Folasaga i le Mosaea
Aisea e Suesue ai Lenei Tusi?
I lau suesuega o le tusi o Mosaea, o le a e faitau ai i molimau mamana e uiga i le misiona a Iesu Keriso. O le a e aoao foi e uiga i tagata o e sa laveaiina e le Alii mai le pologa o le agasala pe mai sauaga faaletino. Ma le isi, o le a e aoao ai i le auala na aumai ai e taumafaiga amiotonu a tagata taitoatasi e pei o le Tup o Peniamina, Apinati, ma Alema ia faamanuiaga matagofie i isi. E faapena foi, o le a e vaai ai i auala na aumai ai e filifiliga le lelei a tagata taitoatasi e pei o Senifa ma lona atalii, le Tupu o Noa, ni taunuuga le lelei i o latou lava luga ma luga o o latou tagata.
O Ai na Tusia Lenei Tusi?
Sa tuufaatasia ma otootoina e Mamona ia faamaumauga se vaega o isi tusitala e fai ai le tusi a Mosaea. Ua faaigoaina le tusi ia Mosaea, o se atalii o le Tupu o Peniamina. O Mosaea o se perofeta, tagatavaai, talifaaaliga, ma se tupu sa taitai i Saraemila mai le tusa o le 124 i le 91 T.L.M. Sa faaigoa o ia i lona tamamatua o Mosaea, o le sa avea foi ma tupu o Saraemila (tagai Ominae 1:12–13, 19).
Sa utuvai mai Mamona mai i ni faamaumauga e fatu ai le tusi o Mosaea. Sa ia otootoina ma sii mai le faamaumauga sa teuina e Mosaea i papatusi lapopoa a Nifae, lea na auiliili mai ai le talafaasolopito o sa Nifae i le laueleele o Saraemila (tagai Mosaea 1–7; 25–29). Sa ia utuvai mai foi mai le faamaumauga a Senifa, lea o loo toe faamatalaina ai le talafaasolopito o le nuu o Senifa mai le taimi na latou tuua ai Saraemila seia oo ina latou toe foi atu i ai (tagai Mosaea 7–22). Ma le isi, sa sii mai e Mamona ma otootoina vaega o tusitusiga a Alema, o le na faasaosaoina upu a Apinati (tagai Mosaea 17:4) ma tausia se faamaumauga o lona lava nuu (tagai Mosaea 18; 23–24).
O Anafea ma o Fea na Tusia ai?
O uluai faamaumauga sa faaaogaina o punavai mo le tusi o Mosaea atonu sa tusia i le va o le 200 T.L.M. ma le 91 T.L.M. Sa otootoina e Mamona nei faamaumauga i se vaitaimi i le va o le T.A. 345 ma le 385. Sa le’i tusia e Mamona le mea na i ai i le taimi na ia tuufaatasia ai le tusi lenei.