Iunite 12: Aso 4
Mosaea 15–17
Folasaga
O le faamaumauga o le talaiga a le perofeta o Apinati i le Tupu o Noa ma ana faitaulaga o loo faaauauina i le Mosaea 15–17. Sa ia molimau atu e uiga i le matafaioi a Iesu Keriso i le avea ai ma Togiola. O se tasi o faitaulaga a Noa, o Alema, sa talitonu ia Apinati. Sa tuliese e le Tupu o Noa ia Alema mai lona lotoa ma na susuina Apinati seia oo ina oti. Sa faamaoni Apinati i le Atua i tulaga uma.
Mosaea 15–16
Ua aoao mai Apinati e uiga i le matafaioi a Iesu Keriso i le avea ai ma Togiola
Faaalu ni nai minute e su’e ma li’o ai upu togiola, togiolaina, ma le faaolataga i le Mosaea 15–16. O le ta’ua soo o se upu i se poloka mau e masani ona faailo mai ai se manatu taua i le savali a le tusitala. A o e suesue i le aso, vaavaai mo le mea na aoao mai e Apinati e uiga i le togiolaina.
Ina ia fesoasoani ia e malamalama i le matafaioi a Iesu Keriso i le avea ai ma Togiola, tagai i le ata lenei:
Vaai faalemafaufau e faapea ua e solia se tulafono ma ua faasalaina i le faasalaga sili ona leaga e faatagaina e le tulafono. O le faasalaga atonu e aofia ai ni sala tupe tetele, taimi i le falepuipui, pe o le oti foi. O a ni ou lagona i le feagai ai ma ni faasalaga faapena? E mafai ona e mafaufau i se auala faatagaina faaletulafono ma faamaoni e sao ai mai nei faasalaga?
Tusi le A’u i lalo o le upu Tagata Solitulafono ma le Faamasinoga tonu i lalo o le upu Faasalaga i le ata. Na tatou solia uma lava tulafono a le Atua i se taimi ma o lea e ao ai ona feagai ma poloaiga o le faamasinoga tonu. O poloaiga o le faamasinoga tonu e manaomia ai e tagata agasala taitasi ona maua le faasalaga e fesootai ma le agasala.
Faitau le faamatalaga lenei mai ia Elder Richard G. Scott o le Korama a Aposetolo e Toasefululua, ma vase ia taunuuga e lua o le soliina o tulafono a le Atua: “O le faamasinoga tonu… e manaomia ai le faamalieina o tulafono uma na solia. A e usitai i tulafono a le Atua, e faamanuiaina oe, ae e leai se viiga faaopoopo e maua e mafai ona faasaoina e faamalie ai tulafono e te solia. Afai e le faaleleia, o tulafono e solia e mafai ona faapogai ai le le fiafia o lou olaga ma o le a taofia ai oe mai le toe foi atu i le Atua” (“The Atonement Can Secure Your Peace and Happiness,” Ensign po o le Liahona, Nov. 2006, 42).
O taunuuga o le solia o tulafono a le Atua e aofia ai le faanoanoa ma le le mafai ona nonofo ma le Atua. Faitau le Mosaea 15:1, 7–9, ma faailoa fasifuaitau o loo faalia ai le ala e faamalieina ai e le Togiola a le Faaola ia poloaiga a le faamasinoga tonu.
Faaaoga se tusi lomifefiloi e sue ai uiga o upu nei:
Togiola (Mosaea 15:1)
Ai’oiga (Mosaea 15:8)
Tu i le va (Mosaea 15:9)
Atonu e te manao e tusi se vaega o nei faauigaga i autafa o fuaiupu.
O nisi taimi e nenefu ai tagata i le faamatalaga a Apinati e uiga ia Iesu Keriso i le Mosaea 15:2–5 i le avea ai (1) o le Alo o le Atua le Tama ma le (2) avea ai o le Tama. O le faamatalaga lenei mai ia Elder Jeffrey R. Holland o le Korama a Aposetolo e Toasefululua ua faamalamalama mai ai le natura paia o Iesu Keriso i le ala lenei: “E pei ona aoao mai e Apinati, o Keriso sa ‘fanauina o ia i le mana o le Atua’ (Mosaea 15:3) o lea e i ai ma mana o le Tama i totonu ia te ia. E faaopoopo atu i lena sootaga paia tuusao, o Keriso foi e galue e pei o le Tama i lena tulaga o ia o le Foafoa o le lagi ma le lalolagi [tagai Mosaea 15:4], o le tama o lo tatou toefanauina faaleagaga ma le faaolataga, ma e faamaoni i le faamamaluina—ma faapea ona maua ai le mana o le—finagalo o lona Tama e sili atu nai lo o mea e finagalo i ai o ia lava” (Christ and the New Covenant [1997], 183–84).
Suesue le Mosaea 15:5–7, ma mafaufau i le tau na totogi e Iesu Keriso e togiola ai oe, pe ia tu ai i le va o oe ma poloaiga o le faamasinoga tonu. I le ata o loo i luga, tusi Iesu Keriso i le va o le Tagata Solitulafono ma le Faasalaga.
E taua ona malamalama e faapea, e le soloesea e le Faaola ia poloaiga a le faamasinoga tonu ae e tu i lo tatou va ma le faamasinoga tonu. Afai tatou te salamo, Na te faamalieina poloaiga a le faamasinoga tonu e ala i le fai ma o tatou sui e tali le faasalaga.
-
Faamaea ia gaoioiga nei i lau api talaaga mo le suesueina o tusitusiga paia:
-
Tusi le O I Latou O E Filifili E Togiolaina (Mosaea 15:11–12; 16:13). Ona sue lea o le Mosaea 15:11–12; 16:13, e vaai po o ai o le a togiolaina. Faamatala le mea ua e maua.
-
Tusi le O I Latou O E Mumusu e Togiolaina (Mosaea 15:26–27; 16:2–5, 12). Ona su’e lea o le Mosaea 15:26–27; 16:2–5, 12, ma vaai pe aisea o le a le togiolaina ai ni isi o tagata. Faamatala le mea ua e maua.
-
-
-
O le a le mea o le a iloiloina ai po o ai o le a togiolaina mai a latou agasala?
-
O le a le mea e te aoao mai le eseese o le “loto” o Iesu Keriso i le Mosaea 15:7 ma le “manao” o i latou o e fai mea leaga i le Mosaea 16:12?
-
Ua faamalieina e Iesu Keriso ia poloaiga a le faamasinoga tonu mo i latou uma o e o le a salamo. O le tau na totogi e le Faaola mo i tatou o se meaalofa e sili ona patino mo soo se tasi e filifili e salamo ma fai le finagalo o le Tama. Faitau le Mosaea 15:10, ma vase le fasifuaitai “o le a silasila o ia i ana fanau.”
Faitau le Mosaea 15:10–12 ma le faamatalaga lenei mai ia Elder Merrill J. Bateman, o se Fitugafulu ua faamalolo faamamaluina:
“Na saunoa le perofeta o Apinati … e faapea ‘pe a faia lona agaga o se taulaga mo agasala, o le a silasila o ia i ana fanau’ (Mosaea 15:10). Ona faailoa mai lea e Apinati le fanau a le Faaola, o perofeta ma i latou o e e mulimuli ia i latou. Mo le tele o tausaga sa ou mafaufau ai i le aafiaga a le Faaola i le faatoaga ma i luga o le satauro o ni nofoaga sa faafaulai atu ai i Ona luga se faaputuga tele o agasala. Ae peitai, e ala mai i upu a Alema, Apinati, Isaia, ma isi perofeta, ua suia ai lo’u manatu. Nai lo o se faaputuga le foligā o agasala, sa i ai se laina umī o tagata, a o lagona e Iesu ‘o tatou vaivai’ (Eperu 4:15), ‘[tauave] o tatou tiga, … tauave o tatou faanoanoa … [ma] sa manua o ia ona o a tatou solitulafono’ (Isaia 53:4–5).
“O le Togiola o se aafiaga pele ma patino lea na iloa ai e Iesu le ala e fesoasoani ai ia i tatou uma taitoatasi” (“A Pattern for All,” Ensign po o le Liahona, Nov. 2005, 75–76).
-
-
O le a sou manatu i le uiga o le avea ma fanau a Iesu Keriso? (tagai Mosaea 15:12).
-
O le a se mea o e faia e mautinoa ai o loo faitauina oe i le fanau a Iesu Keriso?
-
Atonu e te manao e faapatino le Mosaea 15:10 e ala i le tusi o lou igoa e sui ai le “ana fanau” i le vaega o le fuaiupu ua e vaseina. Mafaufau mo se taimi i le uiga o le i ai o se Togiola ua ia vaai ma iloa patino oe.
O a taunuuga o se tagata e musu e togiolaina? Toe vaai i le Mosaea 16:5. O le a le mea o loo tupu i le ata na faaalia muamua atu i le lesona lenei pe afai e tumau pea se tagata solitulafono i le agasala ma musu e salamo? Faitau le Mataupu Faavae ma Feagaiga 19:16–17 e iloa ai le mea o le a tupu ia i latou e le fia talia le galuega togiola a le Faaola e ala i le salamo.
Na aoao mai Apinati o le togiola a Iesu Kerio e le gata ina aofia ai se laveaiga mai agasala ae faapea foi mai le oti. O le a toetutu tagata uma; ae peitai, o isi o le a toetutu muamua i lo isi. Sa faaaoga e Apinati le faaupuga “uluai toetutu” e faamalamalama ai o e amiotonu ma lē sala o le a toetutu muamua i e e tetee (tagai Mosaea 15:21–22). O le a togiolaina e amiotonu mai le oti i le uluai toetutu ae o e amioleaga e tatau ona faatali e toetutu pe a uma le Meleniuma (tagai MF&F 76:85, 106).
-
E finagalo le Faaola e toe aumai i tatou i le afioaga o lo tatou Tama Faalelagi. O Ia e talosaga, fautua, ma augani mo i tatou. E totogi e le Faaola poloaiga o le faamasinoga tonu mo i tatou pe afai o le a tatou salamo.
Mosaea 17
Ua talitonu Alema ia Apinati ma ua tuli ai i fafo; ua fasiotia Apinati
Pe na e molimauina se tagata na tu atu mo le mea sa’o a o faigata ia te ia ona fai o lea mea? O le a le taunuuga?
Ina ua faaiu e Apinati lana savali, o se tasi o faitaulaga, e igoa ia Alema, sa taumafai e tauanau le tupu e faapea sa tautala Apinati i le mea moni ma e tatau ona faasaolotoina. Sa tuli i fafo e le tupu ia Alema ma auina atu auauna e fasioti o ia. Sa lafi Alema ma tusi upu a Apinati.
E taua le liliu o Alema. Ona sa ia tusia upu a Apinati, ua faapea ona faamanuiaina ai le tele o augatupulaga ma tagata. O fua o le liliuga o Alema o le a sili atu ona manino a o e suesue i mataupu o i luma atu. E tolu aso na fono faatasi ai le tupu ma ana faitaulaga ona faatoa faasalaina lea o Apinati i le oti (tagai Mosaea 17:1–6, 13).
-
-
O le fea o upu mulimuli a Apinati na sili ona faagaeetia ai oe?
-
O le a lou manatu, aisea na aafia ai le Tupu o Noa i upu a Apinati e pei ona na latou faia ai?
-
O le a le ituaiga o faatosinaga a faitaulaga na i ai i le Tupu o Noa?
-
E faapefea ona fesoasoani faataitaiga a Apinati e musuia oe ia faamaoni i le Atua i mea uma?
-
Na folafola mai e Peresitene Gordon B. Hinckley: “Ia malosi—i le tu atu mo le mea sa’o. Ua tatou ola i se vaitau o fetuutuunaiga ma le taliaina. I tulaga ia e faafetauia ai i tatou i aso uma, ua tatou iloa le mea sa’o, ae o le malosi ai o uunaiga mai a tatou tupulaga ma leo faatosina a i latou o e o le a faatauanauina i tatou, tatou te gauai atu ai. Tatou te fetuunaia. Tatou te talia. Tatou te gauai atu, ma ua tatou nē ia i tatou lava. … E ao ona tatou atinaeina le malosi e mulimuli ai i o tatou talitonuga” (“Building Your Tabernacle,” Ensign, Nov. 1992, 52).
Tusi le E mafai ona ou faamaoni i le Atua i tulaga uma i totonu o lau api talaaga mo le suesueina o tusitusiga paia i talane o le Mosaea 17:9–12.
-
A o e faaiuina le lesona o le asō, mafaufau e uiga i se tagata o le aiga po o se uo e ono faamanuiaina mai le faalogo i mea ua e aoaoina ma lagonaina i le asō. Afai e mafai, faasoa atu ia te ia mea ua aoaoina ma lou manao ia e faamaoni i le Alii i taimi faigata.
-
Ua ou suesueina le Mosaea 15– 17 ma faamaeaina lenei lesona i le (aso).
Fesili, mafaufauga, ma manatu faaopoopo ou te fia faasoa i lou faiaoga: