Iunite 20: Aso 4

Alema 43–44

Folasaga

I le Alema 43–44, na amata e Mamona ona tusi e uiga i taua i le va o sa Lamana ma sa Nifae. A o faaauau ona auauna atu Alema ma ona atalii i tagata, sa tuufaatasi sa Sorama ma le autau a sa Lamana e osofaia ia sa Nifae. Sa faaali e le Taitaiau o Moronae le faatuatua ma le poto i le puipuia o sa Nifae mai le autau a sa Lamana. E ui ina toaitiiti i latou, o sauniuniga a le autau a sa Nifae ma lo latou faatuatua ia Iesu Keriso na tuuina atu ia i latou le manuia i le taua. Ina ua latou iloa o le a faatoilaloina i latou, sa faia e sa Lamana se feagaiga o le filemu ma tuua le laueleele mo se vaitaimi.

Alema 43

O sauniuniga ma fuafuaga a le Taitaiau o Moronae na fesoasoani e faalavelave i mamanu a le vaega’au a sa Lamana

1. I lau api talaaga mo le suesueina o tusitusiga paia, tusi se lisi o nisi o au fuafuaga, sini, ma naunautaiga mo le lumanai. A o e tusi, mafaufau e faaaofia ai sini faaleagaga ma naunautaiga, e pei o se misiona, faaipoipoga i le malumalu, ma le aiga.

A maea ona e tusia lau lisi, faailoa mai naunautaiga ma sini ua e lagona e le manao Satani e te ausia. A o e suesue le Alema 43–44,vaavaai mo mataupu faavae o le a fesoasoani ia te oe e ausia ai au sini amiotonu e ui i taumafaiga a le fili e taofia lou faamanuiaina.

I le Alema 43:1–4, e ui i taumafaiga a Alema e toe aumai sa Sorama i le Ekalesia, o le toatele o i latou ua faatasi atu ma sa Lamana i la latou sauniuniga e osofaia sa Nifae. Faitau le Alema 43:5–8, ma faailoa mai le “fuafuaga” a le taitai o sa Lamana o Sera’emina. Atonu e te manao e faailoga ia faamoemoega o Sera’emina e pei ona e iloa. Manatunatu loloto pe faapefea e fuafuaga po o naunautaiga a Sera’emina mo sa Nifae ona faapei o fuafuaga e ono i ai ia Satani mo oe.

Sosoo ai ma le faitauina o le Alema 43:9–11, ma faailoa mai le fuafuaga po o naunautaiga o sa Nifae. Manatunatu loloto nei pe mafai faapefea e nei naunautaiga ona faapei o naunautaiga amiotonu o loo ia te oe.

O le Taitaiau o Moronae, o le taitaiau sili o autau a sa Nifae, na saunia ona tagata e puipuia o latou fanua ma aiga mai le faamoemoega leaga o Sera’emina. Faitau le Alema 43:16–19, ma vaavaai mo a sauniuniga na faia e le Taitaiau o Moronae ma sa Nifae.

2. I lau api talaaga mo le suesueina o tusitusiga paia, tusi ni mea se lua na tuuina atu e Moronae i ana alii e saunia ai i latou mo le taua.

Ia faitau nei le Alema 43:20–22 ina ia iloa ai le ala na tali atu ai sa Lamana i sauniuniga a sa Nifae. Manatunatu loloto pe aisea na solomuli ai sa Lamana e ui ina sa toatele atu i loo sa Nifae.

A o tatou suesue tala o taua faaletino i le Tusi a Mamona, e mafai ona tatou faatusatusaina i latou i taua faaleagaga o loo feagai mai tatou.

3. Tali fesili nei i lau api talaaga mo le suesueina o tusitusiga paia: O a mea e mafai ona e aoao mai i sauniuniga a Moronae mo le taua e tusa ai ma le puipuiina o oe lava mai osofaiga a Satani ma faaosoosoga?

Ina ua tuanai le solomuli o sa Lamana, sa leiloa e Moronae po o fea o le a toe osofai mai ai ona fili. Ana o oe o Moronae, o le a se mea e te ono faia e taumafai ai e saunia mo se isi osofaiga?

Faitau le Alema 43:23–24 ia maua ai le mea sa faia e Moronae.

Mai le faataitaiga a Moronae ua tatou aoao ai: : Afai tatou te saili ma mulimuli i fautuaga faaperofeta, o le a sili ona tatou iloa ona puipuia i tatou lava e tetee atu ai i le fili. E pei ona mafai e le perofeta o Alema ona tau atu ia Moronae le auala e puipuia ai sa Nifae mai o latou fili, o perofeta a le Alii o aso nei ua latou aoao i tatou i le auala e puipuia ai i tatou lava mai osofaiga faaleagaga a le fili.

4. I lau api talaaga mo le suesueina o tusitusiga paia, tusi ni nai fuaiupu e uiga i le fautuaga faaperofeta ua tuuina atu i aso e gata ai ma, pe a e faalogo i ai, e mafai ona fesoasoani ia te oe e puipuia oe lava mai fuafuaga ma faaosoosoga a Satani.

E pei ona faamaumauina i le Alema 43:25–43, sa galue Moronae i le malamalama na ia maua mai le perofeta e ala i le vaevaeina o lana au tau ma lalafi solo i le auala a sa Lamana o loo o mai. A o latalata mai sa Lamana, o le afa o le vaegaau a sa Nifae ua osofai ma uunai atu sa Lamana i le vaitafe o Saitonu Ina ua sopoia e sa Lamana le vaitafe, o le isi afa o le au tau a sa Nifae na osofaia. Ina ua iloa e sa Lamana ua siosiomia i latou, sa o latou tau malosi tele ma sa amata ona faavaivai sa Nifae.

E mafai ona e aoao mataupu faavae e uiga i le ausia o au sini ma naunautaiga amiotonu mai le suesueina o le vaega o totoe o le Alema 43. Faitau le Alema 43:43–54, ma faatusatusa le punavai o le malosi mo sa Lamana ma sa Nifae.

Manatunatu loloto e uiga i le sili atu o le mafuaaga na tau ai sa Nifae nai lo le mafuaaga na tau ai sa Lamana. A o tatou faatusatusa Moronae ma lana vaegaau faamaoni i o tatou taua ma le fili, ua tatou aoao ai pe a tatou tatalo mo se fesoasoani i le faataunuuina o a tatou fuafuaga ma naunautaiga amiotonu, o le a fesoasoani mai le Atua ia i tatou e faataunuuina ia mea.

5. I lau api talaaga mo le suesueina o tusitusiga paia, tusi e faatatau i se taimi sa e maua ai le fesoasoani a le Alii i le faataunuuina o au sini amiotonu.

Alema 44

Ina ua tuanai le manumalo o sa Nifae, na faatonuina e le Taitaiau o Moronae ia sa Lamana e fai se feagaiga o le filemu

Toe manatua i le Alema 43 ina ua iloa e le Taitaiau o Moronae ua siomia ia sa Lamana ma ua matatau, sa ia faatonuina ana vaegaau e faamuta le taua. Faitau upu a Moronae i le Alema 44:1–6, ma vaavaai mo le tagata na ave i ai e Moronae le faafetai faapitoa ona o le manumalo o sa Nifae.

6. E tusa ai ma le molimau a Moronae i le Alema 44:4–6, tusi se upumoni i lau api talaaga mo le suesueina o tusitusiga paia e mafai ona fesoasoani ia te oe e feagai ai ma au taua faaleagaga.

Na folafola atu e Peresitene Boyd K. Packer, Peresitene o le Korama a Aposetolo e Toasefululua i le autalavou o le a puipuia i latou e le Atua pe a latou tutumau i le faatuatua. A o e faitau i ana upu, faailoga vaega na e faamafanafana ia te oe ma e te lagona e aoga ia te oe.

“O le autalavou o aso nei ua ola ae i teritori a le fili faatasi ma se faaitiitia o tulaga faatonuina o le ola mama. Ae i le avea ai ma auauna a le Alii, ou te folafola atu o le a puipuia outou ma leoleoina mai osofaiga a le fili pe afai o le a outou faalogo atu i uunaiga ia e sau mai le Agaga Paia.

“Oofu i laei talafeagai, tautala ma le faaaloalo, faalogologo i musika musuia. Aloese mai le ola le mama ma faatinoga leaga patino uma. Ia e puleaina lou olaga ma poloaiina oe lava ia ina ia faamaoni. Talu ai matou te faalagolago tele atu ia te outou, o le a matua faamanuiaina lava outou. E le o tuuaunoaina lava outou e le silafaga a lo outou Tama Faalelagi agaalofa ” (“Fautuaga i le Autalavou,” Ensign po o le Liahona, Nov. 2011, 18).

I le Alema 44:7–10, na folafola e Sera’emina e le talitonu o ia o le Atua o le punavai o le malosi o sa Nifae. Na ia ofo atu e tuuese auupega a sa Lamana, ae sa ia le manao e faia se feagaiga o le filemu. Faitau le tali a Moronae i le Alema 44:11. Mafaufau pe aisea ua e manatu ai e taua ia Moronae ona fai e sa Lamana se feagaiga o le filemu.

E ui o le toatele o sa Lamana ua osia se feagaiga o le filemu, sa faapotopoto e Sera’emina i latou sa totoe e tau ma vaegaau a Moronae. A o feosofi atu sa Nifae i luga o sa Lamana ma amata ona fasiotia i latou, sa iloa e Sera’emina ua le taofia le faatamaia o lana vaegaau ma folafola atu o le a osia se feagaiga o le filemu (tagai Alema 44:12–20).

7. I lau api talaaga mo le suesueina o tusitusiga paia, tusi pe faapefea ona e faaaogaina nisi o mataupu faavae ma upumoni ua e aoaoina i lenei lesona e puipuia ai oe lava mai faaosoosoga ma osofaiga a le fili ma faataunuuina ai ou naunautaiga ma sini amiotonu.

8. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

   Ua ou suesueina le Alema 43–44 ma faamaeaina lenei lesona i le (aso).

   Fesili, mafaufauga, ma manatu faaopoopo ou te fia faasoa i lou faiaoga: