Mamona 8:12–41

Folasaga

Ina ua uma ona tusitusi e uiga i le faaumatiaga o lona nuu ma le maliu o lona tama, na valoia e Moronae le oo mai o le Tusi a Mamona ma lapatai atu ia i latou o e o le a teenaina le tusi.Na vaai Moronae i talafaamaumau a sa Nifae o le a oo mai i se aso o le amioleaga tele, o le a toatele e sili atu le alolofa i mea o le lalolagi nai lo le Atua.Sa ia molimau atu o le a avea le Tusi a Mamona ma se mea “ua taua tele” (Mamona 8:14) i le vaitaimi o tulaga faigata faaleagaga o aso mulimuli.

Mamona 8:12–32

Ua valoia e Moronae le oo mai o le Tusi a Mamona

Tusi mea e te talitonu o nisi ia o meaalofa silisili sa e mauaina:

Faaalu se taimi e mafaufau ai pe aisea ua avea ai nei meaalofa ma se faamanuiaga ia te oe.

Faitau le saunoaga lenei mai ia Peresitene Ezra Taft Benson: “Ou te fia tautala atu e uiga i se tasi o meaalofa silisili ona taua ua tuuina mai i le lalolagi i ona po nei . O le meaalofa o loo ou mafaufau atu ai, o le meaalofa lea ua sili atu ona taua nai lo mea ua gaosia i le poto o le tagata. Ua sili atu ona taua lenei meaalofa i tagata, nai lo le tele o mea maoa’e ua tatou vaaia i vailaau faaona po nei.Ua sili atu lona taua i tagata nai lo vaa ua faia e tagata e femalagaai ai i le vateatea. Ou te tautala atu i le meaalofa o le .”

O le a sou manatu po o le a le meaalofa lea e faatatau i ai Peresitene Benson?

Sa aoao mai Moronae e uiga i le meaalofa lenei i le Mamona 8. Faitau le Mamona 8:12–14 e iloa ai po o le a le meaalofa. O le fuaitau o “lenei talafaamaumau” e faatatau i le Tusi a Mamona. O le Tusi a Mamona o le meaalofa lea na saunoa i ai Peresitene Benson (tagai “O le Tusi a Mamona—O Le Maaauau o la Tatou Tapuaiga,” Liahona, Ian. 1987, 5). Tusi le o le Tusi a Mamona i le avanoa o i le faaiuga o le saunoaga a Peresitene Benson.

Ata

papatusi auro

Toe tagai i le Mamona 8:12–14 e iloa ai le mea na aoao mai e Moronae e uiga i le taua o le Tusi a Mamona. O le a se mea sa ia aoao atu e uiga i le tulaga tautupe o papatusi? Sa faamatala atu e Moronae e ui e le faatagaina e le Alii le faaaogaina o papatusi mo le sailia o ni tupe, e taua tele ia tusitusiga o i luga o papatusi.

O le auala lea na oo mai ai le Tusi a Mamona e mafai ona fesoasoani ia i tatou ina ia malamalama ai i le taua o lenei tusi. Faitau le Mamona 8:15–16, ma faailoa mai le mea na aoao atu e Moronae e uiga i le auala na oo mai ai le Tusi a Mamona.

Tali le fesili lenei, i lau api talaaga mo le suesueina o tusitusiga paia:
1. O le a sou manatu i le uiga e na o se tasi o le e “manatu tasi i [le] mamalu [o le Atua]” e mafai ona aumaia le Tusi a Mamona? (Mamona 8:15).
2. O le a le uiga ia te oe o le a oo mai o le Tusi a Mamona “i le mana o le Atua”? (Mamona 8:16).O le a sou lagona e uiga i le Tusi a Mamona pe a e faitau i upu a Moronae i le Mamona 8:16?

Na lapataia e Moronae i latou o e faitio pe tetee i le Tusi a Mamona. Tagai mo ana lapataiga ao e faitau i le Mamona 8:17–22. Aisea e taua ai lou iloaina “o le a taavavale pea i luma faamoemoega faavavau o le Alii, seia oo ina faataunuuina ana folafolaga uma”? (Mamona 8:22).

Sa faamatalaina e Moronae faapea sa faia e le Alii se feagaiga ma “tagata paia na o e ua muamua atu ia te au” (Mamona 8:23)—e aofia ai perofeta e pei o Nifae, Iakopo, Enosa, ma Alema. Sa osia e le Alii se feagaiga o le a Ia aumaia i luma ia upu a nei perofeta i aso e gata ai. A o e suesue i le Mamona 8:23–25, faailoa mai po o ai na tatalo ai nei perofeta.

Sa tatalo nei perofeta mo o ”latou uso” (Mamona 8:24), o lona uiga o sa Lamana ma e tupuga mai ia i latou. Sa latou tatalo foi mo le tagata o le a “aumaia nei mea i luma” i aso e gata ai (Mamona 8:25; tagai foi i le Mamona 8:16), o lona uiga o le Perofeta o Iosefa Samita, o le sa filifilia e aumaia i luma le Tusi a Mamona i le lalolagi i nei aso e gata ai (tagai MF&F 3:5–10). O le toatele o perofeta anamua sa silafiaina Iosefa Samita ma sa tatalo mo lona manuia ina ia faaliliuina ma lolomiina le Tusi a Mamona, ma faataunuuina ai faamoemoega a le Atua (tagai Mamona 8:22, 24–25; MF&F 10:46).

Na saunoa Peresitene Boyd K. Packer o le Korama a Aposetolo e Toasefululua i le matafaioi a Iosefa Samita i le aumaia o le Tusi a Mamona:

“O le faamoemoe faapea na saunia e [Iosefa Samita] le [Tusi a Mamona] e aunoa ma se tasi na fesoasoani ia te ia, po o ni musumusuga foi, e matua le sao lava lea manatu.

“O le mea moni, o ia o se perofeta a le Atua—leai lava se isi faaupuga e sili atu nai lo lena!

“E le o Iosefa Samita na maua mai ai le tele o tusitusiga paia e pei ona ala mai ia te ia. O ia na avea ma auala na ui mai ai le tuuina mai o faaaliga i le lalolagi.O ia foi o se tagata e pei lava o i tatou e pei foi o perofeta o aso anamua e pei foi o perofeta o tatou nei aso. …

“O le Perofeta o Iosefa Samita o se tama faifaatoaga e lei alu i se aoga. O le faitauina o nisi o ana uluai tusi na ia tusia, e faailoa mai ai e lei aoaoina Iosefa Samita i le sipelaina o upu atoa ma le faaaogaina o le kalama.

“Soo se faaaliga lava na oo mai ia te ia i se tulaga ua uma ona teuteuina ma tusia lelei, o se vavega lava lea mea.” (“Tatou Te Talitonu I Mea Uma Lava Ua Faaalia Mai E Le Atua,” Liahona, Tesema 1974, 25).

Mafaufau o oe o Moronae, o le sa soifua mai pe tusa ma le 1,600 tausaga ua mavae ma o le mana o le Atua na mafai ai ona vaai i o tatou aso. Faitau le Mamona 8:35, ma mafaufau po o le a sou manatu e uiga i tulaga faaleagaga o o tatou aso. Ona faitau lea o le Mamona 8:26–32, lea o loo i ai le faamatalaga faaperofeta a Moronae e uiga i le taimi o le a aumaia ai le Tusi a Mamona—i o tatou aso.

Tusi i lau api talaaga mo le suesueina o tusitusiga paia, ni faamatalaga se lua pe sili atu a Moronae e uiga i o tatou aso. Tusi foi pe aisea e te manatu ai e manaia ma talafeagai mo o tatou aso nei faamatalaga faapitoa.

Sa aoao mai Peresitene Ezra Taft Benson, e uiga i le Tusi a Mamona:

“E tatau ona tatou avea le Tusi a Mamona o se taulaiga autu mo suesuega [aua] sa tusiaina mo o tatou aso. E lei mauaina e sa Nifae le tusi; e lei maua foi e sa Lamana o aso anamua. Sa faatatau mo i tatou. …

“Ua molimau mai tusitala taitasi o le Tusi a Mamona na ia tusia lenei tusi mo tupulaga o le lumanai. …

“Afai na latou vaai i o tatou aso ma latou filifili mea e sili ona taua mo i tatou, pe le o se pogai sili ea lena ona taua e tatau ai ona tatou suesue ma aoao i le Tusi a Mamona? E tatau ona tatou fesili ifo ia i tatou lava ‘o le a le pogai na musuia ai Mamona e le Alii (po o Moronae po o Alema) ia tuu lena mea i lana tusi? O le a se lesona e mafai ona ou aoaoina mai lena mea e fesoasoani ia te au ou te ola ai i nei aso ma nei ona po?’”(“O Le Tusi a Mamona—O Le Maaauau o la Tatou Tapuaiga,” 6).

Ina ia mafaufau loloto i le taua o le Tusi a Mamona ia te oe lava ia, tali ia fesili nei i totonu o lau api talaaga mo le suesueina o tusitusiga paia:
1. Mafaufau i le sa’o o valoaga a Moronae e uiga i tulaga o o tatou aso (tagai i leMamona 8:26–32). O le a se mea o aoao atu ia te oe e nei valoaga e uiga i le taua o le Tusi a Mamona mo o tatou aso?
2. Aisea e te manatu ai o le Tusi a Mamona o se “tasi o meaalofa silisili ona taua ua tuuina mai i le lalolagi i ona po nei” e pei ona aoao mai e Peresitene Ezra Taft Benson? (“O Le Tusi a Mamona—O Le Maaauau o la Tatou Tapuaiga,” 6).
3. Afai e fesiligia oe e se uo pe aisea e taua ai le Tusi a Mamona ia te oe, o le a sau tali?

Mamona 8:33–41

Ua vaai Moronae i aso e gata ai ma fetuuina le amioleaga faaleagaga o lo tatou taimi

Mafaufau i se taimi sa e iloaina ai se tagata o loo i ai se manaoga—se tasi o i ai se manaoga faaletino, faalelagona, faaleagafesootai, pe faaleagaga. Mafaufau i le mea sa e faia pe na mafai ona faia e fesoasoani ai i lena tagata. Mafaufau loloto pe aisea na e filifili ai e fesoasoani pe le fesoasoani i lena tagata. Aisea e te manatu ai e le fesoasoani tagata i nisi taimi ia i latou e i ai se manaoga?

Faitau le Mamona 8:36–41, ma vaavaai mo mafuaaga na tuuina mai e Moronae o le a le fesoasoani ai nisi tagata i aso mulimuli ia i latou e i ai manaoga. Mafaufau e faailoga mafuaaga nei i totonu o au tusitusiga paia. Atonu o le a fesoasoani pe a malamalama i le upu teuteu o lona uiga o le “faaauleleiina” po o le “teuteuina.”

O a nisi o faataitaiga o auala atonu o fiafia ai ia talavou i lenei vaitaimi i mea e mafai e tupe ona faatauina ma mulimuli atili ai i faafiafiaga faalelalolagi nai lo le avea ma se soo moni o Iesu Keriso? Suesue le Mamona 8:38, 41, ma faailoa mai ia taunuuga o le a fetaiai ma tagata mo lo latou faamaualuga, amioleaga, ma le le amanaiaina o e ua matitiva ma e ua le tagolima.

Tusi se mataupu faavae i totonu o lau api talaaga mo le suesueina o tusitusiga paia lea e otooto mai ai ni mea sa e aoaoina mai le Mamona 8:36–41.

O se tasi o faataitaiga o se mataupu faavae sa aoaoina i nei mau o le: O le a tatou tali atu i le Atua mo le auala o tatou taulimaina ai e matitiva ma e ua le tagolima.

Tali le fesili lenei, i lau api talaaga mo le suesueina o tusitusiga paia: O a nisi o manaoga e sili ona taatele—faaletino, faaleagafesootai, faalelagona, ma faaleagaga—o i ai i le autalavou i la outou aoga po o le nuu? Ona mafaufau lea i se mea e mafai ona e faia i le vaiaso a sau e tausia ai se tasi o i ai se manaoga. Tusi le sini lenei i lau api talaaga mo le suesueina o tusitusiga paia.

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Mamona 8:12–41 ma faamaeaina lenei lesona i le (aso).

Fesili, mafaufauga, ma manatu faaopoopo ou te fia faasoa i lou faiaoga: