e te manao e lisi ni punaoa mo le mauaina o afioga a le Atua.

Alii talavou o loo faitau

Mafaufau e tusi le mataupu faavae lenei i au tusitusiga paia i autafa o le 1 Nifae 15:24–25:O le suesue ma le mulimuli i afioga a le Atua e faamalosia ai i tatou e tetee faaosoosoga a Satani.

  1. Journal iconIna ia fesoasoani ia te oe e faamalosia lau molimau i nei mataupu faavae, tali se tasi po o fesili uma nei i lau api talaaga mo le suesueina o tusitusiga paia:

    1. O le a se aafiaga o au suesuega i tusitusiga paia na fesoasoani ia te oe e iloa ai o lenei mataupu faavae e moni?

    2. E faapefea ona e iloa pe moni lenei mataupu faavae?

I le miti a Liae, o i latou na piimau i le ai uamea na taitaia saogalemu mai le puao pogisa i le laau o le ola. I le 1 Nifae 15:26, na fesili atu uso o Nifae ia te ia e faamalamalama mai le uiga o le vaitafe lena sa i talaane o le laau o le ola. Vaai i le 1 Nifae 15:27–29, ma faailoa mai le mea na faatusa i ai le vaitafe.

Faitau 1 Nifae 15:32–36. Aisea na ono faapopoleina ai uso o Nifae i nei aoaoga?

  1. Journal iconTali le fesili lenei, i lau api talaaga mo le suesueina o tusitusiga paia:

    1. O a vaega o le miti a Liae ma le faaliliuga a Nifae o le miti o faaalia ai le alofa ma le popole o le Atua mo uso o Nifae?

    2. O faapefea ona e vaai i le alofa ma le popole o le Atua mo oe i le 1 Nifae 15?

  2. Journal iconTusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

    Ua ou suesueina le 1 Nifae 15 ma faamaeaina lenei lesona i le (aso).

    Fesili, mafaufauga, ma manatu faaopoopo ou te fia faasoa i lou faiaoga: