Mosaea 5–6

Folasaga

Mosaea 5 ua faaiuina ai le lauga a le Tupu o Peniamina i lona nuu lea na amataina i le Mosaea 2. O se taunuuga o lo latou faatuatua i upu a le Tupu o Peniamina, sa oo ai i tagata se liuga tele o le loto. Sa latou ulu atu i se feagaiga ma le Atua ma tauave i o latou lava luga le suafa o Iesu Keriso. E pei ona tusia i le Mosaea 6, sa tuuina atu ai le Tupu o Peniamina lana pule e taitai ai lona malo i lona atalii o Mosaea, ma sa pule Mosaea i le amiotonu, ma mulimuli i le faataitaiga a lona tamā.

Mosaea 5:1–4

Sa oo i le nuu o le Tupu o Peniamina se liuga tele

Mafaufau i fesili nei: Pe na e moomoo ea e mafai ona e suia se mea e uiga ia te oe lava? O le a sau mea na fai i ai?

Sa faamalamalama mai e Elder David A. Bednar o le Korama a Aposetolo e Toasefululua le manaomia e i tatou taitoatasi ona oo i se liuga tele i o tatou olaga: “O le aano o le talalelei a Iesu Keriso e manaomia ai se suiga taua ma le tumau i o tatou lava natura lea e mafai ona ala atu i lo tatou faalagolago i ‘galuega, ma le alofa mutimutivale, ma le alofa tunoa o le Mesia Paia’ (2 Nifae 2:8). A o tatou filifili e mulimuli i le Matai, ua tatou filifili ia suia—ia toefanau faaleagaga” (“Ye Must Be Born Again,” Ensign po o le Liahona, Me 2007, 20).

Atonu e te manao e tusi le fasifuaitau lenei i au tusitusiga paia i talane o le Mosaea 5:2: “A o tatou filifili e mulimuli i le Matai, ua tatou filifili ia suia.”

O a ni auala e te manatu ua tatou filifili ai e sui pe a tatou filifili e mulimuli ia Iesu Keriso?

Toe faamanatu aotelega o le mataupu mo le Mosaea 3 ma le Mosaea 4 e toe manatua ai le taulaiga autu o le lauga a le Tupu o Peniamina. I le faaiuga o lana lauga, sa fesili atu ai le Tupu o Peniamina i tagata pe na latou talitonu i upu sa ia aoaoina ai i latou e uiga i le Togiola a Iesu Keriso (tagai Mosaea 5:1). Faitau le Mosaea 5:2–4, ma vaai po o le a le mea na suia i loto o tagata ina ua uma ona latou faalogologo i upu a le latou tupu. A o e faitau, o le a aoga le iloa o le “manao” (Mosaea 5:2) e faatatau i uiga, manaoga, po o le natura o se tagata.

Faitau le faamatalaga lenei mai ia Elder David A. Bednar: “O le talalelei a Iesu Keriso ua aofia ai mea e tele atu nai lo na o le aloese, faatoilalo, ma le faamamaina mai agasala ma faatosinaga leaga i o tatou olaga; e aofia moni ai le faia o mea lelei, avea ma tagata lelei, ma avea ma tagata lelei atu. … O le liuga o o tatou loto e le Agaga Paia ina ia ‘le toe i ai so [tatou] manao e fai mea leaga, ae ia faia mea lelei e le aunoa’ (Mosaea 5:2), e pei ona sa i ai i le nuu o le Tupu o Peniamina, o le tiutetauave o le feagaiga ua tatou taliaina. O lenei liuga tele e le na o le taunuuga lea o le galue malosi atu po o le atinaeina o le amio pulea sili atu o le tagata lava ia. Ae, o le taunuuga o se liuga faapitoa i o tatou manao, o tatou faamoemoega, ma o tatou natura e ala mai i le Togiola a Keriso le Alii. O lo tatou faamoemoega faaleagaga o le faatoilaloina uma lea o le agasala ma le manao e agasala” (“Clean Hands and a Pure Heart,” Ensign, Nov. 2007, 81–82).

I lau api talaaga mo le suesueina o tusitusiga paia, tali ia fesili nei:
1. O le a lou manatu o le uiga o le oo i se “liuga tele” i lou loto? (Mosaea 5:2).
2. A tatou filifili e mulimuli ia Iesu Keriso, aisea e manaomia ai ona sui o tatou manao ae le na o a tatou amioga?
3. Aisea e te manatu ai e manaomia le Togiola a Iesu Keriso mo se liuga ia tupu i totonu ia i tatou?

Suesue le Mosaea 5:2, 4, ma vaavaai mo le mea na fai e tagata na mafai ai ona tupu se liuga tele o le loto i totonu ia i latou. Atonu e te faailogaina nei mea i au tusitusiga paia. Ia manatua o upu a le Tupu o Peniamina sa faatatau i le mana o le Togiola a Iesu Keriso, ma sa i ai le faatuatua tele o le nuu i nei upu.

O se tasi o mataupu faavae ua tatou aoao mai nei fuaiupu o lenei: A o faaalia lo tatou faatuatua ia Iesu Keriso maua le Agaga Paia, e mafai ona tatou maua se liuga tele o le loto.

E faavae i lau suesuega o le Mosaea 5:1–4 ma le mataupu faavae o loo i luga, tusi i lau api talaaga mo le suesueina o tusitusiga paia, o le a se mea e mafai ona e faia e faaaoga ai le faatuatua tele atu i le Faaola. O a ni mea faapitoa e mafai ona e faia, e amata atu i le asō, ia faaaoga le faatuatua tele atu ina ia mafai ona e uunaia ma faatumauina se luiga tele o le loto i lou olaga?

Mosaea 5:5–15

Sa ulu atu le nuu o le Tupu o Peniamina i se feagaiga ma le Atua ma ua tuuina atu i ai se igoa fou

Ina ua uma ona oo i le nuu o le Tupu o Peniamina se liuga tele o le loto, sa latou mananao e ulu atu i totonu o se feagaiga ma le Alii. Sue upu po o fasifuaitau i le Mosaea 5:5 o loo faaalia ai le maualuga o le tautinoga na lagona e le nuu o le Tupu o Peniamina e faatatau i le faia ma le tausia o lenei feagaiga.

A tatou faia ni feagaiga ma le Atua, Na te iloiloina ia tulaga mo le feagaiga, ae tatou te malilie i tulaga. Ona folafola mai lea e le Atua ia i tatou ni faamanuiaga faapitoa mo lo tatou usiusitai (tagai MF&F 82:10). O le osia o feagaia o se tasi lea o auala e faaali atu ai i le Alii tatou te faamaoni i lo tatou manao e auauna atu ia te Ia.

Tali fesili nei, i lau api talaaga mo le suesueina o tusitusiga paia:
1. O a fasifuaitau i le Mosaea 5:5 e faamanatu atu ai ia te oe ia folafolaga tatou te faafouina i taimi taitasi tatou te fetagofi ai i le faamanatuga?
2. Aisea e te manatu ai e fesoasoani le osia ma le tausiga o feagaiga ia te oe e tausisia ai se “liuga tele o le loto”?

Toe tagai i le Mosaea 1:11–12. O le tasi o faamoemoega o le Tupu o Peniamina i le faapotopotoina o lona nuu o le tuu atu lea ia i latou o se igoa. Faitau le Mosaea 5:6–7, ma faailoga le igoa na tuuina atu e le Tupu o Peniamina i lona nuu ina ua uma ona latou faia la latou feagaiga ma le Alii.

Ua aoao mai e fuaiupu nei le mataupu faavae lenei: Tatou te tauave i o tatou luga le suafa o Iesu Keriso e ala i feagaiga paia. Faitau le Mosaea 5:8–14, ma vaai mo le pogai e manaomia ai ona tatou tauave i o tatou luga le suafa o Iesu Keriso.

O a nisi o faamanuiaga o le tusia o le suafa o Iesu Keriso i totonu o o tatou loto?

O le a se mea e mafua ai ona “soloiesea” le igoa mai lou loto po o le loto o se tasi?

Faitau le Mosaea 5:15, ma vaai mo folafolaga na fai e le Alii ia i latou o e tausia a latou feagaiga.

I lau api talaaga mo le suesueina o tusitusiga paia, tusi ai ou lagona pe a e mafaufau e uiga i le tusia o le suafa o Iesu Keriso i lou loto. Tusi se mafuaaga se tasi pe sili atu o le pogai e te manao ai e teuina lenei igoa ma ia le leiloa lava.

Mosaea 6:1–7

Ua amata e Mosaea lana nofoaiga o se tupu

Faitau le Mosaea 6:3, ma faailoa le mea na fai e le Tupu o Peniamina ae na te le’i faataapeina le motu o tagata.

O le a le mea na fai e le Tupu o Peniamina e fesoasoani ai i lona nuu ia manatua feagaiga na latou faia?

I lau api talaaga mo le suesueina o tusitusiga paia, tusi i lalo le ala e mafai ai e taitai perisitua ma faiaoga ona fesoasoani ia te oe e tausi ai au feagaiga.

Na maliu le Tupu o Peniamina i le tolu tausaga talu ona uma ona ia tuuina atu lana lauga. Faitau le Mosaea 6:6–7, ma vaai mo le auala na mulimuli ai le Tupu o Mosaea i faataitaiga a lona tamā i le avea ma se taitai amiotonu.

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Mosaea 5–6 ma faamaeaina lenei lesona i le (aso).

Fesili, mafaufauga, ma manatu faaopoopo ou te fia faasoa i lou faiaoga: