Talateu kia ʻEta
Ko e hā ‘a e ‘Uhinga Hono Ako ‘o e Tohi ko ‘Ení?
Te ke ‘ilo ‘i hoʻo ako ‘a e tohi ‘a ‘Etá ki he kau Sēletí—‘a ia ko ha kulupu ‘o e kakai naʻa nau fononga ki he Hemisifia Hihifó ‘o nau nofo ai ‘i ha ngaahi senituli lahi ki muʻa pea toki aʻu mai ki ai ‘a e kakai ‘o Līhaí. ‘E tokoniʻi koe ‘e he tohi ko ‘ení ke ke ako ha ngaahi tefitoʻi moʻoni mahuʻinga fekauʻaki mo e lotú, fakahaá, mo e fekauʻaki ‘a e tui kia Sīsū Kalaisí mo hono maʻu ha ‘ilo fakalaumālié. ‘E toe tokoni foki ke mahino kiate koe ‘a e fatongia ‘o e kau palōfitá ‘i hono fakalotoʻi ‘o e kakaí ke nau fakatomalá mo e ngaahi nunuʻa ‘oku hoko mai kiate kinautolu ‘oku nau fakafisinga ‘a Sīsū Kalaisi mo ‘Ene kau palōfitá.
Ko Hai Naʻá Ne Tohi ‘a e Tohi Ko ‘Ení?
Naʻe fakanounouʻi ‘e Molonai ‘a e tohi ko ‘ení mei he ʻū lauʻi peleti koula ‘e 24 ko ia naʻe ui ko e ʻū lauʻi peleti ‘a ‘Etá, ‘a ia ko e palōfita fakaʻosi ia ‘o e kau Sēletí pea faʻu mei ai ha lekooti ‘o honau hisitōliá (vakai, ’Eta 15:33–34). Naʻe maʻu ‘i he ngaahi ‘aho ‘o e Tuʻi ko Mōsaiá ‘a e ʻū lauʻi peleti ‘a ‘Etá ‘e ha kau tangata ‘o e kakai ‘o Limihaí ‘i heʻenau kumi ki he fonua ko Seilahemalá (vakai, Mōsaia 8:7–11; ʻEta 1:2). Naʻe tauhi mai ‘e he kau palōfita mo e kau tangata tauhi lekooti Nīfai ‘a e ʻū lauʻi peleti ‘a ‘Etá ‘o aʻu mai kia Molonai. Naʻe pehē ‘e Molonai kuo ‘ikai te ne fakakau ha “vahe teau ‘e taha” ‘o e lekōtí ‘i heʻene fakanounouʻí (’Eta 15:33).
Naʻe Tohi Ia ‘Anefē pea ‘i Fē?
Naʻe tohi ‘a e ngaahi ‘uluaki lekooti naʻe faʻu mei ai ‘a e tohi ‘a ‘Etá ‘i ha ngaahi senituli ki muʻa pea toki fai ‘e Molonai ‘ene fakanounouʻí. Naʻe kamata hono tohi ‘o e ʻuluaki lekooti ‘o e kau Sēletí ‘i he taimi naʻe tohi ai ‘e he tokoua ‘o Sēletí ‘a e meʻa-hā-mai naʻá ne mamata ki ai ki muʻa pea folau atu ‘a hono kakaí ‘i he ngaahi tahí (vakai, ’Eta 4:1). Naʻe ‘ikai ke ‘i ai ha lau ki ha kau tauhi lekooti kehe ‘i he kau Sēletí ka ko ‘Eta pē (vakai ki he ʻEta 13:3; 15:33). Naʻe fakanounouʻi ‘e Molonai ‘a e tohi ‘a ‘Etá (vakai, Molomona 8:3–6; Molonai 10:1). Naʻe ‘ikai fakahā ‘e Molonai ‘a e feituʻu naʻá ne ‘i ai ‘i he taimi naʻá ne fai ai hono fakanounouʻí, neongo naʻá ne tohi ‘o pehē naʻe fakaʻauha ‘a e kau Sēletí ‘i he funga ‘o e “fonua tokelaú ni” (’Eta 1:1), ‘o hangē ai naʻá ne ‘i he fonua naʻe fakaʻauha ai kinautolú.