Moronae 7:1–19

Folasaga

Sa faamaumauina e Moronae le lauga sa tuuina atu e lona tama, o Mamona, i ona “uso pele” i le tele o tausaga ua mavae (Moronae 7:2). O lenei lesona e aofia ai le vaega muamua o le lauga a Mamona o loo maua i le Moronae 7. O loo saunoa ai i ana aoaoga i le faia o galuega amiotonu ma le loto moni i ai ma lana faamalamalamaga o le auala e mafai ona tatou iloatino ai le lelei ma le leaga. I le lesona e sosoo ai o le a e suesue i le vaega o totoe o le saunoaga a Mamona i le Moronae 7.

Moronae 7:1–10

Aoao atu Mamona i soo o Iesu Keriso e uiga i galuega ma le loto i ai

Na e iloaina ea e i ai se mea sa lei lelei i totonu e pei ona faaalia mai i fafo? O se tasi faataitaiga o lenei mea o se fasi fualaau suamalie, e pei o se apu e oona pe pula tele. Lisi mai nisi faataitaiga se lua pe tolu e mafai ona e mafaufau i ai:

Mafaufau pe faapefea e nei faataitaiga o mea ia e foliga mai e lelei i fafo ae o le mea moni e le lelei e ona faatusatusa i foliga i fafo ma faamoemoega i totonu o tagata. Sa faamaumauina e Moronae upu a lona tama, o Mamona, e faatatau i le tulaga o o tatou loto ao tatou faia galuega amiotonu. Faitau le Moronae 7:2–3 e faailoa atu ai tagata ia sa saunoa atu i ai Mamona.

Sa faatatau Mamona i ona uso ia na ia talanoa atu i ai o “soo fifilemu o Keriso” (Moronae 7:3). Suesue le Moronae 7:4–5 ia iloa ai le auala na iloa ai e Mamona o nei sa Nifae o ni soo moni lava o le Faaola.

E te mafaufau e mafai e se tagata ona faafoliga e amiotonu? Aisea, pe aisea e leai ai?

Sa tautala Mamona e uiga i lenei mataupu i le Moronae 7:6. Ao e suesue i lenei fuaiupu, atonu e te manao e faailoga le fuaitau “loto faamaoni.” O le faamatalaga lenei mai ia Elder Dallin H. Oaks o le Korama a Aposetolo e Toasefululua e mafai ona fesoasoani ia te oe ia malamalama ai po o le a le uiga o le maua o le loto faamaoni. Vase lalo o na vaega o lana faamalamalamaga ia e tutu matilatila mai ia te oe.

“E le tatau le tatou faia na o le mea sa’o. E tatau ona tatou galulue mo mafuaaga sao. O le faaupuga o nei ona po o le faamoemoega lelei. E masani ona faailoa mai e tusitusiga paia lenei uiga faalemafaufau talafeagai ma upu faamoemoega atoa o le loto po o le loto faamaoni.

“O loo faamanino mai e tusitusiga paia e malamalama le Atua i o tatou faamoemoega ma o le faamasinoina ai a tatou galuega” (Pure in Heart [1988], 15).

Sa faamatalaina e Mamona ia taunuuga o se tagata e saili e fai galuega lelei e aunoa ma le loto faamaoni. Saili i le Moronae 7:7–10, ma faailoa mai le mea e tupu pe a tatou faia ni galuega amiotonu e aunoa ma le loto faamaoni. Mai nei mau ua tatou aoao ai ina ia faamanuiaina mo galuega lelei, e tatau ona tatou faia ma le faamaoni o le loto. O le loto faamaoni e aofia ai le faia o galuega lelei ona o le alofa mo le Atua ma isi.

Tali le fesili lenei, i lau api talaaga mo le suesueina o tusitusiga paia: O a ni eseesega sa e matauina ina ua e faia ni galuega lelei ma le loto faamaoni e ese ai mai le faia o se mea lelei ma se loto manatu faapito?
Ina ia fesoasoni ia te oe ia malamalama lelei i le mataupu faavae faapea o le faamanuiaina mo galuega lelei, e tatau ona tatou faia ma le loto faamoni, mafaufau i vaaiga nei: O se uo o le sa faitauina le Tusi a Mamona sa talosagaina lau fesoasoani ia malamalama ai i le Moronae 7:9 ma fai atu, “Sa ou faitau afai e tatalo se tagata e aunoa ma le loto faamaoni, ‘ua leai se aoga ia te ia, ona e le talia e le Atua se ua faapena.’ E masani ona ou lagona e pei ou te le o tatalo ma le loto faamaoni. E tatau ona aua nei ou toe tatalo?” I lau api talaaga mo le suesueina o tusitusiga paia, tusi ai pe faapefea ona e tali atu i lena fesili, ma faamatala mai pe aisea o le a e tali atu ai i lena auala.

Sa tuuina mai e Peresitene Polika Iaga le fautuaga aoga lenei i le auala e mafai ona tatou maua ai se naunautaiga ina ia tatalo ma le loto faamaoni: “E le taua pe o oe po o au o lagona le fia tatalo, a oo mai le taimi e tatalo ai, tatalo loa. Afai tatou te le o fia tatalo, e tatau ona tatou faia seiloga ua tatou fia tatalo” (Aoaoga a Peresitene o le Ekalesia: Polika Iaga [1997], 45).

Mafaufau e uiga i le fautuaga a Peresitene Young ma pe faapefea ona faatatau i le usiusitai i isi poloaiga e ese mai le tatalo. O le tele o le faia o le mea sa’o e mafai ona fesoasoani e aumai se naunautaiga ina ia faaauau ai pea ona usiusitai i lena poloaiga mo mafuaaga sa’o.

Ina ia faaaoga aoaoga a Mamona i le taua o le faia o galuega lelei ma le loto faamaoni, filifili se tasi o poloaiga nei: anapogi, totogi le sefuluai, auauna atu i isi, suesue ia tusitusiga paia, ava i matua, tumau i le amiomama. (O le tumau i le amiomama e aofia ai le ola mama ao faaaoga le Initoneti po o ala o faasalalauga faaleagafesootai. E aofia ai foi le le faia o soo se mea e mafai ona taitai atu ai i le solitulafono o le feusuaiga.) Ona tali lea o fesili nei, i lau api talaaga mo le suesueina o tusitusiga paia:
1. Na faapefea ona faamanuiaina oe pe a e saili ia usiusitai i lena poloaiga ma le loto faamaoni?
2. O le a se fautuaga o le a e tuuina atu i lau tupulaga i le auala e usiusitai ai i lena poloaiga ma le loto faamaoni?

Moronae 7:11–19

O loo aoao atu Moronae i le auala e faamasino ai i le va o le lelei ma le leaga

E mafai faapefea ona tatou iloa e leaga se mea e aunoa ma le faataitai moni i ai? Sa ofoina mai e Mamona se fautuaga e fesoasoani ia i tatou pe a fetaiai ma sea tulaga.

Faitau le Moronae 7:11–13, ma tagai mo le auala e faamasino ai le lelei mai le leaga. Atonu e te manao e faailoga fuaitau ia e tutu matilatila mai ia te oe. Aotele mai mea sa e aoaoina mai nei mau e ala i le faamaeaina o faamatalaga nei i lau api talaaga mo le suesueina o tusitusiga paia:
1. O mea e mai le Atua …
2. O mea e mai le tiapolo …

Ua faamaonia mai e Mamona na valaaulia ma faaosoosoina i tatou e le Atua ia faia pea e le aunoa le lelei. Matau e tusa ai ma le Moronae 7:12, o loo valaaulia foi ma faaosoosina i tatou e le tiapolo. Mafaufau e uiga i nisi auala ua valaaulia ma faaosoosoina ai i tatou e le tiapolo e fai le agasala.

Sa talanoa mai Elder Jeffrey R. Holland o le Korama a Aposetolo e Toasefululua i faamoemoega a Satani mo le sailiiliga ina ia faaosoosoina i tatou ia faia pea e le aunoa le leaga: “O Satani, po o Lusifelo, po o le tama o pepelo—pule a oe i se igoa e te valaau ai—e moni o ia, o foliga moni lava o mea leaga. O ona faamoemoega ua i ai i tulaga faataumaoi uma. …E faavavau lava lona tetee i le alofa o le Atua, le Togiola o Iesu Keriso, ma le galuega o le filemu ma le faaolataga. O le a ia faasagatau i nei mea i soo se taimi ma soo se mea na te mafai ai. Ua ia iloa o le a faatoilaloina o ia ma tulia i fafo i le iuga, ae ua ia naunau i le mea na te mafai ai le toatele o isi faatasi ma ia” (“Ua Tauto i Tatou Uma,” Ensign po o le Liahona, Nov. 2011, 44).

