Iunite 18: Aso 3
Alema 31
Folasaga
Na iloa e Alema o se vaega o tagata faatuiese o sa Nifae ua taua o sa sa Sorama ua se ese mai le upumoni o le talalelei. Ona o le faanoanoa i nei lipoti o le amioleaga, sa ave e Alema isi ma ia e aoao atu i sa Sorama le afioga a le Atua. Sa latou molimauina sauniga tapuai o le liliuese ma le faamaualuga o sa Sorama. Sa tatalo faatauanau Alema ina ia maua e ia ma ona soa le filemu ma le manuia i le toe faafoi mai o sa Sorama i le Alii.
Alema 31:1–7
Sa talai atu e Alema ma ona soa le afioga a le Atua i tagata liliuese o sa Sorama
Vaai faalemafaufau faapea e i ai sau uo po o se tagata o le aiga ua amata ona se ese mai le talalelei pe e le o ola atoatoa i le talalelei e pei ona ia tatau ai. Mafaufau i tali o fesili nei:
-
O le a se mea e mafai ona e faia e fesoasoani ai i lenei tagata e toe foi mai ai i le Ekalesia ma ia naunau e tausia poloaiga?
-
O ai e te ono liliu atu i ai mo se fesoasoani i le taulimaina o le faafitauli ma le le malamalama o lenei tagata?
O lenei lesona o loo faamamafa ai le ala na taumafai ai Alema ma isi e fesoasoani i se vaega o tagata o e na se ese mai le upumoni o le talalelei. Faitau le Alema 31:1–2. O le a se lagona na oo ia Alema ina ua ia faalogo i mea na faia e sa Sorama?
Faitau le Alema 31:3–4, ma iloa ai le ala ua amata ai ona matatau sa Nifae ona o gaoioiga a sa Sorama.
I le mafaufau ai i mea sa e aoaoina i le faagasologa o lau suesuega o le Tusi a Mamona, o le a sou manatu o le a fesoasoani e faamalosia ai sa Sorama ina ia salamo ma toe foi i le upumoni o le talalelei? Faitau le Alema 31:5, ma faailoa mai mea na iloa e Alema o le a sili atu ona aoga e toe aumaia ai sa Sorama.
-
I lau api talaaga mo le suesueina o tusitusiga paia, tusi i lalo pe aisea e te manatu ai o le afioga a le Atua e sili atu le mamana i le fesoasoani i tagata ina ia suia nai lo le faaaoga o le faamalosi po o seisi mea.
Manatunatu loloto i le faamatalaga lenei mai ia Peresitene Boyd K. Packer, o le Peresitene o le Korama a le Toasefululua, e uiga i le mana o le afioga a le Atua:
“O aoaoga faavae moni, e malamalama i ai, e suia ai uiga ma amioga.
“O le suesue i mataupu o le talalelei e vave ona faaleleia ai le amio nai lo le suesue i ala e faalelei ai le amio. O le mafaufau i amio leaga e tau atu i le faia o amio leaga. O le ala lea ua matou faamamafa ai le suesue i aoaoga faavae o le talalelei” (“Fanau Iti,” Liahona, Ian. 1987, 18).
E faavae i luga o le Alema 31:5 ma le saunoaga a Peresitene Packer, faamaea le mataupu faavae lenei: A o ou suesue i le afioga a le Atua, o le a taitaiina au i le .
Faatasi ai ma isi tulaga, e mafai ona e faamaea le mataupu faavae o loo i luga i le auala lenei: A o ou suesue i le afioga a le Atua, o le a taitaiina atu au e fai le mea tonu.
-
Alema 31:8–23
Sa tatalo ma tapuai sa Sorama i le auala sese
O Alema ma le isi toafitu sa o atu e talai le afioga a le Atua ia sa Sorama. Ina ua latou taunuu atu, sa latou iloa ai sa Sorama o loo tapuai i le Atua i se auala ofoofogia. O le a le mea e oo mai i le mafaufau pe a e mafaufau i le upu tapuai?
O le tapuai e faatatau i le auala e faaali ai lo tatou alolofa, faaaloalo, ma le tuuto mo le Atua. O le tapuaiga e masani ona aofia ai gaoioiga e pei o le tatalo, anapogi, ma le auai i sauniga o le ekalesia. Ae peitai, o le tapuaiga moni e aofia ai i taimi uma le loto. Faitau le Alema 31:8–11, ma faailoa mai ma faailoga upu ma fasifuaitau o loo faamatala ai le tapuaiga a sa Sorama.
Atonu e fesoasoani le iloa o “tu o le ekalesia” (Alema 31:10) e faatatau i “sauniga,” e pei o le ositaulaga na manaomia i lena taimi o se vaega o le tulafono a Mose po o le faamanatuga i o tatou aso. Atonu e te manao e faailoga i le Alema 31:10 se tasi o mafuaaga e ao ai ona tatou tapuai ma tatalo i aso uma.
Mafaufau e tusi lenei mataupu faavae i le laina o lau tusitusiga paia i talaane o le Alema 31:9–11: O a tatou taumafaiga i aso taitasi e tatalo ma tausia poloaiga e puipuia ai i tatou mai faaosoosoga.
Sa faamamafa mai e Elder Rulon G. Craven, a o auauna o se uso o le Fitugafulu, le taua o le tapuai o le tagata lava ia i aso uma e avea o se puipuiga mai faaosoosoga ma mea sese: I tausaga ua mavae atu sa talosagaina ai a’u i nisi taimi, e le Au Uso, matou te fono ma ni tagata ua salamo o le Ekalesia ma faatalanoaina i latou mo le toefuataiina o o latou faamanuiaga o le malumalu. O se aafiaga ootia faaleagaga lava lena mea i taimi, le toefuataiina o faamanuiaga a na tagata lelei, ua salamo. Sa ou fai atu le fesili i nisi o i latou, ‘O le a se mea na tupu i lou olaga na aveesea ai lou igoa i se taimi le tumau, mai pepa faamaumau o le Ekalesia? Ma mata e tumu i loimata latou te tali mai: ‘Ou te lei usitai i mataupu faavae o le talalelei: o le tatalo, alu i le lotu e le aunoa, auauna i le Ekalesia ma suesue i le talalelei. Ona ou faamatuu atu lea i faaosoosoga ma aveesea ai le taitaiga a le Agaga Paia” (“O Faaosoosoga,” Liahona, Iulai 1996, 91).
E faapefea e le saunoaga a Elder Craven ona lagolagoina le upumoni o loo maua i le Alema 31:9–11?
Faitau le Alema 31:12–23, ma vaai faalemafaufau pe o le a faapei le faalogo atu i sa Sorama o tatalo mai lo latou olo. Mafaufau i tali o nei fesili:
-
O a ni popolega e ono i ai ia te oe pe a afai e te faalogo i se tasi o tatalo i lenei tulaga?
-
O a nisi o aoaoga faavae sese sa taulotoina e sa Sorama i a latou tatalo?
-
O a ni a latou uiga agai i isi tagata? (Ia matau le aofaiga o taimi e faaali mai ai ia upu matou ma tatou i tatalo a sa Sorama.)
Ina ua maea ona toe fai e tagata taitoatasi le tatalo lava e tasi, “sa latou foi atu i o latou fale, e le toe tautatala e uiga i lo latou Atua seia oo ina latou toe faapotopoto faatasi i latou lava i le pulelaa paia” (Alema 31:23).
-
-
O a nisi o tulaga lamatia o le tapuaiga, tatalo, ma le talanoa e uiga i le Atua e na o le faa tasi i le vaiaso?
-
O a nisi o auala e mafai ai ona tatou tapuai i le Atua i le faasologa o le vaiaso?
-
O la tatou amio e taua foi a o tatou tapuai. Faitau le saunoaga lenei mai ia Elder Dallin H. Oaks o le Korama a Aposetolo e Toasefululua e uiga i le ala e aafia ai e la tatou amio a tatou tapuaiga:
“O le tapuaiga e tele ina aofia ai gaoioiga, ae o le tapuaiga moni e aofia ai se uiga faaalia faapitoa o le mafaufau.
“O le uiga faaalia o le tapuaiga e faaosofia ai i tatou i lagona loloto o le faatuatuaina, faaaloalogia, ma le maofa. O le tapuaiga e tuufaatasia ai le alofa ma le migao i se tulaga tuuto ma e aveina atu o tatou agaga ia latalata atu i le Atua” (Pure in Heart [1988], 125).
-
Alema 31:24–38
Ua tatalo Alema mo se malosi ma le manuia mo faifeautalai i le toe aumaia o sa Sorama i le Alii
Ina ua tuanai le molimauina o le liliuese a sa Sorama, sa tatalo atu Alema i le Alii. Faitau le Alema 31:30–35, ma vaavaai pe faapefea ona eseese le tatalo a Alema ma le tatalo a sa Sorama.
-
Faitau le Alema 31:36–38, ma vaavaai mo faamanuiaga na oo mai ia Alema ma ona soa a o latou maua faamanuiaga faaleperisitua ma le folafolaina o le talalelei. Ia matau o le fasifuaitau “sa pati e ia ona lima i luga o i latou uma” (Alema 30:36) o loo faasino i le faaee atu o lima.
O aafiaga a Alema ma ana soa ua aoao mai ai le mataupu faavae lenei: Afai tatou te tatalo ma galulue i le faatuatua, ona tatou maua ai lea o le fesoasoani paia i o tatou tofotofoga.
Ina ua maea lana tatalo, sa faatinoina e Alema ma ona soa lo latou faatuatua e ala i le galue ma talitonu i le Alii e foai mai mo i latou ao latou auauna atu ia te Ia ma Lana fanau. Vaavaai mo ni auala e mafai ai ona e mulimuli i faataitaiga a Alema o le tatalo i le faatuatua.
-
Ua ou suesueina le Alema 31 ma faamaeaina lenei lesona i le (aso).
Fesili, mafaufauga, ma manatu faaopoopo ou te fia faasoa i lou faiaoga: