Talateu ki he Ngaahi Lea ‘a Molomoná

Ko e hā Hono ʻUhinga ʻOku Ako ai e Tohí Ni?

‘I hoʻo ako ‘a e Ngaahi Lea ‘a Molomoná, te ke lava ‘o fakatupulaki hoʻo tui “ʻoku ‘afioʻi ‘e he ‘Eikí ‘a e meʻa kotoa pē” ʻi he (Ngaahi Lea ‘a Molomoná 1:7) pea ‘okú Ne tataki ‘Ene kau tamaioʻeikí ke nau fakahoko ‘Ene ngaahi taumuʻá. Koeʻuhí ko ha fakamatala fakahisitōlia ‘eni, ‘oku hoko ai ‘a e tohí ni ko ha fehokotakiʻanga ‘o e ʻū lauʻi peleti iiki ‘a Nīfaí (1 Nīfai–‘Amenai) mo hono fakanounouʻi ‘e Molomona ‘a e ʻū lauʻi peleti lalahi ‘a Nīfaí (Mōsaia–4 Nīfai). ‘E lava ‘e he Ngaahi Lea ‘a Molomoná ‘o tokoni ke mahino lahi ange kiate koe ‘a e ngaahi lekooti naʻe fakanounouʻi ‘e Molomoná ‘i heʻene fakatahaʻi ‘a e Tohi ‘a Molomoná. ‘Oku toe fakaʻaliʻali mai foki ai kiate koe ‘a e tui mo e ngaahi lavameʻa ‘a e Tuʻi ko Penisimaní.

Ko Hai Naʻá Ne Tohi ʻa e Tohí Ni?

Naʻe hiki ‘e Molomona ‘a e tohi ko ‘ení. Ko ha palōfita, tangata tauhi lekooti, mo e tokotaha naʻá ne fakanounouʻi mo fakatahatahaʻi ‘a e konga lahi ‘o e Tohi ‘a Molomoná. ‘Oku tauhingoa kiate ia ‘a e Tohi ‘a Molomoná. Naʻá ne toe hoko foki ko ha seniale Nīfai mo ha tamai māʻoniʻoni. Ko hono foha ‘a e palōfita ko Molonaí.

Ko e Fē e Taimi mo e Feituʻu Ne Tohi Aí?

Naʻe hiki ‘e Molomona ‘a e tohi ko ‘ení ‘i he taʻu 385 T.S. nai, hili ‘ene “mamata … ki he meimei fakaʻauha kakato ‘o … [hono] kakaí, ko e kau Nīfaí” (Ngaahi Lea ‘a Molomoná 1:1). Naʻe ‘ikai tohi ‘e Molomona ‘a e feituʻu naʻá ne ‘i aí ‘i he taimi naʻá ne hiki ai ‘a e tohi ko ‘ení.