Ina ua uma ona faamaumau valoaga a Isaia (2 Nifae 12–24), sa faamamafa mai e le perofeta o Nifae le taua o nei valoaga ma faamatala mai o i latou e i ai le agaga o valoaga e mafai ona malamalama ma talisapaia upu a Isaia (2 Nifae 25). Sa ia faamatala mai o le faamoemoega o ana tusitusiga o le “e faatauanau atu ai ia matou fanau, ma o matou uso foi, ia talitonu ia Keriso, ma ia faalelei ma le Atua” (2 Nifae 25:23). Sa ia valaaulia tagata uma ia talitonu ia Iesu Keriso ma ia “tapuai atu ia te ia ma lo latou manatu atoa, mafaufau atoa, ma le malosi atoa, ma o outou agaga atoa” (2 Nifae 25:29).
Ua aoao mai Nifae e mafai ona tatou malamalama i upu a Isaia pe a tatou maua le agaga o valoaga
E masani ona faaaoga e tagata ia loka e malupuipuia ai ni meatotino taua. Latou te ono taofia le ki e tasi i le loka, pe latou te ono tuuina atu foi se kopi o le ki i se uo faatuatuaina po o se tagata o le aiga. Na iloa e Nifae o valoaga a Isaia e “taua tele” (2 Nifae 25:8), ma sa manao o ia ia malamalama i ai tagata uma. Sa ia tuuina atu se ki mo soo se tasi na manao e tatala le uiga o upu a Isaia.
Faitau le fuaiupu muamua i le 2 Nifae 25:4, ma vaavaai mo le ki i le malamalama i upu a Isaia. O le a le uiga o le ia maua “le agaga o valoaga”? O le a lou manatu e mafai faapefea ona fesoasoani le agaga o valoaga ia te oe ia e malamalama lelei ai i tusitusiga paia, ae maise lava o upu a Isaia?
O le agaga o valoaga e faatatau i le agaga o faaaliga. O le uiga o lenei mea a e maelega ma suesue ma le agaga tatalo ia tusitusiga paia ma saili ia malamalama i o latou uiga, e mafai ona e maua le agaga o faaailga, ma o le a faamalamalama e le Agaga Paia i lou mafaufau ma lou malamalamaga. Ma le isi, ua aoao mai tusitusiga paia e faapea “o le agaga o le valoaga o le mau lea ia Iesu” (Faaaliga 19:10). A o e tuputupu ae i lou malamalama ma lau molimau i le Faaola, o lou malamalamaga i tusitusiga paia—e aofia ai aoaoga a Isaia—o le a faateleina ma o le a e malamalama lelei atu i auala e faatatau ai aoaoga ia te oe.
Na faasoa mai e Nifae isi manatu e mafai ona faaleleia ai lou malamalamaaga i upu a Isaia. Sailiili i mau nei, ma faailoa mai nisi o ki e tolu i le malamalama i upu a Isaia:
Ia manatua o le gagana faafaatusa ma le faafatusolo e masani ona faaaoga i valoaga faaIutaia anamua (tagai 2 Nifae 25:1). Ma le isi, o le suesue i aganuu, talafaasolopito, ma laufanua o Isaraelu anamua, o le a fesoasoani e te malamalama ai i upu a Isaia (tagai 2 Nifae 25:5–6). O le ola i aso e gata ai ma le vaaia o le faataunuuga o le tele o valoaga e fesoasoani foi tatou te malamalama ai ia Isaia (tagai 2 Nifae 25:7–8).
E pei ona tusia i le 2 Nifae 25:9–19, Na vavalo Nifae e uiga ia Iutaia ma lo latou nuu moni i Ierusalema ma eria taulalata ane i ai. Fai mai o ia, o tagata Iutaia o e na ave faatagataotauaina i Papelonia ina ua uma ona le faatafunaga o Ierusalema o le a toe foi mai i “le laueleele o lo latou tofi” (tagai 2 Nifae 25:9–11). O le a afio ai Iesu Keriso, le Mesia ia i latou, ae o le toatele o le a teena o Ia ma faasatauro o Ia (tagai 2 Nifae 25:12–13). Ina ua mavae le maliu ma le Toetu o le Faaola, o le a toe faatamaia ai Ierusalema, ma o le a faataapeapeina tagata Iutaia ma faasalaina e isi malo (tagai 2 Nifae 25:14–15). Mulimuli ane o le a latou talitonu ia Iesu Keriso ma Lana Togiola, ma o le a toefuatai mai i latou e le Alii “mai lo latou tulaga se ma pau” (tagai 2 Nifae 25:16–19).
Mafaufau pe o le a faapefea ona e tali atu i se tasi e faapea mai e le talitonu le Au Paia o Aso e Gata Ai ia Iesu Keriso. A o e suesue i vaega o loo totoe o le 2 Nifae 25, vaavaai mo fuaitau e mafai ona e faasoaina atu i se tulaga faapena.
Ia tagai vave atu i le 2 Nifae 25:20–30, ma fuafua e faailoga le igoa “Keriso” i taimi taitasi e vaaia ai.
