Talateu ki he 4 Nīfaí
Ko e hā ‘Oku Ako ai e Tohí Ni?
Te ke fakamoʻoniʻi ‘i hoʻo ako ‘a e 4 Nīfaí ‘a e ngaahi tāpuaki ‘oku maʻu ‘e he kakai ‘oku nau faaitaha ‘i hono moʻui ʻaki ʻa e ongoongolelei ‘o Sīsū Kalaisí. ‘Oku fakahā mai ‘e he tohí naʻe ului kotoa ʻa e kakai ‘i he fonuá lolotonga ‘a e ngāue ‘a e Fakamoʻuí ‘i honau lotolotongá. Koeʻuhi ko ‘enau talangofua ki he ngaahi fekaú, naʻa nau fiefia ai ‘i he melino, maʻu koloa, mo ha ngaahi tāpuaki fakalaumālie fakaofo. Naʻe pehē ‘e Molomona, “Pea ko e moʻoni ‘oku ‘ikai lava ke ‘i ai ha kakai ‘oku lahi hake ‘enau fiefiá ‘i he kakai kotoa pē kuo fakatupu ‘e he toʻukupu ‘o e ‘Otuá” (4 Nīfai 1:16). Te ke toe ako foki ha ngaahi lēsoni mahuʻinga mei he taimi naʻe kamata ai ke fakaʻauʻauhifo ‘a e kakai ko ‘ení ki ha tuʻunga ‘o e fuʻu fai angahala lahi.
Ko Hai Naʻá Ne Hiki e Tohí Ni?
Naʻe fakatahatahaʻi mo hiki fakanounouʻi ‘e Molomona ‘a e ngaahi lekooti ‘a ha kau tangata tohi ‘e toko fā kehe ‘o maʻu ai ‘a e tohi 4 Nīfaí. Ko e ‘uluaki ‘i he kau tangata tohi ko iá ko Nīfai, ‘a ia ‘oku ui ‘a e tohí ‘i hono hingoá. Ko Nīfai ko ‘ení ko e foha ia ‘o Nīfai ‘a ia ko e toko taha ‘o e kau ākonga ‘e toko 12 naʻe fili ‘e he ‘Eikí lolotonga ‘Ene ngāue ‘i he lotolotonga ‘o e ngaahi hako ‘o Līhaí (vakai, 3 Nīfaí 11:18–22; 12:1). Ko e kau tangata tohi ‘e tolu kehé ko ‘Āmosi, ko e foha ‘o Nīfaí, mo ‘Āmosi ko e foha ‘o ‘Āmosí, mo ‘Emaloni ko e tokoua ‘o ‘Āmosí (vakai, 4 Nīfaí 1:19, 21, 47).
Naʻe Tohi Ia ‘Anefē pea ‘i Fē?
‘Oku hangehangē naʻe hiki ‘a e ngaahi ʻuluaki lekooti naʻe maʻu mei ai ‘a e 4 Nīfaí ‘i he vahaʻa ‘o e taʻu T.S. 34 mo e T.S. 321. Naʻe fakanounouʻi ‘e Molomona ‘a e ngaahi lekooti ko iá ‘i he vahaʻa ‘o e taʻu T.S. 345 mo e T.S. 385. Naʻe ‘ikai tohi ‘e Molomona ‘a e feituʻu naʻá ne ‘i aí ‘i he taimi naʻá ne fakanounouʻi ai ‘a e tohí ni.