Alema 37

Folasaga

E pei ona faamaumauina i le Alema 37, sa faaauau e Alema lana apoapoaiga i lona atalii o Helamana ma tuuina atu ia te ia le tausia o talafaamaumau paia. Sa ia faamanatu ia Helamana o tusitusiga paia ua uma ona avea ma auala e aumaia ai le faitau afe o sa Lamana i le Alii, ma sa ia valoia o loo i ai i le Alii isi faamoemoega mo talafaamaumau i le lumanai. Na faatonuina e Alema lona atalii i mea e ao ona ia aoao atu i tagata, ma ia aoao Helamana i le taua o le vaai atu i afioga a Iesu Keriso mo le taitaiga e ala i le faatusatusaina o afioga a le Faaola i le Liahona.

Alema 37

Sa faatuatuaina e Alema ia Helamana e tausia talafaamaumau, ma apoapoai ia te ia e tausi poloaiga, ma faamanatu ia te ia le ala e galueaiina ai le Liahona e tusa ai ma le faatuatua

Mafaufau i le ata lenei:

Mafaufau i ni mea laiti ma le faatauvaa se lua pe tolu ua suia ai le lalolagi, e pei o le matauila. Mafaufau i ni mea laiti ua faia se eseesega mo le manuia o lou olaga. Tusi nei mea laiti e lua i le itu tauagavale o le ata o loo i luga. I le itu taumatau, tusi ni nai upu e faamatala ai aafiaga tetele na aumaia e nei mea laiti i lou olaga.

E pei ona faamaumauina i le Alema 37, na saunia e Alema lona atalii o Helamana e avea ma le isi tausimea o talafaamaumau paia. Na aoao e Alema Helamana i se mataupu faavae e uiga i le matafaioi o mea laiti ma faatauvaa i le fuafuaga a le Alii. Faitau le Alema 37:6–7, ona faamaea lea o le mataupu faavae lenei: Ina ia faataunuu ai Lona faamoemoega e faavavau, e galue le Alii i le .

Faitau le Alema 37:1–7, ma vaavaai mo mea na faamatala e Alema o ni mea laiti ma faatauvaa. Suesue foi le Alema 37:8–10, ma vaavaai mo auala na taitaia ai e papatusi apamemea (lea o loo i ai tusitusiga paia) i mea tetele mo tagata o le Tusi a Mamona. A o e faitau, faailoga i lau tusitusiga paia po o fea o nei faamanuiaga ua e maua foi e ala i au lava suesuega o tusitusiga paia.

Tali fesili lenei i lau api talaaga mo le suesueina o tusitusiga paia: O a ni auala se lua pe tolu ua i ai i tusitusiga paia na mafua ai ona tutupu mea tetele i lou olaga?

Alema 37:13–16 o loo faamaumau ai le apoapoaiga a Alema ia Helamana a o ia tuuina atu i lona atalii e tausia talafaamaumau. Suesue i fuaiupu nei, ma vaavaai mo mataupu faavae sa aoao atu e Alema. O se tasi o nei mataupu faavae o le: Afai tatou te usiusitai i poloaiga a le Alii, o le a manuia i tatou. Manatunatu loloto pe faapefea e lenei mataupu faavae ona fesootai ma le ata o loo i le amataga o le lesona.

E pei ona faamaumauina i le Alema 37:35–47, na faatonuina e Alema Helamana e aoao atu tagata ina ia manumalo i le amioleaga ma faaosoosoga e ala i le faatuatua i le Alii o Iesu Keriso. I lalo ifo o ni faasologa o lesona e lua o loo i ai nei aoaoga. Suesue lesona taitasi ma mau o loo i ai. Ona sauni lea e aoao atu se tasi o lesona i se tagata o le aiga, o lou aiga atoa (e mafai ona avea o se vaega o le lesona o le afiafi faaleaiga), po o se uo. Atonu e te manao e faia ni fetuunaiga i le lesona e faalagolago po o ai [e te aoaoina] ma po o fea e te aoao atu ai. Faatulaga se taimi, ma aoao atu le lesona i le aso faatulagaina. Aumai foi le faasologa o lau lesona i le isi vasega e suesue i le fale ma ia saunia, pe a valaauina, e aoao atu lau lesona i le vasega.

Lesson 1—Alema 37:35–37

Faamatala ia i latou o loo e aoaoina e masani ia i latou e toto laau ia nonoa pe fusi le laau laiitiiti i se fasi laau ona aveese lea o le lagolago i se taimi pe a matua le laau. Fesili: Aisea e te mafaufau ai e manaomia e se laau se pine mo se lagolago a o itiiti ma o loo ola?

Faitau le aafiaga lenei mai le soifuaga o Peresitene Gordon B. Hinckley:

Sa toto e Peresitene Gordon B. Hinckley se laau laitiiti i tafatafa o lona fale ina ua faatoa faaipoipo o ia. Sa ia le amanaia tele i le gasologa o tausaga. I se tasi aso na ia vaaia ai ua le tino lelei ma ua lo’u agai i sisifo ona o matagi mai sasae na pio ai le laau a o itiiti ma vaivai. Sa ia alu atu i fafo ma tau uunai e faatu sa’o, ae sa mafiafia tele le ogalaau. Sa ia taumafai e faaaoga se maea ma toso e faasa’o ai, ae sa le gaoioi. Mulimuli ane, na ia aumaia lana ili ma ili ese lala tetele sa i le itu i sisifo, lea sa mailoga ai se ma’ila mataga. Sa ia faapea mai mulimuli ane e uiga i le laau:

“Ua sili atu nei i le afa seneturi talu ona ou totoina lena laau. O loo nonofo i le taimi nei lou afafine ma lona aiga i le fale lena. O le tasi aso na ou toe vaai ai atu i le laau. Ua telē lava. Ua sili atu le lelei o ona foliga. Ua aoga tele fo’i i le fale. A e sa faigata lava lona laitiiti ma saua tele le mea na ou faia e faasa’o ai.

“I le taimi muamua na toto ai, sa na o se manoa pu’upu’u lava sa manaomia e nonoa faasa’o ai mai le matagi. Sa mafai ma sa tatau ona ou maua mai lena manoa e aunoa ma se galuega tele. Peitai sa ou le faia, ma o lea na falala sese ai le laau i le matagi na taia ai” (“A’oa’o Oa i le Tama e Tusa ma Lona Ala,” Liahona, Ian. 1994, 68).

Fai i se tasi e faitau le apoapoaiga a Alema ia Helamana i le Alema 37:35, ma talanoa pe faapefea e lenei fuaiupu ona fesootai ma le aafiaga a Peresitene Hinckley ma le laau. (Alema 37:35 o se fuaitau o le mau tauloto. Atonu e te manao e faailogaina i se auala e iloa gofie ai ina ia mafai ona e mauaina i le lumanai.)

Valaau i latou o loo e aoao atu e tau mai se mataupu faavae o loo otooto ai le Alema 37:35. (E mafai ona avea ma se mea faapenei: E ao ona tatou aoao i lo tatou talavou e tausi i poloaiga a le Atua. Atonu e te manao e fai atu se fesili se tasi pe sili atu o fesili nei:

O le a se eseesega e te manatu e oo i olaga o tagata pe a latou aoao e tausi i poloaiga a le Atua a o itiiti i latou?
E faapefea e le tausia o poloaiga a o e talavou ona faia se eseesega mo oe?
E mafai ona e mafaufau i se tasi sa faamanuiaina i lona olaga atoa ona ua ia aoao e usiusitai i poloaiga a o itiiti? Sa faapefea ona faamanuiaina lenei tagata?

Fai atu i se tasi e faitau leotele le Alema 37:36–37 ma vaavaai mo apoapoaiga faapitoa e mafai ona fesoasoani i se tagata e tausi ia poloaiga. Fai atu fesili e pei o nei:

E faapefea e le mulimuli i lenei apoapoaiga i aso uma ona fesoasoani ia te oe e tausi poloaiga?
O a auala e te taumafai ai e faamuamua le Alii i ou manatu ma gaoioiga? E faapefea ona e faaleleia?
O a folafolaga ua tuuina atu ia i latou o e tatalo?

Faasoa atu lau molimau e uiga i le pe faapefea e le fefautuai ma le Alii ona fesoasoani ia te oe e tausi poloaiga. Valaaulia i latou o loo e aoaoina e mulimuli i upu a Alema i le fefautuai ma le Alii

Lesona 2—Alema 37:38–45

Fesili ia i latou o loo e aoaoina pe latou te iloa le igoa o le tapasa na tuuina atu e le Alii i le aiga o Liae lea sa fesoasoani ia i latou e faimalaga atu ai i le nuu o le folafolaga. Ona fai atu lea i se tasi e faitau le Alema 37:38. Faamatala na faatatau Alema i le Liahona e aoao atu ai ia Helamana se mataupu faavae taua e tusa ai ma le auala e taitaiina ai e le Alii Lana fanau.

Ia tuu atu ia i latou o loo e aoaoina e tali mai i fesili nei e ala i le faitauina o fuaiupu o loo taua ma saili mo le tali.

E tusa ai ma Alema 37:38–40, na faapefea ona galue le Liahona?
E tusa ai ma le Alema 37:41–42, aisea na le ola ai le Liahona i nisi o taimi?
E tusa ai ma le Alema 37:43–45, e faapefea ona faapei le Liahona o afioga a Keriso?

Faamatala atu o upu o le ata ma le ituaiga (Alema 37:43, 45) o le uiga o se mea ua faaaogaina o se faatusa o se manatu e sili atu. Mo se faataitaiga, o le usiusitai po o le le usiusitai o le aiga o Liae i faatonuga o le Liahona o se faailoga o a tatou filifiliga e usiusitai pe le usiusitai i afioga a Keriso. E faapei ona taunuu atu le aiga o Liae i le nuu o le folafolaga e ala i le mulimuli i le Liahona, o le a tatou maua le ola e faavavau pe a tatou mulimuli i afioga a Keriso.

Fesili i se tasi e faamatala po o fea tatou te maua ai afioga a Iesu Keriso i o tatou olaga. (O nisi o tali talafeagai atonu o tusitusiga paia, saunoaga a perofeta o aso nei, o se faamanuiaga faapeteriaka, ma musumusuga a le Agaga.)

Fesili: O a mataupu faavae sa aoaoina atu e Alema ia Helamana e faaaoga ai le faataitaiga o le Liahona? (O tali atonu e faapei o le mataupu faavae lenei: Afai tatou te faalogo i afioga a Iesu Keriso, o le a latou taitai i tatou ia maua le ola e faavavau.) Atonu e te manao e faasoa atu lau molimau o le faalogo ma le usiusitai i afioga a le Alii o le a aumaia ai faamanuiaga sili i o tatou olaga.

I lau api talaaga mo le suesueina o tusitusiga paia, tusi ni nai fuaiupu e faamatala ai mea sa e aoaoina mai le suesueina o le lesona ua e filifili e aoao atu.
Tusi le mea lenei i lau api talaaga mo le suesueina o tusitusiga paia: Ua ou filifili e aoao atu lau lesona i le Alema 37: (tusi pe o le fea fuaiupu o le a e aoao atu). O le a ou aoao atu (tusi po o ai ua e filifilia e aoao atu) i le (tusi le aso ua e fuafuaina e aoao ai lenei lesona).

Mau Tauloto—Alema 37:35

Faailoga Alema 37:35. Taumafai e tauloto le fuaiupu lea. Ona tauloto lea pe faitau atu i se matua po o se tasi tagata matua faatuatuaina. Fesili atu i lenei tagata fesili nei:

E faapefea e le usiusitai i poloaiga a le Atua ona fesoasoani ia te oe i lou olaga?
O a ni fautuaga o ia te oe mo au e fesoasoani ai ina ia sili lou atamai i lou talavou?

Tusi i lau api talaaga mo le suesueina o tusitusiga paia mea na e aoaoina mai le tagata sa e talanoa i ai e uiga ia Alema 37:35.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Alema 37 ma faamaeaina lenei lesona i le (aso).

Fesili, mafaufauga, ma manatu faaopoopo ou te fia faasoa i lou faiaoga: