Folasaga i le 4 Nifae
Aisea e Suesue ai Lenei Tusi?
I lau suesuega o le 4 Nifae, o le a e molimauina faamanuiaga lea e oo mai i tagata o e tutufaatasi i le ola ai i le talalelei a Iesu Keriso. O loo faailoa mai e le tusi na liua tagata uma i le laueleele atoa i le vaitaimi o le talaiga a le Faaola ia i latou. O le usiusitai i poloaiga, sa latou olioli ai i le filemu, tamaoaiga, ma faamanuiaga ofoofogia faaleagaga. Na tautino mai e Mamona, “Ma e moni e le mafai ona i ai o ni tagata e sili atu ona fiafia i totonu o tagata uma na foafoa e le aao o le Atua” (4 Nifae 1:16).O le a e aoao foi ni lesona taua mai le agaigai malie atu o nei tagata i se tulaga o le amioleaga.
O Ai na Tusia Lenei Tusi?
Na tuufaatasia ma faapuupuu e Mamona talafaamaumau a isi tusitala e toafa e fatu ai le tusi o le 4 Nifae.O le tusitala muamua o Nifae, lena na faaigoa ai le tusi.O Nifae o le atalii o Nifae, o le na avea ma se tasi o soo e toa 12 na filifilia e le Alii i le taimi o Lana galuega i fanau a Liae (tagai 3 Nifae 11:18–22; 12:1).O isi tusitala e toatolu o Amosa le atalii o Nifae, Amosa le atalii o Amosa, ma Amorona le uso o Amosa (tagai 4 Nifae 1:19, 21, 47).
O Anafea ma o Fea na Tusia ai?
O uluai talafaamaumau na faaaoga o ni punaoa mo le tusi o le 4 Nifae na tusia latalata lava i le va o le T.A. 34 ma le T.A. 321.Na faapuupuuina e Mamona na talafaamaumau i se taimi i le va o le T.A. 345 ma le T.A. 385.Sa le’i tusia e Mamona le mea na i ai o ia, ina ua ia tuufaatasia lenei tusi.