E pei ona faamaumauina i le Alema 40–41, na aoao atu e Alema lona atalii o Korianetona i aoaoga faavae taua e faatatau i le olaga pe a mavae le oti. Sa faamatala e Alema e ala i le Togiola a Iesu Keriso, o le a toetutu tagata uma. Sa aoao atu foi e Alema Korianetona e uiga i le lalolagi o agaga o le a i ai e ua oti, e faalagolago i a latou filifiliga i le olaga nei, e faatalitali ai i le parataiso po o le falepuipui o agaga seia oo i le toetu. Na aoao e Korianetona mai ia Alema o le ata o le toefuataiina e aofia ai e le gata o le toetu faaletino, ae faapea foi i le toefuataiina faaleagaga lea tatou te maua ai taunuuga o a tatou amioga ma manaoga. Mulimuli ane, sa faamamafa atu e Alema e faapea e ogatotonu i lenei ata o le toefuataiina o le upumoni o le amioleaga e le mafai lava ona taitaiina atu i le fiafia moni.
Ua aoao e Alema Korianetona e uiga i le lalolagi o agaga ma le toetu.
Ata
o le tina ma le fanau i le maa o le fanua tanu
Vaai faalemafaufau e faapea ua i ai sau uo o le sa le i mamao atu le aafia ai i le maliu a se tasi o lona aiga. O lau uo, e iloaina o oe o se tagata lotu, ua sau ia te oe ma fesili nei:
E faapefea ona mafai ona toe ola i tatou? O ai o le a toetu?
O fea tatou te o i ai pe a oti i tatou, ma e faapefea lena mea?
O le a le toetu? O le a le eseesega o o tatou tino faaletino ma o tatou tino toetu? O le a le mea e tupu pe a tatou toetutu?
O le faamatalaga i le Alema 40 e mafai ona fesoasoani e tali ai nei fesili. O lenei mataupu o le faaauauga lea o aoaoga a Alema i lona atalii o Korianetona. Sa popole Korianetona e faatatau i le toetu o e ua oti.
Faitau uma fuaitau o mau nei. Filifili se fuaitau se tasi pe sili atu, ma faamatala i lau api talaaga mo le suesueina o tusitusiga paia pe faapefea e mea na aoao atu e Alema ona tali i fesili talafeagai. (Afai e i ai sou taimi i le faaiuga o le lesona, atonu e te manao e toe foi i tua ma toe iloilo mea na aoao atu e Alema i isi fuaiupu.)
Suesue le Alema 40:1–5. E faapefea ona mafai ona toe ola i tatou? O ai o le a toetu?
Suesue le Alema 40:6–7, 11–14. O fea tatou te o i ai pe a oti i tatou, e faapefea lena mea? (Ina ua aoao atu e Alema o agaga o tagata uma o le a “ave atu i fanua i lena Atua o le na ia tuuina ia te i latou le ola” (Alema 40:11), sa ia aoao atu pe a mavae lo tatou oti, ae le i oo mai lo tatou toetutu, o le a toe foi o tatou agaga i le lalolagi o agaga, e le o le taunuuga faaiu seia maea le faamasinoga a le Atua. Atonu e aoga ona tagai i vae o faamatalaga i le fuaiupu 13 ina ia malamalama ai i le uiga ina ua faapea mai Alema o le “pouliuli i fafo.” Alema 40:14 e fesoasoani foi tatou te malamalama ai o lenei faamatalaga o le pouliuli i fafo e faatatau i le tulaga a o le i oo i le toetu e masani ona tatou taua o le falepuipui o agaga ae le o le nofoaga faaiu tumau mo i latou ua malaia.)
Suesue le Alema 40:21–26. O le a le toetu? O le a le eseesega o o tatou tino faaletino ma o tatou tino toetu? O le a le mea e tupu pe a mavae lo tatou toetutu?
E faasino i le Alema 40:11–12, sa faamatala e Peresitene George Q. Cannon o le Au Peresitene Sili “e le i faamoemoe Alema e faaali atu se manatu ua faavave ona auina atu i latou i le afioaga patino o le Atua. Sa manino lona faaaogaina o lena fasifuaitau i se tulaga agavaa” (Gospel Truth: Discourses and Writings of President George Q. Cannon, sel. Jerreld L. Newquist, 2 vols. [1957–74], 1:73).
Sa faamatala e Elder Neal A. Maxwell o le Korama o Aposetolo e Toasefululua nisi o mea o le a tatou iloa pe a mavae ona toetutu i tatou:
“I le aso o le faamasinoga…o le a faaalia mea uma. E le gata o le a tatou maua e pei ona taua e le Tusi a Mamona o le ‘manatu pupula’ ma le ‘faamanatua atoatoa’ o a tatou agasala, ae o mea fiafia o le a auamaia foi i luma ma toe fuataiina. O le a tatou iloa ‘e tusa e pei ona tatou iloa nei.’ (Alema 5:18; 11:43; tagai foi MF&F 93:33.) O le a tatou fevaaiai o le ‘mata i le mata’ (Mosaea 12:22; 15:29) ona o le fefaasoaai o faamatalaga faavae
“E faaopoopo i mea uma o le a toe tuuina atu’ (Alema 40:23) e iai le manatu, e aofia ai, mulimuli ane, o tatou manatu i le muai olaga. Mafaufau i le fiafia o le toe faatasia o le mafaufau ma le agaga e le manatu talafeagai o le esetete muamua ma le esetete lona lua.
“O se lologa o lagona o le a oo mai ia i tatou, ona ua silafia e le Atua alofa le poto o le toe fuataiina atoatoa o le manatu. O lenei lologa o faamatalaga faafouina o le a faateleina atili ai la tatou faafetai le mamao i tua o tiga faaumiumi o le Atua ma le alofa agalelei o Iesu ma lana togiola!” (Lord Increase Our Faith [1994], 103).
O le toetu o le toe tuufaatasia lea o le agaga ma le tino, ma mea uma lava o le a toe fuatai i lo latou tulaga tatau ma le atoatoa. A mavae le toetu o le a taitoatasi i tatou ma tutulai i le afioaga o le Atua ina ia faamasinoina. Faitau le Alema 40:25–26, ma saili le faamatalaga a Alema i le tofi mulimuli a i latou o e filifili le amiotonu i lenei olaga e pei ona faatusaina i le tofi mulimuli a i latou o e filifili le amioleaga. Mafaufau pe mafai faapefea e lenei fuaitau ona aafia ai lou naunautaiga ia mama i luma o le Atua.
E pei ona faamaumauina i le Alema 40:16–22, o le toetu na talanoa i ai Alema sa faatatau lea i le taimi i le fogaeleele. O Iesu Keriso na muai toetu, e le i pine ae mulimuli mai ai e na amiotonu o e na soifua ma maliliu i le taimi o Atamu seia oo i le taimi o le Toetu o Keriso (tagai Alema 40:16, 20; MF&F 133:54–55). O lenei toetu ua faasino i ai e Alema o le “uluai toetu.”
Ua aoao e Alema ia Korianetona e uiga i le ata o le toefuataiina
Mafaufau i upumoni na aoao atu e Alema e uiga i le toetu, o le lalolagi o agaga, ma le faamasinoga, mafaufau pe faapefea ona aafia ai amioga a se tagata pe afai e talitonu o ia i mea nei.
E leai se olaga pe a mavae le oti.
A tatou oti, o le a faaatoatoaina i tatou e tusa lava pe sa lelei pe leaga a tatou galuega i lenei lalolagi.
I le faamasinoga o le a tauia i tatou mo a tatou galuega lelei ma faasalaina mo a tatou galuega leaga.
Ata
O Loo Soifua o Ia
I le Alema 41 ua tatou aoao ai sa le mautonu Korianetona i mea sa aoaoina atu e isi tagata e uiga i le toetu. Mafaufau e faailoga ia le fasifuaitau “o sese mamao ese” i leAlema 41:1, ona faitau lea o le fuaiupu lenei ma vaavaai mo le mafuaaga na sese ese ai nisi o tagata. Ina ia fesoasoani ia te oe e malamalama ai i lenei fuaiupu, atonu e fesoasoani ia te oe ona iloa o le faauigaese o tusitusiga paia o lona uiga e mimilo, faaese, pe suia le uiga o le mau.
O a manatu na faapea mai Alema o le a ia faamanino mo Korianetona?
Toefuataiina o lona uiga o le toe faafoi mai. Na manao Alema ina ia malamalama Korianetona e i ai le tulaga faaletino ma le faaleagaga i mea ua ia taua o le “fuafuaga o le toefuataiga” ” (Alema 41:2). Suesue le Alema 41:2–5, ma faailoga mea faaletino o le a toe fuataiina mai ia i tatou pe a mave le oti ma mea faaleagaga o le a toe fuataiina mai. ( O le Tatau i nei fuaiupu o lona uiga e manaomia pe tatau ai.)
O le a le tulaga faaletino o le fuafuaga o le toefuataiga o loo taua i le Alema 41:2?
O le tulaga faaleagaga o le fuafuaga o le toefuataiga o loo faamatalaina i le Alema 40:3–5 o le: O le a toe fuataiina mai i tatou a le o le fiafia po o le faanoanoa e tusa ai ma a tatou galuega ma naunautaiga i le olaga faaletino.
Faapea la ua fesiligia oe e aoao atu le Alema 40:3–5 i se vasega o le Peraimeri. Tusi i lau api talaaga mo le suesueina o tusitusiga paia le auala o le a e faamatalaina ai le aoaoga faavae o le toefuataiina faaleagaga i se auala faigofie ina ia mafai ona malamalama ai tamaiti i mea na aoao mai e Alema.
Manatunatu loloto pe faapefea e le malamalama i le aoaoga faavae o le toefuataiina ona mafai ona aafia ai au amioga ma manaoga.
A o tatou malamalama i le aoaoga faavae o le toefuataiina, ua faigofie ona amata ona tatou popole i taunuuga o le a oo mai ona o a tatou agasala ma filifiliga sese. E i ai ea se isi auala e suia ai taunuuga le lelei ona o a tatou manaoga ma amioga sese? Ua ofoina atu e Alema ia Korianetona se faapogai e faamoemoe ai. Faitau le Alema 41:6–9, ma vaavaai mo mea tatou te mafai ona fai ina ia maua ai le lelei ma le fiafia toefuatai ia i tatou e tusa lava pe sa matuia le tatou agasala. Atonu e te manao e faailoga upu ma fasifuaitau i le Alema 41:6–7 o loo faapea mai ua tatou nafa ma mea o le a tatou maua i le toetu. Mafaufau i le fesili lenei: E faalagolago i nei fuaiupu, o le a le tulaga ua avea ai i tatou ma o tatou lava faamasino?
E i ai i latou e manatu e mafai ona latou toe foi atu i le Atua e aunoa ma le tauaveina o tiutetauave patino mo a latou amioga. E masani ona latou faapea mai o a latou filifiliga sese e malie. O nisi o taimi o e o loo faia le agasala e foliga mai e fiafia. Ae faitau le Alema 41:10, ma vaavaai mo mea na aoao atu e Alema e uiga i le amioleaga. (Alema 41:10 o se fuaitau o mau tauloto o le tusitusiga paia. Atonu e te manao e faailoga nei mea i se auala e iloagofie ina ia mafai ona e maua i le lumanai.)
I le Alema 41:10, na molimau atu Alema i lona atalii o le“e lei avea lava le amioleaga ma fiafia.” Faamaea le gaioiga lea i lau api talaaga mo le suesueina o tusitusiga paia:
Tusi e uiga i le mafuaaga e te talitonu ai e moni le faamatalaga a Alema.
Tusi se faataitaiga i le ala atonu e faatauanau ai i tatou e Satani ia talitonu e mafai ona tatou solia le poloaiga a le Atua ma maua pea le fiafia.
Mafaufau e tusi le faamatalaga lenei mai ia Peresitene Ezra Taft Benson i lau tusitusiga paia i talaane o le Alema 41:10: “E le mafai ona e faia le mea sese ma lagona le sao. E le mafai!” (“O Se Savali i le Tupulaga Faiae,” Liahona, Mat. 1978, 47).
Alema 41:11 ua faamatala pe aisea e le mafai ai ona maua le fiafia moni pe a filifili le mea sese. Ina ia fesoasoani ia te oe ia malamalama i lenei fuaiupu, faamaea le siata o loo i lalo e ala lea i le faafetauiina o fasifuaitau faaletusitusiga paia ma lona faauigaga. (A ma’ea, siaki tali ma tali o loo i le faaiuga o le lesona.)
O upu ma fasifuaitau mai le Alema 41:11 o loo faamatala ai le i ai “i se tulaga o le natura”
Faauigaga
“I se tulaga faaletino”
Faatapulaa ma mafatia e ala i a tatou agasala
“O le au oona ma i totonu o noanoaga o le amioletonu”
Leai le mafuataga o le Agaga Paia
“Ua aunoa ma le Atua i le lalolagi”
Ua pulea e tuinanau o le tino
O lea ua e faauigaina nei upu, toe faitau le Alema 41:11 ina ia faailoa mai pe aisea ua le mafai ai ona fiafia pe a filifili le mea sese. O nisi ua filifili le amioleaga atonu ua manatu ua fiafia i latou i lena lava taimi, ae o a latou filifiliga o le a taitai atu i le faanoanoa ma le le fiafia mulimuli ane.
I lau api talaaga mo le suesueina o tusitusiga paia, tali fesili nei:
Aisea e te manatu ai o le i ai i “se tulaga o le natura,” po o se “tulaga faaletino” po o se agasala, e eseese ma le natura o le fiafia?
O a nisi o faataitaiga i le mafuaaga e maua ai e le autalavou i latou lava ua faaitiitia le mafutaga ma le Agaga Paia, ua faatapulaa ma mafatia ia latou agasala, pe ua pulea e le tuinanau o o latou tino?
Faitau le Alema 41:12, ma vaavaai mo le fesili na fesiligia ai e Alema ia Korianetona e uiga i le toefuataiina. Faitau nei le Alema 41:13, ma faailoga le auala na tali atu ai Alema i lenei fesili.
Vaai faalemafaufau o loo e talanoa i se uo o loo manao ina ia fiafia ae o loo filifili e amioai i ala e feteenai ma poloaiga a le Alii. E faaaoga ai le aoaoga faavae o le toefuataiina sa e suesue i ai i le aso, faamatala i lau api talaaga mo le suesueina o tusitusiga paia pe aisea ua le maua ai e ia le fiafia ma o le a le mea e ao ona faia ina ia maua ai le fiafia moni.
Ata
pumareni
O se pumareni o se auupega sa muai faaaogaina mo tuliga manu. Ona o lona foliga, afai e sao ona togi, e toe foi mai i le tagata na togiina. Faitau le Alema 41:14–15, ma vaavaai pe faapefea ona fai le pumareni ma faatusa o le upumoni ua aoaoina i nei fuaiupu. Atonu e te manao e faailoga le fasifuaitau “auina atu” i le fuaiupu 15. Mafaufau i se taimai sa e auina atu ai le lelei ma le alofa mutimutivale po o le agalelei ma toe maua mai.
O le a se amioga amiotonu se tasi e te manao e auina atu i isi po o se uiga amiotonu e te manao ina ia vaai i ai nisi ia te oe e te manao e toe maua mai mai isi? O le a se sini e mafai ona setiina e “auina atu” ai se tasi o nei uiga po o amioga?
Faitau le Alema 41:10, ma tusi mea nei i lau api talaaga mo le suesueina o tusitusiga paia: Afai e lei avea lava le amioleaga ma fiafia, ona o le a taitaiina pea lava i le fiafia. Tusi se upu i le avanoa e faauma lelei ai le fuaiupu. Lisi nei se aofaiga o gaoioiga patino amiotonu e te lagona e mafai foi ona fetaui i le avanoa (mo se faataitaiga, auauna atu i isi). Tusi lau molimau i le ala ua e vaaia ai nisi o nei gaoioiga amiotonu ua taitai atu i le fiafia.
E taua le malamalama o le fiafia e oo mai mai le amiotonu e le masani ona maua vave i le taimi lava lena, faifaipea, pe faaauau pea iinei i le olaga faaletino. Ae ui i lea, o le filemu ma le fiafia o le a oo mai pea lava pea i le ala a le Alii ma le taimi i se tagata o loo ogatasi ma Ana aoaoga ma poloaiga.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:
Ua ou suesueina le Alema 40–41 ma faamaeaina lenei lesona i le (aso).
Fesili, mafaufauga, ma manatu faaopoopo ou te fia faasoa i lou faiaoga: