Folasaga i le O Upu a Mamona

Aisea e Suesue ai Lenei Tusi?

E ala i le suesueina o Upu a Mamona, e mafai ona faateleina lou faatuatua e faapea “ua silafia e le Alii mea uma” (Upu a Mamona 1:7) ma e Na te taialaina Ana auauna e faataunuu Ona faamoemoega. I le avea ai ma se talafaamaumau tuai, o le tusi ua avea o se sootaga i le va o papatusi laiti a Nifae (1 Nifae–Ominae) ma le faapuupuuga e Mamona o papatusi lapopoa a Nifae (Mosaea–4 Nifae). O Upu a Mamona e mafai ona fesoasoani e te malamalama lelei ai po o le fea o faamaumauga na otootoina e Mamona a o ia tuufaatasia le Tusi a Mamona. E faailoa atu ai foi oe i le faatuatua ma mea na ausia e le Tupu o Peniamina.

O Ai na Tusia Lenei Tusi?

O Mamona na tusia le tusi lenei. O ia o se perofeta, o se tausi faamaumauga, ma le tagata na otootoina ma tuufaatasia le tele o le Tusi a Mamona. O le Tusi a Mamona ua faaigoaina ia te ia. O ia o se taitai sa Nifae ma o se tamā amiotonu. O lona atalii o le perofeta o Moronae.

O Anafea ma o Fea na Tusia ai?

Sa tusia e Mamona le tusi lenei e tusa o le T.A. 385, ina ua uma ona “molimauina le toe a faaumatiaina atoa o [lona] nuu, o sa Nifae” (Upu a Mamona 1:1). Sa le’i faamaumauina e Mamona le mea sa i ai ina ua ia tusia le tusi lenei.