Alema 6–7

Folasaga

Ina ua maea ona aoao atu tagata i Saraemila ma faatulagaina lelei le Ekalesia, sa alu atu Alema i le aai o Kitiona. Na ia iloa ai o tagata o loo nonofo ai iina e sili atu lo latou faatuatua nai lo e sa i ai i Saraemila. O lea, sa ia faamalosi atu i tagata i Kitiona ina ia faaauau pea ona faalagolago i le Alii ma saili e ola ai i Lana Togiola i o latou olaga. O le molimau a Alema ia Iesu Keriso e mafai ona fesoasoani ia te oe e faaleleia atili ai lou malamalama i le loloto o le Togiola a Iesu Keriso ma aoao atu ia te oe le ala e maua ai faamanuiaga o Lona Togiola i aso uma a o e faaauau atu pea i le ala i le malo o le Atua.

Alema 6

Ua faamalosia e Alema le Ekalesia i Saraemila ma alu atu e talai i Kitiona

Faauma le fuaiupu lenei: Ou te alu i le lotu aua .

Ao e suesue i le Alema 6, mafaufau pe faapefea e le malamalama i faamoemoega o sauniga a le ekalesia ona mafai ai ona sili atu ona taua sauniga ia te oe.

A o le i tuua e Alema Saraemila, sa ia faamalosia le Ekalesia iina. Faitau Alema 6:1–4, ma faailoa mai ni fasifuaitau se lua pe tolu o loo faamatala ai tiutetauave a taitai perisitua o le Ekalesia.

O se mataupu faavae taua tatou te aoaoina mai le aafiaga o Alema e faapea: I o tatou aso, e faapei foi i taimi o le Tusi a Mamona, ua faatuina le Ekalesia mo le manuia o tagata uma. Faitau Alema 6:5–6, ma faailoga fasifuaitau nei e lua: “ia faalogologo i le afioga a le Atua” ma “aufaatasi i le anapogi ma le tatalo malosi mo le manuia o agaga o i latou o e sa latou le iloaina le.” O nei fasifuaitau ua faailoa mai ai auala ua tuuina mai ai e le Ekalesia avanoa mo tagata uma ina ia tuputupu ae ai ma fesoasoani i isi. Ia mafaufau i le auala atonu e faamaea ai e tagata o le Ekalesia i Saraemila le fuaiupu ua e faaumaina i luga.

Tusi ni nai manatu i lau api talaaga mo le suesueina o tusitusiga paia pe faapefea e le auai i le lotu e tusa ai ma mafuaaga o lo o taua i leAlema 6:5–6 ona faia se eseesega i lou auai i le lotu.

O faamanuiaga o le auai i le Ekalesia ua faamoemoe lea mo fanau uma a le Atua. Na aoao mai Elder Jeffrey R. Holland o le Korama a Aposetolo e Toasefululua:

“E tatalo tagata uma mo faifeautalai. Tau ina ia faia ai pea. I lena agaga, e tatau foi ona tatou tatalo mo i latou o e o loo (po o latou e moomia ona) ona feiloai atu i faifeautalai. I Saraemila, na poloaiina ai na tagata ina ia ‘potopoto faatasi i le anapogi ma le tatalo faatauanau’ [Alema 6:6] mo i latou o e e le’i auai i le Ekalesia a le Atua. E mafai foi ona tatou faia faapea.

“E mafai foi ona tatou tatalo i aso uma mo o tatou lava tomai faafaifeautalai. Tatalo i lalo o le taitaiga faalelagi mo mea faapea, o le avanoa faafaifeautalai na o loo e manao i ai ua uma ona saunia i le loto o se tasi o loo manao i le talalelei o loo ia te oe. ‘Aua o loo i ai nei tagata e toatele i luga o le lalolagi … ma o e ua nao na taofia mai le upumoni ona ua latou le iloa le mea e maua ai’ [MF&F 123:12]. Tatalo ina ia latou mauaina oe! Ma ia nofouta, aua e toatele e o i le lalolagi o le a lagonaina le oge i o latou olaga, e le o se oge i mea e ai po o le galala i le fia inu vai, a o le oge i le faalogologo i afioga a Ieova [tagai Amosa 8:11]” (“Molimau ia te Au,” Liahona, Iulai 2001, 16).

Ina ia mulimuli i fautuaga a Elder Holland, mafaufau e tatalo mo se fesoasoani mai le Tama Faalelagi ina ia e iloa ma faataunuu ai avanoa faamisiona ua saunia mo oe. Saili avanoa e valaau atu ai i isi e faasoa i ai faamanuiaga o loo e fiafia i ai i le avea ai o se tagata o le Ekalesia.

Alema 7:1–13

Ua aoao atu e Alema tagata o Kitiona e uiga i le Togiola a Iesu Keriso

Vaai faalemafaufau e faapea o loo e faia se talanoaga e uiga i le salamo ma ni uo o ni tagata toaaga o le Ekalesia. Ua manatu au uo ua latou le i solia ni tulafono matuia ma faapea ifo pe faapefea ona latou aafia moni i le mana o le Togiola. Mafaufau e uiga i ni mea e te ono faasoa atu ma nei uo. Ia manatua nei manatu a o e suesue i le Alema 7:1–13.

Ina ua tuua Saraemila, sa talanoa Alema ma tagata i le aai o Kitiona. Faitau le Alema 7:3–6 ma vaavaai po o a ni tulaga faaleagaga sa faamoemoe i ai Alema na te maua i tagata o Kitiona. Ona faitau lea Alema 7:17–19 e iloa ai pe na faamaonia ia faamoemoega o Alema. I laina nei, faamatala le tulaga faaleagaga o tagata o Kitiona:

Faitau le Alema 7:7–10, ma vaavaai le gaoioiga na lagona e Alema na aupito sili lona taua mo tagata ia iloa e uiga i ma mea e manaomia ona faia e tagata ina ia saunia i ai.

Tali fesili nei i totonu o lau api talaaga mo le suesueina o tusitusiga paia: Aisea e te manatu ai o le a tau atu e Alema i tagata ua malosi lo latou faatuatua (tagai Alema 7:17) e tatau ona latou salamo ina ia saunia ai mo le afio mai o le Faaola? (Tagai i le Roma 3:23.)

Sa aoao atu e Alema tagata o Kitiona i lenei mataupu faavae taua: Sa tiga Iesu Keriso ina ia faaolaina i tatou mai le agasala ma le oti ma fesoasoani ia i tatou i luitau o lenei olaga. Faitau Alema 7:11–13, ma faailoga i lau tusitusiga paia le tulaga sa finagalo le Faaola e “ave i Ona luga” mo lo tatou manuia.

Atonu e fesoasoani le iloa o le atoatoa o vaivaiga, le malamalama, po o gasegase—e aofia i upu le tele o ituaiga o faafitauli. O le upu o le fesoasoani o lona uiga o le fesoasoani i taimi e manaomia ai po o le pagatia. O lona faavae faaLatina o lona uiga o le tamoe e fesoasoani i se tasi, e faaalia ai le finagalo malosi o le Atua e fesoasoani ia i tatou.

I talaane o Alema 7:11–13 i lau mau po o i lau api talaaga mo le suesueina o tusitusiga paia, atonu e te manao e tusi ia faamatalaga nei mai ia Elder Bruce C. Hafen, o le sa auauna atu o se Fitugafulu: “O le Togiola ua le na o mo e agasala” (“Matagofie mo Efuefu: O le Togiola a Iesu Keriso,” Ensign, Aperila 1990, 7). Apr 1997 (Alema 7:11–13 o se fuaitau o mau tauloto. Atonu e te manao e faailoga i se auala faapitoa ina ia mafai ona faigofie ona e maua i le lumanai.)

O le siata lenei o loo maua ai upu mai le Alema 7:11–13 o loo faamatala ai le tulaga na tauave ai e le Faaola i Ona lava luga. Tusi le siata i lau api talaaga mo le suesueina o tusitusiga paia, ona filifili lea o nisi o nei upu ma tusi faataitaiga pe faapefea e oe po o tagata e te iloa ona lagona nei tulaga. Mafaufau po o le a le uiga o le tauave e Iesu Keriso o nei mea i Ona lava luga.

Tiga
Mafatiaga
Faaosoosoga
Gasegase
Maliu
Le atoatoa
Agasala

Na faasoa mai e Elder Jeffrey R. Holland le molimau lenei e faapea e mafai e le Togiola ona tauave a tatou avega mai ia i tatou:

“Pe o oulua tauivi ea ma se temoni o mea ua fai ma vaisū —tapaa po o fualaau oona po o le taalo faitupe, po o le tai fana’e o le mala faatafuna o ponokarafi? Pe o faaletonu ea lau faaipoipoga po o pagatia ea sau tamaitiiti? Pe o e le mautonu ea i le faasinomaga o itupa po o le sailia o lagona lelei ia te oe lava? Pe o oe—po o se tasi e te alofa i ai—o loo feagai ma se faama’i po o se faanoanoaga po o le oti? Po o a lava ia isi laasaga e mafai ona e uia ina ia foia ai ni popolega, ia saumuamua i le talalelei a Iesu Keriso. Faatuatua i folafolaga mai le lagi. I lena tulaga, o le molimau a Alema o la’u molimau foi lena: ‘Ua ou mautinoa,’ ua ia fai mai ai, ‘o i latou uma o e faalagolago i le Atua, e lagolagoina i latou i o latou tofotofoga, ma o latou tiga, ma o latou puapuaga’ [Alema 36:3].

“O lenei faalagolago i le natura alofa tunoa o le Atua o loo i le totonugalemu o le talalelei na aoaoina e Keriso. Ou te molimau atu o le Togiola a le Faaola e siieseina ai mai ia i tatou e le gata o avega o a tatou agasala, ae faapena foi i avega o o tatou mafatiaga na faanoanoaga, o o tatou lototiga ma o tatou lē fiafia [tagai Alema 7:11–12]. Mai lava i le amataga o le faatuatua i se fesoasoani faapena o le a tuuina mai ai ia i tatou e le gata i le mafuaaga ma se auala e faaleleia ai, ae o se faamalosiauga ina ia tuuese a tatou avega ae tauave lo tatou faaolataga” ” (“O Mea Malepelepe e Fonofonoina,” Ensign po o le Liahona, Me 2006, 70–71).

Tusi i lau api talaaga mo le suesueina o tusitusiga paia e uiga i ou lagona mo Iesu Keriso ma mea ua Ia faia mo oe e ala i le Togiola. Ona tali lea i se tasi po o seti uma e lua o fesili nei:
1. O anafea na fesoasoani ai le Togiola ia te oe i se tasi o auala o loo faamatala mai e Alema 7:11–13? E faapefea ona fesoasoani le Togiola ia te oe i le faasologa o lena taimi?
2. E faapefea ona fesoasoani le Togiola a le Faaola ia te oe i se luitau o loo e feagai nei ma oe? O le a se mea e te faia e faalagolago ai i le Togiola a o e feagai ma lenei luitau?

Mau Tauloto—Alema 7:11–13

E ui o le Alema 7:11–13 o se fuaitau o mau tauloto e umi, o loo i ai ni upu faapitoa e mafai ona fesoasoani ia te oe e manatua ai le uiga ma le mana o le Togiola i lou olaga atoa. Ina ia fesoasoani ia te oe e tauloto nei upu autu, toe tusi le Alema 7:11–13 i se fasipepa e ese mai, ma le tuuese o upu na maua muamua i le siata i lenei lesona. Faitau i vaega tusitusia o lenei mau seia mafai ona e faatumuina ia upu o loo misi e aunoa ma le vaai i au tusitusiga paia. Atonu e te manao e toe iloilo nei fuaiupu i ni nai aso o sosoo ai ina ia fesoasoani ia te oe e manatua ai mea e mafai ona faia e le Faaola mo oe ma isi i le faagasologa o lou olaga. Faataitai lau mau tauloto o le Alema 7:11–13 e ala lea i le taulotoina leotele ia te oe lava po o i se tasi o le aiga po o i se uo po o le e ala lea i le tusia i totonu o lau api talaaga mo le suesueina o tusitusiga paia.

Alema 7:14–27

Sa faamalosi atu e Alema tagata ina ia faaauau pea i le ala i le malo o le Atua

Faitau Alema 7:19 ina ia manatua ai le ala na faamatala ai e Alema le tulaga faaleagaga o tagata i Kitiona. Sa aoao atu e Alema lenei mataupu faavae taua: E ala i le ola ai i mataupu faavae o le talalelei, ua tatou mulimuli i le ala i le malo o le Atua. (O le malo o le Atua o le malo selesitila.) Suesue i le Alema 7:14–16, ma vase lalo o upu ma fasifuaitau e faailoa mai ai mea e manaomia ona tatou faia ina ia mafai ai ona mulimuli i le ala e taitai atu ai i tatou i le malo o le Atua. Ona suesue lea o le Alema 7:22–25, ma vase lalo o upu ma fasifuaitau o loo faailoa mai ai mea e manaomia ona tatou avea ai ina ia mulimuli ai i lenei ala.

Tusi se ala i lau api talaaga mo le suesueina o tusitusiga paia mai le tulimanu o le itu agavale pito i lalo o se pepa e agai i le tulimanu o le itu taumatau i luga o le pepa. Tusi le Olaga Nei i le pito i lalo o le ala, ma tusi O le Malo o le Atua i le pito i luga o le ala. I luga o le ala, tusi mea e ao ona e faia ma mea e ao ona e avea ai o le a taitaiina atu oe i le malo o le Atua.
Filifili se faatinoga se tasi mai le ala, ma tusi e uiga i le auala na e vaaia ai se tagata o faia lenei mea. Ona filifili lea o se uiga se tasi mai le ala, ma tusi e uiga i le auala na e vaaia ai se tagata o avea ai faapea. Faatu se sini o le a fesoasoani ia te oe e alualu ai i luma i nei vaega e lua ina ia mafai ai ona e ulufale atu i le malo o le Atua i se aso.

Faitau le Alema 7:27, ma vaavaai mo faamanuiaga sa iloa e Alema o le a maua e tagata pe afai latou te faaauau pea i le faatuatua ma galuega lelei. Ia manatua pe a e mulimuli ma le faatuatua i le ala e taitai atu ai i le malo o le Atua, o le a mafai foi ona e maua nei faamanuiaga.

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina Alema 6–7 ma faamaeaina lenei lesona i le (aso).

Fesili, mafaufauga, ma manatu faaopoopo ou te fia faasoa i lou faiaoga: