Alema 38

Folasaga

Sa auauna atu le atalii o Alema o Sepulona o se faifeautalai i sa Sorama. Ina ua tuanai lenei misiona, sa faaalia e Alema lona olioli i le tumau ma le faatuatua sa faaalia e Sepulona ao puapuagatia i sauaga a sa Sorama. Na molimau atu Alema ia Sepulona i le mana laveai o Iesu Keriso ma apoapoai ia te ia ina ia faaauau pea ona aoao atu le talalelei.

Alema 38:1–3

Ua faaalia e Alema le fiafia i le faatuatua o Sepulona

Faaalu se minute e mafaufau ai i se taimi na lagona ai e ou matua le olioli ona o se faaiuga lelei sa e faia pe sa faia e se tasi o le aiga po o ona o le auala o loo e ola ai i lou olaga.

Ata

o le aiga i le laulau ai

Faitau le Alema 38:1–3, ma vaavaai mo fasifuaitau o loo faamatala ai le lagona o Alema ia Sepulona ma pe aisea. Tusi nisi o fasifuaitau na e maua:

Mai nei fuaiupu ua tatou aoao ai lenei mataupu faavae: : A o amata lo tatou talavou ina ia tumau ma faatuatua i le tausia o poloaiga, e mafai ona tatou aumaia le olioli sili i o tatou matua…

Faaalu se taimi e fesili ai i se tasi o ou matua, tagata tausi, po o se taitati o le Ekalesia pe faapefea e au faaiuga lelei ona aafia ai o ia. Tusi a latou tali i lau api talaaga mo le suesueina o tusitusiga paia.

Alema 38:4–9

Ua molimau Alema i le mana laveai o le Faaola

Na faamanatu atu e Alema ia Sepulona ua laua iloa uma le mana laveai o le Faaola, e ui ina eseese auala. Faitau le Alema 38:4–8,ma faamaea le siata o loo i lalo. Faaaoga foi mea ua e iloa e uiga ia Sepulona mai le Alema 38:2–3 ma mea ua e aoaoina e uiga ia Alema mai isi mataupu i le Tusi a Mamona e fesoasoani ia te oe e faamaea ai le siata.

	Sepulona (Alema 38:2–5)	Alema (Alema 38:6–8)
O le a le mea na laveaiina mai ai o ia?
Na faapefea ona ia maua faamanuiaga o le laveaiina?

Mai aafiaga a Sepulona, tatou te aoao ai: : Afai tatou te talia mea uma ma le onosai ma le talitonu i le Atua, o le a Ia laveaiina i tatou mai tofotofoga, faalavelave, ma puapuaga ma siitia i tatou i le aso mulimuli. Mai aafiaga a Alema ua tatou aoao ai foi: Ina ia maua le faamagaloga o a tatou agasala ma maua le filemu i o tatou agaga, e ao ona tatou faaaoga le faatuatua ia Iesu Keriso ma saili Lona alofa mutimutivale.

Ata

Faatusa o Keriso

Tali le fesili lenei, i lau api talaaga mo le suesueina o tusitusiga paia:
1. O a mea ua e aoao mai le tala ia Sepulona ma Alema e uiga i le mana laveai o le Faaola ia te oe?
2. Filifili se mataupu faavae e tasi o loo faaali atu i le ituaiga faamamafa i le palakalafa muamua, ma tusi ni nai fuaiupu e uiga i le ala e mafai ai ona e faatino lea mataupu faavae i lou olaga.

Faitau le Alema 38:9, ma vaavaai mo mea na manao Alema e aoao e Sepulona. Atonu e te manao e faailoga fasifuaitau o loo i le fuaiupu lea e te lagona o loo otooto ai mea na manao Alema e malamalama ai lona atalii.

Mafaufau e uiga i se taimi na laveaiina ai oe e le mana laveai o le Faaola mai tofotofoga, faalavelave, po o le le agavaa. O le a le mea na e faia e saili ai lena laveai? E i ai ni tofotofoga po o ni agasala i lou olaga i le taimi nei? E mafai faapefea ona e liliu atu i le Faaola mo le lavaeaiina?

Tali le fesili lenei i lau api talaaga mo le suesueina o tusitusiga paia: Aisea e te manatu ai e taua mo oe le iloa ua na o le pau lava le “ala po o ni auala” e mafai ai ona faaolaina ai oe, o le Faaola? (tagai Alema 38:9).

Alema 38:10–15

Ua apoapoai Alema ia Sepulona ina ia faaauau pea le atiaeina o uiga amiotonu

Mafaufau i se faiaoga po o se taitai o le Ekalesia sa i ai sona aafiaga lelei i lou olaga. Mafaufau i uiga o lena tagata e te fiafia i ai.

E pei ona faamaumauina i le Alema 38:10–15, sa uunaia e Alema Sepulona ina ia faaauau pea ona atiae amioga o le a fesoasoani ia te ia a o ia faaauau pea ona aoao atu le talalelei ma auauna atu i isi. O le fautuaga na tuuina atu e Alema ia Sepulona e mafai ona aoga mo soo se tasi e manao e uunaia isi mo se lelei e ala i le auauna atu, faiaoga, ma isi auala. Suesue le Alema 38:10–15, ma faailoa mai soo se fautuaga e te lagona e faapitoa le fesoasoani ia te oe. Atonu e te manao e faailoga mea ua e maua.

O loo mulimuli mai se taiala o suesuega e fesoasoani ia te oe ina ia malamalama atili ma faaaoga fautuaga a Alema i lona atalii o Sepulona (tagai Alema 38:10–15). Mai le koluma i le itu agavale filifili ni vaega se lua pe tolu o le fautuaga a Alema e te lagona o le a sili ona aoga ia te oe. Faamaea gaoioiga talafeagai mo le aoao atu o loo i le koluma i le itu taumatau. Tusi au tali i lau api talaaga mo le suesueina o tusitusiga paia.

Alema 38:10–12 Taiala o Suesuega
Fautuaga a Alema	Gaoioiga o le Aoao Atu
“Ia e filiga ma faautauta i mea uma” (Alema 38:10).	O le tagata e filiga e tuu atu le tumau ma le taumafaiga malosi i taimi o gaoioiga o le olaga. O le tagata e faautauta e faaaoga le faapalepale i mea uma ma faatino le amio pulea. I lau api talaaga mo le suesueina o tusitusiga paia, tusi pe aisea e manaomia ai nei uig e lua pe a auauna atu i isi. Tusi pe faapefea ona sili atu lou filiga po o le faautauta i se tasi pe sili atu o vaega o lou olaga ma le faia ai o le a fesoasoani ia te oe e sili atu ona lelei le auauna atu i isi.
“Vaai ia aua ne’i faafefeteina oe i luga o le faamaualuga; ioe, vaai ia aua ne’i mitamitavale” (Alema 38:11).	Faamaualuga, i tusitusiga paia, pe a tuu e se tagata le talitonu sili ia te ia lava nai lo le Atua. O lona uiga foi o se tagata ua manatu e sili ae o ia nai lo isi. O le faafeagai o le faamaualuga amioletonu o le lotomaualalo. O i latou e lotomaualalo e taumafai e manatu i isi i le auala lava e pei ona latou manatu ai ia i latou lava, ma latou te alolofa i le Atua ma faamuamua o Ia i o latou olaga. Tusi i lau api talaaga mo le suesueina o tusitusiga paia se mea e ono tupu pe a faapea ua faamaualuga ma faafefeteina se tagata o le Ekalesia i lona tofiga. Mafaufau i lou valaauga i le Ekalesia po o se isi avanoa o loo e maua e auauna atu ai. Tusi se auala se tasi pe lua o le a e saili ai ina ia lotomaualalo ma aloese mai le faamaualuga pe mitamitavale a o e auauna atu.
“Faaaoga le lotoa, ae le o le faafiamalosi” (Alema 38:12).	O le lotoa o lona uiga o le mautinoa o loo faatasi le Atua ma i tatou ma e mafai ona fesoasoani ia i tatou e galulue e aunoa ma le fefe i Lana galuega. O le faafiamalosi e mafai ona faauigaina e faapea o le uunai o o tatou talitonuga po o amioga i isi e aunoa ma le malamalama i o latou manaoga ma lagona. I lau api talaaga mo le suesueina o tusitusiga paia, tusi pe aisea ua e manatu ai e finagalo le Alii ina ia tatou lotoa. Faamaumau foi auala faapitoa e mafai ona e faaaogaina ai le fautuaga e faaaoga le lotoa ae le o le faafiamalosi ao e saili e auauna atu i isi.
“Pulea ou tuinanau uma” (Alema 38:12).	O le pulea o lona uiga o le faatonutonu po o le pulea. O le tuinanau o se lagona malosi. Manatunatu loloto i fesili nei ma faamaumau au tali i lau api talaaga mo le suesueina o tusitusiga paia: Aisea e te manatu ai e taua mo i tatou ona pulea o tatou tuinanau —i nisi faaupuga, ia faatonutonu pe pulea a tatou lagona malolosi? E faapefea ona e manatu o le pulea o ou tuinanau e mafai ona fesoasoani ia te oe ina ia faatumulia i le alofa? O le a sau mea e fai e mulimuli ai i le fautuaga a Alema e pulea uma ou tuinanauga?
“Aloese mai le faapaie” (Alema 38:12).	Saili le “Paie, Faapaie” i le Taiala i Tusitusiga Paia (scriptures.lds.org) po o le “Faapaie, Paie, Tagata Paie” i le Taiala Autu e aoao atili ai i le uiga o le paie. Filifili ni fuaiupu se lua o loo lisiina i lalo o lena ulutala, ma suesue i ai. Faamaumau mea ua e aoaoina mai nei fuaiupu i lau api talaaga mo le suesueina o tusitusiga paia. Tusi pe faapefea e le fautuaga e aloese mai le faapaie ona fesoasoani ia te oe ia sili atu le auauna atu i isi. Mulimuli, tusi se auala patino o le a e saili ai le aloese mai le faapaie

O le fautuaga a Alema ia Sepulona i le Alema 38:10–15 o loo aoao ai le mataupu faavae lenei: O le atiaeina o uiga amiotonu e saunia ai i tatou e aoao ma auauna atu i isi. Manatunatu loloto pe faapefea e le atiaeina o uiga amiotonu ua e faitau i ai i le Alema 38 ona mafai ona faamanuia ai lou olaga ma olaga o i latou o loo siomia oe.

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Alema 38 ma faamaeaina lenei lesona i le (aso).

Fesili, mafaufauga, ma manatu faaopoopo ou te fia faasoa i lou faiaoga: