Talateu KIA Mōsaiá
Ko e hā Hono ʻUhinga ʻOku Ako ai e Tohí Ni?
Te ke lau ‘i hoʻo ako ki he tohi ‘a Mōsaiá ha ngaahi fakamoʻoni mālohi ki he misiona ‘o Sīsū Kalaisí. Te ke toe ako foki ‘o kau ki ha kakai naʻe fakahaofi ‘e he ‘Eikí mei he nofo pōpula ki he angahalá mo e ngaohikoviʻi fakasinó. Ko e meʻa foki ‘e tahá, te ke toe ako ki he founga ne hanga ai ‘e he ngaahi ngāue māʻoniʻoni ‘a ha niʻihi fakatāutaha hangē ko e Tuʻi ko Penisimaní, ‘Apinetai, mo ‘Alamā ‘o ‘omi ha ngaahi tāpuaki fakaofo ki ha niʻihi kehe. Ka ‘i he tafaʻaki ‘e tahá, te ke sio ki he anga hono ‘omi ‘e he ngaahi fili taʻe totonu ‘a ha niʻihi fakataautaha hangē ko Sēnifi mo hono foha ko e Tuʻi ko Noá, ha ngaahi nunuʻa fakamamahi kiate kinautolu mo honau kakaí.
Ko Hai Naʻá Ne Tohi ʻa e Tohí Ni?
Naʻe fakatahatahaʻi mo fakanounouʻi ‘e Molomona ‘a e ngaahi lekooti ‘a ha kau tangata tohi kehe ‘o maʻu ai ‘a e tohi ‘a Mōsaiá. ‘Oku fakahingoa ‘a e tohí kia Mōsaia, ‘a ia ko e foha ‘o e Tuʻi ko Penisimaní. Ko ha palōfita, tangata kikite, tangata maʻu fakahā mo e tuʻi ‘a Mōsaia ‘a ia naʻe pule ‘i Seilahemala mei he taʻu 124 ki he taʻu 91 K.M.nai. Naʻe fakahingoa ia ki heʻene kui ko Mōsaiá, ‘a ia naʻá ne hoko foki ko ha tuʻi ‘i Seilahemala (vakai, ʻAmenai 1:12–13, 19).
Naʻe toʻo ‘e Molomona ha ngaahi fakamatala mei ha ngaahi lekooti kehe ‘o faʻu mei ai ‘a e tohi ‘a Mōsaiá. Naʻá ne fakanounouʻi pea toʻo ha ngaahi lea mei he lekooti naʻe tauhi ‘e Mōsaia ‘i he ʻū lauʻi peleti lalahi ‘a Nīfaí, ‘a ia ‘oku fakamatalaʻi fakaikiiki ai ‘a e hisitōlia ‘o e kau Nīfaí ‘i he fonua ko Seilahemalá (vakai, Mōsaia 1–7; 25–29). Naʻá ne toʻo foki mei he lekooti ‘a Sēnifí, ‘a ia ‘oku fakamatalaʻi ai ‘a e hisitōlia ‘o e kakai ‘o Sēnifí mei he taimi naʻa nau ‘alu atu ai mei Seilahemalá ‘o aʻu ki heʻenau toe foki maí (vakai, Mōsaia 7–22). Naʻe ngāue ʻaki foki ‘e Molomona ‘a e ngaahi lea mo fakanounouʻi ha ngaahi konga ‘o e ngaahi tohi ‘a ‘Alamaá, ‘a ia naʻá ne fakatolonga mai ‘a e ngaahi lea ‘a ‘Apinetaí (vakai, Mōsaia 17:4) peá ne tauhi ha lekooti ‘o hono kakai ‘oʻoná (vakai, Mōsaia 18; 23–24).
Ko e Fē e Taimi mo e Feituʻu Ne Tohi Aí?
‘Oku ngalingali naʻe tohi ‘a e ngaahi ‘uluaki fakamatala naʻe ngāue ʻaki ki hono hiki ‘o e tohi ‘a Mōsaiá, ‘i he vahaʻa ‘o e taʻu 200 K.M. mo e taʻu 91 K.M. Naʻe fakanounouʻi ‘e Molomona ‘a e ngaahi lekooti ko ‘ení ‘i he vahaʻa ‘o e taʻu 345 mo e 385 T.S. . Naʻe ‘ikai tohi ‘e Molomona ‘a e feituʻu naʻá ne ‘i aí ‘i he taimi naʻá ne hiki ai ‘a e tohi ko ‘ení.