Iunite 21: Aso 2

Alema 50–52; 54–55

Folasaga

Sa faaauau pea e le Taitaiau o Moronae ona fesoasoani i ona tagata e puipuia i latou lava e ala i le faamalolosia o o latou aai. Sa manumalo sa Nifae ia sa Lamana seia oo ina amata ona faavaivaia i latou e le fouvale ma le amioleaga. E ui i taumafaiga a Moronae e tuufaatasia ma puipuia tagata, na aveesea le tele o aai o sa Nifae ona o le finauga i le lotolotoi o i latou lava. Mulimuli ane, ua toe maua e Moronae,Teanekuma, ma Liae le aai o Moleka ma faatoilalo se tasi o vaegaau tele a sa Lamana. Sa taumafai Amorona le taitai amioleaga o sa Lamana e soalauple se fesuiaiga o pagota, ae sa faasaoloto e Moronae pagota a sa Nifae e aunoa ma se toto masaa. Sa tu mausali Moronae ma sa le feutagai ma Amorona ma ana au.

Alema 50–51

Ua faamalosia sa Nifae ma manuia pe a latou usiusitai i le Alii ma aufaatasi i latou lava.

Mafaufau i se taimi i lou olaga sa e tauivi ai e manumalo i se luitau, e pei o se faaosoosoga, o se faafitauli tau le soifua maloloina, o se faafitauli i le aoga, po o se faafitauli i se mafutaga ma uo ma aiga. Pe na e moomoo ea maimau pe a na sili atu lou malosi faaleagaga i lena taimi?

Na saunoa Peresitene Henry B. Eyring o le Au Peresitene Sili: “A o faateleina le malosi o ave [o le agasala] o loo siomia ai i tatou, po o le a le malosi o le faaleagaga sa i ai o le a le lava. Ma po o le a le ola o le malosi faaleagaga sa tatou manatu sa mafai ai, o le ola faateleina o le a avanoa mo i tatou. O le manaomia uma o le malosi faaleagaga ma le avanoa e maua ai o le a faateleina i le tau tatou te le mafaufau loloto i ai” ” (“Always,” Ensign, Oct. 1999, 9).

O sauniuniga sa faia e sa Nifae mo a latou taua e mafai ona fesoasoani tatou te aoao i lenei upumoni: Afai tatou te saunia i tatou lava faaleagaga, tatou te manumalo mai luitau o le olaga.

Toe faamanatu le Alema 50:1–6. O a mea na fai e sa Nifae e fausia ai olo faataamilo i o latou aai? Faitau le Alema 50:7. O a nisi mea na fai e sa Nifae e saunia ai mo le taua?

Na fausia e sa Nifae olo na maua ai e i latou le malosi i se taimi o le faigata sili. E mafai ona tatou mulimuli ia latou faataitaiga e ala i le fausia o o tatou malosiau faaleagaga ina ia tatou maua le malosi manaomia i taimi faigata. O le malosiaga faaleagaga e tele ina fausia e ala i le taumafaiga faifai pea i aso uma. Tatou te malosi faaleagaga e ala i le faia o mea nei e pei o le suesue i tusitusiga paia pea lava pea, tatalo, auai i sauniga a le Ekalesia, faataunuuina o o tatou valaauga, faaalia o le faafetai i le Atua, auauna atu i isi, ma le faalogo ma lagona fautuaga a o tatou taitai o le Ekalesia.

1. Faamaea le faamatalaga lenei i lau api talaaga mo le suesueina o tusitusiga paia:

   1. E mafai ona ou fausia le malosi faaleagaga sili e ala lea i le (lisi o nisi o mea e mafai ona e faia).

   2. O le a sili atu ona ou faia pea lava pea (fiifili se mea se tasi mai le lisi ua e faia i aso taitasi e atiae ai lou malosi faaleagaga.

Faitau le Alema 50:19–23, ma vaavaai mo le ala na faamanuia ai e le Alii sa Nifae o e sa faatuatua ia te Ia e ui i tulaga faigata o o latou taimi. Atonu e te manao e tusi lenei mataupu faavae e latalata i nei fuaiupu: O le faatuatua i le Atua e aumaia ai faamanuiaga, e ui i le lotolotoi o fesouaiga. Vaavaai i le Alema 50:21 ia iloa ai mea na saunoa ai Mamona na mafua ai ona aveesea faamanuiaga o sa Nifae.

I le taimi na taitaiina ai e le Taitaiau o Moronae sa Nifae i a latou taua e faasaga ia sa Lamana, na avea ai Pa’orana ma faamasino sili o sa Nifae. O ia o se tagata amiotonu, ma sa ia galue e faatuina le filemu i le nuu. Ae peitai, o se vaega o sa Nifae na mananao e sui ia tulafono o sa Nifae ina ia puleaina i latou e se tupu, ae le o se faatulagaga o faamasino. O lenei mataupu sa faapalota, ma sa palota tagata e faia pea la latou faatulagaga o faamasino. Ae peitai, sa le i lagolagoina e “tagata-tupu” le leo o tagata ma sa mumusu e tau ma isi sa Nifae ina ua o mai sa Lamana e tau. Sa taitaia e Moronae ana vaegaau e faasaga tau atu i tagata-tupu ma faamalosia i latou e auai ma sa Nifae. O lea sa matua faavaivaia ai sa Nifae i a latou taua e faasaga atu ia sa Lamana (tagai i le Alema 51:1–21).

Faitau le Alema 51:22–27, ma vaavaai mo faamaoniga na mafai ai ona maua e sa Lamana le pule i luga o sa Nifae ona o le fefinauai ma tagata-tupu. Mafaufau i lenei mataupu faavae: O le fevaevaeai ma le fefinauai e faatamaia ai le filemu.

2. Faitau le Alema 50:39–40 ma le Alema 51:22, ma iloa ai le maelega o Paorana ma le Taitaiau o Moronae e saili le atiaeina o le filemu i totonu o o latou tagata. Mafaufau i se taimi o lou olaga sa e vaai ai fefinauaiga, pe i le va o uo, tagata o aiga, uo i le aoga, po o isi. Mafaufau foi i uiga o se tasi o loo taumafai e atiae le filemu. Tusi i lau api talaaga mo le suesueina o tusitusiga paia uiga e ono i ai i sē e tausi le filemu.

Alema 52

Na galulue faatasi Moronae ma Teanekuma e faatoilalo sa Lamana

E pei ona faamaumauina i le Alema 51:33–34, sa fasiotia e Teanekuma ia Amalekia, o se tasi o taitai vaegaau tautaua a sa Nifae. Ina ua tuanai le maliu o Amalekia, sa avea lona uso o Amorona e fai ma taitai o vaegaau a sa Lamana. Na tuuina atu e Moronae faatonuga ia Teanekuma e faaauau ona fausia olo ma puipuia le itu i matu o laufanua o Nuumau ma toe ave soo se aai o sa Nifae o loo nonofo ai sa Lamana i le taimi lea, pe a mafai (tagai Alema 52:1–10). Faitau le Alema 52:15–17, ma vaavaai mo mafuaaga na filifili ai Teanekuma e aua nei osofaia le aai o Moleka.

Na iloa e Teanekuma afai ua i ai le fili i lona olo mau, o le a faigata ona faatoilaloina o ia. Mai lenei aafiaga, e mafai ona tatou aoao i lenei mataupu faavae : Afai tatou te aloese mai olo mau a le fili, o le a mafai ona tatou aloese ma tetee i faaosoosoga.

3. O a nisi o nofoaga e mafai ona taua o olo mau a le fili? (O nofoaga nei poo tulaga e mafai ona faaaafiaina oe e te agasala pe afai e te alu ai iina —mo se faataitaiga, o se pati o loo inu ai le ava malosi e tagata po o le matamata i se ata le talafeagai.) Tusi i lau api talaaga mo le suesueina o tusitusiga paia nisi o nei nofoaga. Tusi foi pe aisea ua e manatu ai e tatau ona e aloese mai le alu i nei nofoaga.

O se taimi faigata lea mo sa Nifae aua sa maua e sa Lamana le tele o aai o sa Nifae a o tau sa Nifae ma tagata-tupu. Sa faaaogaina e sa Lamana na aai e avea ma ni olo mau, o lea sa faigata ai e sa Nifae ona toe maua i latou. Sa fai e Moronae se fuafuaga ina ia aveesea ai sa Lamana mai le aai o Moleka ina ia mafai ona toe maua e sa Nifae le aai. Faitau le Alema 52:21–26 e vaavaai i mea na faia e Moronae ma Teanekuma.

4. Tusi i lau api talaaga mo le suesueina o tusitusiga paia mea sa fai e Moronae ma Teanekuma e pu’e ai le aai o Moleka (tagai Alema 52:21–26). Tusi foi sou manatu e uiga ia Moronae o se taitai. O a ni auala sa avea ai o ia ma se taitai lelei mo sa Nifae?

Alema 54–55

Sa musu Moronae e fesuiai pagota ma Amorona ma ua toe ave le aai o Kita

I le faagasologa o le taua i le va o sa Lamana ma sa Nifae, e toatele pagota sa pueina e itu uma e lua Na auina atu e le taitai o sa Lamana o Amorona se tusi ia Moronae, e faatu atu e faapea e fesuiai a latou pagota. Sa fiafia Moronae e fesuiai pagota ina ia toe faafoi mai ai pagota o sa Nifae ma ina ia le fafagaina ma tausia ai e ana vaegaau pagota o sa Lamana. (Tagai i le Alema 54:1–2.)

Ae peitai, a o fetusiai i laua ma Amorona, na tusi atu ma le malosi Amorona ina ia ifo mai sa Nifae ae ia pulea i latou e sa Lamana. Sa ia fai mai o sa Nifae o tagata fasioti tagata ma ua alagatatau ia sa Lamana ona tau ma i latou. Na ia folafola atu foi e leai se Atua. (Tagai Alema 54:16–24.)

Ina ua maua e Moronae lenei tusi, na ia iloa sa pepelo Amorona. Sa iloa e Amorona e leai se mafuaaga amiotonu a sa Lamana e tau ai ma sa Nifae. Na faapea atu Moronae na te le fesuiaia pagota ma ua tuu atu ai le malosi tele ia sa Lamana. O le a ia sue se auala e faasaoina ai pagota o sa Nifae e aunoa ma le fefaatauaia o i latou. (Tagai i le Alema 55:1–2.)

Faitau le Alema 55:3–24 e iloa ai mea sa faia e Moronae e faasaoina ai pagota o sa Nifae.

Ina ua musu Moronae e fai le mea o loo manao ai Amorona ma maua le auala e faasaoina ai pagota o sa Nifae, sa ia taofia sa Lamana mai le mauaina o manuia e tele i lo sa Nifae nai lo lena na maua le manuia silisili mo sa Nifae. E tasi le upumoni tatou te mafai ona aoao mai faataitaiga a Moronae o lenei: Afai tatou te talitonu i le Alii ma usiusitai ia te Ia ma le sa’o, o le a Ia lagolago i tatou i a tatou luitau.

O le tala o loo maua i le Alema 55:3–24 o se tala matagofie tele o le laveaiina. Mafaufau i se tagata o le aiga po o se uo e fiafia e faalogo i lenei tala, ma saili se taimi e faamatala ai le tala i lenei tagata Atonu e te manao foi e faasoa atu ma lenei tagata le mataupu faavae o le lotoa i le palakalafa o i luga ma faamatala le ala e fai ai Moronae ma faataitaiga o lenei mataupu faavae.

5. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

   Ua ou suesueina le Alema 50–52; 54–55 ma faamaeaina lenei lesona i le (aso).

   Fesili, mafaufauga, ma manatu faaopoopo ou te fia faasoa i lou faiaoga: