Talateu kia ʻAmenaí
Ko e hā Hono ʻUhinga ʻOku Ako ai e Tohí Ni?
Te ke ‘iloʻi ‘i hoʻo ako ‘a e tohi ‘a ‘Amenaí, naʻe maluʻi ‘e he ‘Eikí ‘a e kau Nīfai māʻoniʻoní, peá Ne taki kinautolu ki he fonua ko Seilahemalá (vakai, ʻAmenai 1:7, 12–13). ‘Oku toe fakamatala foki ‘a e tohi ‘a ‘Amenaí ki ha ngaahi falukunga kakai kehe—ko e kau Mūlekí (pe kakai ‘o Seilahemalá) mo e kau Sēletí, ‘a ia naʻe tataki mai ‘e he ‘Eikí ki he fonua ‘o e talaʻofá.
Ko Hai Naʻá Ne Tohi ʻa e Tohí Ni?
Naʻe hiki ‘a e tohi ‘a ‘Amenaí ‘e ha kau tangata kehekehe ‘e toko nima: ko ‘Amenai, ‘Amalone, Kēmisi, ‘Apinatomi, mo ‘Amalekai. Ko ‘Amenaí ko e foha ia ‘o Seilomi pea ko e mokopuna tolu ia ‘o Līhai mo Selaia. Naʻe fakamatalaʻi ‘e ‘Amenai ko ha “tangata fai angahala” ia, ‘a ia kuo “ʻikai te ne tauhi … ‘a e ngaahi fekau ‘a e ‘Eikí” (ʻAmenai 1:2). Naʻe tānaki mai ‘e ‘Amalone (foha ‘o ‘Amenaí), Kēmisi (tokoua ‘o ‘Amaloné), mo ‘Apinatomi (foha ‘o Kēmisí) ha ngaahi fakamatala nounou. Naʻe hiki ‘e ‘Amalekai ko e foha ‘o ‘Apinatomí ‘a e konga lahi ‘o e tohi ‘a Amenaí pea ko ia naʻe tohi fakaʻosi ‘i he ʻū lauʻi peleti iiki ‘a Nīfaí. Naʻá ne tuku ‘a e ʻū lauʻi peletí ki he Tuʻi ko Penisimaní.
Ko e Fē e Taimi mo e Feituʻu Ne Tohi Aí?
Naʻe hiki ‘e he kau hiki tohi kehekehe ‘o e tohi ‘a ‘Amenaí ‘i he vahaʻa ‘o e taʻu 361 K.M. mo e taʻu 130 K.M. Naʻe hiki ia ‘e he ‘uluaki toko faá ‘i he fonua ko Nīfaí. Naʻe hiki ‘e ‘Amalekai ‘ene lekōtí ‘i he fonua ko Seilahemalá.