Talateu ki he 3 Nīfaí
Ko e hā ‘a e ‘Uhinga ki Hono Ako ‘o e Tohi ko ‘Ení?
Te ke ako ‘i hoʻo ako ‘a e 3 Nifaí, ‘o kau ki he ngaahi folofola mo e ngaahi ngāue ‘a e Fakamoʻuí lolotonga ‘Ene ngāue fakafaifekau ‘i he lotolotonga ‘o e kakai ‘o e Tohi ʻa Molomoná. ‘Oku faʻa pehē ‘e he kau taki ‘o e Siasí ko e 3 Nīfaí ko e Kosipeli ia hono nima ‘a hotau ‘Eikí, koeʻuhí, he ‘oku hangē ia ko e Kosipeli ‘e fā ‘o e Fuakava Foʻoú, ‘oku fakamamafaʻi ai ‘a e ngaahi akonaki tonu mo e ngāue fakafaifekau ‘a hotau ‘Eiki ko Sīsū Kalaisí (vakai ki he Gordon B. Hinckley, “The Cornerstones of Our Faith,” Ensign, Nov. 1984, 52). Naʻe akoʻi ‘e Palesiteni ‘Ēsela Tafi Penisoni ‘oku ‘i he “3 Nīfaí ha niʻihi ‘o e ngaahi potu folofola fakalotomāfana mo mālohi taha ‘i he ngaahi folofolá kotoa. ‘Oku fakamoʻoni ia kia Sīsū Kalaisi, mo ʻEne kau palōfitá, mo e ngaahi tokāteline ‘o e fakamoʻuí” (“The Savior’s Visit to America,” Ensign, May 1987, 6). ‘I hoʻo vakai ki hono fakahā ‘e Sīsū Kalaisi ‘Ene ‘ofa mamahi ki he kakaí “taki taha” (3 Nīfai 11:15; 17:21), ‘e lava ‘o mahino lelei ange ai kiate koe ‘Ene tokanga mai kiate koe fakataautahá. Te ke toe lava foki ‘o ako ha ngaahi lēsoni mahuʻinga ‘i hoʻo fakatokangaʻi ‘a e anga ‘o e teuteuʻi ‘e ha kakai ‘e niʻihi ‘a kinautolu ke nau feʻiloaki mo e Fakamoʻuí kae taʻofi ‘e ha niʻihi ia ‘a kinautolu ke ‘oua te nau aʻusia ha ngaahi tāpuaki fakaofo.
Ko Hai Naʻá Ne Tohi ‘a e Tohi Ko ‘Ení?
Naʻe fakanounouʻi ‘e Molomona ‘a e ngaahi lekooti mei he ngaahi peleti lalahi ‘a Nīfaí ke maʻu mei ai ‘a e tohi 3 Nīfaí. ‘Oku ui ‘a e tohí kia Nīfai, ‘a ia ko e foha ‘o Nīfai, ‘a ia naʻe fai ‘ene ngaahi ngāué ‘i he ngaahi vahaʻataimi ki muʻa, lolotonga, mo e hili ‘a e ngaahi hā mai ‘a e Fakamoʻuí ki he kakaí. Naʻe ngāue ‘a Nīfai “‘i he mālohi mo e fuʻu mafai lahi” (3 Nīfai 7:17) lolotonga ‘a e taimi ‘o e fuʻu fai angahala lahi ki muʻa ‘i he ngaahi ‘aʻahi mai ‘a Sīsū Kalaisí. Ka ne hoko ‘a e ngāue fakafaifekau ia ‘a Nīfaí ko ha talateu pē ki he ngāue fakafaifekau ‘a Sīsū Kalaisí, ‘a ia naʻe hoko ‘Ene ngaahi folofolá mo e ngaahi ngāué ko e tefitoʻi meʻa ‘oku fakamamafaʻi ‘e he 3 Nīfaí. Naʻe tānaki mai ‘e Molomona ‘i heʻene fakanounouʻi ‘a e lekooti ‘a Nīfaí ‘a ‘ene fakamatala pē ‘aʻana mo ‘ene fakamoʻoni ki he tohi ko ‘ení (vakai ki he 3 Nīfai 5:8–26; 26:6–12; 29–30).
Naʻe Tohi Ia ‘Anefē pea ‘i Fē?
‘Oku ngalingali naʻe tohi ‘a e ngaahi lekooti naʻe ngāue ʻaki ‘o maʻu mei ai ‘a e tohi 3 Nīfaí ‘i he vahaʻa ‘o e taʻu 1 K.M. mo e 34 K.M. Naʻe fakanounouʻi ‘e Molomona ‘a e ngaahi lekooti ko ‘ení ‘i he vahaʻa ‘o e taʻu T.S. 345 mo e T.S. 385. Naʻe ‘ikai tohi ‘e Molomona ‘a e feituʻu naʻá ne ‘i ai ‘i he taimi naʻá ne fakatahatahaʻi ai ‘a e tohi ko ‘ení.