Ina ia fesoasoani ia te oe ia saunia e faaaoga aoaoga a Mamona i le faamasino i le va o le lelei ma le leaga, lisi i totonu o lau api talaaga mo le suesueina o tusitusiga paia nisi o ata TV e sili ona e fiafia i ai, pese, vaega faamusika, saite i le initoneti, polokalama faatekinolosi, taaloga vitio, po o ni au lava mea totino. (Atonu e te manao e faafou lenei lisi e tusa ai ma mea e sili ona e fiafia i ai.) O le a e toe foi mai i lenei faamatalaga i lau api talaaga i se taimi mulimuli ane o lenei lesona.

Faitau le Moronae 7:15–17, ma vaavaai mo upumoni ia o le a fesoasoani ia te oe ia iloa ai le auala e faamasino ai pe o se mea e mai le Atua pe mai le tiapolo.

O le Agaga o Keriso ua ta’ua foi o le Malamalama o Keriso (tagai Moronae 7:18). Sa tuuina mai e Peresitene Boyd K. Packer, Peresitene o le Korama a Aposetolo e Toasefululua, lenei faamalamalamaga e mafai ona fesoasoani ina ia e malamalama atili ai i le Malamalama o Keriso:

“O le Agaga Paia ma le Malamalama o Keriso e eseese mai le isi. E uiga e i ai nisi taimi e tutusa ai upu e faamatalaina ai i tusitusiga paia, ae o ni tino eseese e lua ma patino. …

“O le tele o le tatou iloa e uiga i le Malamalama o Keriso, o le tele foi lea o le a tatou malamalama ai e uiga i le olaga ma le faatele ona tatou maua se alofa loloto mo tagata uma. …

“E tusa lava pe o lenei malamalama i totonu, o le iloa lea o le sao ma le sese, ua taua o le Malamalama o Keriso, i le uiga po o le manatu, e mafai ona taitaiina i tatou e suia a tatou amioga—sei vagana ai ua tatou taofiofia pe le amanaiaina foi. …

“O alii, tamaitai ma tamaiti uma o soo se malo, talitonuga, po o lanu—o soo se tasi lava, e tusa lava po o fea latou te nonofo ai pe o a foi o latou talitonuga po o a foi mea latou te faia—o loo i totonu o i latou le Malamalama o Keriso e le fano lava.I lenei tulaga ua foafoaina tutusa tagata uma lava. O le Malamalama o Keriso i tagata uma o se molimau lea o le Atua e le faailoga tagata” (“O Le Malamalama o Keriso,” Liahona, Ape. 2005, 8–10).

E maua foi e tagata o le Ekalesia ua papatiso le meaalofa o le Agaga Paia e fesoasoani ia i latou ia iloatino le va o le lelei ma le leaga. Sa aoao atu Peresitene Packer faapea, “E mafai ona galue le Agaga Paia e ala i le Malamalama o Keriso” (“Malamalama o Keriso,” 10).

Suesue i le Moronae 7:18–19 e maua ai le fautuaga a Mamona i le auala e tali atu ai i le Malamalama o Keriso o i totonu o i tatou. Atonu e te manao e faailoga ia upu po o fuaitau o i nei mau e faailoa mai ai a o tatou saili ma le filiga ia mulimuli i le Malamalama o Keriso, o le a mafai ona tatou iloatino le va o le lelei ma le leaga.

Faasino i le lisi sa e faia i lau api talaaga mo le suesueina o tusitusiga paia i le galuega fai 5. Mafaufau loloto ma le faaeteete i aitema o i lau lisi, ma “sailiili ma le filiga i le malamalama o Keriso” (Moronae 7:19) e fuafua ai pe o nei mea e mai le Atua pe leai. Atonu o le a aoga ia fesili nei e mafaufau ai:

O le a le lelei o faia e nei mea e valaaulia ai oe e faia le mea lelei, ia talitonu ia Keriso, ia alofa atu i le Atua ma auauna atu ia te Ia?
Pe o faatauanau ea oe e soo se mea nei “ia faia le leaga,…ia le talitonu ia Keriso,…faafitia o Ia, (po o le) le auauna i le Atua”? (Moronae 7:17).
E te lagona e tatau ona e aveese soo se mea o nei aitema mai lou olaga? Afai o lea, o le a faapefea ona e faia?

Sa ofo atu e Mamona le folafolaga faapea afai e te filfili e aveese soo se mea mai lou olaga e le lelei ma saili ina ia “taofimau i mea lelei uma,” o le a avea oe o se “fanau a Keriso” (Moronae 7:19).

Tusi le mea lenei i lalo o galuega atofaina o le aso i lau api talaaga mo le suesueina o tusitusiga paia:

Ua ou suesueina le Moronae 7:1 19 ma faamaeaina lenei lesona i le (aso).

Fesili, mafaufauga, ma manatu faaopoopo ou te fia faasoa i lou faiaoga: