Alema 42

Folasaga

Ua faaiuina e Alema lana fautuaga i lona atalii le mautonu o Korianetona e ala i le faamatalaina e faapea, ua saunia e le Tama Faalelagi se auala mo i latou o e agasala ina ia maua le alofa mutimutivale. Sa ia aoao atu i lona atalii e uiga i le faasalaga ua manaomia mai le faamasinoga mo le agasala. Ona ia molimau atu lea o Iesu Keriso o le a “faamalie ai manaoga o le faamasinoga” (Alema 42:15) e ala i le mafatia mo tagata uma na agasala ma ua naunau e salamo. Ua saunia e le Alii le alofa mutimutivale i e ua salamo.

Alema 42:1–14

Ua aoao atu e Alema Korianetona e uiga i le tulafono o le faamasinoga

Moeiini ou mata mo se taimi ma manatunatu loloto pe faapei pe a oo mai le taimi mo lou Faamasinoga Mulimuli. A o e iloilo lou olaga, e te manao i le Faamasinoga Mulimuli ina ia tonu? Aisea atonu e te manao ai i lau faamasinoga ina ia tonu?

Ia, mafaufau i le upu o le tonu i lona faauigaga. O se tasi o faauigagaga o le tonu e aofia ai le maua o mea e tatau ai; o le manatu o le tonu e fesootai ma le faaupuga faaletusitusiga paia faamasinoga tonu.

Tusi se fua faigofie i lau api talaaga mo le suesueina o tusitusiga paia e pei ona faaali atu iinei. Ona tusi lea o le upu Faamasinoga tonu i lalo ifo o lau ata. Tuu se avanoa i lau api talaaga ina ia aofia ai ma isi igoa i luga o lau ata a o e faaauau le lesona.

Ina ia fesoasoani ia te oe e malamalama atili ai i le mataupu o le faamasinoga tonu, faitau le faamalamalamaga lenei mai ia Elder Dallin H. Oaks o le Korama a Aposetolo e Toasefululua:

“O lefaamasinoga tonu e tele ona uiga. O se tasi [o uiga] o le paleni. O se faailoga taatele o le faamasinoga tonu o le paleni o le fua. …

“… O le manatu o le faamasinoga tonu e tusa ai o le manatu faavae o tusitusiga paia uma o talanoa i tagata ua faamasinoina e tusa ai ma a latou galuega” (“Sins, Crimes, and Atonement” [address to CES religious educators, Feb. 7, 1992], 1).

Na popole le atalii o Alema o Korianetona e uiga i le tonu o le Faamasinoga Mulimuli. Faitau le Alema 42:1, ma faailoga le mea na manatu ai Korianetona o le a le tonu pe le tonu e uiga i le Faamasinoga Mulimuli.

Ia manatua sa solia e Korianetona agasala e tele, o nisi sa matua matuia lava (tagai Alema 39:2–3); o lea, atonu na manatu ai Korianetona pe sa faamoemoe e le tonu le faasalaina o i latou na agasala.

I lau api talaaga mo le suesueina o tusitusiga paia, tusi pe aisea ua e manatu ai o i latou e le i salamo mai a latou agasala o le a popole e uiga i le mauaina o “ le taui e tatau ai” i le faamasinoga.

I le Alema 42:2–11, sa faaali e Alema le popolega o Korianetona e ala i le faamatala atu o le Pau o Atamu ua aumaia ai lo tatou oti faaletino (o le tuueseeseina o le tino ma le agaga i le oti o le tino) ma le oti faaleagaga (o le vavaeeseina lea mai le Atua ona o le agasala). O lea sa alagatatau ai le faatuina o se fuafuaga ia toe maua mai ai le tagata mai lo latou tulaga o le pa’u. A le o lea, o le a tumau ai pea tagata uma i le tulaga o le agasala ma faanoanoa e faavavau e tusa ai ma manaoga o le faamasinoga tonu.

Faitau le Alema 42:12, ma faailoa mai le mea na mafua ai ona ulufale atu le tagata i lo latou tulaga o le pa’u. Faitau nei le Alema 42:14, ma faailoga le taunuuga o lo tatou le usiusitai lea e manaomia e le faamasinoga tonu. I luga o le ata o fua sa e tusia i lau api talaaga mo le suesueina o tusitusiga paia, tusi le Soligatulafono—le usiusitai po o le agasala i lalo ifo o le fua i le itu agavale ma le Faasalaga—e vavaeeseina mai le afioaga o le Atua i lalo ifo o le fua i le itu taumatau.

Faitau le Alema 42:18. I lau api talaaga mo le suesueina o tusitusiga paia, tali fesili nei:
1. O le a sou manatu i le uiga o le maua o le “faanoanoa o le mafaufau” (Alema 42:18)?
2. O a mea atonu e taitai atu ai i tatou e le mafaufau ua tiga ina ia faia?

Mai i mea na aoaoina e Alema, o le a le mea e manaomia e le tulafono o le faamasinoga tonu pe a le usiusitai se tagata? (Ona o lo tatou le usiusitai, e manaomia e le tulafono o le faamasinoga tonu ina ia tatou lagona le tiga ma le vavaeeseina mai le afioaga o le Atua.) Manatunatu loloto mo se taimi ina ua e aafia i le salamo ma le faanoanoa po o le aveesea mai o le Agaga Paia ona o se mea sese ua e faia. Vaai faalemafaufau i lena lagona ua faateleina i mea sese uma ua e faia, ona vaai faalemafaufau lea i lena lagona o le a tumau ia te oe e faavavau.

E faavae i luga o mea na aoao atu e Alema, e te manao i le Faamasinoga Mulimuli e faavae i luga i le na o le faamasinoga tonu? E te manao e te maua mea e “tatau” mo mea sese sa e faia?

Alema 42:15–31

Ua aoao atu e Alema ia Koroanetona e uiga i le fuafuaga o le alofa mutimutivale

O se tasi o uiga paia o le Atua o le e tonu lava o Ia. O manaoga o le faamasinoga tonu e tausalaina ai fanau taitasi a le Tama Faalelagi ma o le a le faatagaina ai soo se tasi e mau faatasi ma Ia i la tatou tulaga o le agasala. Mafaufau i fesili nei: O i ai ea se auala mo nei manaoga o le faamasinoga tonu ina ia aveesea pe faaleaogaina?

E toatele tagata e ono tali atu i lenei fesili e ala i le fautuaina faapea pe afai tatou te salamo, o le a tatou te le mafatia i taunuuga o a tatou agasala? E ui o lenei tali e mulimuli ane e sao, e taua ona malamalama e faapea o le aveesea po o le faamagaloina o taunuuga o le a le tonu aua o le a le faamalieina ai manaoga o le faamasinoga tonu. Sa aoao atu Alema o le faaleaogaina o le faasalaga e aunoa ma le faamalieina o manaoga o le faamasinoga tonu e le mafai ona fai. Faitau le Alema 42:25, ma vaavaai mo mea o le a tutupu pe afai e aveesea e le Atua le taunuuga mo le agasala ma tuua le faamasinoga tonu e le faamalieina.

Manatunatu loloto i fesili nei a o le i faitauina le Alema 42:15 e saili ai le tali: Afai o le faasalaga o a tatou agasala e le mafai ona aveesea, e faapefea ea ona tatou maua le filemu i o tatou mafaufau ma toe fuataiina i le afioaga o le Atua?

Atonu e fesoasoani ia malamalama o le fasifuaitau “faamalie ai manaoga o le faamasinoga tonu” o lona uiga o le faamalieina po o le totogiina mo le faasalaga ua manaomia e le faamasinoga tonu.

Mai le Alema 42:15 ua tatou aoao ai: O le Togiola a Iesu Keriso ua faamalieina ai le manaoga o le faamasinoga tonu ina ia mafai ona faaalia le alofa mutimutivale i le salamo. Faamaea le ata o fua sa e tusia i lau api talaaga mo le suesueina o tusitusiga paia e ala lea i le tusia o le Faamalieina e ala i le alofa mutimutivale—o le Togiola a Iesu Keriso i lalo ifo o le fasifuaitau “Faasalaga …”.

Vaai faalemafaufau o loo i ai sau uo sa tauivi i lalo o avega na fatuina e ana agasala. I lau api talaaga mo le suesueina o tusitusiga paia, tusi le auala e te faamatala ai i lau uo le ala e faamatuu atu ai e le Togiola a Iesu Keriso le alofa mutimutivale ua faaalia mai ia i tatou taitoatasi.

Manatunatu loloto i le uiga ia te oe o le iloaina na naunau le Faaola e mafatia i faasalaga o manaoga o le faamasinoga tonu i lou tulaga ina ia mafai ona faaali atu ia te oe le alofa mutimutivale.

Faitau le Alema 42:22–24, ma faailoga mea e manaomia e Iesu Keriso ina ia mafai ona faaalia mai le alofa mutimutivale ia i tatou. O le fasifuaitau “salamo moni” i le fuaiupu 24 o lona uiga o le salamo ma le faamaoni. E tusa ai ma mea sa e faitau i ai, faamaea le mataupu faavae lenei: Afai tatou te salamo, o le a tatou maua e ala i le Togiola a Iesu Keriso.

Sa faatatau e Peresitene Boyd K. Packer, Peresitene o le Korama a Aposetolo a le Toasefululua ia Iesu Keriso o se puluvaga. O se puluvaga o se tasi e tulai i le va o ni vaega se lua e fesoasoani e foia se faafitauli. A o e faitau i ana upu, vaavaai pe faapefea ona manaomia le Faaola mo le alofa mutimutivale ina ia faaalia i le tagata agasala:

“Ma e tusa ai ma le tulafono e faavavau, e le mafai ona faaalia le alofa tunoa vagana ua i ai se tasi o le ua i ai le naunau ma e mafai ona ia tauaveina a tatou aitalafu ma totogi le tau, ma faia se fuafuaga mo lo tatou togiolaina.

“Vagana ua i ai se puluvaga, vagana ua i ai sa tatou uo, ma le tulaga atoatoa o le faamasinoga tonu, o le a leai se alofa i o tatou luga. O le tulaga atoatoa mo le faaleleia o la tatou soligatulafono, e tusa lava pe itiiti, po o le a le tele, o le a faapea lava ona fuafuaina mai ia i tatou taitoatasi.

“Peitai e tatau ona iloa lenei mea: O le mea moni, o le upu moni paia o loo faapea mai o loo i ai se Puluvaga. …

“E mafai e ala mai ia te Ia ona matua faailoa mai le alofa mutimutivale ia i tatou taitoatasi e aunoa ma le solia ai o le tulafono e faavavau o le faamasinoga tonu. …

“O le maua o le alofa e le faapea o se mea maua fua. E maua le alofa mutimutivale e ala i le osigafeagaiga ma Ia. O aiaiga la a Ia, Ana aiaiga alofa” (“O Le Puluvaga,” Liahona, Oketopa 1977, 55–57).

A o faaiuina e Alema lana talanoaga ma Korianetona, sa ia otooto mea uma sa ia taumafai e aoao atu i lona atalii. Faitau le Alema 42:26–31, ma faailoga mea na manao ai Alema mo Korianetona a o amata ona malamalama o ia i aoaoga faavae ma mataupu faavae na aoao atu e Alema i lenei mataupu. Ia matau le manaoga o Alema mo Korianetona ina ia le faia ni alofaga mo ana agasala, ae e mo ia ia faatagataina aoaoga faavae ma mataupu faavae e faatatau i le faamasinoga tonu, alofa mutimutivale, ma le Togiola ia “tosina atoa ai lou loto” (Alema 42:30). E mafai faapefea ona e faatagaina nei aoaoga faavae ma mataupu faavae e tosina atoa ai lou loto?

I lau api talaaga mo le suesueina o tusitusiga paia, tusi ou mafaufauga e faatatau i fesili nei: Afai e te faaalia patino mai lou agaga faafetai i le Faaola mo Lana taulaga mo oe, o le a se mea e te tau atu ia te Ia?

E taua le iloa na salamo Korianetona ma mulimuli ane na i ai se aafiaga tele i le tuputupu ae o le Ekalesia (tagai Alema 49:30).

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Alema 42 ma faamaeaina lenei lesona i le (aso).

Fesili, mafaufauga, ma manatu faaopoopo ou te fia faasoa i lou faiaoga: