Moronae 6

Folasaga

Sa latalata Moronae i le faamaeaina o lona tusiaina o papatusi e ala i le faamatalaina o nisi o agavaa mo se tagata ina ia saunia ai mo le papatisoina i le Ekalesia. Ona ia otootoina lea o tiutetauave e tatau ona tausia ai e tagata o le Ekalesia isi tagata. Sa faamatalaina foi e Moronae le faamoemoega o sauniga o le Ekalesia ma faamamafa atu le manaomia ona taitaia o sauniga o le Ekalesia e ala i le uunaiga a le Agaga Paia.

Moronae 6:1–3

Sa faatulagaina e Moronae mea e manaomia mo le papatisoga

Mafaufau e i ai sou tei e fitu tausaga o le a valu i ni nai masina. Sa talosagaina oe e ou matua e aoao atu se lesona i le afiafi faaleaiga i le auala e saunia ai mo le papatisoga.

Afai o le a e aoao atu lena lesona i le taimi lenei, o le a se mea o le a e aoao atu ina ia mafai ona fesoasoani i lou tei e saunia ai ina ia papatiso? Tusi ou manatu i lau api talaaga mo le suesueina o tusitusiga paia.

Ina ua uma ona faaaofia i ana faamaumauga ia tatalo o le faamanatuga (tagai Moronae 4–5), sa faaopoopo e Moronae faatonuga e faatatau i le sauniga o le papatisoga. Suesue le Moronae 6:1–3, vaavaai mo mea e manaomia mo le papatisoga. Atonu e te manao e faailoga mea e manaomia sa e iloaina i au tusitusiga paia.

O le a sou manatu i le uiga o i latou o e mananao ina ia papatisoina e ao ona “latou fua mai fua e tatau ai e iloa ai ua latou agavaa”? (Moronae 6:1).

Mafaufau loloto po o le a sou manatu i le uiga o le maua o “le loto momomo ma le agaga salamo” (Moronae 6:2) ao lei papatiso. E pei ona faamaumauina i le Moroni 6:1–3, sa faamatalaina e Moronae e ala atu i le papatisoga ua tatou osifeagaiga e tauave i o tatou luga le suafa o Iesu Keriso ma auauna atu ia te Ia e oo i le iuga. O le a se mea o e faia e faatumau ai ma faamalosia lou naunautaiga e auauna atu ia Iesu Keriso?

I lau api talaaga mo le suesueina o tusitusiga paia, faamatala mai nisi o auala sa e taumafaiina talu mai lou papatisoga e faatumau ai ma faamalosia ai lou naunautaiga e auauna atu ia Iesu Keriso.

Moronae 6:4

Faamatala mai e Moronae le auala e tausia ai ma fafagaina faaleagaga tagata o le Ekalesia

Ina ua uma ona faamatala mai mea manaomia e tatau ona ausia e tagata taitoatasi ao lei papatiso, ona faamatala mai lea e Moronae le auala na tumau faamaoni ai i latou o e faatoa papatiso i a latou feagaiga. Faitau le Moronae 6:4, ma vaavaai po o le a le mea na fai e fesoasoani ai i tagata fou ua liliu mai ina ia tumau faamaoni.

Aotele mai mea sa e aoaoina mai le Moronae 6:4 e uiga i ou tiutetauave agai i isi tagata o le Ekalesia.

O a faamanuiaga o loo faailoa mai le Moronae 6:4 o le a oo mai i le fafagaina i le afioga a le Atua?

O se tasi o upumoni taua o loo aoaoina i le Moronae 6:4 e faapea loo i ai sa tatou tiutetauave ia manatua ma fafagaina faaleagaga isi tagata o le Ekalesia.

Sa molimau mai Elder Jeffrey R. Holland o le Korama a Aposetolo e Toasefululua e uiga i le taua o le fafagaina o le tasi ma le isi i le afioga a le Atua. “O le toatele o tagata e le o mai i le lotu na ona saili ni nai mea moni o le talalelei, pe o mai e vaai ni uo ua leva, e ui lava e taua na mea uma. Latou te o mai e saili se aafiaga faaleagaga. Latou te fia maua le filemu. Latou te mananao ia faamalosia lo latou faatuatua ma faafouina lo latou faamoemoe. Latou te mananao, i se otootoga, ia fagaina i afioga lelei a le Atua, ia faamalosia e mana o le lagi. O i tatou e valaaulia e lauga pe faiaoga pe taitai ua i ai se matafaioi e fesoasoani e saunia lena mea, i le lelei sili e mafai ona tatou saunia ai” (“O Se Aoao Ua Maliu Mai Mai le Atua” Ensign, May 1998, 26).

Na e manatu ea e uiga i le aofaiga toatele o tagata o e sa tatalo mo oe, saunia lesona mo oe, faamalosiau ia te oe ma lou auai i le Ekalesia, ma fesoasoani ia te oe i luitau?

I lau api talaaga mo le suesueina o tusitusiga paia, tusi e uiga i ni tagata se toalua pe toatolu o e na manatuaina oe i se auala anoa pe na fafagaina oe faaleagaga.

O se taimi o lata mai, talanoa ma se tagata o le aiga po o se uo i le auala na faamanuiaina ai oe ona sa manatua oe e se tagata pe sa fafagaina oe i le afioga a le Atua.

Na faamatala e Peresitene Henry B. Eyring o le Au Peresitene Sili se tala e uiga i se tiakono i lana uarota o le na malamalama i le manaomia ona faataunuu lona tiutetauave i isi tagata o lana korama:

“O se tasi o lana korama na nofo latalata i lo matou fale. O lena tamaitiiti o le matou tuaoi, e lei alu lava ia i se fonotaga a le korama pe auai faatasi foi i se mea e fai a lana korama. O lona tama fai, e le o se tagata o le ekalesia ma sa le alu foi lona tina i le lotu.

“Sa fono le au peresitene o le korama lenei a tiakono i se taeao o se Aso Sa. … I le latou fonotaga faaau-peresitene sa manatua ai e na leoleo mamoe e tai 13 tausaga, le tamaitiiti lea e le sau lava. Sa latou talanoa i lona manaomia tele o mea ia latou te mauaina. Sa tofia e le peresitene lona fesoasoani e alu e sue mai le mamoe lea na se.

“Ou te iloaina le fesoasoani, ma sa matamuli o ia, ma sa ou iloaina le faigata o le tofiga, ma o lea sa ou matauina ai mai lou faamalama i luma, ao tatoso atu le savali a le fesoasoani i tafatafa o lou fale, ma agai atu ai i le auala i le fale o le tamaitiiti lea e le sau lava i le lotu. Sa tuu lima o le leoleo mamoe i ana taga. Sa savali punou o ia. Sa savalivali lemu, le ituaiga savali foi lea e pei e te le o mautinoa pe e te fia alu i le mea la e te agai i ai. Pe a ma le 20 minute, ae toe foi mai ma le tiakono lea na se, o loo savali mai i ona tafatafa. Sa faifai pea lena vaaiga mo nisi Aso Sa. Ona malaga ese lea o le tamaitiiti lea na se ma toe maua mai.

“… Ini tausaga mulimuli ane, sa ou i ai i se konafesi faalesiteki i se konetineta e mamao ese mai le potu sa faia ai le fonotaga a lena au peresitene. Sa savali mai se toeaina laulusina ia te au ma faapea lemu mai. ‘O le tama tama a lou afafine sa nofo i le tou uarota i tausaga ua leva’ Sa ia faamatalaina mai ma le lotomomomo le olaga o lena tamaitiiti. Ona ia fesili mai lea pe mafai ona ou sailia lena tiakono sa tatoso atu lana savali i lena auala. Ma sa manao pe mafai ona ou momoli atu lana faafetai ia te ia, ma tau atu i ai ua matua nei le tama a lona afafine ae o loo ia manatua pea lava” (“Ia Tatou Mataala Faatasi ma Au,” Liahona, Me 2001, 44–47).

Mafaufau i ni tagata patino o e atonu e finagalo le Alii ia te oe ina ia “manatua” pe “fafagaina”. Fuafua se auala e mafai ona e fesoasoani e fafaga i latou faaleagaga. Tusi o latou igoa i luga o se fasi pepa, ma tuu i totonu o se nofoaga o le a fesoasoani ia te oe ia manatua ai i latou.

Moronae 6:5–9

Na faamatala e Moronae le faamoemoega o fonotaga a le Ekalesia ma le ala o faatautaia ai

Mafaufau o oe o se matua o se talavou o le, mo nai vaiaso ua tea, sa fai mai na te le fia alu i le lotu ona e foliga mai e leai se uiga ma e faamoe tagata. Mafaufau po o le a lau tala e fai atu e fesoasoani ai e uunaia lau tama e auai i le lotu ma ia malamalama i mafuaaga sa’o mo le auai soo.

I lana talafaamaumau, na musuia Moronae e faamatala mai mafuaaga na potopoto faatasi ai tagata o le Ekalesia i lona vaitaimi. Suesue i le Moronae 6:5–6, ma tagai pe faapefea ona e faamaeaina le faamatalaga lenei: I le avea ma tagata o le Ekalesia, e tatau ona tatou potopoto soo faatasi e .

Sa faasoa mai e Elder Dallin H. Oaks o le Korama a Aposetolo e Toasefululua se vaega o se tusi mai se uo o loo faaalia mai ai se suiga i le amio e uiga i le auai i le lotu:

“Sa tusia e se uo atamai:

“‘I le tele o tausaga ua mavae, sa ou suia ai lou uiga faaalia i le alu i le lotu. Ua ou le toe alu i le lotu mo au lava, ae ua ou mafaufau i isi. Ua fai ma au masani, lou faatalofa i tagata e nonofo na o i latou ma faafeiloai tagata asiasi mai, … ua ou ofo atu lava au e faia se tofiga. …

“‘Pe a faapuupuu ou te alu i le lotu i aso taitasi, ma le faamoemoe ou te toaga, ou te le faatali sei tau mai se mea e fai, ma ua ou faia se eseesega lelei i olaga o tagata. O le mea lea, na matua sili atu ona ou fiafia ma maua le loto malie i lou auai i sauniga a le Ekalesia.’

“O nei mea uma ua faapupula mai ai le mataupu faavae e faavavau, e sili atu lo tatou fiafia ma sili atu le loto malie, pe a tatou galulue ma auauna atu i mea tatou te foai atu, ae le o mea tatou te maua” (“Auaunaga ma le Le Manatu Faapito,” Ensign po o Liahona, Me 2009, 96).

Atonu sa e faamaeaina le faamatalaga o i luga i nisi o manatu nei.

I le avea ma tagata o le Ekalesia, e tatau ona tatou potopoto soo faatasi e:

Anapogi ma tatalo.
Faamalosia le tasi ma le isi faaleagaga.
Aai ma feinu i le faamanatuga i le manatuaina o le Alii o Iesu Keriso.

Toe mafaufau i aafiaga sa e maua na aoao ai oe i le taua o le tatalo po o le anapogi faatasi ma tagata o lau uarota po o le paranesi.

Tali fesili nei, i lau api talaaga mo le suesueina o tusitusiga paia:
1. E faapefea ona suia lou aafiaga i le lotu pe afai sa e auai ma le naunau e faamalosia isi faaleagaga?
2. Aisea e taua ai le ‘ai ma inu soo i le faamanatuga i le manatuaina o Iesu Keriso?
3. E mafai faapefea i le alu i le lotu mo mafuaaga o loo lisiina i luga ona fesoasoani e “faatutumau ai [oe] i le ala sao”? (Moronae 6:4).

Faitau le Moronae 6:7–8, ma tagai mo le mea sa “tausisi ma le faaeteete” i ai tagata o le Ekalesia i le vaitaimi o Moronae, po o i nisi upu, sa latou gauai faapitoa atu i ai. Aisea e te manatu ai e taua lo tatou aoao atu ma faamalosiau le tasi ma le isi ina ia aloese ma salamo i le agasala?

Sa molimau mai Moronae o le faatele ona tatou salamo ma saili le faamagaloga ma le loto i ai, o le a faamagaloina ai i tatou. Atonu e te manao e faailoga le upumoni lenei i le Moronae 6:8.

Sa faaiuina e Moronae le mataupu lenei i le aoao atu o le auala e tatau ona faatautaia ai a tatou fonotaga o le Ekalesia. Faitau le Moronae 6:9, ma faailoa mai po o ai e tatau ona taitaia a tatou fonotaga i le Ekalesia. Mafaufau i se taimi sa e matua malamalama ai i le faatosinaga a le Agaga Paia i le taimi o se fonotaga a le Ekalesia.

E mafai faapefea ona faatatau ia te oe le mataupu faavae lea e faapea o fonotaga a le Ekalesia e tatau ona faatautaia e ala i le mana o le Agaga Paia? Afai sa talosagaina oe e fai se lauga pe aoao atu se lesona i le taimi o se fonotaga a le Ekalesia, e faapefea ona e faamautinoa atu o mea o e tau atu e saofaga i le taitaiga ma le faatosinaga a le Agaga Paia i le taimi o lena fonotaga?

I lau api talaaga mo le suesueina o tusitusiga paia, tusi se fuafuaga o le auala o le a e faia ai au fonotaga a le Ekalesia i le Aso Sa a sau. Atonu e te manao e faaaofia ai ni auala e valaaulia ai le Agaga Paia i lau tapuaiga ma le auala e te ono manatua ai ma fafagaina isi e ala i lou auai.
Tusi le mea lenei i lalo o galuega atofaina o le aso i lau api talaaga mo le suesueina o tusitusiga paia:

Ua ou suesueina le Moronae 6 ma faamaeaina lenei lesona i le (aso).

Fesili, mafaufauga, ma manatu faaopoopo ou te fia faasoa i lou faiaoga: