Iunite 29: Aso 2

Mamona 9

Folasaga

Na faaiu e Moronae le talafaamaumau a lona tama i le valaau atu ia i latou e lei talitonu ia Iesu Keriso ia liliu mai i le Alii e ala i le salamo.Sa ia aoao atu o le Atua o se Atua o vavega o le e lemasuia. Sa ia aoao atu foi e na o le pau le mea e muta ai vavega pe a muta le faatuatua o tagata. Sa ia uunaia tagata uma e tatalo i le Tama i le suafa o Iesu Keriso ina ia maua mea na latou te manaomia.

Mamona 9:1–6

Ua valaau atu Moronae ia i latou e le talitonu ia Iesu Keriso ia salamo

Mafaufau po o le a se mea atonu e te manatu i ai ma lagonaina pe ana faapea e te ulufale atu i le afioaga o le Atua i le aso. O le a sou manatu pe faapei ni lagona o tagata amioleaga i Lona afioaga? Faitau le Mamona 9:1–5, ma matauina sa faamatalaina e Moronae le mea o le a iu lava ina tupu pe a aumai tagata o e ua filifili e le talitonu ia Iesu Keriso i le afioaga o le Atua.

Sa faamatalaina e le Perofeta o Iosefa Filitia Samita o le toatele o tagata e talitonu sese faapea o le a latou lagona le toafimalie i le afioaga o le Atua e tusa lava pe latou te lei salamo mai a latou agasala.

“E le mafai ona i ai le faaolataga e aunoa ma le salamo. E le mafai ona ulu atu se tagata i le malo o le Atua ma ana agasala. O se mea o le a lē fetaui mo se tagata le sau i le afioaga o le Tama ma nofo ai ma ana agasala i le afioaga o le Atua. …

“Ou te manatu e toatele naua tagata i luga o le fogaeleele, atonu e toatele i latou i le Ekalesia—ni nai tagata i le Ekalesia—o e i ai se manatu e mafai ona latou ola i lenei olaga i le faia e pei ona latou mananao ai, solia o poloaiga a le Alii ma i le iuga e latou te o atu i lona afioaga. Latou te manatu o le a latou salamo, pe atonu i le lalolagi o agaga.

“E tatau ona latou faitau i nei upu a Moronae: ‘Tou te manatu ea e mafai ona outou mau faatasi ma ia [Keriso] i lalo o lo outou iloa lelei o lo outou sala? Tou te manatu ea e mafai ona outou fiafia e mau faatasi ma lena Tagata paia, ao falo tiga o outou agaga i lagona sala i lo outou solia pea o ana tulafono?

‘“Faauta, ou te fai atu ia te outou o le a sili atu ona outou pagatia i le mau faatasi ma se Atua paia ma fai mea tonu, i lalo o lo outou iloa lelei o lo outou eleelea i ona luma, nai lo lo outou mau faatasi ma agaga faasalaina i seoli. Aua faauta, pe a aumai outou tou te vaai i lo outou le lavalava i luma o le Atua, ma le mamalu foi o le Atua, ma le paia o Iesu Keriso, o le a tutuina e lena mea i luga o outou se afi e le matineia’ [Mamona 9:3–5]” (Doctrines of Salvation, comp. Bruce R. McConkie, 3 vol. [1954–56], 2:195–96).

1. Tali le fesili lenei, i lau api talaaga mo le suesueina o tusitusiga paia: Aisea e te manatu ai e sese ona faatali e salamo i lenei olaga, ae talitonu e mafai ona e salamo i le olaga a sau? (Atonu e te manao e faaaoga mea sa aoaoina mai le Mamona 9:1–5; Alema 12:14; ma le Alema 34:32–34 i lau tali.)

Faitau le Mamona 9:6, ma vaavaai po o le a le mea e tatau ona faia e “e ua le talitonu” e aloese ai mai mafatiaga ia sa faamatalaina e Moronae. Mafaufau e faailoga ia upu o i le Mamona 9:6 lea e faamatala ai tulaga o tagata o e liliu atu i le Atua ma tagi atu ia te Ia mo le faamagaloga. Ua tatou aoaoina mai lenei mau: Afai o le a tatou salamo ma valaau atu i le Atua, o le a tatou le pisipisia pe a tatou o atu i Lona afioaga. Atonu e te manao e tusi le mataupu faavae lenei i totonu o au tusitusiga paia po o lau api talaaga mo le suesueina o tusitusiga paia.

2. I lau api talaaga mo le suesueina o tusitusiga paia, tusi ni nai fuaiupu e uiga i le auala e te mafaufau o le a e lagonaina i le afioaga o le Atua pe afai ua e iloa ua faamamaina oe ma ua le pisipisia e ala i le Togiola a le Faaola.

E ala atu i le salamo ma le ola amiotonu, e mafai ona e saunia ina ia maua le toafilemu i le afioaga o le Atua. Mafaufau loloto i le mea e sili ona taua e te lagona e mafai ona e faia i le taimi nei e saunia ai e fetaiai ma le Atua.

Mamona 9:7–20

Ua folafola mai e Moronae e faia e le Atua vavega ma tali i tatalo a e faatuatua

Faamaloloina e Keriso se Alii Tauaso

Na e molimauina ea pe na mauaina se vavega? Tusi lau faauigaga o le upu vavega:

Saili le upu vavega i le Bible Dictionary po o le Taiala i Tusitusiga Paia e faamanino atu ai pe faaopoopo i lau faauigaga. Aisea e te manatu ai e le talitonu nisi tagata o aso nei i vavega?

E pei ona faamaumauina i le Mamona 9:7–8, sa tusi atu Moronae i tagata i aso mulimuli o e tetee o loo soifua le Atua, ua Ia tuuina mai faaaliga, ma e Na te liligi mai meaalofa i luga o i latou e faamaoni. Na aoao malosi atu Moronae faapea o loo i ai se Atua ma ua tutusa lava Ia o “ananafi, i le aso, ma le faavavau” (Mamona 9:9). O loo faaauau pea ona Ia galueaina vavega i tagata faamaoni i vaitausaga uma. Faitau le Mamona 9:9–11, 15–19, ma faailoa mai po o le a se mea na aoao atu e Moronae e uiga i le natura o le Atua ina ia mafai ona ia fesoasoani i tagata ia talitonu o loo galueaina pea e le Atua vavega.

3. Tusi i lau api talaaga mo le suesueina o tusitusiga paia mea sa e aoaoina mai le Mamona 9:9–11, 15–19 e uiga i le natura o le Atua. Tusi foi lau tali i le fesili lenei: O a ni mea o aoao mai e nei mau e uiga i le naunautaiga ma le mafai e le Atua ona faataunuu vavega i olaga o tagata i lenei vaitaimi?

Faitau le Mamona 9:20, ma vaavaai mo mafuaaga atonu ua le mafai ai e nisi tagata ona maua ni vavega.

O loo aoao mai e upu a Moronae o loo faamaumauina i le Mamona 9:9–19 lenei mataupu faavae: Ona e lemasuia le Atua, o le a Ia saunia ni vavega e tusa ai ma le faatuatua o Ana fanau. Atonu e te manao e tusi lenei mataupu faavae i talaane o le Mamona 9:19–20 i totonu o au tusitusiga paia.

E mafai ona tatou tofo i le mana faivavega a le Atua i le tele o auala i o tatou olaga. Ina ua uma ona toe iloiloina nisi o vavega tetele sa faamatalaina i tusitusiga paia, sa aoao atu Sister Sydney S. Reynonds, o le sa auauna atu i le au peresitene aoao o le Peraimeri:

“E pei lava o le taua o nei ‘vavega tetele’ ia le taua o ‘vavega iti i tulaga taitasi’ ia e aoaoina i tatou ina ia i ai le faatuatua i le Alii. O ia vavega e oo mai ao tatou iloa ma faalogo ma usitai i uunaiga a le Agaga i o tatou olaga. …

“Ou te talitonu o i tatou uma lava e mafai ona molimauina nei vavega laiti. Tatou te iloa ni tamaiti na tatalo i ni mea na leiloloa ma toe mauaina.Tatou te iloa ni tagata talavou na maua le lototetele e tutu atu ai o ni molimau a le Atua ma lagonaina Lona aao lagolago. Tatou te iloa ni uo na totogiina sefuluai i ni a latou tupe mulimuli lava, ma e ala i se vavega, na mafai e i latou lava ona totogiina o latou pili o le aoga, po o o latou pili o fale mautotogi, pe na mafai foi ona maua meaai mo o latou aiga.E mafai ona tatou fetufaai mea na tutupu i tatalo na taliina ma faamanuiaga o le perisitua na tuuina atu le lototele, aumaia le faamafanafanaga, po o le toefuataiina o le malosi.O nei vavega i aso taitasi o loo fesoasoani ia i tatou ina ia iloa ai le aao o le Alii i o tatou olaga” (“O Se Atua o Vavega,” Liahona, Iulai 2001, 12).

4. Tusi i lau api talaaga mo le suesueina o tusitusiga paia e uiga i se aafiaga sa e mauaina po o se tasi e te iloaoina e faamaonia ai o le Atua o loo avea lava ma Atua o vavega i le aso.

Mamona 9:21–37

Ua oao atu Moronae e uiga i le tatalo ma le faamoemoega o talafaamaumau a sa Nifae

teine o loo tatalo

E mafai ona e toe manatuaina se taimi na e lagona ai le tuuina atu e le Tama Faalelagi ia te oe o le fesoasoani sa e manaomiaina ona sa e tatalo? Faitau le Mamona 9:21, ma vaavaai mo le mea sa aoao atu e Moronae e uiga i le tatalo atu i le Tama Faalelagi mo se fesoasoani.

Faitau le faamatalaga lenei, ma tagai po o le a le uiga o le tatalo i le suafa o Keriso: “Tatou te tatalo i le suafa o Keriso pe afai o tatou mafaufau o le mafaufau lea o Keriso, ma o o tatou moomooga o moomooga lea o Keriso—pe a i ai ana upu i totonu o i tatou (Ioane 15:7). Ona tatou ole atu ai lea mo mea ua saʼo ma o le a mafai e le Atua ona tuuina mai.O ni isi tatalo e lē mafai ona maua mai ni tali ona ua le faia i le suafa o Keriso: ua lē tusa ai ma le finagalo o Keriso ae ua faia ia tatalo i le manatu faapito o le tagata (Taiala i Tusitusiga Paia, “Tatalo”).

Mafaufau i au lava tatalo e tusa ai ma mea ia faatoa e faitauina. O le a se mea e mafai ona e faia ina ia tatalo atoatoa ai i le suafa o Iesu Keriso?

Ina ia tuuina mai se faataitaiga o tagata o e na talitonu i le Faaola ma sa mafai ona galueaina ia vavega, sa sii mai ai e Moronae le mea sa aoao mai e Iesu Keriso i Ona soo sa Nifae. E pei ona faamaumauina i le Mamona 9:22–25, sa poloaiina e le Faaola Ona soo ina ia o atu i le lalolagi uma ma talai atu le talalelei, ma sa Ia folafola atu “o faailoga nei o le a mulimuli atu ia te i latou o e e talitonu” (Mamona 9:24). Sa faaauauina e Moronae ana aoaoga e uiga i le tatalo.

5. Faitau le Mamona 9:27–29, ma faailoa mai mea sa aoaoina e Moronae e uiga i le auala e tatau ai ona tatou tatalo atu ma le faatuatua. Tusi mea sa e faailoaina mai i totonu o lau api talaaga mo le suesueina o tusitusiga paia. Ona faitau lea o ni nai fuaiupu e faamatala ai le auala e mafai ona e faaaogaina ai se tasi o nei aoaoga ina ia faaleleia ai au lava tatalo.

Atonu e te manao e tusi le mataupu faavae lenei i totonu o au tusitusiga paia e latalata i le Mamona 9:27: Afai tatou te tatalo ma le faatuatua i le suafa o Iesu Keriso, o le a Ia tuuina mai ia i tatou ni faamanuiaga lea o le a fesoasoani ia i tatou e galueaiina lo tatou faaolataga.

A o faaiuina e Moronae ana upu, sa faaalia lona popole faapea o nisi o tagata i aso mulimuli o le a teena le Tusi a Mamona ona o le vaivai o i latou na tusiaina (tagai i le Mamona 9:30–34). Faitau le Mamona 9:35–37, ma tagai mo le mea sa faailoa atu e Moronae e uiga i faamoemoega o le Tusi a Mamona.

Mafaufau pe na faapefea e le oo mai o le Tusi a Mamona ona avea ma faamaoniga faaopoopo o le Atua o se Atua o vavega ma e Na te taliina ia tatalo.

6. Tusi le mea lenei i lalo o galuega atofaina o le aso i lau api talaaga mo le suesueina o tusitusiga paia:

   Ua ou suesueina le Mamona 9 ma faamaeaina lenei lesona i le (aso).

   O fesili, mafaufauga, ma manatu faaopoopo ou te fia faasoa i lou faiaoga: