Iunite 13: Aso 2
Mosaea 19– 20
Folasaga
Ina ua uma ona sosola ese Alema ma lona nuu mai le autau a le Tupu o Noa, o tagata o e sa nonofo ai pea ia Noa sa amata ona mafatia i taunuuga na valoia e Apinati. O le tala e uiga i tagata sa Nifae i le nuu o Liae-Nifae e faamanatu mai ai ia i tatou e faapea, a tatou teena fautuaga a auauna a le Alii, tatou te oo i ni taunuuga ogaoga. I le isi itu, a tatou usitai i perofeta, tatou te olioli i le filemu ma le saogalemu e oo lava i o tatou tofotofoga. A o e suesue i lenei lesona, mafaufau e faapefea ona e maua le filemu ma le saogalemu lea e oo mai mai le faalogo atu i fautuaga a perofeta a le Alii i aso nei.
Mosaea 19–20
Ua oo tagata sa Nifae i le nuu o Liae-Nifae i le faataunuuga o valoaga a Apinati
Faitau le aafiaga lenei na faasoa mai e Elder David R. Stone, o lē sa auauna atu o se tasi o Fitugafulu, ma mafaufau e uiga i le taua o lapataiga faaleagaga tatou te maua e ala mai i perofeta:
“I le taeao o se tasi Aso Sa … sa matou feala ae i se aso matagofie i Santo Domingo i le Dominican Republic. Sa susulu le la o le Karipeane ma lagi lelei. Sa agiagi mai le sau mālu, na tau leai ni lau na masu’e i luga o laau; sa mafanafana ma toafilemu ma malū. Ae o gatai mamao i le sami, e le oo atu i ai le malosi o o matou sane faaletino i lena aso, sa agai mai ai le mala faatamai, faalealofa ma le lemateteeina. O le Ofisa Autu o Afa, faatasi ai ma le tiutetauave o le tulitulimatagauina ma le valoia o le ala o le Afa o Georges, sa le mapu lo latou logologo mai o faamatalaga fou na maua i luga o le Initoneti. I le toafilemu, ma le faifaimalie o lena taeao, ona o le lelei o na fofoga pupula i le lagi, sa ou vaaia ai le ala valoia o le matagi, na fa’ata mai e pei ose āū i le fatu o Santo Domingo.
“I totonu o le 48 itula na taia ai e le afa le motu i le malosi … o le saua, ma tuua ai i lona ala le faatafunaga, faataumaoiga, ma le oti. …
“E ui i le tetele o le faaleagaina ma le faatamaiaga ma le oti e mafai ona i ai mai nei mea ofoofogia maoae o malosiaga faaletino, o loo i ai se isi faaleagaina e sili atu lea e faatupuina i olaga o tagata e afa faaleagaga. O nei malosiaga matamataita e masani ona afua ai ni faatamaiaga sili atu ona leaga nai lo o afa faaletino , aua latou te faatamaia o tatou agaga ma faoa mai ia i tatou o tatou faamoemoega ma folafolaga e faavavau. …
“Tatou te tuuina i tatou lava i le ala o nei afa faaleagaga pe a tatou matele i le ita, meainu malolosi, ma sauaga; tuinanau ma faatautala; ola soonafai ma ponokalafi; fualaau faasaina, faamaualuga, manao tele, faatupu vevesi, mata’ua, ma pepelo—e umi lava le lisi. …
“Ae peitai o loo i ai foi o tatou leoleo o afa faaleagaga, o i latou o o latou valaauga o le vaai ma lapatai, ma fesoasoani ia i tatou e alose mai le faaleagaina, faatafunaina, ma le oti faaleagaga. O o tatou leoleo i luga o le olo ua tatou ta’ua o aposetolo ma perofeta. O i latou o o tatou mata faaleagaga i le lagi, ma latou te iloa, e ala i musumusuga ma faaaliga ma le atamai mama, le ala e ono uia e nei afa. E faaauau ona latou siiae o latou leo i le lapataiga e ta’u mai ia i tatou e uiga i taunuuga leaga o le solia ma le loto i ai ma le amio leaga o poloaiga a le Alii. O le le amanaiaina ma le iloa o a latou lapataiga o le faamasani lea i le tiga, faanoanoa, ma le faatamaia. O le mulimuli ia i latou o le mulimuli lea i auauna filifilia a le Alii i laufanua faaleagaga o le filemu ma le manuia” (”Spiritual Hurricanes,” Ensign, Nov. 1999, 31–32).
Faaalu se taimi e mafaufau loloto ai i mea matautia sa e faalogo o lapatai mai ai i tatou e perofeta ma aposetolo. E mafai faapefea e a latou upu ona puipuia i tatou mai “afa faaleagaga”?
Na auina mai e le Atua ia Apinati e lapatai le nuu o Liae-Nifae e uiga i le faatafunaga na agai atu ia i latou pe afai latou te le salamo.
-
Kopi le siata lenei i lau api talaaga mo le suesueina o tusitusiga paia, tuu ia lava se avanoa e tusi ai lalo ia mau taitasi:
Valoaga e uiga i le nuu ole Tupu o Noa (Mosaea 12:1–2)
Faataunuuga (Mosaea 19:10, 14–15; 20:20–21; 21:3–4, 8, 10–13)
Valoaga e uiga i le Tupu o Noa (Mosaea 12:3)
Faataunuuga (Mosaea 19:18–20)
A.
E.
Toe faamanatu valoaga a Apinati ia sa Nifae i le nuu o Liae-Nifae e ala i le faitauina o mau o loo i le koluma agavale o le siata. I lalo o mau talafeagai, tusi ai taunuuga na fai mai Apinati o le a feagai ma le Tupu o Noa ma lona nuu pe afai latou te le salamo. I le pito i lalo o le koluma agavale (A), tusi ai lou manatu i ni ou lagona ma se mea e te ono faia pe ana e faalogo i lapataiga a Apinati.
Ae e te le’i amata galue i le koluma taumatau o le siata, faauma le gaoioiga o loo i lalo ane i le tusi lesona. O le gaoioiga lenei o le a fesoasoani e te faamasani atili ai i mea na tutupu i le Mosaea 19–20 ma iloa le faataunuuga o valoaga a Apinati o loo faamaumauina i nei mataupu.
A o e suesue i le Mosaea 19–20, faanumera i totonu o au tusitusiga paia ia mea nei e 11 na tutupu i le fasologa na tutupu ai. O aotelega o mataupu o loo i le amataga o mataupu taitasi o le a tuuina atu ai ni faaiteite aoga e taiala ai oe.
-
Ua taumafai Kitiona e fasioti le Tupu o Noa.
-
Sa augani tamaitai ma tamaiti sa Nifae ia sa Lamana e aua le fasiotia i latou.
-
Sa tigaina le Tupu o Noa i le oti e ala [i le susunu] i le afi.
-
Ua o mai le autau a sa Lamana i totonu o tuaoi o Semulona.
-
Ua gaoi (ave) faamalosi e faitaulaga a le Tupu o Noa ia afafine e 24 o sa Lamana.
-
Na talosaga le tupu o sa Lamana i lana autau e faasao ola o tagata o Limae.
-
Na sosola nisi o le nuu o Noa mai luma o sa Lamana, ae tuu ia tamaitai ma tamaiti.
-
Sa faatonu e Limae lona nuu e aua le fasiotia le tupu o sa Lamana.
-
Ua i ai le filemu i le va o sa Nifae ma sa Lamana mo le lua tausaga.
-
Ua folafola atu e Limae o le a totogi e lona nuu le afa o a latou meatotino ia sa Lamana.
-
Ua tetee e sa Nifae se osofaiga a sa Lamana ma pue ai le tupu o sa Lamana.
(O tali i le gaoioiga lenei o loo maua i le faaiuga o le lesona lenei.)
-
Faitau le Mosaea 20:21, ma faailoga le faamatalaga a Kitiona e faaalia ai lona malamalamaaga e faapea o le teena o upu a auauna a le Alii e aumai ai puapuagatia ma le faanoanoa.
Faitau le Mataupu Faavae ma Feagaiga 133:63, 70–72 e vaai ai pe faapefea ona faatatau lenei mataupu faavae ia i latou i aso e gata ai o e o le a le faalogo i le Alii po o Ana auauna. Atonu e te manao e tusi mau nei o se mau faasino mo le Mosaea 20:21. Vaai i lauga o le konafesi aupito lata mai i mekasini o le Ensign po o le Liahona (lomiga o Me ma Novema) po o luga o le LDS.org e sue ai saunoaga a perofeta e faatatau i nei mataupu.
Mafaufau loloto i le fesili lenei: O a ni mea na e faalogo o aoao mai talu ai nei e perofeta, o le a fesoasoani i tagata taitoatasi, aiga, ma atunuu e aloese ai mai puapuaga ma le faanoanoa?
Ina ia vaai i se faataitaiga o le faanoanoa ma puapuaga e mafai ona oo mai mai le teena o perofeta a le Alii, vaai mo taunuuga na fai mai Elder Dallin H. Oaks o le Korama a Aposetolo e Toasefululua o le a oo mai ia i latou o e aafia i ponokalafi:
“O ponokalafi e faaleagaina ai le gafatia e se tagata ona fiafia i mafutaga masani faalelagona, alofa, ma faaleagaga ma se tagata o le itupa faafeagai. Na te faaeleaina papupuni lelei lea e tutu e tetee atu i amioga le taupulea, le talafeagai, pe faasāina. A o faagaseina le mafaufau, o tagata e aafia i ponokalafi e oo atu lava i le faatinoina o mea ua latou vaaia, e tusa lava po o a ona aafiaga i o latou olaga ma olaga o isi.
“O ponokalafi foi e oo ina fai ma vaisu. E faaleagaina ai le gafatia e fai ai faaiuga ma e ‘maileia’ ai tagata e aafia ai, ma tosotātā atu ai i latou e manao pea lava pea i ai” (“Pornography,” Ensign po o le Liahona, Me 2005, 89).
Mafaufau i nisi o faataitaiga o le faanoanoa ma puapuaga lea e oo ma mai le le amanaiaina o fautuaga a perofeta e uiga i mataupu e pei o le taalo i taaloga faitupe, ponokalafi, le Upu o le Poto, le faamaoni, pe’a, tatuiina o le tino, faiga o lavalava le tauagafau, po o le tafao faamasani ae le’i oo le matua i le 16 tausaga.
-
Na molimau mai Elder Robert D. Hales o le Korama a Aposetolo e Toasefululua e faapea, e mafai ona tatou maua le filemu ma toe foi atu i le afioaga o le Atua e ala i le mulimuli i perofeta:
“E tuuina atu la’u molimau o perofeta o nei aso ua i ai tomai o perofeta o anamua ma isi perofeta o lenei tisipenisione. …
“… O lo tatou saogalemu faaleagaga ua taoto lea i le liliu atu i le siufofoga manino o lo tatou perofeta soifua. Afai tatou te faalogo i lona siufofoga ma usitai i lana fautuaga, o le a mafai ona tatou ola e pei ona finagalo ai Keriso ia tatou ola ai ma tumau ai seia oo i le iuga, ina ia i ai se aso o le a tatou, faatasi ma o tatou aiga, foi atu ai i le afioaga o lo tatou Tama Faalelagi ma lo tatou Faaola o Iesu Keriso” (”Hear the Prophet’s Voice and Obey,” Ensign, Me 1995, 17).
-
-
Ua ou suesueina le Mosaea 19–20 ma faamaeaina lenei lesona i le (aso).
Fesili, mafaufauga, ma manatu faaopoopo ou te fia faasoa i lou faiaoga:
Tali i le gaoioiga o le faatulaga: 1, 4, 5, 2, 8, 11, 3, 10, 7, 6, 9.