Faitau le 2 Nifae 25:28–29, ma faailoa le mea na fai mai Nifae o “le ala sa’o.” Suesue le 2 Nifae 25: 23–26 mo mafuaaga e avea ai le talitonu ia Iesu Keriso ma “ala sa’o.” (Ia matau o le 2 Nifae 25:23, 26 o se fuaitau o le mau tauloto. Atonu e te manao e faailoga i se ala iloagofie ina ia mafai ona e mauaina i le lumanai.) Tusi au tali i lau api talaaga mo le suesueina o tusitusiga paia.
O le upu faalelei i le 2 Nifae 25:23 o lona uiga ina ia aumai e ogatasi ma le Atua. O le “alofa tunoa” o le Alii o le auala mulimuli lea e tupu ai le faaleleiga ma le Atua. Faitau le faamalamalamaga lenei o le alofa tunoa o le Alii:
“O le upu alofa tunoa, e pei ona faaaogaina i totonu o tusitusiga paia e faasino tonu lava i le fesoasoani faalelagi ma le malosi tatou te maua e ala i le Togiola a le Alii o Iesu Keriso. …
“… O le alofa tunoa, e ala i le taulaga togiola a le Faaola, o le a toetutu ai tagata uma ma maua le tino ola pea. [Peitai afai e tatau ona tatou agavaa mo le ola faavavau i le afioaga o le Atua, e ao ona tatou mama mai a tatou agasala e ala i Lona alofa tunoa.]
“O le fasi fuaitau o ‘mea uma tatou te mafaia’ [2 Nifae 25:23] o loo aoao mai ai, e manaomia i la tatou vaega le taumafai, ina ia maua ai le atoatoaga o le alofa tunoa o le Alii ma maua ai le agavaa e mau faatasi ma Ia. Na poloai mai le Alii ia i tatou e usiusitai i Lana talalelei, e aofia ai le faatuatua ia te Ia, salamo i a tatou agasala, papatiso, mauaina o le meaalofa a le Agaga Paia, ma tumau e oo i le iuga. …
“E le gata i le manaomia o le alofa tunoa mo lou faaolataga tupito, e te manaomia foi lenei mana faaola i aso uma o lou olaga. A e faalatalata atili atu i lou Tama Faalelagi i le maelega, faamaualalo, ma le agamalu, o le a Ia faagaeetia ma faamalosia oe e ala i Lona alofa tunoa” (Faamaoni i le Faatuatua: O se Tusitaiala o le Talalelei [2004], 18–20).
I lau api talaaga mo le suesueina o tusitusiga paia, tusi tali i fesili nei:
O le a le faiā i le va o le alofa tunoa o le Alii ma a tatou taumafaiga e ola i le talalelei?
O le a le uiga ia te oe ia faaolaina e le alofa tunoa?
O le a le uiga ia te oe o le fasifuaitau “mea uma tatou te mafaia”?
Mafaufau loloto i le upumoni lenei: Ona o Iesu Keriso, e mafai ai ona laveaiina i tatou e ala i le alofa tunoa pe a uma mea uma e mafai ona tatou faia. Mafaufau i se taimi na e faia ai mea uma na mafai ona e faia ma sa faamanuiaina ai i le fesoasoani ma le malosi mai le lagi.
O le isi upumoni na aoao mai e Nifae (tagai 2 Nifae 25:26) o le: E ala mai i le Togiola a le Faaola, e mafai ai ona tatou maua se faamagaloga o a tatou agasala.
Fuafua e tusi se tusi i se uo po o se tagata o le aiga e uiga i lou talitonuga ia Iesu Keriso pe molimau atu foi e uiga i lou talitonuga i se sauniga molimau po o se isi nofoaga talafeagai.
Toe faitau le 2 Nifae 25:26, ona tali lea o fesili nei i totonu o lau api talaaga mo le suesueina o tusitusiga paia:
O a ni auala e te tapuai ai pe [faaalia] ai le faaaloalo ia Iesu Keriso? O a ni gaoioiga e faaali atu ai i isi e te talitonu ma tapuai ia Iesu Keriso?
O a ni mea e mafai ona e faia e faaleleia atili ai au tapuaiga i le Faaola faatasi ai ma lou manatu, mafaufau, ma le malosi atoa?
Faaaoga le mamanu lenei e fesoasoani ai e tauloto le 2 Nifae 25:26:
“Ma ua matou tautalatala e uiga ia Keriso,
ua matou olioli ia Keriso,
ua matou talai atu Keriso,
ua matou vavalo e uiga ia Keriso,
ma ua matou tusitusi foi e tusa ma a matou valoaga,
ina ia mafai ona iloa e a matou fanau
po o le a le puna e mafai ona latou tepa taulai i ai
mo se faamagaloga o a latou agasala.”
A uma ona tauloto le fuaitau mo ni nai taimi, ia ufiufi le laina muamua i lou lima ona toe taumafai lea e fai. Ona ufiufi lea o le isi laina, ma faaauau ai seia oo ina e lagona ua e taulotoina le fuaitau.
Ata
tamaitai talavou o loo tuuina atu lana molimau
Tauloto le 2 Nifae 25:26 i se tagata o le aiga, ma tusi i lau api talaaga mo le suesueina o tusitusiga paia ua e taulotoina.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:
Ua ou suesueina le 2 Nifae 25 ma faamaeaina lenei lesona i le (aso).
Fesili, mafaufauga, ma manatu faaopoopo ou te fia faasoa i lou faiaoga: