Talateu ki he 1 Nīfaí
Ko e hā ‘a e ‘Uhinga ki Hono Ako ‘o e Tohi ko ‘Ení?
ʻI hoʻo ako ‘a e 1 Nīfaí, te ke ʻiloʻi “kuo fili ‘e he ‘Eikí ‘a ‘ene ngaahi ‘aloʻofa ongongofuá, koeʻuhí ko ‘enau tuí, ke fakaiviʻi ‘a kinautlu ‘o a’u ki heʻenau maʻu ‘a e mālohi” (1 Nīfai 1:20). Hangē ko ‘ení, te ke vakai ki he anga hono tokoniʻi ‘e he ‘Otuá ‘a Nīfai ke ne maʻu ‘a e ʻū lauʻi peleti palasá koeʻuhí ke lava ʻe hono fāmilí ‘o maʻu ‘a e ngaahi folofolá, mo e founga hono fakahaofi ‘e he ‘Otuá ‘a Nīfai mei he ngaahi fakamanamana fakaesino ki heʻene moʻuí, mo e founga hono fakahaofi ‘e he ‘Otua ‘a Līhai mo hono kakaí mei he honge ‘i he feituʻu maomaonganoá mo e fakaʻauha ‘i he tahí, pea haofaki kinautolu ‘o nau aʻu lelei ki he fonua ‘o e talaʻofá.
Naʻe aʻusia ‘e Līhai mo hono kakaí ‘a e ‘aloʻofa mo e tokoni ʻa e ‘Otuá ‘i heʻenau tauhi ‘a e ngaahi fekaú. Naʻe fekumi ‘a Līhai mo Nīfai ki ha tataki mei he ‘Otuá pea maʻu ia ‘i he ngaahi folofolá, ngaahi misi, ngaahi meʻa-hā-mai, pea mo e Liahoná. Naʻe maʻu ‘e Nīfai peá ne lekooti ha meʻa-hā-mai ʻo e hisitōlia ‘o e māmaní ‘a ia naʻe fakahā ai kiate ia ‘a e mālohi ‘o e ‘Otuá ke ‘afioʻi ‘a e meʻa kotoa pē. Naʻe mamata a Nīfai ‘i ha meʻa-hā-mai ki he papitaisó, ngāue fakafaifekaú, mo hono kalusefai ‘o Sīsū Kalaisi ‘i he kahaʻú.
‘I hoʻo ako ki he ngaahi meʻa naʻe hoko kia Nīfai mo Līhai ‘i he tohi ko ‘ení, ‘e lava ke ke ako ai ‘a e founga ke kumi mo maʻu ai ‘a e ngaahi tāpuaki ‘o e langí ‘i hoʻo moʻuí
Ko Hai Naʻá Ne Tohi ‘a e Tohi Ko ‘Ení?
Naʻe tohi ‘e he foha ‘o Līhai ko Nīfaí ‘a e tohi ko ‘ení ‘i heʻene talangofua ki he fekau ‘a e Eikí ke ne tauhi ha lekooti ‘o hono kakaí. ‘Oku hangē naʻe fāʻeleʻi ‘a Nīfai ‘i Selusalema pe ‘i ha feituʻu ofi ki ai. Naʻá ne nofo ai lolotonga e ngāue ‘a e palōfita ko Selemaiá mo e pule ‘a e Tuʻi ko Setikiá.
Naʻe kumi ‘a Nīfai ke ne maʻu haʻane fakamoʻoni ki he ngaahi lea ‘a ‘ene tamaí ‘o kau ki hono fakaʻauha ‘o Selusalemá mo e fie maʻu ke ‘alu mei ai ‘a hono fāmilí. Naʻe hoko ‘a Nīfai ko ha meʻangāue ‘i he toʻukupu ‘o e ‘Otuá ‘i he hokohoko atu ʻene fekumi pea mo muimui ki he faleʻi ‘a e ‘Eikí. Naʻá ne talangofua ‘o foki tuʻo ua mo hono ngaahi tokouá ki Selusalema—ko e ‘uluakí ke ‘omi ‘a e ʻū lauʻi peleti palasá pea kimui angé ke fakalotoʻi ‘a e fāmili ‘o ‘Isimelí ke nau kau fakataha mo e fāmili ʻo Līhaí ʻi he feituʻu maomaonganoá. Naʻe foʻu ‘e Nīfai ha vaka ‘i he tokoni ‘a e ‘Eikí ‘a ia naʻá ʻave ai hono fāmilí mo ha niʻihi kehe ki he fonua ‘o e talaʻofá. ʻI he pekia ʻa Līhaí naʻe hoko ‘a Nīfai ko e taki ki hono kakaí.
Naʻe Tohi Ia ‘Anefē pea ‘i Fē?
Naʻe tohi ‘e Nīfai ‘a e fakamatala ko ia ‘oku hoko ko e 1 Nīfaí ‘i he 570 K.M. nai —ko e taʻu ia ‘e 30 hili ‘ene mavahe mo hono fāmilí mei Selusalemá (vakai, 2 Nīfai 5:28–31). Naʻá ne tohi ia ‘i heʻene ‘i he fonua ko Nīfaí.