‘Iuniti 2: ‘Aho 2
1 Nīfai 2
Talateú
‘Oku tali ‘e he kakaí ‘a e fakahā mei he ‘Otuá ‘i ha ngaahi founga kehekehe. Naʻe fekauʻi ‘e he ʻEikí ‘a Līhai ‘i ha misi ke ‘ave hono fāmilí ki he feituʻu maomaonganoá. Naʻe lāunga ‘a Leimana mo Lēmiuela koeʻuhí ko e ngaahi fekau ‘a e ‘Otuá, ka naʻe fekumi ‘a Nīfai ia ke ne maʻu ha fakamoʻoni fakapapau ki ai. ‘E tokonʻi koe ‘e hano fakafehoanaki ‘a ‘enau ngaahi tali kehekehé, ke ke fakakaukauʻi ‘a e founga te ke ngāue ʻaki ai hoʻo tauʻatāina ke filí ‘i hoʻo tali ‘a e fakahinohino mei he ‘Eikí.
1 Nīfai 2:1–7
‘Oku fekau ‘e he ‘Otuá kia Līhai ke mavahe ki he feituʻu maomaonganoá
Fakakaukauloto ko Līhai koe pea ‘oku kole atu ‘a e ʻEikí ke ke mavahe mo ho fāmilí pea tuku homou ‘apí mo hoʻomou ngaahi meʻa kotoa pē. Kuo pau ke mou lue lalo ‘i ha ngaahi ‘aho pea ko e ngaahi meʻa pē ke feau ‘aki ‘a e ngaahi fie maʻu ‘a homou fāmilí te mou lava ‘o ‘avé.\ Fakakaukau ki ha founga te ke tali ʻaki ki ha kole pehē.
Lau ‘a e 1 Nīfai 2:1–6, pea kumi ki he ngaahi tūkunga naʻe tupu ai ‘a e mavahe ‘a Līhai mo hono fāmilí ki he feituʻu maomaonganoá.
Ko e hā ‘a e ‘uhinga naʻe feinga ai ‘a e kakaí “ke toʻo ‘a ‘ene [Līhai] moʻuí”? (vakai, 1 Nīfai 2:1).
Ko e hā ‘a e meʻa naʻe fekau ‘e he ‘Eikí kia Līhai ke ne faí? (vakai, 1 Nīfai 2:2).
‘Oku hoko ‘a Līhai ko ha sīpinga ‘o e tefitoʻi moʻoni ‘o e ongoongoleleí ‘oku pehē, ko e taimi ko ia ‘oku tau tui faivelenga mo talangofua aí, ‘e tokoniʻi kitautolu ‘e he ‘Eikí ‘i he ngaahi taimi ‘o e faingataʻá.
-
Tali ‘i hoʻo tohinoa ki he ako folofolá ‘a e fehuʻi ko ‘eni ‘oku kau ki he 1 Nīfai 2:4: Ko e hā ha meʻa te ke ako mei he ngaahi meʻa ne fili ‘e Līhai ke ‘avé mo e meʻa ke tukú?
Vakai ki he mape ‘i he ngataʻanga ‘o e lēsoní, ke tokoni atu ke mahino ange ʻa e fonua naʻe fononga ai ‘a Līhaí.
Lau ‘a e 1 Nīfai 2:7, pea fakatokangaʻi ‘a e meʻa naʻe fai ‘e Līhai hili ‘ene mavahe mo hono fāmilí ke fononga ki he feituʻu maomaonganoá. Ko e hā ha meʻa te ke ngāue ʻaki ke fakamatalaʻi ha ‘ulungaanga mahuʻinga naʻe fakahā ‘e Līhai?
1 Nīfai 2:8–14
‘Oku lāunga ‘a Leimana mo Lēmiuela koeʻuhí ko ‘ena tamaí
Naʻe fai ‘e he ngaahi foha kotoa ‘e toko fā ‘o Līhaí ‘a e fononga tatau, ka naʻa nau fai ia ‘i ha ngaahi tōʻonga fakakaukau kehekehe ki he ngaahi fekau ‘a e ‘Otuá.
‘Ako ‘a e 1 Nīfai 2:8–10, pea siakaleʻi ‘a e ongo foʻi lea ko e vaitafé mo e teleʻá.
-
Lau ‘a e 1 Nīfai 2:11–14, pea kumi ki he ngaahi ‘uhinga naʻe lāunga ai ‘a Leimana mo Lēmiuela koeʻuhí ko ‘ena tamaí. (Fakatokangaʻi ange: Ko e ‘uhinga ‘o e kia-kekevá ko e loto fefeka mo e loto hīkisia.)
Ko e taha ‘o e ngaahi ‘uhinga ‘oku poupouʻi ai ‘e Sētane ‘a e lāungá ke taʻofi ‘a e kakaí ke ‘oua te nau muimui ki he kau palōfita moʻuí, kau taki fakalaumālié, mo e mātuʻá. Naʻe lea ‘a ‘Eletā H. Losi Uokamani ‘o e Kau Fitungofulú ‘o kau ki he lāungá. Naʻá ne pehē, ‘oku “kau ki he lāungá ha sitepu ‘e tolu, ‘a ia ‘oku nau takitaha fononga hifo kotoa pē ‘i he hala ki he talangataʻá.
‘Uluakí, ko e taimi ‘oku lāunga ai ‘a e kakaí, ‘oku nau ngāue ʻaki ‘enau fakamaau pē ‘anautolu pea nau kamata ke fehuʻia ‘a e ngaahi akonaki ‘a e kau palōfita moʻuí. “ʻOku nau ‘uluaki [fehuʻi] ‘i honau ‘atamaí, hili iá pea nau [fakatō] ‘a e ngaahi fehuʻí ‘i he ‘atamai ‘o e kakai kehé.
Uá, ko kinautolu ‘oku lāungá ‘oku nau kamata “ke fakaʻuhingaʻi pea fakaʻataʻatā kinautolu ke ‘oua te nau fai ‘a e meʻa [kuo] fakahinohinoʻi kinautolu ke nau faí. … Ko ia, ‘oku nau [fokotuʻu] ai ha ‘uhinga ke nau talangataʻa.
“ʻOku hoko mai leva ai ‘a e sitepu hono tolú: ko e fakapikopiko ‘i he tauhi ‘o e fekau ‘a e ‘Eikí [vakai, T&F 58:29]. …
“ʻOku ou fakaafeʻi kimoutolu ke mou tokanga taha ki he ngaahi fekau ʻa e palōfita moʻuí ʻa ia ʻokú ke hohaʻa lahi taha ki aí. ʻOkú ke fehuʻi pe ʻoku ʻi ai nai hano kaunga kiate koe? ʻOkú ke kumi nai ha ngaahi ʻuhinga ke ʻoua naʻá ke fai ai ʻa e fekaú? ʻOkú ke ongoʻi taʻe fiemālie pe ʻiteʻita nai ʻi he niʻihi ko ia ʻoku nau fakamanatu atu kiate koe ʻa e fekaú? ʻOkú ke fakapikopiko nai ʻi hono tauhi iá? Tokanga ki he olopoto ʻa e filí. (ʻi he Conference Report, Oct. 2001, 104–6; pe Liahona, Sānuali 2002, 98–100). (“Beware of Murmuring,” Ensign, Nov. 2001, 85–86).
-
1 Nīfai 2:16–19
‘Oku kumi ‘e Nīfai ke maʻu ha ‘ilo mei he ‘Eikí
Lau ‘a e 1 Nīfai 2:16, 19, pea fakaʻilongaʻi ‘a e meʻa naʻe fie maʻu ‘e Nīfaí mo e meʻa naʻá ne fai ‘o tuʻunga ai ‘ene tali ‘a e ngaahi fekau ‘a e ‘Eikí ‘a ia kuo fai mai ‘i heʻene tamaí. Neongo naʻe ‘ikai lāunga ‘a Nīfai, ka ke fakalaulauloto ki he meʻa naʻá ne tohi ‘i he 1 Nīfai 2:16 ‘o kau ki hono fakamolū ‘e he ‘Eikí ‘a hono lotó, ‘o hangē ai foki naʻe faingataʻa kiate ia ‘a e ‘amanaki ke nau mavahe mei Selusalemá.
-
‘Oku akoʻi mai kiate kitautolu ‘e he ngaahi meʻa naʻe hoko kia Nīfaí ‘a e tefitoʻi moʻoni ko ʻeni ‘o e ongoongoleleí: ʻOku fakamolū hotau lotó ‘i he taimi ‘oku tau ui ai ki he ‘Otuá, ke tau tui ki Heʻene ngaahi folofolá.
Lau ‘a e 1 Nīfai 2:17–18, pea feinga ke ‘iloʻi ‘a e ngaahi holi mo e ngaahi meʻa naʻe fai ‘e Nīfai hili hono fakamolū ‘e he ‘Eikí ‘a hono lotó. Fakakaukau ki ha meʻa te ke lava ʻo ako mei he ngaahi tali kehekehe ‘a Nīfai, Samu, Leimana, mo Lēmiuelá. Ko ha foʻi moʻoni mahuʻinga ‘eni ‘e taha: Ko e taimi ko ia ʻoku tau vahevahe atu ai ‘a e meʻa kuo tau ako ‘i he Laumālie Māʻoniʻoní, ‘e tui ‘a e kakai kehé ki heʻetau ngaahi leá.
-
Fakakaukau ki ha taha te ke lava ‘o vahevahe ki ai ha meʻa naʻe tokoniʻi koe ‘e he Laumālié ke ako mo ongoʻi ʻoku moʻoni. ‘E lava ke kau ai haʻo kaungāmeʻa, mēmipa ‘o ho fāmilí, takimuʻa ‘i he Siasí, pe ko ha faiako. Ngāue ʻaki ha faingamālie he uiké ni ke talanoa ai mo e tokotaha ko iá pea vahevahe ange e fakamoʻoni ko iá.
1 Nīfai 2:20–24
ʻOku fakapapauʻi ange ʻe he ʻEikí kia Nīfai te ne tuʻumālie koeʻuhí ko ʻene talangofuá
Kumi ke ‘iloʻi mo fakaʻilongaʻi ‘a e ngaahi talaʻofa ‘oku fai mai ‘i he 1 Nīfai 2:20–21. ‘Oku tuʻo 34 hono fai mai ‘a e talaʻofa ko ‘ení ‘i he Tohi ‘a Molomoná. Lolotonga hoʻo ako ki he Tohi ‘a Molomoná te ke vakai ai ki he anga hono fakahoko ‘a e ngaahi folofola kotoa ‘a e ‘Eikí kia Nīfaí. Fakaʻosi ‘a e lēsoni ‘o e ‘aho ní ‘aki haʻo lau ‘a e 1 Nīfai 2:22–24.
’Oku tāpuakiʻi ‘e he ‘Otuá ‘a kinautolu ‘oku talangofua mo faivelengá. Fakalaulauloto ki he tuʻunga hoʻo talangofuá ‘i hono tauhi ‘o e ngaahi fekau ‘a e ‘Otuá. Ko e hā ha founga ‘e taha te ke lava ‘o talangofua ange ai? Feinga ke ke muimui ki he ngaahi ueʻi ‘okú ke maʻu mei he Laumālié.
-
Kuó u ako ‘a e 1 Nīfai 2 peá u fakakakato ‘a e lēsoni ko ‘ení ‘i he (‘ahó).
Ko e ngaahi fehuʻi, fakakaukau, mo e ngaahi mahino makehe ‘oku ou fie vahevahe mo ʻeku faiakó: