Talateu ki he 2 Nīfai
Ko e hā Hono ʻUhinga ʻOku Ako ai e Tohí ni?
‘E tokoni e tohi 2 Nīfaí ke mahino kiate koe ‘a e ngaahi tefitoʻi moʻoni mahuʻinga ‘o e ongoongoleleí, hangē ko e Hinga ‘a ‘Ātama mo ‘Iví, ko e Fakelelei ‘a Sīsū Kalaisí, mo e tauʻatāina ke filí. Ko e meʻa ‘e tahá, ʻoku fonu ‘a e tohi ko ‘ení ‘i he ngaahi kikite ‘a Nīfai, Sēkope mo ‘Īsaia, ‘a ia naʻa nau hoko ko e kau fakamoʻoni makehe ki he Fakamoʻuí. Naʻa nau kikiteʻi hono Fakafoki Mai ‘o e ongoongoleleí ‘i he ngaahi ‘aho kimui ní, ko e tānaki e kakai ‘o e fuakava ‘o e ‘Otuá, ko e Hāʻele ‘Angaua Mai ‘a Sīsū Kalaisí mo e Nofo Tuʻí. ‘Oku kau foki ‘i he tohi 2 Nīfaí hono fakamatalaʻi ‘e Nīfai ‘a e tokāteline ‘a Kalaisí pea fakaʻosi ‘aki ‘a e fakamoʻoni ‘a Nīfai ki he Fakamoʻuí.
Ko Hai Naʻá Ne Tohi ʻa e Tohí ni?
Naʻe tohi ‘e Nīfai, ko e foha ‘o Līhaí, ‘a e tohi 2 Nīfaí. Ko ha palōfita ‘a Nīfai mo e ‘uluaki takimuʻa māʻongoʻonga ia ‘o e kakai Nīfaí. ‘Oku fakahā mai ‘e he ngaahi meʻa naʻá ne tohí, naʻá ne maʻu ‘a e mālohi ‘o e ‘Eikí ki he huhuʻí (vakai, 2 Nīfai 4:15–35; 33:6) peá ne holi ‘i hono laumālié kotoa ke ‘omi ‘a e fakamoʻuí ki hono kakaí (vakai, 2 Nīfai 33:3–4). Naʻá ne langa ha temipale pea akoʻi hono kakaí ke nau tui kia Sīsū Kalaisi koeʻuhí ke fakahoko ‘ene taumuʻa ko ʻení.
Ko e Fē e Taimi mo e Feituʻu Ne Tohi Aí?
Naʻe kamata tohi ‘e Nīfai ‘a e fakamatala ko ia ‘oku hoko ko e 2 Nīfai ‘i he taʻu 570 K.M. nai—‘a ia ko ha taʻu ia ‘e 30 hili ‘ene mavahe mo hono fāmilí mei Selusalemá (vakai, 2 Nīfai 5:28–31). Naʻá ne tohi ia ‘i he taimi naʻá ne ‘i he fonua ko Nīfaí (vakai, 2 Nīfai 5:8, 28–34).