Alema 11

Folasaga

Na fefinauai Amoleka ma le loia o Seseroma, o le na taumafai ina ia faafitia e ia le Atua moni o lo o soifua. A o ia puipuia lona faatuatuaga e faasaga atu i taumafaiga a Seseroma e mailei o ia, sa molimau Amoleka o le faaolataga mai le agasala e na o Iesu Keriso e oo mai ai. Sa molimau malosi atu Amoleka o tagata uma lava o le a toetutu ma faamasinoina e le Atua. Talu ai le Togiola a le Faaola, o le a i ai se aso e toetu ai ma tulai ai i luma o le Atua ma tuuina atu le talaaga o lou olaga i le lalolagi.

Alema 11:1–25

Ua teena e Amoleka faaosoosoga a Seseroma e faafitia le i ai o le Atua

Mafaufau i sau mea totino e taua tele ia te oe ma e te le faataua atu lava. Mafaufau pe aisea ua sili ai ona taua ia te oe. I le Alema 11, a o faaauau pea e Alema ma Amoleka le aoao atu o tagata o Amonaea, na faafeiloai e se loia amioleaga e igoa ia Seseroma ia Amoleka ma ofoina atu ia te ia ni tupe e fesuiai ma se mea sa taua tele ia Amoleka. Ua faamatalaina e tusitusiga paia Seseroma “o se tagata o le sa poto tele i ala a le tiapolo” (Alema 11:21), o lona uiga ua ia aoao e faaaoga faiga lava e tasi, fuafuaga, faaoleole, ma togafiti e faaaoga e Satani e maileia ai isi mai le amiotonu ma le upumoni.

Suesue le Alema 11:21–22, ma iloa ai le aofaiga o le tupe na ofoina atu e Seseroma ia Amoleka ma le mea na ia manao e fai i ai e Amoleka. O le “oneti” o le siliva ario sili lea ona taua a sa Nifae (tagai Alema 11:6, 11–13). O le oneti e tasi e tutusa lea ma le totogi o le vaiaso e tasi mo se faamasino (tagai Alema 11:3).

Tali fesili nei:

O anafea na e vaai ai i se tasi ua teena faatosinaga a le lalolagi, e pei ona ofoina atu ia Amoleka?
E faapefea e lou vaai i lenei mea ona uunaia oe ina ia faamaoni?

Faitau le Alema 11:23–25 ma vaavaai i le ala na tali atu ai Amoleka i le ofo a Seseroma. Ona tali lea o fesili nei i lau tusi lesona:

Aisea e te manatu ai sa le fiafia Amoleka i le ofo a Seseroma?
E tusa ai ma Alema 11:25, o le a le fuafuaga a Seseroma i le ofoina atu o oneti e ono ia Amoleka?
E faapefea ona tali tutusa lenei mea i mea e fai e Satani pe a gauai atu tagata i ana faaosoosoga?

Faamaea galuega nei i lau api talaaga mo le suesueina o tusitusiga paia:
1. Ina ia iloa lelei le ala na mafai ai e Amoleka ona teena le ofo a Seseroma, faitau le Alema 11:22 ma faamaea le faamatalaga lenei: “O le a ou le fai atu se mea e le tusa ai ma le Agaga o le Alii.” Ona tusi lea o isi upu e tolu pe fa e mafai ona e tuu i avanoa ina ia sao ai le faamatalaga (mafaufau, mo se faataitaiga, fai, faitau, ofu, matamata, ma tusi).
2. Tusi se faamatalaga e faatatau i le Alema 11:22 e mafai ona fesoasoani ia te oe e manatua ai pe faapefea ona e manumalo i faaosoosoga faatasi ai ma le fesoasoani a le Agaga Paia. O le mea ua e tusia e faailoa atu ai i au lava upu le upumoni e faapea afai tatou te faalagolago i le Agaga Paia, e mafai ona tatou manumalo i faaosoosoga.

Fai se malologa puupuu mai lau suesuega, ma manatunatu loloto i le fesili lenei: E faapefea e le ola ina ia ou lagona le Agaga Paia ma mullimuli i Ana musumusuga ona fesoasoani ia te au e manumalo ai i faaosoosoga?

Faitau le fautuaga o lo o mulimuli mai mai ia Peresitene Boyd K. Packer, Peresitene o le Korama a Aposetolo e Toasefululua, ma vaavaai pe faapefea e le faalagolago i le Agaga Paia ona fesoasoani ia te oe e manumalo ai i faaosoosoga:

“Afai ua e see atu i mea e le tatau ona e oo i ai, pe afai foi ua e fegalegaleai ma tagata ua tosoina ese atu oe i le itu sese, o le taimi tonu lena e faatino ai lou tutoatasi, lau faitalia. Faalogo i le siufofoga o le Agaga, ma o le a le taitaiina sese lava oe. …

“… I le avea ai ma auauna a le Alii, ou te folafola atu o le a puipuia outou ma leoleoina mai osofaiga a le fili pe afai o le a outou faalogo atu i uunaiga ia e sau mai le Agaga Paia” (“Fautuaga i le Autalavou,” Ensign po o le Liahona, Nov. 2011, 18).

Ina ia mafaufau i faaaogaaga e mafai ona maua o mea ua e aoaoina, tali fesili nei i lau api talaaga mo le suesueina o tusitusiga paia:
1. O a nisi o tulaga lea e faaosoosoina ai le autalavou e fetuutuunai ai a latou molimau pe ia le amanaia i latou mo mo mea o le lalolagi?
2. O a ni fautuaga e mafai ona e ofoina atu i se uo i le aoga o le a fesoasoani ai ia te ia e faalagolago i le Agaga Paia pe a feagai ma faaosoosoga faapenei?

Faaaoga mea ua e aoaoina e ala i le manatuaina o le faataitaiga a Amoleka i seisi taimi e faaosoosoina ai oe e fetuutuunai ou talitonuga. Ia manatua e mafai ona e maua le faalagolago sili ma le mautinoa pe a e ola amiotonu ma mulimuli i musumusuga a le Agaga Paia.

Alema 11:26–40

Ua molimau Amoleka i le Alo o le Atua ma ua manumalo mai taumafaiga a Seseroma e faaleaga i lana upu

Sa osofaia e Seseroma le faatuatua o Amoleka ia Iesu Keriso. Ina ia fesootai faaletagata i le mea na tupu ina ua le manuia le taumafai o Seseroma e faafitia e Amoleka le Atua soifua, mafaufau i se taimi atonu na teena ai e se tasi ou talitonuga. Faitau le felafolafoaiga a Amoleka ma Seseroma i le Alema 11:26–34, ona tagai lea i le auala na mimilo ai e Seseroma upu a Amoleka i le Alema 11:35.

Faitau le auala na faasao ai e Amoleka lenei pepelo i le Alema 11:36–37. Atonu e te manao e faailoga le vae o faamatalaga 34a i lau mau, ma faitau le Helamana 5:10–11. Ona faamatala lea i au lava upu le eseesega i le va o le faasaoina “ia tatou agasala” ma le faasaoina “mai ia tatou agasala” (faaopoopo le faatusilima):

Faitau le Alema 11:40, ma faailoa mai le laasaga muamua na fai mai Amoleka e ao i tagata ona fai ina ia faasaoina ai mai a latou agasala. E i ai nisi o tagata ua faaali mai e talitonu ia Iesu Keriso ae peitai latou te le mananao e suia a latou amioga. O le talitonu i le suafa o Iesu Keriso o lona uiga o le i ai o le faatuatua ia te Ia.

Ina ia malamalama lelei pe faapefea e le “talitonu i lona suafa” (o le i ai o le faatuatua ia Iesu Keriso) ona taitai atu i le salamo, faitau le saunoaga lenei mai ia Peresitene Dieter F. Uchtdorf o le Au Peresitene Sili: “Tatou te manaomia se faatuatua malosi ia Keriso ina ia mafai ai ona salamo. O lo tatou faatuatua e tatau ona aofia ai se ‘manatu sao i le [Atua] lava ia, atoatoaga, ma uiga’ (Lectures of Faith [1985], 38). Afai tatou te talitonu e silafia e le Atua mea uma, e alofa, ma e alofa mutimutivale, o le a mafai ona tatou tuu atu lo tatou faatuatua ia te Ia mo lo tatou faaolataga e aunoa ma le fefo’ifo’iai. O le faatuatua ia Keriso o le a suia ai o tatou mafaufauga, talitonuga, ma amioga ia e le tusa ai ma le finagalo o le Atua” (“Vaega Tonu o le Toe Foi Saogalemu,” Ensign po o le Liahona, Me 2007, 100).

E faapefea e lou faatuatua ia Iesu Keriso ona uunaia oe e sui ou mafaufauga, talitonuga, ma amioga?

Aisea e manaomia ai e se tagata le faatuatua ia Iesu Keriso ina ia mafai ai ona salamo? Ina ia faaaoga mea ua e aoaoina mai ia Amoleka ma Peresitene Uchtdorf, tusi i lau api talaaga mo le suesueina o tusitusiga paia le auala e te faamatala ai le mataupu faavae lenei: O le Faatuatua Moni ia Iesu Keriso o se amataga lea o le faagasologa o le togiolaina mai a tatou agasala.

Alema 11:41–46

Ua aoao Amoleka e uiga i le toetu ma le faamasinoga o tagata uma

Ae e te le’i faitauina le faaiuga o le molimau a Amoleka ia Seseroma, ia toe manatu i le fesili lenei: E faapefea e gaoioiga a se tasi ona aafia pe a le talitonu i le olaga pe a mavae le oti?

Tusi upu Toetu ma le Faamasinoga o ni ulutala i koluma eseese e lua i lau api talaaga mo le suesueina o tusitusiga paia. Ona suesue lea o le Alema 11:41–45, ma vaavaai mo le tele o faamatalaga e te mafai ona maua e faatatau i le toetu ma le faamasinoga, ma tusi mea ua e aoaoina i lalo o ulutala taitasi. Atonu e te manao e tusi i le pito i luga o le laupepa i totonu o lau tusitusiga paia po o i lau api talaaga mo le suesueina o tusitusiga paia: E ala i le Togiola o Iesu Keriso, o le a toetutu uma ma faamasinoina e tusa ai ma a latou galuega. Ua aoao foi e nei fuaiupu e faapea o le toetu o lona uiga o le toe faatasia o o tatou tino ma o tatou agaga i lo latou “foliga atoatoa” ma le “tulaga e tatau ai,” e le toe tuueseeseina (tagai Alema 11:43, 45).
Tali se tasi pe lua o fesili nei, i lau api talaaga mo le suesueina o tusitusiga paia:
1. O a manatu ma lagona ua ia te oe pe a e mafaufau i le uiga o le toetu ma le faamasinoina?
2. E faapefea e lou talitonuga o le a e toetu ma faamasinoina ona aafia ai le auala ua e filifili e te ola ai i aso taitasi?
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Alema 11 ma faamaeaina lenei lesona i le (aso).

Fesili, mafaufauga, ma manatu faaopoopo ou te fia faasoa i lou faiaoga: