Iunite 14: Aso 2

Mosaea 27

Folasaga

Mosaea 27 o loo faamatala mai ai le liliuga o Alema (le atalii o Alema) ma atalii o le Tupu o Mosaea. O loo ta’u mai ai a latou taumafaiga faatuiese e faatamaia le Ekalesia a le Atua, le asiasiga a se agelu, o le suiga faavavega o Alema, ma taumafaiga a nei alii talavou e faalelei mea leaga na latou faia. O le tala i le liliuga o Alema ua faamamafa mai ai le tatau i tagata uma ona toe fanauina ma ola i le amiotonu. Ua faaali mai foi i lenei mataupu ia faamanuiaga o le tatalo mo i latou o e e filifili ia le mulimuli i le talalelei a Iesu Keriso.

Mosaea 27:1–23

Na valaau atu se agelu ia Alema le Itiiti ma atalii o Mosaea ia salamo

Mafaufau ia i latou e te iloa o e e le o i ai ni molimau i le talalelei pe ua o ese mai le Ekalesia. O le a sau mea e fai pe afai o se tasi o i latou ua teteeina au taumafaiga uma e fesoasoani atu ia te ia? Vaai mo ni aoaoga manino i lenei fesili a o e suesue i le asō.

Faitau le Mosaea 27:8–10, ma faailoa pe o faapefea ona faamatala e nei fuaiupu ia Alema ma atalii o Mosaea. O le a le mea na taumafai Alema ma atalii o Mosaea e fai i le Ekalesia ma ona tagata?

O le a le vaega o le faamatalaga e uiga ia Alema ma atalii o Mosaea e sili ona matilatila ia te oe? Aisea?

E i ai taimi, tatou te lagonaina ai le tofotofoina ia talitonu o ni tagata faapitoa o le a le mafai lava ona sui ma o ma i le Alii. Mafaufau i lenei uiga faaalia a o faaauau ona e suesue i le Mosaea 27.

Faitau le Mosaea 27:11–14, ma vase le mafuaaga na sau ai le Agelu ia Alema ma atalii o Mosaea.

O leMosaea 27:14 o loo aoao mai ai le mataupu faavae lenei: E tali mai le Alii i a tatalo faatuatua mo isi. Atonu e te manao e tusi le mataupu faavae lenei i au tusitusiga paia i talane o le Mosaea 27:14. E le o tagata uma e manaomia ona salamo, ma e le o tagata uma foi o e tatou te tatalo ai o le a maua le asiasiga a se agaelu. E tali mai le Alii i a tatou tatalo faatuatua mo isi e tusa ai ma Lona lava poto.

1. I lau api talaaga mo le suesueina o tusitusiga paia, tali se tasi pe o fesili uma nei:

   1. O le a se taimi na e lagona ai na fai e au tatalo se eseesega i le olaga o se tasi?

   2. E mafai faapefea e le talitonu e tali mai le Alii i a tatou tatalo faatuatua e fai ma sui o isi, ona aafia ai le ala e te tatalo ai?

Mafaufau loloto i le ala e te ono faatatauina ai le tala ia Alema ma atalii o Mosaea i lou olaga. E mafai ona faaauau pea ona e tatalo mo i latou e te iloa ma alofa i ai, o e e filifili e fai mea e ese mai ma aoaoga a le Alii. E mafai ona e manatua e faafofoga ma tali mai le Alii i au tatalo i Lana lava ala ma le taimi, ma faataga foi tagata taitoatasi e faaaoga lona lava faitalia. Ma le isi, ia mafaufau ma le totoa i fesili nei: O ai atonu o loo tatalo mo lou manuia? O a ni mea o finagalo le Alii e te sui ai? O le a le mea e tatau ona e faia ina ia tupu ai lena suiga?

Faitau uma upu o loo totoe a le agelu ia Alema, e pei ona tusia i le Mosaea 27:15–16. Ia manatua na tautala mai le agelu “e pei o se leo o se faititili, sa luluina ai le eleele” (Mosaea 27:11). Mafaufau po o le a se taunuuga o lenei aafiaga ia te oe pe ana faapea sa e i ai faatasi ma Alema ma atalii o Mosaea.

O le a sou aotelega o le savali a le agelu?

Ina ua uma le savali a le agelu, sa le mafai ona tautala Alema. Sa oo ina vaivai ma sa “sii le gaoioi” (Mosaea 27:19) atu i lona tamā. Ina ua faalogo le tamā o Alema i le mea na tupu, sa “olioli, o ia aua na ia iloa o le mana lea o le Atua” (Mosaea 27:20). Sa ia faapotopotoina le nuu “ina ia mafai ona latou molimauina le mea ua faia e le Alii i lona atalii” (Mosaea 27:21). Sa fai atu le tamā o Alema i faitaulaga e anapopogi ma tatalo ina ia mafai ona maua e lona atalii le malosi ma mafai ona tautala (tagai Mosaea 27:22). Sa tali le Alii i a latou tatalo.

Mosaea 27:24–31

Ua salamo Alema le Itiiti ma atalii o Mosaea ma ua toefanauina

Faitau le Mosaea 27:23–24, 28–30 e iloa ai le ala na suia ai Alema le Itiiti o se taunuuga o lona aafiaga ma le agelu. I le siata o loo i lalo, tusi upu po o fasifuaitau mai fuaiupu nei o loo faamatala ai le tulaga faaleagaga o Alema i le taimi muamua ma le taimi mulimuli ane ina ua suia lona loto.

I le Taimi Muamua	I le Taimi Mulimuli Ane

2. I lau api talaaga mo le suesueina o tusitusiga paia, tusi i lalo se fasifuaitau se tasi na e tusia i le koluma I Le Taimi Mulimuli Ane e te faamoemoe o le a faamatala ai oe i lou olaga atoa. Faamatala pe aisea.

Toe faamanatu le Mosaea 27:24, 28, ma faailoga le mea na fai e Alema ma le mea na fai e le Alii na faapea ona aumai ai le suiga o le lotoo Alema.

Faaaogaina o Metotia Eseese o le Makaina

E mafai ona aoga le faaaoga o metotia eseese o le makaina e iloa ai le eseeega i le va o autu po o upumoni i tusitusiga paia. Mo le faataitaiga, i le Mosaea 27:24, 28, e mafai ona e vasevasea le mea na fai e Alema e aumai ai lenei suiga ae li’o le mea na fai e le Alii. Ona mafai ai lea ona e iloa le eseesega i le va o le lua lea i le taimi lava e vaaia ai. Atonu e te manao e faailoa po o le a le uiga o au faailogaga i se taiala po o faamatalaga e tusi i se mea i totonu o au tusitusiga paia, ina ia e manatu ai lo latou uiga.

3. I lau api talaaga mo le suesueina o tusitusiga paia, tusi i lalo pe aisea e taua ai ona malamalama i le mea e ao ona tatou faia a o tatou saili e sui o tatou olaga ma le mea foi o le a fai e le Alii mo i tatou.

4. Tali se tasi po o fesili uma, i lau api talaaga mo le suesueina o tusitusiga paia:

   1. E mafai faapefea e le Mosaea 27 ona fesoasoani i tagata o e o loo lotovaivai ma manatu e le mafai ona latou salamo ma o mai i le Alii?

   2. E mafai faapefea e le Mosaea 27 ona fesoasoani i tagata o e talitonu e le mafai ona salamo se isi tagata ma o mai i le Alii?

Faitau le Mosaea 27:25–26, ma sue po o ai e tatau ona suia e ala i le Togiola—po o nisi faaupuga, o ai e tatau ona fanau i le Atua.

O fuaiupu nei o loo aoao mai ai le mataupu faavae: E tatau ona toefanauina i tatou uma taitotasi e ala i le Togiola a Iesu Keriso. O le fanau i le Atua o lona uiga o le Agaga o le Alii e mafua ai se suiga tele i le loto o se tagata ina ia le toe i ai sona manao e fai amioleaga, ae e manao e saili i mea a le Atua (tagai Mosaea 5:2). Sa vave ona oo ia Alema ma atalii o Mosaea se suiga tele o le loto, ae o le toatele o i tatou e suia malie e ala i Togiola. O le fanauina i le Atua e sili atu ona avea o se faagasologa nai lo o se mea e tupu.

5. Tali fesili nei, i lau api talaaga mo le suesueina o tusitusiga paia:

   1. Na faapefea ona e suia e ala i le Togiola ina ua e salamo ma taumafai i aso taitasi e mulimuli i le Faaola?

   2. O le a se mea e tasi e mafai ona e faia, e faalelei atili ai lou sau i le Alii ma faataga le Togiola e fai se eseesega i lou olaga?

Mosaea 27:32–37

Sa feoai solo i le nuu ia Alema le Itiiti ma atalii o Mosaea, ma ta’uta’u atu a latou agasala ma faamalosia le Ekalesia.

O fuaiupu e sosoo ai o le a e suesueina i le Mosaea 27 ua faaalia ai le mataupu faavae: Ina ia salamo moni, e ao i se tagata ona fai mea uma e mafai e toe faalelei ai mea na ia faaleagaina. O le toefaalelei o lona uiga o le fai o mea tatou te mafaia e faasa’o ai taunuuga o o tatou filifiliga leaga ma toefuatai ai mea na faaleagaina ona o a tatou amioga. Mo se faataitaiga, afai na gaoi e se tasi se mea mai se tuaoi, o le faia o le faaleleiga o le a aofia ai le toe faafoi atu o le aitema na gaoia. Faitau le Mosaea 27:32–37, ma faailoa le mea na fai e Alema ma atalii o Mosaea e fai ai se faaleleiga mo a latou agasala.

Tusi i lalo pe faapefea ona fai e se tagata se faaleleiga mo agasala nei:

• Pepelo i se matua:

• Faasalalauina o tala e uiga i se isi tagata:

• Kopi i se meaaoga:

A o e mafaufau pe faapefa ona e suia e ala i le Togiola, fuafua pe faapefea ona e salamo ma fai se faaleleiga mo au agasala.

6. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

   Ua ou suesueina le Mosaea 27 ma faamaeaina lenei lesona i le (aso).

   Fesili, mafaufauga, ma manatu faaopoopo ou te fia faasoa i lou faiaoga: