Alema 23–24

Folasaga

Ina ua tuanai lona liua, sa folafola atu e le tupu o sa Lamana le saolotoga e tapuai ai i ona tagata. O lenei folafolaga na mafai ai e Arona ma ona uso ona talai le talalelei ma faatuina le ekalesia i le tele o aai o sa Lamana. E faitau afe sa Lamana na liua ma le toe pauu ese lava. O na sa Lamana o e na liua i le Alii sa osia se feagaiga e faataatitia i lalo a latou auupega o taua. Sa o latou ave i o latou lava luga le igoa o Aneti-Nifae-Liae. Ina ua osofia i latou e sa Lamana e le i liliu mai, o le toatele o Aneti-Nifae-Liae na ositaulaga o latou ola nai lo le solia o a latou feagaiga.

Alema 23

E faitau afe sa Lamana ua liua i le Alii ma suia o latou igoa ia Aneti-Nifae-Liae

I lau api talaaga mo le suesueina o tusitusiga paia, tusi se ata o se foliga fiafia ma se foliga faanoanoa Faaigoa le foliga fiafia Faatuatua ma foliga faanoanoa Le Talafeagai. A o e faitau i le saunoga lenei a Elder Richard G. Scott o le Korama a Aposetolo e Toasfululua, vaavaai mo upu po o fasi fuaiupu o lo o faamatala ai nei ituaiga o tagata e lua. Tusi upu nei po o fasifuaitau i lalo o le ata talafeagai.

“Ua tofu vaaaia e i tatou nisi tagata e faia pea lava pea mea tonu i o latou olaga. E foliga mai e fiafia lava i latou, e sagisagi fiafia foi i le olaga. Pe a oo ina faia ni faaiuga faigata i le olaga, e foliga mai latou te faia lava e le aunoa faaiuga sa’o, tusa lava pe i ai nisi mea e faatosinaina ai i latou. Tatou te iloa e mafai ona latou gauai atu i tofotofoga, ae e foliga mai latou te le ano i ai. E faapena foi ona tatou vaaia isi e le totoa i a latou faaiuga e fai. I se siosiomaga mamana faaleagaga, latou te faia faaiuga o le a latou faia le mea e lelei atu, e suia o latou olaga, e faataatia ese uiga masani leaga. E matua faamaoni lava lo latou naunau e suia, ae e le umi ae toe foi lava i le mea lava lea na tonu ia i latou e lafoai.

O le a le mea e mafua ai le eseesega o olaga o nei ituaiga tagata e lua? E mafai faapefea ona e faia pea lava pea o faaiuga sao? (“O Le Liua Atoa e Aumaia ai le Fiafia,” Liahona, Iulai 2002, 26).

Manatunatu loloto i le ala e te tali atu ai i fesili e lua na fesili ai Elder Scott. A o e suesue i le Alema 23–24, mafaufau e uiga i le mafuaaga e toatele ai tagata o le Ekalesia e tumau i le faatuatua i le talalelei a Iesu Keriso i o latou olaga.

Ina ua tuanai le liliu mai o le tupu o sa Lamana i le talalelei a Iesu Keriso, sa ia auina atu se folafolaga i ona tagata uma, ma sa oo mai se vavega. E faitau afe sa Lamana sa liua foi. Faitau le Alema 23:1–5 e iloa ai le folafolaga ma le ala na oo mai ai le vavega.

Faitau le Alema 23:6–7. E toa fia o le faitau afe o e sa “faaliliuina i le Alii” sa tumau pea ona liua i o latou olaga?

Ina ua uma ona liua nei sa Lamana, na latou mananao e taua i latou i se igoa fou ina ia le toe taua i latou o ni sa Lamana. Faitau le Alema 23:16–18, ma faailoa mai le igoa sa latou filifilia ma faamanuiaga na oo mai ia i latou ona o lo latou faatuatua.

I lau api talaaga mo le suesueina o tusitusiga paia, i lalo o le ata ua faaigoaina o le “Faatuatua,” tusi mea sa e aoaoina mai ia Aneti-Nifae-Liae e uiga i le faatuatua i le Alii i lou olaga atoa.

Tusi le upumoni lenei i au tusitusiga paia po o i lau api talaaga mo le suesueina o tusitusiga paia: O le uiga o le liua o le suiga faaleagaga ma avea o se tagata fou e ala i le mana o le Atua. E faapei ona suia Aneti-Nifae-Liae, afai e te naunau e maua le mana o le Togiola i lou olaga e ala i lou faatuatua ma le salamo, e mafai ona avea oe ma se tagata fou e ala i le mana o le Atua ma tumau ai ona liua i lou olaga atoa.

Toe tagai i fesili e lua a Elder Scott, ona faitau lea o lana tali: “O le liua moni o le fua lea o le faatuatua, salamo, ma le tumau i le usiusitai. O le liua moni o le a malosi atili ai lou tulaga gafatia e faia ai mea e te iloa e tatau ona fai ma le taimi foi e tatau ai ona fai, tusa lava po o a tulaga o i ai. ” (“O Le Liua Atoatoa e Aumaia ai le Fiafia,” 25).

Tali fesili nei i lau api talaaga mo le suesueina o tusitusiga paia: E tusa ai ma Alema 23:18, o sa Lamana na liua mai na amata ona faatamaoaigaina ma fefaauoai ma sa Nifae. A o taumafai tagata e salamo ma suia o latou olaga, aisea e taua ai mo i latou ona fegalegaleai ma isi o e o loo taumafai foi e ola amiotonu?
Suesue upu ua e lisiina i lalo o le ata o le “Faatuatua” i totonu o lau api talaaga mo le suesueina o tusitusiga paia. Mafaufau e uiga i le auala o loo faamatalaina lelei ai e nei upu lou tulaga o le liua. Tusi i lau api talaaga mo le suesueina o tusitusiga paia mea o le a e faia ina ia sili atu ai ona e liua i le Alii.

Alema 24

O le feagaiga a Aneti-Nifae-Liae o le le toe faaaogaina o a latou auupega

E pei ona faamaumauina i le Alema 24:3, na faaee atu e le tupu o sa Lamana le malo i luga o lona atalii a o le i maliu o ia, ma ua ia faaigoa ia te ia o Aneti-Nifae-Liae. Faitau le Alema 24:1–5 ina ia iloa ai le faafitauli e le i pine ae atiae ua mafua ai ona fono Amona ma ona uso ma le tupu. Ina ua amata ona iloa o sa Lamana e le i liua o le a faasaga tau atu ia Aneti-Nifae-Liae, na tonu i nei tagata amiotonu o le a leai sa latou sauniuniga e faia e puipuia ai i latou lava (tagai Alema 24:6 ). Faitau le Alema 24:7–14, ma faailoa mai pe aisea ua faia ai e Aneti-Nifae-Liae lenei faaiuga.

I lau api talaaga mo le suesueina o tusitusiga paia, tusi mea sa e aoao mai ia Aneti-Nifae-Liae e faatatau i le uiga o le tuulafoai ia tatou agasala pe a tatou salamo.

Ata

O Aneti-Nifae-Liae o loo Tanumia a Latou Pelu

Faitau le Alema 24:15–18, ma vaavaai mo mea sa faia e Aneti-Nifae-Liae e faailoa atu ai i le Alii ua latou salamo faamaoni. Aisea ua faalolotoina ai le tanumia e tagata o a latou pelu ma isi auupega i le eleele? (Tagai i le Alema 24:17–18.)

I o tatou lava olaga pe a tatou salamo mai agasala, e ao ona tatou taumafai e aua nei toe faia na agasala. Faitau mea na aoao mai e Peresitene Spencer W. Kimball e uiga i le lafoai o le agasala o se vaega taua o le salamo: “E le mafai e se tasi ona na o le manao mo ni tulaga lelei i le matua lafoaia lea o le agasala. E tatau ia te ia ona faataunuu. …E tatau ona mautinoa lelei e ia e le gata ua ia lafoaia le agasala, ae ua faapea foi ona suia e ia tulaga o loo siosiomia ai le agasala. E tatau ona ia aloese mai nofoaga ma tulaga na tupu mai ai le agasala, aua e mafai foi ona toe tupu mai ai le agasala i ia mea. E tatau ia te ia ona lafoaia tagata o e na latou fai le agasala. E le tatau ia te ia ona ita i tagata na aafia ai, ae peitai e tatau ia te ia ona aloese mai ai faapea ma mea uma na pogai ai le agasala. E tatau ia te ia ona…fausia e ia se olaga fou. E tatau ia te ia ona lafoaia soo se mea lava e toe manatua ai mea na tutupu i aso ua tuanai” (O Le Vavega o le Faamagaloga [1969], 44–45).

I le Alema 24:10–12, faailoga upu po o fasifuaitau e faailoa ai le salamo o Aneti-Nifae-Liae ma le faamagaloga a le Atua i a latou agasala. Tusi le mataupu faavae lenei i le laina e sosoo ma nei fuaiupu: : Afai tatou te faia mea uma e salamo ai, o le a aveesea e le Atua lo tatou tausalaina ma fesoasoani ia tatou tumau i le mama. Toe tagai i le tala ia Aneti-Nifae-Liae o loo tanumia a latou auupega i le palapala. I o tatou aso, e manaomia pea lo tatou “tanumia” o a tatou agasala e faailoa atu ai i le Alii ua tatou faia mea uma e mafai ai ona tatou salamo ma le toe faia le agasala e tasi.

Mafaufau pe faapefea e tagata i le tulaga lenei ona mautinoa o le a latou le toe faia le agasala lava e tasi. Tusi ni ou manatu mo tulaga taitasi i lau api talaaga mo le suesueina o tusitusiga paia:
1. Sa matamata se tasi i se vaega faaponokalafi o se ata ona ua faaosooso e ana uo le tagata e matamata le ata faatasi ma i latou.
2. O se tasi ua soli faalilolilo le Upu o le Poto ma uo ina ua o se vaega faatasi i le po.
3. O se tasi ua faasoa atu tali mai se suega ua maea ma se uo o loo sauni e sue le suega lava lea i se taimi mulimuli o le aso.

Manatunatu loloto i le fesili lenei: O le a le mea e te manaomia e “tanumia” i lou olaga ina ia le faaosoosoina oe e fai agasala ua e salamo mai ai?

Faitau le Alema 24:19–22 e iloa ai mea na fai e Aneti-Nifae-Liae ina ua faasagatau mai sa Lamana ia te i latou. Sa faaalia e nei tagata lo latou tuuto i le Alii e ala lea i le naunau e maliliu nai lo le solia o se folafolaga sa latou faia i le Alii. Sa tuuina atu atoa o latou ola i le Alii, ma sa latou tutumau atoatoa i le faatuatua ia te Ia i o latou olaga.

Faitau mea na aoao atu e Peresitene Ezra Taft Benson e uiga i le tuuina atu o o tatou ola i le Alii:

“E liua tagata aua o Keriso o le taitai. E pei i latou o Paulo o le a latou fesili, ‘Le Alii e, se a le mea e te finagalo ou te faia?’ (Galuega 9:6.) …

“O lo latou loto e tusa lea ma Lona finagalo. (Tagai i le Ioane 5:30.)

“Latou te faia e le aunoa mea na e fiafia i ai le Alii. (Tagai i le Ioane 8:29.)

“E le gata ina oti i latou oti mo le Alii, a o le mea pito taua e latou te fia ola foi mo Ia.

“E te ulu atu i o latou fale, e faailoa mai i ata e i puipui o o latou fale, tusi i a latou fatatusi, a latou musika e faalogoina, a latou upu ma galuega, o i latou o ni Kerisiano.

“Latou te tutu o ni molimau i le Atua i taimi uma, i mea uma, ma nofoaga uma. (Tagai Mosaea 18:9.)

“E i ai Keriso i o latou mafaufau, e pei ona latou vaai atu ia te Ia i manatunatuga uma (Tagai MF&F 6:36.)

“E i ai Keriso i o latou loto e pei ona tuuina atu lo latou alofa ia te Ia e faavavau. (Tagai Alema 37:36).” (“Fanauina i la le Atua,” Liahona, Ian. 1986, 2–3).

Tali fesili lenei i lau api talaaga mo le suesueina o tusitusiga paia: I le faagasologa o lenei vaiaso, o a nisi o auala e mafai ona e faaalia ai ua e tuuina atu atoa lou olaga i le Alii?

Faitau le Alema 24:23–27, o loo faamatala ai uiga faaalia a sa Lamana ina ua latou vaai atu ua le faasagatau mai ia Aneti-Nifae-Liae. A o e faitau, saili ia upu po o fasifuaitau e aoao ai lenei mataupu faavae: : E ala i le faatuatua i le Alii, e mafai ona tatou fesoasoani i isi ia liliu mai. Mafaufau e uiga i le ala e mafai ai e se tagata faapitoa o lou e aiga po o ni uo faapitoa ona uunaia e ala i lau faaiuga e faatuatua i le Alii.

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Alema 23–24 ma faamaeaina lenei lesona i le (aso).

Fesili, mafaufauga, ma manatu faaopoopo ou te fia faasoa i lou faiaoga: